Imbono YeBhayibhile
Yintoni Esenza Sibe Ngabantu Abalungileyo Okanye Abangendawo?
IINCWADI zembali zineengxelo zabantu abanentiyo nabakhohlakeleyo. Kodwa iintlekele ezehlayo zenza abantu babe nobubele baze babe nomoya wokuzincama. Yenzeka njani into yokuba umntu abe ngumbulali okhohlakeleyo ngoxa omnye enobubele? Yenzeka njani into yokuba abantu babe neempawu zezilwanyana?
Ukungafezeki Nokuba Nesazela
IBhayibhile ingqala isithi: “Umntu uneengcinga ezigwenxa kwaeselula.” (Genesis 8:21, IBhayibhile YesiXhosa Yowe-1996) Ngoko abantwana batyekele ekwenzeni ubudenge. (IMizekeliso 22:15) Sithi sizalwa sibe sityekele ekwenzeni ububi. (INdumiso 51:5) Kungumgudu ukwenza okulungileyo, kufana nokubheqa isikhitshane usenyuka kumsinga wamanzi.
Sekunjalo, senziwe sanesazela. Sazi okulungileyo nokubi yaye loo nto isibangela ukuba senze into egqalwa njengelungileyo. Yiloo nto kanye ebangela ukuba nabantu abangaqeqeshwanga baziwe ngokuba nesisa. (Roma 2:14, 15) Noko ke, ukutyekela kwethu ekwenzeni okubi kunokusibangela ukuba sidideke. Yintoni enye enokusiphembelela kule ngxaki sinayo yokwenza okulungileyo nokubi?
Imeko Embi Esingqongileyo
Ulovane lutshintsha umbala luze lufane nendawo elikuyo. Ngokufanayo, abantu abanxulumana nezaphuli-mthetho baba nemikhwa efana neyazo. IBhayibhile isilumkisa isithi: “Uze ungalandeli isihlwele esineenjongo ezimbi.” (Eksodus 23:2) Kwelinye icala, ukusoloko unxulumana nabantu abanyanisekileyo, abanokusesikweni nabaziphethe kakuhle kukubangela ukuba wenze izinto ezilungileyo.—IMizekeliso 13:20.
Kodwa ke, asinakuthi ayinakusichaphazela impembelelo embi kuba nje singanxulumani nabantu abenza izinto ezimbi. Ngenxa yokungafezeki, iingcinga zethu zisenokutyekela ebubini yaye xa ithuba livela, sisenokuzibona sisenza izinto ezimbi. (Genesis 4:7) Ngaphezu koko, ubungendawo busenokungena kwimizi yethu ngezinto esizonwabisa ngazo. Imidlalo yevidiyo, iinkqubo zikamabonwakude neemovie zisoloko zibonisa ugonyamelo nokuziphindezela. Kanti, ukusoloko ubukele okanye ufunda ngeendaba zasehlabathini okanye ezasekuhlaleni kunokukubangela ukuba ungavakalelwa xa ubona ububi bokubandezeleka kwabantu.
Yintoni ebangela obu bubi? IBhayibhile iphendula isithi: “Ihlabathi liphela lisemandleni ongendawo.” (1 Yohane 5:19) IZibhalo zibonisa ukuba lowo ‘ungendawo’ uSathana uMtyholi, ulixoki kwaye usisibulala-mntu. (Yohane 8:44) Usasaza ubungendawo ngempembelelo ekhoyo kweli hlabathi liphantsi kwakhe.
Ngenxa yokuba kukho ezi zinto ziphembelela isimo sengqondo nezinto esizenzayo, abanye abantu banokuthi abanakubekw’ ityala ngezinto ezimbi abazenzayo. Kodwa yiyiphi eyona nyaniso? Kanye njengokuba ivili lokuqhuba imoto lilawula icala eya ngakulo, iphini elincinane lilawula icala eya kulo inqanawa nengqondo ilawula umzimba.
Ukwenza Okulungileyo Okanye Okubi—Uyazikhethela
Intsusa-senzo yazo zonke izinto esizenzayo, ezimbi okanye ezilungileyo, ziingcinga zethu. Siya kuvuna iziqhamo ezilungileyo xa sihlwayela iingcinga ezilungileyo. Ngokwahlukileyo, xa sihlwayela ububi, siza kwenza izinto ezimbi. (Luka 6:43-45; Yakobi 1:14, 15) Ngoko sinokutsho ukuba umntu uba ngumntu olungileyo okanye ongendawo ngokwendlela akhetha ukwenza ngayo.
Kuyavuyisa ukwazi ukuba iBhayibhile ithi umntu ungafunda ukwenza ubulungisa. (Isaya 1:16, 17) Luthando olusibangela ukuba senze okulungileyo kuba “uthando alusebenzi bubi kummelwane kabani.” (Roma 13:10) Xa sikuhlakulela ukuthanda abantu, akunakwenzeka ukuba sibaphathe kakubi.
Yiloo nto kanye eyafundwa nguRay wasePennsylvania, eUnited States. Ngenxa yokuba wakufunda eselula ukulwa, wathiywa igama elibonisa ukuba wayesoloko eqhway’ udushe. Kwakhona wayenengxaki yokugqajukelwa ngumsindo. Kodwa ke, ngenxa yokuba wayephila ngemigaqo yeBhayibhile watshintsha. Kodwa kwakungasoloko kulula ukwenjenjalo. Maxa wambi wayevakalelwa njengombhali weBhayibhile uPawulos owathi: “Xa ndinqwenela ukwenza okulungileyo, kusuke kubekho okubi kum.” (Roma 7:21) Emva kweminyaka ezama, ngoku uRay uyakwazi ‘ukuboyisa ububi ngokulungileyo.’—Roma 12:21.
Kutheni kungelolize ukuzama ‘ukuhamba endleleni yabantu abalungileyo’? (IMizekeliso 2:20-22) Kungenxa yokuba kuza kuthi ekugqibeleni okulungileyo kukweyise okubi. IBhayibhile ithi: “Abenzi bobubi baya kunqunyulwa . . . Kusele ithutyana, angabikho ongendawo . . . Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.” (INdumiso 37:9-11) UThixo uya kubusiphula neengcambu ubungendawo. Lihle ngokwenene ikamva labo bazimiseleyo ukwenza okulungileyo!
NGABA WAKHA WAZIBUZA?
● Ngubani omele aphendule ngezinto esizenzayo?—Yakobi 1:14.
● Ngaba sinako ukuyitshintsha indlela esiphila ngayo?—Isaya 1:16, 17.
● Ngaba buya kuze buphele ubungendawo?—INdumiso 37:9, 10; IMizekeliso 2:20-22.
[Imifanekiso ekwiphepha 21]
Uyazikhethela ukuba ngumntu olungileyo okanye ongendawo