Zingayileka Njani Izinto Kungekho Myili?
PHANTSE sekudlule iminyaka eli-150 ukususela oko uCharles Darwin weza nento yokuzivelela kwayo yonke le ndalo intsonkothileyo neyahlukahlukeneyo. Noko ke, loo ngcamango yakhe nezinye iinguqulelo zayo zakutshanje ziye zahlaselwa ngamandla ngabo bakholelwa ukuba lonke ulungelelwano olumangalisayo lwezinto eziphilayo lubonisa ukuba zinomyili yaye uziyile ngenjongo. Kwaneqela lezazinzulu ezihlonelwayo alivumelani nengcamango yokuba iintlobontlobo zezinto ezidaliweyo esizibona emhlabeni zazivelela.
Ezinye kwezo zazinzulu zithi indalo iyilwe ngendlela ekrelekrele—zisithi into yokuba indalo iyiliwe ixhaswa ngokupheleleyo yibhayoloji, imathematika nengqiqo. Zizama ukuba ootitshala bayixubushe ngamandla le ngcamango kunye nabantwana besikolo. Olu kruthakruthwano ngendaleko lwenzeka ubukhulu becala eUnited States, kodwa zikho iimpikiswano ezinjalo ekuthiwa zenzeka eNetherlands, eNgilani, ePakistan, eSerbia naseTurkey.
Kungumnqa Ke Ukungakhankanywa Kwale Nto
Kukho into ebalulekileyo edla ngokushiywa xa kuthethwa ngoku kuyila ngendlela ekrelekrele. Loo nto kukungakhankanywa komyili. Ngaba ukholelwa ukuba ikho into enokuyileka kungekho myili? IThe New York Times Magazine yachaza ukuba, abo bathethelela oku kuyileka kukrelekrele “abathethi kwanto ngokuba ungubani okanye uyintoni umyili wezi zinto.” Umbhali uClaudia Wallis wachaza ukuba abo bakholelwa ukuba, izinto zayileka ngendlela ekrelekrele “bayaqinisekisa ukuba bambekela bucala uThixo xa bexubusha ngalo mba.” Iphephancwadi iNewsweek lathi: “Le nkqubo yokuyileka okukrelekrele ayithethi kwanto ngobukho okanye ubunjani bomyili.”
Kodwa nawe unokuyiqonda ukuba kulilize ukuzama ukuwubetha ngoyaba umbuzo ophathelele umyili. Iqalwa ngaphi into yokufuna ukuba abantu baginye baze baneliswe kukuxelelwa ngokuyileka kwendalo nobomi kube kungekho kwanto ithethwayo ngobukho nobunjani bomyili?
Ngenxa yoku, ingxubusho yokuba bumele bamkelwe okanye bukhatywe ubukho bomyili ivusa le mibuzo: Ngaba ukwamkela ubukho bomyili onamandla angaphaya kwawomntu kuyibuyisela emva inkqubela yenzululwazi? Ngaba simele samkele le ngcamango yobukho bomyili okrelekrele kuba nje ingekho enye indlela? Ngaba isengqiqweni yona into yokugqiba ekubeni into eyiliweyo imele ibe nomyili? Inqaku elilandelayo liza kuxubusha le mibuzo kunye neminye ephathelele oku.
[Imifanekiso ekwiphepha 3]
UCharles Darwin wayekholelwa ekubeni indalo entsonkothileyo yazivelela
[Inkcazelo]
Darwin: From a photograph by Mrs. J. M. Cameron/U.S. National Archives photo