Xa Uchukunyiswa Yinto Eyiliweyo Umele Ufune Ukwazi Umyili Wayo
KUSENOKWENZEKA ukuba ukhe weva ngomzobi nomkroli waseItali uMichelangelo. Ngoxa usenokuba awukaze ubone namnye kwimizobo yakhe yobugcisa yokuqala, ungavumelana nombhali-mbali owabiza le ngqondi yaseItali ngokuthi “ligcisa elingummangaliso nelingenantanga.” Akakho umntu onokubuphika ubuchule bukaMichelangelo. Ngubani ke umntu obenokuchukunyiswa yile misebenzi yobugcisa kaMichelangelo, kodwa yena ambekele bucala njengegcisa?
Ngoku ke khawucinge ngezinto ezintsonkothileyo nezahlukahlukeneyo eziphilayo ezizalise lo mhlaba sikuwo. Ngokufanelekileyo, iThe New York Times yacaphula omnye unjingalwazi wenzululwazi yebhayoloji esithi: “Ibhayoloji ibubonisa phandle ubungqina bokuyilwa kwezi zinto.” Waleka wathi: “Ubomi busishiya sibamb’ ongezantsi xa sibona indlela obuyilwe ngayo.” Ngaba kukunyaniseka ngokwenene ukuvuma ukumangalisa kwendlela into eyileke ngayo ngoxa ungavumi ukuba inomyili wayo?
Umpostile uPawulos, owayeneliso elibukhali kwizinto ezimngqongileyo wathetha ngabo ‘bahlonela baze banikele inkonzo engcwele kwindalo kunakuLowo wayidalayo.’ (Roma 1:25) Ngenxa yeengcamango ezigqugqisileyo zendaleko, bambi abayamkeli okanye abafuni kuyamkela into yokuba into eyiliweyo ibonisa phandle ukuba inomyili. Kodwa ngaba ingcamango yokuzivelela kwezinto yinzululwazi echanileyo? Phawula isigqibo awafikelela kuso kwiThe New York Times uChristoph Schönborn, ubhishophu omkhulu wamaKatolika eVienna: “Nayiphi na ingcamango ekuphikayo okanye ezama ukububetha ngoyaba ubungqina obucacileyo bokuyilwa kwezinto zebhayoloji, loo ngcamango yinkolelo engenasihlahla, kungekhona inzululwazi.”
Ngaba Kuthetha Isiphelo Senzululwazi?
Noko ke, kukho abo bavakalelwa kukuba ukwamkela obu bungqina bokubakho koMdali kuya “kulubuyisela emva uphando olukhoyo.” Inqaku lephephancwadi iNew Scientist lichaza loo maxhala lisithi, “ekubeni kwinzululwazi kufundwa intw’ engapheliyo, kufunwa izinto ezintsha, oko kuya kufikelela esiphelweni, kuze kuthiwe xa singafumaneki isicombululo, ‘hay’ le nto yenziwe ngumyili.’” Ngaba loo nkxalabo ifanelekile? Nakanye. Eyona nyaniso kukuba uphando luya kuhambela phambili. Kutheni kunjalo nje?
Ukusuka nje wamkele ingcamango yokuba indalo nobomi emhlabeni zabakho ngamabona-ndenzile nangendaleko bekuya kuthintela nayiphi na imizamo yokufumana inkcazelo evakalayo. Kwelinye icala, ukwamkela into yokuba kukho uMdali okrelekrele ongumyili wazo zonke ezi zinto sizibonayo kusenza sityhalele phambili ngokuphanda ngendalo nendlela asebenzise ngayo amandla akhe ekuzidaleni. Khawucinge ngoku: Ukwazi ukuba uLeonardo da Vinci wazoba “uMona Lisa” akukhange kubathintele ababhali-mbali bobugcisa ekuqhubekeni befunisisa ngobo bugcisa bakhe nezinto awazisebenzisayo ekuzobeni. Ngokufanayo, ukwamkela into yokuba kukho uMyili akumele kusithintele ekufunisiseni iingcombolo nokuntsonkotha kwendalo yakhe.
Kunokuba idodobalise uphando, iBhayibhile ikhuthaza ukuba siphande sifunisisa iimpendulo kwimibuzo yenzululwazi neyezinto zokomoya. UKumkani uDavide wamandulo wakha wacamngca ngendlela owenziwe ngokumangalisa ngayo umzimba wakhe. Ngenxa yoko wathi: “Ngendlela eyoyikekayo ndenziwe ngokumangalisayo. Imisebenzi yakho iyamangalisa, njengoko umphefumlo wam uqonda kakuhle.” (INdumiso 139:14) Enyanisweni, iBhayibhile ithi uMdali wakha wambuza oku usolusapho uYobhi: “Ngaba uziqwalasele ngengqiqo iindawo ezibanzi zomhlaba?” (Yobhi 38:18) Nakanjani na oko akunakudodobalisa nayiphi na imibuzo okanye uphando. Eneneni, apha uMyili Obalaseleyo ufuna ukuba siphicothe imisebenzi yezandla zakhe. Nasi esinye isimemo esabhalwa ngumprofeti uIsaya esifuna ukuba songeze ukuqonda kwethu ngaLowo wenza indalo esingqongileyo: “Phakamiselani amehlo enu phezulu nize nibone. Ngubani na odale ezi zinto?” Enyanisweni, eyona nto ithethwa kuIsaya 40:26 sisibakala sokuba indalo yaveliswa ngokusebenza kwamandla amakhulu, ibe oko kuvisisana noko kuye kwafunyaniswa yinzululwazi.
Kuyavunywa ukuba iimpendulo ngokuphathelele ukudala azisoloko zifumaneka lula. Kwelinye icala, oku kubangelwa kukuba amandla ethu okuqonda alinganiselwe ibe asilazi kakuhle nehlabathi esiphila kulo. UYobhi wayekuqonda kakuhle oku. Wadumisa uMdali, owabangela ukuba ingqukuva yomhlaba esikuwo ikwazi ukuhlala phezu kwento engenakubonwa ngamehlo waza waxhoma phezu kwawo amafu azaliswe ngamanzi. (Yobhi 26:7-9) Ewe, uYobhi waqonda ukuba ezo zinto zimangalisa kangako ‘ziyimiphetho yeendlela zoMdali.’ (Yobhi 26:14) Akuthandabuzeki ukuba uYobhi wayefuna ukufunda ngakumbi ngehlabathi elimngqongileyo. NoDavide wakuvuma ukusikelwa umda kwakhe wathi: “Ulwazi olunjalo lundimangalisa gqitha. Luphakame kangangokuba andinakulufikelela.”—INdumiso 139:6.
Ukwamkela into yobukho boMdali ayidodobalisi inkqubela yenzululwazi. Ukufuna ulwazi olungakumbi ngezinto zendalo nezokomoya akunakuze kuphele. Ukumkani wamandulo owayesaziwa ngolwazi lwakhe oluphangaleleyo ngokuzithoba wathi: “Kwanexesha elingenammiselo ulibeke ezintliziyweni zabo, ukuze uluntu lungaze luwufumane umsebenzi uThixo oyinyaniso awenzileyo ukususela ekuqaleni kuse ekupheleni.”—INtshumayeli 3:11.
“Ngaba UnguThixo Wokuvala Izikhewu”?
Abanye baphikisa ngelithi into kaThixo ayinabungqina, ifakwa nje “njengesicombululo” apho kungekho ngcaciso inobungqina benzululwazi. Ngamanye amazwi, ibango lokuba kukho uMyili onguThixo lifakwa nje “ukuvala izikhewu” xa abantu bengenampendulo. Ziziphi ezi zikhewu kuthethwa ngazo apha? Ngaba zizikhewana nje ezingabalulekanga kulwazi lwethu? Nakanye, enyanisweni zizikhewu ezikhulu eziyintsinda-badala kwingcamango kaDarwin yendaleko. Ubukhulu becala zibonakala kwibhayoloji kangangokuba le ngcamango yendaleko ibisoloko isiwa phantsi ukuzichaza. Eyona nyaniso kukuba, ikwangaba baxhasi bendaleko babambelele kwezi ngcamango zikaDarwin zingenasihlahla abazenza zibe “nguThixo wokuvala izikhewu” kubo.
UMdali ethetha ngaye iBhayibhile asinguye “uThixo wokuvala izikhewu.” Kunokuba abe njalo, imisebenzi yakhe igubungela zonke iinkalo, neenkcukacha zokudala. Umdumisi wawubethelela kakuhle wonke umsebenzi wokudala kaYehova xa wathi: “Ungumthombo wabo bonke ubomi; ibe ngenxa yokukhanya okuvela kuwe siyakwazi ukubona ukukhanya.” (INdumiso 36:9, iToday’s English Version) Uchazwa kakuhle njengaLowo “walenzayo izulu nomhlaba nolwandle nazo zonke izinto ezikuzo.” (IZenzo 4:24; 14:15; 17:24) Ngesizathu esivakalayo, umfundisi wenkulungwane yokuqala wathi uThixo “wadala zonke izinto.”—Efese 3:9.
Ukongezelela koku, uThixo waseka “imimiselo yamazulu,” imithetho yendalo elawula izinto zendalo nokusebenza kwazo, mimiselo leyo zisafunda ngayo nangoku izazinzulu. (Yobhi 38:33) Izinto eziyilwe nguye ziphelele yaye ziyilwe ngenjongo, zifeza oko akufunayo ukuze umhlaba ube nezinto ezahlukahlukeneyo eziphilayo.
Ukuyila Nokuba Sengqiqweni Kwako
Into yokugqibela kukuba, kufuneka siqwalasele lo mba wokuba sengqiqweni. Ephefumla nje ngokubanzi ngobunyaniso beengcamango ezahlukeneyo zenzululwazi, umbhali wezenzululwazi uJohn Horgan wathi: “Xa singaqinisekanga ngento ethile, simele singabi nazintloni ukusebenzisa ingqiqo ukuze isincede.”
Ngaba isengqiqweni into yokuba ubomi bazivelela nje ngebhaqo okanye ngenxa yendaleko? Phezu kwako nje ukuthandwa kwengcamango yendaleko, abantu abaninzi abakrelekrele, kuquka izazinzulu beyisekile ukuba kukho uMdali okrelekrele. Omnye unjingalwazi wenzululwazi uthi “ngendlela emangalisayo nesengqiqweni, [abantu abaqhelekileyo] bavakalelwa kukuba ubomi bayilwa.” Kutheni becinga njalo nje? Kungenxa yokuba inkoliso yabantu iyavumelana namazwi ompostile uPawulos athi: “Ndlu nganye inomakhi wayo.” (Hebhere 3:4) Emva koko uPawulos ufikelela kwisigqibo esisengqiqweni sokuba: “Lowo wazakhayo zonke izinto nguThixo.” Ngokwembono yeBhayibhile, ayikho ngqiqweni into yokuvuma ukuba indlu imele ibe nomyili nomakhi wayo ube usithi kwelinye icala iseli entsonkothileyo yasuka yazivelela nje ngamabona-ndenzile.
IBhayibhile ithi ngabo babuphikayo ubukho boMyili noMdali: “Lowo ungenangqiqo uthe entliziyweni yakhe: ‘Akakho uYehova.’” (INdumiso 14:1) Apha umdumisi ululeka abo kusafuneka beyiseke. Kusenokwenzeka ukuba umntu ulawulwa ziimbono zakhe kunokuba alawulwe zizibakala ezihluzekileyo. Kwelinye icala, umntu osisilumko, oqondayo nothobekileyo uyabamkela ubukho boMdali.—Isaya 45:18.
Kubantu abaninzi abacingayo, kukho ubungqina obuluqilima obubonisa ukuba kukho uMyili Obalaseleyo.
Unako Ukumazi Lo Myili
Ukuba sicinga ukuba sayilwa, makube yintoni ke esayilelwa yona? Iyintoni injongo yobomi? Kwinzululwazi iyodwa asikwazi kufumana iimpendulo ezanelisayo zale mibuzo. Noko ke, imibuzo enjengale ifuna iimpendulo ezeyisayo nezanelisayo. IBhayibhile inokusinceda gqitha kule nkalo. Ayipheleli nje ekuchazeni uYehova njengoMdali, kodwa iyatsho nokuba uneenjongo, nezizathu ezivakalayo ngoko akwenzayo. IZibhalo zibonisa ukuba injongo kaThixo ngabantu isinceda sibe nekamva nethemba.
Kodwa ke, ngubani uYehova? UnguThixo onjani? AmaNgqina kaYehova ayakucela ukuba uzame ukumazi uMyili wethu Obalaseleyo njengomntu wokwenene. Unako ukufunda ngegama lakhe, iimpawu zakhe nendlela abaphatha ngayo abantu. Ngokufunda iLizwi lakhe iBhayibhile, uya kutsho usibone isizathu sokuba kungafuneki sichukunyiswe zizinto aziyile ngokusemagqabini nje kuphela kodwa sikwamele simzukise njengoMyili.—INdumiso 86:12; ISityhilelo 4:11.
[Umfanekiso okwiphepha 4]
UMichelangelo
[Imifanekiso ekwiphepha 5]
Ukukholelwa kubukho boMyili kuyavisisana nenzululwazi yokwenene
[Umfanekiso okwiphepha 6]
Ubukho bezinto ezahlukeneyo nezikwaziyo ukuphila bubungqina bokuyilwa kwazo
[Imifanekiso ekwiphepha 7]
Izinto eziyiliweyo zimele zibe nomyili