Imibuzo Evela Kubafundi

Wayetheth’ ukuthini uYesu ngokuthi ikhoboka lakhe elithembekileyo laliya kuba ‘yingqondi’?

UYesu wababuza lo mbuzo: “Ngubani ngokwenene olikhoboka elithembekileyo neliyingqondi ethe inkosi yalo yalimisela phezu kwempahla yendlu yayo, ukuze liyinike ukutya kwayo ngexesha elifanelekileyo?” (Mateyu 24:45) ‘Likhoboka’ elilungiselela “ukutya” kokomoya libandla lamaKristu athanjiswe ngomoya. Kwakutheni ukuze uYesu athi liyingqondi?a

Ukuba sihlolisisa iimfundiso zikaYesu, siya kusiqonda kakuhle isizathu sokusebenzisa kwakhe igama elithi ‘ingqondi.’ Ngokomzekelo, xa wayethetha ‘ngekhoboka elithembekileyo neliyingqondi,’ uYesu wenza umzekeliso weentombi ezinyulu ezilishumi ezazilindele ukufika komyeni. Ezi ntombi zinyulu zisikhumbuza ngokulinda kwamaKristu athanjisiweyo ngaphambi kowe-1914, elindele ukufika koMyeni omkhulu uYesu Kristu. Ezintlanu zezo ntombi zinyulu zazingenaoli yaneleyo ekufikeni komyeni, zaza zaphoswa ngumtshato. Ezinye ezintlanu zaziziingqondi. Zagcina ioli eyaneleyo ukuze ziqhubeke zikhanyisa izibane zazo ekufikeni komyeni, yaye zavunyelwa ukuba zibekho emtshatweni.—Mateyu 25:10-12.

Ekufumaneni kukaYesu igunya loBukumkani ngowe-1914, amaKristu athanjisiweyo amaninzi ayenethemba lokumanyana naye ngelo xesha ezulwini. Noko ke, kwakusekho umsebenzi omkhulu emhlabeni, yaye amanye awo ayengawulungelanga loo msebenzi. Njengeentombi ezinyulu ezingezizo iingqondi, awazange azomeleze kwangaphambili ngokomoya, ngoko ayengakulungelanga ukuqhubeka engabathwali bokukhanya. Kodwa ke, amaninzi kuwo ayeziingqondi—asebenzisa ubulumko—azomeleza ngokomoya. Athi akufumanisa ukuba kusekho umsebenzi omninzi ngaphambili, azimisela ngovuyo ukuwugqiba. Ngaloo ndlela, azingqina ‘elikhoboka elithembekileyo neliyingqondi.’

Kwakhona hlolisisa indlela uYesu awalisebenzisa ngayo igama elithi ‘ingqondi’ kuMateyu 7:24. Wathi: “Wonk’ ubani owevayo la mazwi am aze awenze uya kufaniswa nendoda eyingqondi, eyakha indlu yayo phezu kolwalwa.” Indoda eyingqondi yakha indlu eyomeleleyo, enokumelana nesaqhwithi. Kodwa yona indoda esisiyatha yakha entlabathini ize iphulukane nendlu yayo. Ngoko umlandeli oyingqondi kaYesu ngulowo uyibona kwangaphambili imiphumo emibi yokulandela ubulumko babantu. Ukusebenzisa kwakhe ingqiqo kumenza asekele ukholo, izenzo neemfundiso zakhe koko kwafundiswa nguYesu. ‘Ikhoboka elithembekileyo neliyingqondi’ lenza kanye oko.

Kwakhona, phawula indlela elisetyenziswa ngayo igama elithi ‘ingqondi’ kwiZibhalo ZesiHebhere. Ngokomzekelo, uFaro wamisela uYosefu ukuba anyamekele ukutya kwaseYiputa. Oku kwakuyinxalenye yelungiselelo likaYehova lokuba kondliwe abantu bakhe. Kutheni kwakhethwa uYosefu? UFaro wathi kuye: “Akukho bani uyingqondi nosisilumko njengawe.” (Genesis 41:33-39; 45:5) Kwakhona iBhayibhile ithi uAbhigali “wayeqiqa.” Wanika umthanjiswa kaYehova, uDavide kunye namadoda akhe, ukutya. (1 Samuweli 25:3, 11, 18) Into eyenza ukuba uYosefu noAbhigali babizwe ngokuba ziingqondi kukuba babekuqonda ukuthanda kukaThixo yaye basebenzisa ubulumko.

Ngoko xa uYesu wachaza ikhoboka elithembekileyo njegeliyingqondi, wayebonisa ukuba laliya kusebenzisa ingqiqo nobulumko njengoko lisekela ukholo, izenzo neemfundiso zalo eLizwini likaThixo lenyaniso.

[Umbhalo osemazantsi]