Ngaba Umele Uphilele Unamhlanje Kuphela?
“IKAMVA asinto ndikhe ndizikhathaze ngayo. Kaloku ikamva yinto apha efika ngokuqhwanyaza kweso.” Loo mazwi, nasoloko ecatshulwa kuthiwa athethwa sisazinzulu esaziwayo uAlbert Einstein. Baninzi abantu abavakalelwa ngolo hlobo. Basenokuthi, “Kutheni umele uzikhathaze ngekamva?” Mhlawumbi ukhe weva abanye besithi: “Qhubeka nobomi.” “Cinga ngonamhlanje.” “Libala ngengomso.”
Kakade ke, le ngcamango asinto intsha. AmaEpikure amandulo ayenentetho ethi: “Yitya, usele uze wonwabe. Ezinye izinto azibalulekanga.” Kuyabonakala ukuba le ngcamango yayisekho phakathi kwalawo ayephila ngomhla kampostile uPawulos, kuba ayesithi: “Masidle size sisele, kuba ngomso siza kufa.” (1 Korinte 15:32) Ayekholelwa ukuba obu bomi bufutshane sibuphilayo kuphela kwabo, ngoko ekhuthaza ukuba busetyenziswe ngokupheleleyo.
Kwizigidi zabantu eziphilayo, ukusebenzisa obu bomi ngokupheleleyo akuthethi kuthi baphilela iziyolo. Iimeko ezimaxongo abaphila phantsi kwazo zenza ubomi banamhlanje bube yintlungu, ekunzima ukuphila kuyo. Xa kunjalo, ingenzeka njani into yokuba bacinge ngekamva, “ingomso” abasoloko belibona limfiliba kungekho themba kulo?
Ngaba Simele Silicebele Ingomso?
Nabantu abangatsali nzima basoloko bengayiboni imfuneko yokucebela ingomso. Basenokuthi, “Kutheni simele sizikhathaze ngengomso?” Bambi basenokuthi, xa ucebel’ ingomso ugqibela ngokuphoxeka. Nosolusapho wamandulo uYobhi waphoxeka xa ebona amacebo akhe ‘echithakala,’ kusonakala oko kwakumele kumzisele ikamva elimyoli nentsapho yakhe.—Yobhi 17:11, IBhayibhile yesiXhosa yowe-1996; INtshumayeli 9:11.
Imbongi yaseSkotlani uRobert Burns ifanisa obu bugxwayiba sikubo nobukanomgcana, impuku yasemasimini awathi lo kaBurns elima wachitha indlu yayo ngekhuba engenanjongo zokwenjenjalo. Emva kokonakala kwaloo ndlu yayo, le mpuku yabaleka izisindisa. Le mbongi ithi: ‘Eneneni, kukangaphi sisehlelwa zizinto kube kungekho nto sinokuyenza, nkqu nawona macebo ethu mahle esifa namthanyana?’
Ngaba ayikho ngqiqweni into yokucebela ikamva? Inyaniso kukuba, ukungacebi kakuhle kunokuba nemiphumo emibi gqitha xa kufika iinkanyamba okanye ezinye iintlekele zemvelo. Ngokomzekelo, yinyaniso ukuba akakho umntu owayenokuyithintela iNkanyamba uKatrina. Kodwa ngaba wawungayi kuncitshiswa umonakalo kweso sixeko nasebantwini ukuba yayibonwe yaza yacetyelwa kusengaphambili?
Ucinga ntoni wena? Ngaba kusengqiqweni ngokwenene ukuphilela unamhlanje kuphela silibale ngengomso? Yiva oko kuthethwa linqaku elilandelayo ngalo mbandela.
[Imifanekiso ekwiphepha 3]
“Yitya, usele uze wonwabe. Ezinye izinto uza kubuya uzibone”
[Umfanekiso okwiphepha 4]
Ngaba wawungayi kuncitshiswa umonakalo ukuba iNkanyamba uKatrina yayibonwe yaza yacetyelwa kusengaphambili?
[Inkcazelo]
U.S. Coast Guard Digital