Lisiphathele Ntoni Ikamva?
KUTHENI KUBALULEKILE UKUFUMANA IMPENDULO YALO MBUZO? Indlela umntu alijonga ngayo ikamva ichaphazela indlela aphila ngayo namhlanje. Ngokomzekelo, abo bangenathemba ngekamva banokuqiqa ngale ndlela: “Masidle size sisele, kuba ngomso siza kufa.” (1 Korinte 15:32) Ukuba nesimo sengqondo esinjalo kudla ngokukhokelela ekudleni ngokugqithiseleyo, ekuseleni kakhulu nakunxunguphalo—kungekhona ekubeni noxolo lwengqondo.
Liyinyaniso elokuba, ukuba ikamva belixhomekeke ebantwini beliya kuba mfiliba. Umoya, amanzi nomhlaba ungcoliswa ngendlela egqithiseleyo. Ziyanda izisongelo zemfazwe yenyukliya neentlaselo zabanqolobi. Izigidi ngezigidi zabantu emhlabeni wonke zithwaxwa zizifo nobuhlwempu. Sekunjalo, sikho isizathu sokuba nethemba.
Ngoxa abantu bengakwazi ukuchaza oko kuya kwenzeka kwikamva, uYehova uThixo uthi ‘unguLowo uxela ukuphela kwasekuqaleni, kwakudala izinto ebezingekenziwa.’ (Isaya 46:10) Uthini uYehova ngekamva?
Oko Kuthethwa YiBhayibhile
UYehova akayi kuvumela ukuba umhlaba okanye abantu abaphila kuwo batshatyalaliswe ngonaphakade. Eneneni, iBhayibhile ithembisa ukuba uThixo uya ‘konakalisa abo bawonakalisayo umhlaba.’ (ISityhilelo 11:18) Esebenzisa uBukumkani bakhe, okanye urhulumente wasezulwini, uYehova uya kuphelisa ubungendawo emhlabeni aze azalisekise injongo yakhe yantlandlolo. (Genesis 1:26-31; 2:8, 9; Mateyu 6:9, 10) Ezi ndinyana zeBhayibhile zilandelayo, zisibonisa oko kuya kwenzeka kwikamva, zichaza iziganeko eziya kuchaphazela wonke umntu osemhlabeni.
INdumiso 46:8, 9. “Yizani, nibone imisebenzi kaYehova, indlela amise iziganeko ezikhwankqisayo ngayo emhlabeni. Uphelisa iimfazwe kuse esiphelweni somhlaba. Waphula isaphetha nomkhonto; iinqwelo uzitshisa emlilweni.”
Isaya 35:5, 6. “Ngelo xesha aya kuvulwa amehlo eemfama, zivulwe neendlebe zezithulu. Isiqhwala siya kutsiba njengexhama, nolwimi lwesimumu luya kumemelela ngochulumanco. Kuba kuya kumpompoza amanzi entlango, nemisinga kwithafa eliyinkqantosi.”
Isaya 65:21, 22. “Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kwakha kuhlale abanye; abayi kutyala kudle abanye.”
Daniyeli 2:44. “UThixo wezulu uya kumisa ubukumkani obungenakuze bonakaliswe. Yaye obo bukumkani abuyi kudluliselwa kubo nabaphi na abanye abantu. Buya kuzityumza buziphelise zonke ezi zikumkani, buze bona bume ukusa kwixesha elingenammiselo.”
Yohane 5:28, 29. “Liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe [uYesu] baze baphume.”
ISityhilelo 21:3, 4. “Naye abe nguThixo walo. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”
Impendulo YeBhayibhile Izisa Uxolo Lwengqondo
Kusenokuba nzima ukukukholelwa oku kuchazwe ngasentla. Kodwa nguThixo owenza ezi zithembiso, kungekhona abantu. Yaye uYehova uThixo ‘akanakuxoka.’—Tito 1:2.
Ukuba unokholo kwizithembiso zikaThixo, uze uphile ngokuvisisana nemithetho yakhe, uya kuhlala unoxolo lwengqondo naphantsi kwezona meko zinzima. Imfazwe, ubuhlwempu, ukugula kwaneengxaki zokwaluphala nokufa—ayikho nanye kwezi eya kukwenza uphulukane noxolo ngokupheleleyo. Ngoba? Kuba unethemba eliqinisekileyo lokuba uBukumkani bukaThixo buya kuziphelisa ezi zinto.
Unokuba nalo njani ithemba elinjalo ngekamva? Umele ‘utshintshe ingqondo yakho’ uze ukungqine “ukulunga nokwamkeleka nokugqibelela kokuthanda kukaThixo.” (Roma 12:2) Kusenokwenzeka ukuba ufuna ubungqina obungakumbi bokuba izithembiso zeBhayibhile zinokuthenjwa. Ukufuna ulwazi olunjalo akuyonkcitha-xesha. Zimbalwa ebomini izinto ezinokukwenza ube noxolo lwengqondo.
[Imifanekiso ekwiphepha 8, 9]
Lithini iLizwi likaThixo ngekamva?