“Yeyam Isilivere, Negolide Yeyam”

NGENKULUNGWANE yesithandathu Ngaphambi KweXesha Lethu, uKumkani wamaPersi uKoreshi wakhulula abantu bakaThixo ababethinjwe eBhabhiloni. Amawaka abo abuyela eYerusalem ukuze aphinde akhe itempile kaYehova eyayingamabhodlo. Imeko yezoqoqosho kwaba bathinjwa yayimaxongo yaye abamelwane babo babewuchasile umsebenzi wokwakha. Ngenxa yoko, abanye abakhi babezibuza enoba umsebenzi wokwakha uya kuze ugqitywe kusini na.

UYehova wasebenzisa umprofeti wakhe uHagayi, ukuze aqinisekise abakhi ukuba uza kubalondoloza. Wathi: “Yaye ndiya kuzinyikimisa zonke iintlanga, zize izinto ezinqwenelekayo zazo zonke iintlanga zingene; yaye ndiya kuyizalisa ngozuko le ndlu.” Ethetha ngenkxalabo yabakhi malunga nemali yokwakha, uHagayi wavakalisa esi sigidimi: “Yeyam isilivere, negolide yeyam,’ utsho uYehova wemikhosi.” (Hagayi 2:7-9) Kwiminyaka nje emihlanu emva kokuba uHagayi ethethe lo mazwi akhuthazayo, isakhiwo sagqitywa.—Ezra 6:13-15.

Amazwi kaHagayi abe lukhuthazo kubakhonzi bakaThixo kwiminyaka yamvanje xa besenza imisebenzi ephathelele unqulo lwawo kuYehova. Ngowe-1879, xa ikhoboka elithembekileyo neliyingqondi laqalisa ukupapasha eli phephancwadi, elalibizwa ngoko ngokuba yiZion’s Watch Tower and Herald of Christ’s Presence, labhala la mazwi: “Sikholelwa kwelokuba ‘iZion’s Watch Tower’ ixhaswa nguYEHOVA, yaye ukuba uqhubeka eyixhasa ayisayi kungqiba ingasayi kwenza nkongozelo ebantwini ukuba bayixhase. Ukuba Lowo uthi: ‘Yeyam isilivere negolide yeyam,’ uyasilela ukusinika inkxaso yemali, siya kuqonda ukuba elo lixesha lokuba siyeke ukuyipapasha.”

Elo xesha alikafiki. Inkupho yokuqala yashicilelwa ngemibhalo engama-6 000, ngesiNgesi kuphela. Namhlanje, umlinganiselo wenkupho nganye umalunga nezi-28 578 000, ngeelwimi ezili-161.a UVukani!, iqabane lephephancwadi IMboniselo, kushicilelwa imibhalo emalunga nezi-34 267 000, ngeelwimi ezingama-81.

Mininzi imisebenzi eyenziwa ngamaNgqina kaYehova enenjongo efana neyeMboniselo—oko kukuthi ukuphakamisa uYehova njengeNkosi enguMongami wendalo nokuvakalisa iindaba ezilungileyo zoBukumkani bakhe. (Mateyu 24:14; ISityhilelo 4:11) Ulweyiseko lwamaNgqina namhlanje lusafana nqwa nolo lwavakaliswa kweli phephancwadi ngowe-1879. Ayekholelwa ukuba uThixo uyawuxhasa umsebenzi wawo yaye inkxaso yemali yokwenza loo msebenzi iya kufumaneka xa kusenziwa umsebenzi awusikelelayo. Noko ke, ziziphi iindlela ezibonakalayo amaNgqina kaYehova axhaswa ngayo kumsebenzi wawo? Yaye yiyiphi le misebenzi axakeke yiyo ukuze avakalise iindaba ezilungileyo emhlabeni jikelele?

Uxhaswa Njani Lo Msebenzi?

Njengokuba beshumayela esidlangalaleni, kuqhelekile ngamaNgqina kaYehova ukubuzwa ukuba: “Ngaba niyahlawulwa ngokwenza lo msebenzi?” Impendulo, nguhayi, akafumani nepen ‘emdaka. Anikela ngexesha lawo ngokuzithandela. Aba bashumayeli bachitha iiyure ezininzi bethetha ngoYehova nezithembiso zeBhayibhile zekamva elibhetele ukuze bakhuthaze wonk’ umntu. Bakuxabisa kakhulu oko uThixo abenzele kona nomlinganiselo iindaba ezilungileyo ezibuphucule ngayo ubomi babo nendlela abazijonga ngayo izinto. Ngenxa yoko, bafuna ukwabelana nabanye ngezi zinto zilungileyo. Ngokwenza oko, bathobela umgaqo owachazwa nguYesu othi: “Namkele ngesisa, yiphani ngesisa.” (Mateyu 10:8) Eneneni, umnqweno wamaNgqina kaYehova wokungqinela uYehova noYesu, uwashukumisela ukuba asebenzise imali yawo ukuze abelane nabanye ngeenkolelo zawo, nkqu nabo bahlala kude kuwo.—Isaya 43:10; IZenzo 1:8.

Umkhamo womsebenzi wokushumayela neendlela ezisetyenziswayo zokuwuphumeza—izakhiwo zokushicilela, iiofisi, iiHolo zeNdibano, amakhaya abavangeli basemazweni, njalo njalo—zizindleko ezinkulu. Ivelaphi imali engaka? Ivela kwiminikelo yokuzithandela. AmaNgqina kaYehova akawatyhali ngasemva amalungu amabandla ukuba anikele ngemali ukuze kuxhaswe imisebenzi yentlangano, yaye akabizi nemali eqingqiweyo kuncwadi lwawo. AmaNgqina abamba ngazibini kuye nabanina onqwenela ukunikela ukuze kuxhaswe umsebenzi wokufundisa. Makhe sihlolisise nje inkalo ibenye kwimigudu eyenziwayo yokushumayela iindaba ezilungileyo ehlabathini jikelele—ukuguqulela.

Uncwadi Ngeelwimi Ezingama-437

Kangangeminyaka emininzi iincwadi zamaNgqina kaYehova zezona beziguqulelwa kakhulu ehlabathini lonke. Amaphecana, iincwadana ezinemifanekiso, amaphephancwadi neencwadi ziye zaguqulelwa ngeelwimi ezingama-437. Liyinyaniso elokuba ukuguqulela, njengawo nawuphi na umsebenzi wokushumayela, ubiza intywenka yemali. Kodwa yintoni ebandakanyekileyo kumsebenzi wokuguqulela?

Xa abahleli boncwadi lwamaNgqina kaYehova begqiba ukubhala inqaku ngesiNgesi, elo nqaku lithunyelwa nge-elektroniki kumaqela aqeqeshiweyo abaguquleli mbombo zone zomhlaba. Qela ngalinye linembopheleleko yokuguqulela uncwadi kulwimi lwalo. Kuxhomekeka kumsebenzi abanawo nokuntsonkotha kolwimi abaguqulela kulo, la maqela anokuba namalungu amahlanu ukusa kwangama-25.

Inqaku eliguqulelweyo liyahlolwa lize lifundwe. Usukelo oluphambili kukuba kudluliselwe ingcamango esuka kulwimi elibhalwe ngalo ngokuchanileyo nangokucacileyo kangangoko kunokwenzeka. Lo msebenzi uba namahlandinyuka. Xa kuguqulelwa inqaku elisebenzisa amagama athile akhethekileyo, abaguquleli nabahloli kusenokufuneka benze uphando kulwimi elibhalwe ngalo elo nqaku nolwimi abaguqulela kulo ukuqiniseka ukuba bachanile (ludla ngokuba sisiNgesi, kodwa ezinye iilwimi ziguqulela ngokusuka kwisiFrentshi, isiRashiya okanye iSpanish). Ngokomzekelo, xa kuguqulelwa inqaku likaVukani! elithetha ngezinto ze-elektroniki okanye imibandela engembali, kwenziwa uphando olucokisekileyo.

Abaguquleli abaninzi basebenza kwiiofisi zamasebe zamaNgqina kaYehova ixesha elizeleyo okanye ngamaxesha athile. Abanye baguqulela behlala kwindawo ethetha olo lwimi. Abaguquleli abahlawulwa ngomsebenzi abawenzayo. Abaguquleli bexesha elizeleyo banikwa igumbi lokuhlala, ukutya nomxhesho omncinane wezinto ezisisiseko. Ehlabathini lonke kukho abaguquleli abangamaNgqina abangama-2 800. Okwangoku, ziiofisi zesebe zamaNgqina kaYehova ezingama-98 ezihlala aba baguquleli okanye ezivelela amaqela abaguquleli kwezinye iindawo. Ngokomzekelo, isebe laseRashiya livelela abaguquleli bexesha elizeleyo nabaguquleli abasebenza ngamathuba athile abangama-230, abaguqulela iilwimi ezingama-30, eziquka iilwimi ezingaqhelekanga ezifana nesiChuvash, isiOssetian, nesiUighur.

Ukuphucula Umgangatho Wokuguqulela

Nabani na okhe wafunda ulwimi olutsha, uyazi ukuba ukuguqulela iingcamango ezichanileyo asintw’ ilula. Usukelo oluphambili kukuba kudluliselwe inkcazelo neengcamango zombhali kwangaxeshanye kuguqulelwa ngendlela efundeka lula, ngokungathi ibhalwe ngolwimi ekuguqulelwe ngalo. Oku kufuna ubuchule. Kubathabatha iminyaka abaguquleli abasakhasayo, ukuba babe ziincutshe zabaguquleli, yaye amaNgqina kaYehova alungiselele inkqubo yokubafundisa. Kukho abayaleli abatyelela amaqela abaguquleli ukuze baphucule isakhono sabo sokuguqulela besebenzisa iinkqubo zekhompyutha.

Le nkqubo ingqineke iphumelela. Ngokomzekelo, isebe laseNicaragua lamaNgqina kaYehova linikela le ngxelo: “Okwesihlandlo sokuqala, abaguquleli bethu besiMiskito bafumene uqeqesho kubugcisa nemigaqo yokuguqulela kumyaleli ovela kwisebe laseMexico. Oku kuye kwenza umahluko omkhulu kwindlela abaguquleli abawenza ngayo umsebenzi wabo. Umgangatho wokuguqulela uye waphucuka ngendlela encomekayo.”

Amazwi Achukumisayo

Imigudu yokushicilela iiBhayibhile noncwadi olusekelwe eBhayibhileni kulwimi lwabo lweenkobe yenzelwe ukuba ichukumise iintliziyo zabantu, yaye yiloo nto kanye eyenzekayo. Ngowama-2006, amaNgqina kaYehova eBulgaria aba nemincili xa kwakhululwa INguqulelo Yehlabathi Elitsha YeZibhalo ZamaKristu ZesiGrike ngesiBulgaria. Isebe lelo lizwe lamkele imibulelo yabantu ngalo msebenzi. Amalungu amabandla athi, ngoku “iBhayibhile ichukumisa iintliziyo zabo kungekhona iingqondo zawo kuphela.” Enye inkonde yaseSofia yathi: “Ndineminyaka emininzi ndiyifunda iBhayibhile, kodwa andizange ndiyifunde inguqulelo enje ukuqondakala nekulula ukuba ichukumise intliziyo yam.” Ngokufanayo, eAlbania, emva kokuba efumene umbhalo weNguqulelo Yehlabathi Elitsha ngesiAlbania, elinye iNgqina lalapho lathi: “Limnandi iLizwi likaThixo ngesiAlbania! Kulilungelo ukuba uYehova athethe nathi ngolwimi lwethu!”

Ukuguqulela iBhayibhile kunokulithabatha iminyaka iqela labaguquleli ngaphambi kokuba liyigqibe. Kodwa umphumo kukuba izigidi zabantu zikuqonda kakuhle oko iLizwi likaThixo likutshoyo okwesihlandlo sokuqala, ngaba akucingi ukuba eso sisizathu esivakalayo sokwenza lo msebenzi?

“Singabasebenzi Abangamadlelane NoThixo”

Ewe, ukuguqulela ngomnye wemisebenzi emininzi ebalulekileyo ukuze kushunyayelwe iindaba ezilungileyo ngokucokisekileyo. Ukubhala, ukushicilela nokuthumela iincwadi ezisekelwe eBhayibhileni neminye imisebenzi yesebe, yeziphaluka namabandla amaNgqina kaYehova, kufuna inkxaso yemali. Nakuba kunjalo, abantu bakaThixo “bazinikela ngokuvumayo” ukuze benze lo msebenzi. (INdumiso 110:3) Bayakuvuyela ukufak’ isandla kulo msebenzi yaye uYehova ubajonga “njengabasebenzi abangamadlelane” kunye naye.—1 Korinte 3:5-9.

Liyinyaniso elokuba lowo uthi “yeyam isilivere negolide yeyam” akaxhomekekanga kwiisenti zethu ukuze aphumeze lo msebenzi. Nakuba kunjalo, uYehova ujizeka abakhonzi bakhe ngelungelo lokuba nenxaxheba ekungcwaliseni igama lakhe ngokwenza okuthile ukuze kushunyayelwe inyaniso esindisa ubomi “kuzo zonke iintlanga.” (Mateyu 24:14; 28:19, 20) Ngaba konke oku akukushukumiseli ukuba wenze konke okusemandleni akho ukuxhasa lo msebenzi ongenakuze uphinde wenziwe?

[Umbhalo osemazantsi]

[Ibhokisi ekwiphepha 18]

“ASENZA SICINGE NZULU”

Intombazana eneminyaka eli-14 ubudala ibhalele isebe laseCameroon lamaNgqina kaYehova yathi: “Emva kokuba ndithenge izinto zesikolo zonyaka, ndiye ndakwazi ukuthengisa incwadi zesikolo zonyaka ophelileyo nge-R37. Ndinikela ngale mali kunye ne-R13,50 kwimali ebendiyilondoloza. Ngamana ningaqhubeka nomsebenzi omhle eniwenzayo. Enkosi ngamaphephancwadi iMboniselo noVukani! Asenza sicinge nzulu.”

[Ibhokisi/Umfanekiso okwiphepha 18]

UMNIKELO OKHETHEKILEYO

Isebe laseMexico lifumene ileta evela kwinkwenkwana enoxabiso eneminyaka emithandathu ubudala, uManuel, ehlala eChiapas State. Njengokuba ingekakwazi ukubhala, umhlobo wayo uyibhalele le leta. Uthi uManuel: “Umakhulu wam undiphe imazi yehagu. Emva kokuba izele amantshontsho, ndiye ndakhetha eyona ibhetele ndaza ndayikhulisa ndincediswa ngabanye abazalwana. Ndiyanithanda, yaye ndinithumelela lo mnikelo wemali endiyifumene emva kokuba ndiyithengisile le hagu. Inobunzima obuziikhilogram ezili-100, yaye ndifumene i-R830 ngayo. Ndicela le mali niyisebenzisele umsebenzi kaYehova.”

[Ibhokisi ekwiphepha 19]

‘NIYISEBENZISELE UKUGUQULELA IBHAYIBHILE’

Kwindibano yesithili yamaNgqina kaYehova yowama-2005 ebiseUkraine, kukhululwe INguqulelo Yehlabathi Elitsha YeZibhalo ZamaKristu ZesiGrike ngesiUkraine. Kusuku olwalandelayo, kwafunyanwa umyalezo kwibhokisi yendibano yomnikelo: “Ndineminyaka elithoba ubudala. Enkosi ngeZibhalo ZesiGrike. Umama usinike le mali mna nomntakwethu ukuba sikhwele ibhasi xa sisiya esikolweni. Kodwa xa bekungani imvula, besihamba ngeenyawo ukuya esikolweni saza sagcina imali engange-R73. Mna nomntakwethu singathanda ukuba le mali isetyenziselwe ukuguqulela iBhayibhile epheleleyo ngesiUkraine.

[Ibhokisi ekwiphepha 20, 21]

INDLELA ABANYE ABAKHETHA UKUNIKELA NGAZO

IMINIKELA EYA KUMSEBENZI OWENZIWA EHLABATHINI LONKE

Abaninzi babekela bucala imali ethile okanye baqingqe imali abaza kunikela ngayo kwibhokisi ebhalwe “Iminikelo Eya Kumsebenzi Owenziwa Ehlabathini Lonke—Mateyu 24:14.”

Nyanga nganye amabandla athumela le mali kwiofisi yamaNgqina kaYehova enyamekela ilizwe lawo. Iminikelo yokuzithandela inokuthunyelwa ngokungqalileyo kwiWatch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, okanye kwiofisi yamaNgqina kaYehova enyamekela ilizwe lakho. Iitsheki ezithunyelwa kule adresi ingasentla zimele zibhalwe “Watch Tower.” Nceda uqhagamshelane neOfisi YeSebe xa ufuna ukunikela ngezinto ezixabisekileyo ezifana nezacholo. Emva koko, bhala ileta echaza ngokucacileyo ukuba ezo zinto zizipho ezihambisana neminikelo.

UKUNIKELA OKUCETYIWEYO

Ukongezelela kwiminikelo yemali enikelwa phantsi kweemeko ezithile, zikho nezinye iindlela zokunikela kwinkonzo yoBukumkani. Ezi ziquka:

I-Inshorensi: IWatch Tower Bible and Tract Society of South Africa inokubhaliswa njengemele ifumane imali kwi-inshorensi yobomi okanye kwilungiselelo lemali yomhlala-phantsi.

Imali Eselugcinweni NeeBond: Kunokunikelwa ngemali eselugcinweni neebond kwiWatch Tower Bible and Tract Society of South Africa njengesipho.

Izindlu Nemihlaba: Izindlu nemihlaba enokuthengiswa inokunikelwa njengesipho okanye, kwimeko yendawo yokuhlala, ngokuzigcina zikwilungelo lalowo wenze umnikelo, onokuqhubeka ehlala kuzo ngethuba esaphila. Qhagamshelana neofisi yesebe ekwilizwe lakho ngaphambi kokubhalisa izindlu nemihlaba.

Iminqophiso Yamafa: Izinto okanye imali inokushiyelwakwiWatch Tower Bible and Tract Society of South Africa njengomnqophiso welifa osemthethweni.

Ukuze ufumane inkcazelo engakumbi, unokuqhagamshelana neAccounting Office, ngokuyibhalela okanye ngokuyitsalela umnxeba , kwidilesi ebhalwe apha ngezantsi okanye kwiofisi yesebe lamaNgqina kaYehova enyamekela ilizwe lakho.

Accounting Office

Watch Tower Bible and Tract Society of South Africa

Private Bag X2067

Krugersdorp, 1740, South Africa

Inombolo Yomnxeba: 011 761 1000

[Imifanekiso ekwiphepha 19]

Abaguquleli besiMiskito, kwisebe laseNicaragua