Unokonwaba Nakuba Ubuhlungu

NGUBANI ongazange akhe aviswe ubuhlungu? KwanoBawo wethu wasezulwini, uYehova uThixo, uyayazi intlungu yokuphoxeka. Ngokomzekelo, wakhulula amaSirayeli ebukhobokeni eYiputa waza wawasikelela. Nakuba kunjalo iBhayibhile ithi: “Izihlandlo ngezihlandlo babemvavanya uThixo, bemenza buhlungu Lowo uyiNgcwele kaSirayeli.” (INdumiso 78:41) Sekunjalo, uYehova ebesoloko ‘enguThixo onoyolo.’—1 Timoti 1:11.

Kakade ke, siphoxwa zizinto ezininzi. Sinokuzithintela njani zingasihluthi uvuyo? Yintoni esinokuyifunda kwindlela uYehova uThixo azisingatha ngayo iimeko eziphoxayo?

Izinto Ezinokusiphoxa

ILizwi likaThixo lithi: ‘Sonke sehlelwa lixesha nasisihlo esingenakubonwa kwangaphambili.’ (INtshumayeli 9:11) Kungabhungisanga sinokuba ngamaxhoba olwaphulo mthetho, ingozi okanye isigulo esithile sinokusidimaza kakhulu. IBhayibhile ikwathi: “Ulindelo olubanjezelweyo lugulisa intliziyo.” (IMizekeliso 13:12) Ukulindela into ethile elungileyo kuyasivuyisa, kodwa ukuba ayide ifike, sinokuziva sidimazekile. Ngokomzekelo, uDuncan,a owayenosukelo lokuba ngumvangeli wasemazweni, wafumanisa ukuba emva kweminyaka emininzi ekule nkonzo, kwakuza kufuneka yena nenkosikazi yakhe babuyele ekhaya. Ubalisa esithi: “Okokuqala ebomini bam, ndandingazi ukuba mandithini. Ndandingenasukelo, kwakungasekho nto ibalulekileyo.” Intlungu yokuphoxeka inokuhlala ixesha elide njengokuba kwakunjalo kuClaire. Uhambisa athi: “Ndandineenyanga ezisixhenxe ndikhululwe xa ndaphuma isisu. Sele iyiminyaka yenzekayo lo nto, kodwa nanamhla oku, xa ndibona umntwana oyinkwenkwe enikela intetho, ndidla ngokucinga ukuba, ‘Ngengaka nonyana wam.’”

Kwakhona kunokuba buhlungu xa uphoxwa ngomnye umntu, njengokwaliwa ngumntu omthandayo, ukuqhekeka komtshato, umntwana onemvukelo, umhlobo ongathembekanga okanye ongenambulelo. Ekubeni siphila nabantu abangafezekanga yaye siphila kumaxesha anzima, zininzi izinto ezinokusiphoxa.

Iintsilelo zethu zinokusidimaza. Ngokomzekelo, ukuba siye satshona esikolweni, asifumani msebenzi, okanye unomntu othile omncwasileyo abe yena engekho kulo nto, unokuziva uludwayi. Kwakhona sinokuziva sidimazekile xa umntu esimthandayo egqwidiza ngokomoya. UMary uthi: “Intombi yam yayiqhuba kakuhle. Ndandicinga ukuba ndandiyimisele umzekelo omhle. Kodwa yathi yakumshiya uYehova uThixo nemilinganiselo yentsapho yethu, ndavakalelwa kukuba ayikho eyam. Azikho izinto endandiziphumeze ebomini ezazinokuvala eso sikhewu. Ndandidimazeke ngokwenene.”

Sinokuhlangabezana njani nezo meko? Ukuze ufumane impendulo, qwalasela umzekelo owamiselwa nguYehova xa wayephoxekile.

Cinga Ngesicombululo

Ayikho into angazange asenzele yona isibini sokuqala uYehova uThixo, kodwa asizange sibe nambulelo sasuka samvukela. (Genesis, isahluko 2 nesesi-3) Unyana waso uKayin waba nentliziyo embi. Akazange asinanze isilumkiso sikaYehova kunoko wabulala umninawa wakhe. (Genesis 4:1-8) Unokuyicingela indlela amele ukuba wayebuhlungu ngayo uYehova?

Kwakutheni ukuze angaphulukani novuyo lwakhe uThixo nangona wayebuhlungu? Ekubeni wayenenjongo yokuba umhlaba uzaliswe ngabantu abafezekileyo waqhubeka efezekisa lo njongo. (Yohane 5:17) Ngenxa yoko, walungiselela idini lentlawulelo noBukumkani bakhe. (Mateyu 6:9, 10; Roma 5:18, 19) UYehova uThixo akazange alibale kukukhalaza kunoko wacinga ngesicombululo.

ILizwi likaThixo lisikhuthaza ukuba sicinge ngezinto ezakhayo kunokuba sicinge ngento ebesifanele ukuba siyenze. Lithi: “Hlalani nicinga ngezinto eziyinyaniso, nezizezenkxalabo enzulu, nezibubulungisa, nezinyulu, nezithandekayo, nekuthethwa kakuhle ngazo, nezinesidima, nezincomekayo.”—Filipi 4:8.

Imbono Efanelekileyo Ngokuphoxeka

Kunokwenzeka izinto ezinokutshintsha ubomi bethu ngesiquphe. Ngokomzekelo, sinokuzibona sele singenamsebenzi, iqabane lomtshato okanye ilungelo ebesikade sinalo. Sinokuphulukana nempilo, ikhaya okanye abahlobo bethu. Sinokujamelana njani neemeko ezinjalo?

Abanye baye bafumanisa ukuba ukuzazi izinto eziza kuqala kuluncedo. UDuncan, ebesimkhankanye ngaphambili, uthi: “Mna nomfazi wam sadimazeka gqitha sakufumanisa ukuba sasingenakuze sibuyele kwisabelo sethu kwakhona. Ekugqibeleni, zazimbini izinto ezazibalulekile: ukunyamekela umama nokuqhubeka nenkonzo yexesha elizeleyo ukuba kunokwenzeka. Xa sisenza izigqibo, sicinga ngendlela eziya kuzichaphazela ngayo ezi zinto zimbini. Oku kwenza izinto zibe lula.”

Uninzi lwethu luye lunikele ingqalelo kwizinto ezidimazayo xa lusentlungwini. Ngokomzekelo, imigudu yethu yokukhulisa umntwana, ukufumana umsebenzi okanye ukushumayela iindaba ezilungileyo kwilizwe lasemzini kusenokungavelisi imiphumo ebesiyilindele. Sisenokucinga ukuba, ‘Singongantweni.’ Kanye njengokuba isiqalo esilusizi sabantu singazange sithethe ukuba uThixo usilele, ukusilela kwemigudu yethu akuthethi ukuba akukho yethu.—Duteronomi 32:4, 5.

Sikhawuleza sicaphuke xa abantu besiphoxa. UYehova akasabeli ngaloo ndlela. UKumkani uDavide wenza ihlazo ngokukrexeza nokubulalisa umyeni walo mfazi. Sekunjalo uYehova wayibona inguquko enyanisekileyo kaDavide waza waqhubeka emsebenzisa njengomkhonzi wakhe. Ngendlela efanayo, uKumkani uYehoshafati wenza impazamo ngokwenza ubuhlobo neentshaba zikaThixo. Umprofeti kaYehova wathi: “Ngenxa yesi senzo umcaphukisile uYehova. Noko ke, kukho izinto ezilungileyo ezifunyenweyo kuwe.” (2 Kronike 19:2, 3) UYehova waqonda ukuba impazamo enye awayenzayo uYehoshafati ayizange imenze abe ngumngcatshi. Ngendlela efanayo, nathi asinakubalahla abahlobo bethu ukuba asizibaxi izinto xa benze impazamo. Abahlobo bethu abaye basiphoxa basenokuba basenazo iimpawu ezintle.—Kolose 3:13.

Ukuphoxeka kuyafuneka ukuze siphumelele. Sisenokuphoxeka naxa siye senza isono. Nangona, kunjalo sinokuchacha ukuba sithabatha amanyathelo afanelekileyo ukuze siye phambili. Xa uKumkani uDavide wayephoxekile ngenxa yesono awayesenzile, wabhala wathi: “Aphele amathambo am kukugcuma kwam imini yonke. . . . Ekugqibeleni isono sam ndisivumile kuwe [Yehova] . . . , waza wena wasixolela isiphoso sezono zam.” (INdumiso 32:3-5) Ukuba siyaqonda ukuba asikwenzanga oko uThixo alindele ukuba sikwenze, simele sicele uThixo asixolele size sitshintshe iindlela zethu size sizimisele ukulandela isiluleko sakhe ngakumbi kwixesha elizayo.—1 Yohane 2:1, 2.

Kulungele Ukuphoxeka Kwangoku

Ngokungathandabuzekiyo, zikho izinto eziza kusiphoxa kwixesha elizayo. Yintoni esinokuyenza ukuze singadimazeki? Abangela umdla amagqabaza kaBruno, igqala lendoda elingumKristu eyatyhubela amava atshintsha ubomi bayo. Wathi: “Kwimeko yam, eyona nto yayibalulekile ukuze ndingadimazeki yayikukuba ndiqhubeke ndizomeleza ngokomoya njengokuba ndandisenza kakade. Ndiye ndasiqonda isizathu sokuba uThixo avumele le nkqubo yezinto ikhohlakeleyo iqhubeke. Ndiye ndachitha iminyaka ngeminyaka ndisakha ulwalamano lwam noYehova. Ndandinombulelo ngokuba ndandiye ndakwenza oko. Ukwazi ukuba wayenam kwandinceda ndanyamezela intlungu yokudandatheka.”

Njengokuba sicamngca ngekamva, sinokuqiniseka ngento enye: Nangona sinokudimazeka okanye abanye basiphoxe, uThixo akasayi kuze asiphoxe. UThixo uthi igama lakhe elithi Yehova, lithetha ukuba “Ndinguye lowo ndiya kuzingqina ndinguye.” (Eksodus 3:14) Oko kuyasiqinisekisa ukuba uya kuba yiyo nantoni ekufuneka abe yiyo ukuze azalisekise izithembiso zakhe. NgoBukumkani bakhe uye wathembisa ukuba, ukuthanda kwakhe kuza kwenzeka “nasemhlabeni, njengasezulwini.” Ngenxa yoko umpostile uPawulos wabhala wathi: “Ndeyisekile kukuba nakufa nabomi nazingelosi narhulumente . . . naso nasiphi na esinye isidalwa aziyi kuba nako ukusahlula eluthandweni lukaThixo olukuye uKristu Yesu.”—Mateyu 6:10; Roma 8:38, 39.

Sinokukhangela phambili ngentembelo ekuzalisekeni kwesithembiso uThixo asenza ngomprofeti uIsaya: “Ndidala amazulu amatsha nomhlaba omtsha; kwaye izinto zangaphambili aziyi kukhunjulwa, zinganyuki zithi qatha entliziyweni.” (Isaya 65:17) Elinjani ikamva esililindeleyo xa zonke izinto ezisidimazayo ziya kuba zingasekho.

[Umbhalo osemazantsi]

[Amagama acatshulweyo akwiphepha 13]

Asisileli ngenxa yokuba siye sasilela ekuqaleni

[Amagama acatshulweyo akwiphepha 14]

ILizwi likaThixo lisikhuthaza ukuba sinikele ingqalelo kwizinto ezakhayo kunokuba sigxwale emswaneni

[Imifanekiso ekwiphepha 15]

UThixo wonwabile, nangona abantu besilela, kuba injongo yakhe iza kuzaliseka nakanjani

[Umfanekiso okwiphepha 16]

Ukwazi ukuba zinto zokomoya ziza kuqala kuya kusinceda sihlangabezane nokudimazeka