“Ngubani Na Osisilumko Noqondayo Phakathi Kwenu?”
“Ngubani na osisilumko noqondayo phakathi kwenu? Makayibonise imisebenzi yakhe ngehambo yakhe entle enobulali bobulumko.”—YAK. 3:13.
1, 2. Yintoni enokuthethwa ngabaninzi ekucingwa ukuba bazizilumko?
NGUBANI ocinga ukuba ulumke ngokwenene? Ngaba ngabazali bakho, ixhego elithile, okanye ngunjingalwazi wakwanokholeji? Indlela omjonga ngayo umntu onobulumko ixhomekeka kwimvelaphi yakho neemeko ophila phakathi kwazo. Noko ke, bona abakhonzi bakaThixo banomdla koko uThixo athi kwenza umntu abe nobulumko bokwenene
2 Abantu abagqalwa njengezilumko lihlabathi, abazizo ngokwenene bonke emehlweni kaThixo. Ngokomzekelo xa wayethetha namadoda awayecinga ukuba azizilumko, uYobhi wathi: “Andifumani namnye ulumkileyo phakathi kwenu.” (Yobhi 17:10) Echaza abo babegatya ulwazi lukaThixo, umpostile uPawulos wathi: “Nangona babemi ngelithi bazizilumko, baba zizidenge.” (Roma 1:22) Esebenzisa umprofeti uIsaya, uYehova wabethelela oku: “Yeha ke abo bazizilumko kwawabo amehlo!”—Isa. 5:21.
3, 4. Yintoni efunekayo emntwini ukuze abe sisilumko ngokwenene?
3 Kuyacaca ukuba, kufuneka siyazi eyona nto yenza umntu abe sisilumko ngokwenene aze akholeke emehlweni kaThixo. IMizekeliso 9:10 isithela thsuphe ngoku: “Ukoyika uYehova kukuqala kobulumko, nokwaziwa kwaLowo Ungoyena Ungcwele kukuqonda.” Ukuze umntu abe sisilumko umele oyike uThixo aze athobele imilinganiselo yakhe. Noko ke, akwanele ukwazi nje ukuba uThixo ukho kwanokuba unemilinganiselo afuna siphile ngayo. Umfundi uYakobi usikhuthaza ukuba sicinge ngoku. (Funda uYakobi 3:13.) Cinga nje ngeli binzana: “Makayibonise imisebenzi yakhe ngehambo yakhe entle enobulali bobulumko.” Ubulumko bokwenene bumele bubonakale yonk’ imihla kwizinto ozenzayo nozithethayo.
4 Ubulumko bokwenene buquka ukuba nobuchule bokuzibona kakuhle izinto uze usebenzise ulwazi nokuqonda ngendlela efanelekileyo. Ziziphi izinto ezinokubonisa ukuba sinabo obo bulumko? UYakobi ukhankanya izinto ezininzi.a Yintoni awayithethayo enokusinceda sibe nolwalamano oluhle namanye amaKristu, kuquka abo bangekho kwibandla lamaKristu?
Zizenzo Ezibonisa Ukuba Umntu Ulumke Ngokwenene
5. Yiyiphi indlela aya kuziphatha ngayo umntu osisilumko ngokwenene?
5 Kufanelekile ukuba uYakobi anxulumanise ubulumko nehambo entle. Ekubeni ukoyika uYehova ikukuqala kobulumko, umntu osisilumko uzabalazela ukuvisisanisa ihambo yakhe neendlela kwanemilinganiselo kaThixo. Asizalwa sinabo obu bulumko bobuthixo. Sinokubufumana ngokufundisisa iBhayibhile rhoqo size sicamngce ngoko sikufundayo. Oku kuya kusinceda senze oko sibongozwa ukuba sikwenze kweyabase-Efese 5:1: “Yibani ngabaxelisa uThixo.” Okukhona sixelisa uYehova, kokukhona siya kwenza izinto ngobulumko. Iindlela zikaYehova ziphakame gqitha kunezo zabantu. (Isa. 55:8, 9) Ngoko xa sixelisa uYehova ekwenzeni izinto, abantu baya kubona ukuba sahlukile.
6. Kutheni ukuba nobulali kubonisa ukuhlonela uThixo, ibe yintoni equkwa kukuba nolu phawu?
6 UYakobi uthi ekuphela kwendlela umntu anokumxelisa ngayo uYehova kukuba ‘nobulali bobulumko.’ Nangona ukuba nobulali kuquka ukuthantamisa, kwangaxeshanye umKristu unokuba ngqongqo kwimilinganiselo yeBhayibhile, ukuze abe ngolungeleleneyo. Nakuba enamandla angenakuthelekiswa nanto, uThixo unobulali, nathi asoyiki ukusondela kuye. UNyana kaThixo wayenobulali njengoYise kangangokuba wathi: “Yizani kum, nonke nina nibulalekayo nenisindwa ngumthwalo, yaye ndiza kunihlaziya. Thabathani idyokhwe yam nize nifunde kum, kuba ndinomoya wobulali, ndithobekile ngentliziyo, kwaye niya kuyifumanela ukuhlaziyeka imiphefumlo yenu.”—Mat. 11:28, 29; Fil. 2:5-8.
7. Kutheni sinokuthi uMoses ungumzekelo omhle wokuba nobulali?
7 IBhayibhile isixelela ngabathile ababebalasele ngokuba nobulali, okanye ngokululama. Omnye wabo nguMoses. Wayeneembopheleleko ezinkulu, ukanti uchazwa ‘njengoyena wayelulamile kubantu bonke ababephezu komhlaba.’ (Num. 11:29; 12:3) Cinga nje ngamandla awawanikwa nguYehova ukuze aqhubeke esenza ukuthanda kwakhe. UYehova wavuyiswa kukusebenzisa abantu abanobulali ukuze azalisekise iinjongo zakhe.
8. Abantu abangafezekanga banokuba nabo njani ‘ubulali bobulumko’?
8 Kucacile ukuba, abantu abangafezekanga bangakwazi ukuba ‘nobulali bobulumko.’ Kuthekani ngathi? Yintoni esinokuyenza ukuze silubonise ngakumbi olu phawu? Ubulali yinxalenye yesiqhamo somoya oyingcwele kaYehova. (Gal. 5:22, 23) Sinokuthandazela umoya wakhe size sizibhokoxe ekuboniseni isiqhamo sawo sinethemba lokuba uThixo uya kusinceda sibe nobulali ngakumbi. Sikhuthazwa ngakumbi ngala mazwi omdumisi: “[UThixo] uya kubafundisa indlela yakhe.”—INdu. 25:9.
9, 10. Nguwuphi umgudu ekufuneka siwenzile ukuze sibe nobulali, yaye ngoba?
9 Noko ke, kufuneka umntu enze umgudu wokwenene ukuze abe nobulali. Ngenxa yendlela esikhule ngayo, kwabanye bethu kusenokuba nzima ukuba nolu phawu. Ukongezelela koko, abantu esiphila nabo basenokukhuthaza okwahlukileyo, besithi umntu “akamele ayeke abantu bakhwele bezehlela kuye.” Ngaba bubulumko ngokwenene ukwenjenjalo? Ukuba kuqhambuka umlilo ongephi endlwini yakho, ngaba ubuya kuwucima ngeparafini okanye ngamanzi? Iparafini ibiya kuwenza ungalawuleki ngakumbi, ngoxa amanzi ebeya kuwucima. Ngokufanayo, iBhayibhile ithi: “Impendulo, xa inobulali, isusa umsindo, kodwa ilizwi elibangela intlungu linyusa umsindo.” (IMize. 15:1, 18) Ngaba siyayibona indlela ekunokuba bubulumko bokwenene ngayo ukubonisa ubulali xa kukho into esicaphukisayo, enoba kusebandleni okanye akunjalo?—2 Tim. 2:24.
10 Njengokuba kuchazwe ngasentla, abaninzi abaphenjelelwa ngumoya wehlabathi abayazi le nto kuthiwa kukuthantamisa, ukuba noxolo nokuzola. Kunoko ihlabathi lizaliswe ngabantu abakrwada nabanekratshi. UYakobi wayekwazi kakuhle oku, ngenxa yoko walumkisa ibandla ukuba liphephe ukonakaliswa ngulo moya. Yintoni enye esinokuyifunda kweso silumkiso sakhe?
Indlela Ababonakala Ngayo Abaswele Ubulumko
11. Ziziphi iimpawu ezingqubanayo nobulumko bukaThixo?
11 Ngokunyaniseka, uYakobi wabhala ngeempawu zabantu ezingqubanayo nobulumko bukaThixo. (Funda uYakobi 3:14.) Ukuba nekhwele nosukuzwano ziimpawu zokwenyama, kungekhona ezokomoya. Phawula okwenzekayo xa umntu ecinga ngokwenyama. Amaqela amathandathu abo bathi bangamaKristu ongamele iindawo ezithile zeChurch of the Holy Sepulchre eYerusalem, ekukholelwa ukuba yakhiwe kuloo ndawo wafela waza wangcwatyelwa kuyo uYesu. La maqela ayesoloko exhwithana. Ngowama-2006, kwiphephandaba iTime kwabhalwa ‘ngokruthakruthwano loonongendi olwenzeka ixesha elide begqebhana kanobom ngeziphatho zamakhandlela ezinkulu.’ Babengathembananga, kangangokuba bade bagcinisa izitshixo zecawa kumntu oliSilamsi.
12. Yintoni enokwenzeka xa singenabo ubulumko bukaThixo?
12 Usukuzwano olunjalo alumele lukhankanywe nokukhankanywa kwibandla lamaKristu okwenyaniso. Noko ke, maxa wambi ukungafezeki kuye kwabangela abanye abafuna kujikwa kwindlela abacinga ngayo. Ukuqinis’ intamo okunjalo kunokukhokelela kusukuzwano. Umpostile uPawulos wathi akubona oko kwibandla laseKorinte, walibhalela wathi: “Ngoxa kukho ikhwele nembambano phakathi kwenu, aningabenyama na yaye anihambi njengoko abantu besenjenjalo na?” (1 Kor. 3:3) Loo meko imbi ngolo hlobo yaqhubeka ixesha elide kwelo bandla lenkulungwane yokuqala. Ngenxa yoko, simele siwulumkele umoya onjalo kwibandla lamaKristu namhlanje.
13, 14. Chaza izinto ezinokwenziwa ngabantu ezibonisa ukuba bacinga ngokwenyama.
13 Unokungena njani umoya onjalo ebandleni? Unokuqala kancinane. Ngokomzekelo, xa kusakhiwa iHolo yoBukumkani, abantu basenokuba neembono ezahlukeneyo ngendlela ekumele kwenziwe ngayo. Omnye umzalwana usenokucaphuka xa izimvo zakhe zingamkelwa, mhlawumbi ade azigxeke phandle izigqibo ezenziweyo. Usenokude angabi safuna kufaka sandla kuloo msebenzi. Into asenokuba uyilibele lo mzalwana kukuba kufuneka uxolo ukuze ufezwe kakuhle umsebenzi webandla, kungekhona indlela ethile ekhethekileyo. UYehova usikelela umoya wobulali endaweni yosukuzwano.—1 Tim. 6:4, 5.
14 Omnye umzekelo kuxa abadala bebandla bephawula ukuba omnye wabo akasenazo iimfaneleko zabadala ezichazwa ziZibhalo, nakuba sele eneminyaka engumdala. Xa umveleli wesiphaluka esiva ukuba lo mdala ukhe walulekwa kodwa akaphucula, usenokuvumelana nabadala xa bencomela ukuba ayekiswe. Uya kuvakalelwa njani? Ngaba uya kusamkela ngokuthobeka nobulali eso sigqibo senziwe ngazwinye nesisekelwe kwiZibhalo, aze azabalazele ukufaneleka ngokweZibhalo ukuze aphinde abe ngumdala? Okanye ngaba uya kuqumba, ecatshukiswa kukuba ephulukene nelo lungelo? Yintoni ebangela ukuba azenze ofanelekayo, ngoxa enyanisweni engafaneleki? Ebeya kuba ulumke ngokwenene ukuba ebenokuthobeka aze akwamkele oko.
15. Yintoni eyenza uvakalelwa kukuba isiluleko esiphefumlelweyo sikaYakobi 3:15, 16 sibaluleke ngokwenene?
15 Kuyavunywa ukuba, zikho nezinye iimeko ezinokubangela ukuba umntu abonakale ecinga ngokwenyama. Enoba imeko injani na, simele sizabalazele ukuziphepha iimpawu zokwenyama. (Funda uYakobi 3:15, 16.) Umfundi uYakobi uchaza ezo mpawu ‘njengezasemhlabeni’ kuba ziimpawu zokwenyama, azisekelwanga kubulumko baphezulu. ‘Zezobulwanyana,’ kuba ziphuma kwiinkanuko zokwenyama, yaye zizimbo zezilwanyana ezingenangqiqo. Ziimpawu ‘zobudemon,’ kuba zibonakaliswa ziintshaba zomoya kaThixo. Yinto engafanelekanga ngokwenene ukuba umKristu abe nezo mpawu.
16. Yintoni ekusenokufuneka siyenze ukuze silwe neempawu ezingafanelekanga, yaye sinokuphumelela njani?
16 Ngamnye ebandleni umele azihlolisise ukuba akanazo kusini na ezo mpawu aze alwele ukwahlukana nazo. Njengabafundisi ebandleni, abaveleli bamele baqiniseke ukuba abanazo. Ngenxa yokungafezeki nempembelelo yeli hlabathi kunzima ukwahlukana nazo. Ukuzama ukwahlukana nazo sinokukufanisa nokunyuka kwinduli enodaka nemtyibilizi. Ukuba asinanto yokubambelela, sinokutyibilika lula size sibuyele emva. Noko ke, ukuba sibambelela ngokuqinileyo kwisiluleko esiseBhayibhileni, nakuncedo uThixo alunikela ngebandla lakhe elisehlabathini, asinakubuyela emva.—INdu. 73:23, 24.
Iimpawu Abazabalazela Ukuba Nazo Abazizilumko
17. Yintoni abadla ngokuyenza abo bazizilumko xa belingelwa ekwenzeni okubi?
17 Funda uYakobi 3:17. Sinokuzuza lukhulu xa sinokuqwalasela ezinye zeempawu ezifumaneka ngokuba ‘nobulumko obuvela phezulu.’ Ukuba nyulu kuquka ukuba msulwa kwizenzo neentshukumisa. Simele singalibazisi ukugatya izenzo ezingendawo. Asimele sibe sicinga nokucinga ngaphambi kokuba senze oko. Mhlawumbi ukhe wabona into eza kukuphandla. Ngokukhawuleza uyayiphepha okanye uvale amehlo. Loo nto ayifuni nokuba ube ucinga. Kumele kube njalo naxa silingelwa ukwenza okubi. Ukuba nyulu nokuba nesazela esiqeqeshwe ngeBhayibhile kumele kusincede singabe sicinga xa kufuneka sigatye okubi. (Roma 12:9) IBhayibhile inemizekelo yabantu abaye bakwenza oku, njengoYosefu noYesu.—Gen. 39:7-9; Mat. 4:8-10.
18. Kuthetha ukuthini (a) ukuba noxolo? (b) ukwenza uxolo?
18 Ubulumko bukaThixo bufuna ukuba sibe noxolo. Oku kubandakanya ukuphepha ukusoloko ufuna undikho, okanye ukwenza nantoni na eza kuphazamisana noxolo. UYakobi uyicacisa ngokubhekele phaya le ngongoma esithi: “Imbewu yesiqhamo sobulungisa ihlwayelwa phantsi kweemeko zoxolo ngabo benza uxolo.” (Yak. 3:18) Phawula ibinzana elithi “benza uxolo.” Ngaba ebandleni saziwa njengabantu abenza uxolo okanye abathandi bengxushungxushu? Ngaba sihlala sisilwa okanye siphikisana nabanye, sicaphuka msinya okanye sibacaphukisa abanye? Ngaba sinyanzelisa ukuba abanye bamkele loo nto siyiyo, okanye ngokuthobeka sizama ukuphucula ubuntu bethu obungathandekiyo? Ngaba saziwa njengabantu abenza unakonako ukuze kubekho uxolo, abantu abaxolela msinya baze balibale? Ukuzihlolisisa ngokunyaniseka kwezi nkalo kuya kusinceda sibone apho kufuneka siphucule khona ekuboniseni ubulumko bukaThixo.
19. Umntu wenza njani ukuze aziwe ngokuba nengqiqo?
19 Echaza izinto ezibonisa ubulumko baphezulu, uYakobi uquka ukuba nengqiqo. Ngaba saziwa njengabayekelelayo xa kungekho mgaqo weZibhalo waphulwayo, singanyanzelisi ukuba kwamkelwe loo nto ifunwa sithi? Ngaba saziwa njengabathantamisayo nabangenekayo? Ezo zinto zibonisa ukuba siye safunda ukuba nengqiqo.
20. Kuya kusinceda ngantoni ukubonisa iimpawu zikaThixo esixubushe ngazo?
20 Kunokuba mnandi ngokwenene ebandleni xa abazalwana noodade bezabalazela ukubonisa iimpawu zobuthixo athetha ngazo uYakobi. (INdu. 133:1-3) Xa sinobulali, uxolo nengqiqo kwabanye siya kuba nolwalamano oluhle nabo, ngaloo ndlela sibonisa ukuba ‘sinobulumko baphezulu.’ Kwinqaku elilandelayo siza kufunda indlela esinokuncedwa ngayo kukujonga abanye ngendlela uYehova abajonga ngayo.
[Umbhalo osemazantsi]
a Umongo ubonisa ukuba ekuqaleni uYakobi wayecinga ngamadoda amakhulu, okanye “abafundisi” bebandla. (Yak. 3:1) Ngokuqinisekileyo la madoda amele abe ngumzekelo ekuboniseni ubulumko bobuthixo, kodwa sonke sinokufunda kwesi siluleko sikaYakobi.
Ngaba Unokuchaza?
• Yintoni eyenza umKristu abe nobulumko bokwenene?
• Yintoni esinokuyenza ukuze sibe nobulumko bukaThixo?
• Babonakala ngantoni abo bangenabo ‘ubulumko baphezulu.’
• Ziziphi iimpawu ozimisele ukuzibonakalisa ngakumbi?
[Umfanekiso okwiphepha 23]
Ziintoni ezinokubangela usukuzwano namhlanje?
[Umfanekiso okwiphepha 24]
Ngaba uqala ukhe ucinge ngaphambi kokuba ugatye okubi?