Isithembiso Esibaluleke Gqitha

NDENZA isithembiso esibaluleke gqitha. Makhe ndikuchazele isizathu sokuba umama oselula njengam nongummi waseSpeyin enze isithembiso esinjalo.

Ekhaya lwalungekho uxolo nemvisiswano. Iintliziyo zaba lihlwili xa umnakwethu omncinane oneminyaka emine ubudala wafela kwingozi yemoto eyayihlasimlis’ umzimba. Ukongezelela koko, ukungakwazi kukatata ukuziphatha kwabangela ukuba umama angonwabi kwaphela emtshatweni. Kodwa oko akuzange kube ngumqobo ekubeni asifundise imilinganiselo yokuziphatha, mna nomnakwethu.

Ekuhambeni kwexesha, umnakwethu watshata, nam ngokunjalo. Kungekudala emva koko, umama wahlaselwa ngumhlaza, waza wafa. Noko ke, ngaphambi kokuba afe, wasishiya nobutyebi.

Elinye ibhinqa awayeqhelene nalo lamxelela ngethemba lovuko eliseZibhalweni, ibe umama wavuma ukufundelwa iBhayibhile. Elo themba leBhayibhile lamnceda wayiqonda injongo yobomi, watsho wafumana ulonwabo kwezo ntsuku zakhe zokugqibela esidla amazimba.

Sathi sakuphawula imiphumo emihle awayifumana kwisigidimi seBhayibhile, mna nomnakwethu saqalisa ukufunda iLizwi likaThixo. Ndabhaptizwa kwinyanga nje ngaphambi kokuzala umntwana wam wesibini, intombazana entle uLucía.

Usuku lokubhaptizwa kwam lwalubaluleke ngokwenene kum. Kaloku ngoku ndandisele ndingokaYehova, kuba ndandizahlulele kuye ukuze ndimkhonze ngonaphakade. Esinye isizathu kukuba, ndandiza kukwazi ukufundisa unyana nentombi yam ngeenkolelo zam.

Noko ke, zange kube kudala, esi sizathu sesibini sovuyo endandinalo saphazanyiswa. Xa uLucía wayeneminyaka emine ubudala, wakhathazwa sisisu esinganyamezelekiyo. Emva kokuhlolwa izihlandlo eziliqela, ugqirha wafumanisa ukuba kwisibindi sakhe kukho ithumba elingangeorenji. Wasixelela ukuba uneneuroblastoma, ithumba lomhlaza eliphazamisana nemithambo-luvo. Oko kwaba sisiqalo seminyaka esixhenxe yemfazwe kaLucía nomhlaza, apho wayeza kuchitha iintsuku eziliqela esibhedlele.

Ukuzincama

Kule minyaka yobunzima, uLucía wayesoloko endomeleza ngokundanga nokundiphuza ngobubele. Indlela awayekuzolele ngayo ukugula kwakhe yabachukumisa gqitha abasebenzi basesibhedlele. Wayesoloko esebenzisana nabongikazi, ebancedisa xa besisa iyogurt, iziselo, nezinye izinto kubantwana abalaliswe kumagumbi akufutshane. Abongikazi bade bamnika iyunifomu yabo kunye nebheji ebhalwe ukuba “ngumncedisi wabongikazi.”

Omnye umsebenzi kweso sibhedlele uthi: “ULucía wayichukumisa gqitha intliziyo yam. Wayengumntwana okhutheleyo, olichule nowayekuthanda ukuzoba. Kwakungenzima ukwazi into ayicingayo yaye eqolile.”

ULucía wayesomelezwa yaye ethuthuzelwa liLizwi LikaThixo. (Heb. 4:12) Wayeqinisekile ngesithembiso esikwiLizwi likaThixo sokuba kwihlabathi elitsha ‘akuyi kubakho kufa, nakuzila nakukhala nantlungu kwakhona.’ (ISityhi. 21:4) Ngenxa yokuthanda kwakhe abantu, wayesebenzisa naliphi na ithuba elivelayo ukuze abachazele ngesigidimi seBhayibhile. Ukuba nethemba elingagungqiyo kuvuko kwamnceda wakwazi ukuhlala elungelelene yaye edlamkile nakuba lalimfiliba ithemba lokuphila. (Isa. 25:8) Wahlala enjalo de kwasa ekufeni.

Lolo suku ke endenza ngalo isithembiso esibalulekileyo. Kwakunzima ukuba uLucía avule amehlo. Uyise wayembambe kwesinye isandla, ndabe mna ndimbambe kwesinye. Ndamsebezela ndisithi: “Ungakhathazeki, andizi kukushiya. Phefumla kancinane. Xa uvuka, uya kube uphile qete. Akuyi kuphinda uqaqanjelwe, ibe nam ndiya kube ndisecaleni kwakho.”

Ngoku ndimele ndigcine eso sithembiso. Ndiyazi ukuba ukulindela umhla wovuko akulula. Kodwa ndiyazi nokuba, xa ndithembele kuYehova ngomonde ndize ndigcine ingqibelelo yam kuye, ndiya kube ndikho xa evuswa ekufeni.

Ilifa Elashiywa NguLucía

Inkalipho kaLucía, kunye nenkxaso emangalisayo yebandla, yamchukumisa gqitha umyeni wam, owayengengomKristu ngelo xesha. Ngosuku awafa ngalo uLucía, umyeni wam wandixelela ukuba uza kukhe azikise ukucinga. Kwiiveki ezimbalwa kamva, wacela omnye umdala wasebandleni ukuba amqhubele isifundo seBhayibhile. Zange kube kudala, waya kuzo zonke iintlanganiso. Ngoncedo lukaYehova wayeka ukutshaya, nto leyo eyayinzima ngaphambili.

Intlungu yokufelwa nguLucía ayikapheli, kodwa ndiyambulela uYehova ngelifa endalishiyelwa ngulo mntwana. Sinomyeni wam sithuthuzelana ngethemba elimangalisayo lovuko, kangangokuba sinombono waxa siphinda sibonana noLucía—edlamkile, etsho ngaloo mehlo mahle nezidlele ziba nezibotho luncumo.

Ukufa kwentombi yam kwachukumisa ngokukhethekileyo nomnye ummelwane wam. Ngenye intsasa yangoMgqibelo eyayinetha, kwafika inenekazi elalinonyana owayefunda kwisikolo awayekuso uLucía. Unyana walo owayeneminyaka eli-11 ubudala ngelo xesha, naye wabulawa seso sifo sikaLucía. Lathi lakuva ngokufa kukaLucía, leza kusityelela. Lalifuna ukwazi indlela endihlangabezana ngayo nokufa kukaLucía, laza lacebisa ukuba siseke iqela eliza kuthuthuzela abanye oomama abakwimeko efanayo.

Ndalichazela ukuba ndifumene intuthuzelo yokwenene eyodlula nayiphi na enokufumaneka ebantwini kumadinga eBhayibhile. Lalingakholelwa koko lalikuva njengoko ndandifunda amazwi kaYesu akuYohane 5:28, 29. Lasamkela isifundo seBhayibhile laza ngokukhawuleza laluva “uxolo lukaThixo olungaphaya kokuqonda.” (Fil. 4:7) Rhoqo xa sifunda iBhayibhile, sikhe sithi xha, sizibone sikwihlabathi elitsha sisamkela abantwana bethu xa bevuswa ekufeni.

Ewe, ubomi obufutshane obaphilwa nguLucía basishiya nelifa eliya kuhlala lihleli. Ukholo lwakhe lwenza intsapho yethu yamanyana ekunquleni uThixo, lwaza lwenza nam ndazimisela ngakumbi ukuhlala ndomelele. Ngokuqinisekileyo sonke thina baye bafelwa ngabantu abasenokuvuswa sinesithembiso esibalulekileyo esiye sasenza.

[Umfanekiso okwiphepha 20]

Umfanekiso weparadesi owazotywa nguLucía