Funa Ukhokelo LukaThixo Kwizinto Zonke
“Lo Thixo nguThixo wethu ukusa kwixesha elingenammiselo, nangonaphakade. Yena uya kusikhokela de sife.”—INDU. 48:14.
1, 2. Kutheni simele sithembele kukhokelo lukaYehova endaweni yobulumko bethu, ibe yiyiphi imibuzo ephakamayo?
KULULA gqitha ukuzikhohlisa sibone izinto ezingenaxabiso okanye eziyingozi njengezinexabiso. (IMize. 12:11) Xa kukho into esifuna ukuyenza ngoxa ingafanelekanga kumaKristu, sidla ngokuza nezizathu ezithethelela oko. (Yer. 17:5, 9) Ngenxa yoko, umdumisi wabonisa ubulumko xa wathandaza kuYehova wathi: “Thumela ukukhanya kwakho nenyaniso yakho. Ngamana zingandikhokela.” (INdu. 43:3) Wayethembele kuYehova, kungekhona kubulumko bakhe obusikelwe umda, efuna ukhokelo lukaYehova kuphela. Njengomdumisi, kuya kuba bubulumko nakuthi ukufuna ukhokelo lukaThixo.
2 Kutheni simele sithembele kukhokelo lukaYehova ngaphezu kwalo naluphi na olunye? Simele silufune nini? Sisiphi isimo sengqondo esimele sibe naso ukuze silufumane, ibe usikhokela njani uYehova namhlanje? Le yimibuzo ebalulekileyo neza kuxutyushwa kweli nqaku.
Kutheni Simele Sithembele Kukhokelo LukaYehova?
3-5. Ziziphi izizathu ezenza siqiniseke ngokupheleleyo ngokhokelo lukaYehova?
3 UYehova unguBawo wethu wasezulwini. (1 Kor. 8:6) Usazi kakuhle njengabantu ngabanye, ibe unokubona noko kusezintliziyweni zethu. (1 Sam. 16:7; IMize. 21:2) UKumkani uDavide wathi kuThixo: “Wena uyakwazi ukuhlala kwam nokuvuka kwam. Uziqwalasele iingcamango zam ukude. Kuba akukho lizwi elulwimini lwam, kodwa, khangela! Owu Yehova, sele ukwazi konke.” (INdu. 139:2, 4) Ekubeni uYehova esazi kakuhle, inokwenzeka njani into yokuba sithandabuze ukuba uyakwazi okona kusilungeleyo? Enye into, uYehova usesona silumko. Ubona yonke into, akhangele ngaphaya koko kunokubonwa ngabantu, ibe uyayazi imiphumo yezinto zisaqala ukwenzeka. (Isa. 46:9-11; Roma 11:33) ‘UnguThixo, osisilumko yedwa.’—Roma 16:27.
4 Ukongezelela koko, uYehova uyasithanda ibe uhlala efuna sifumane oko kusilungeleyo. (Yoh. 3:16; 1 Yoh. 4:8) NjengoThixo onothando, unesisa kuthi. Umfundi uYakobi wathi: “Sonke isipho esilungileyo naso sonke isipho esigqibeleleyo sivela phezulu, kuba sihla sivela kuYise wezikhanyiso zesibhakabhaka.” (Yak. 1:17) Abo bavumayo ukukhokelwa nguye bazuza lukhulu kwisisa sakhe.
5 Okokugqibela, uYehova ungusomandla. Ethetha ngoku umdumisi wathi: “Nabani na ohleli kwindawo efihlakeleyo yOyena Uphakamileyo uya kuzifumanela indawo yokulalisa emthunzini waLowo unguSomandla. Ndiza kuthi kuYehova: ‘Uyindawo yam yokusabela negwiba lam, Thixo wam, endiza kukholosa ngaye.’” (INdu. 91:1, 2) Xa sithobela ukhokelo lukaYehova, sifuna indawo yokusabela kuThixo ongenakuze awe phantsi. Kwanokuba siyachaswa, uYehova uyasixhasa. Akayi kuze asiphoxe. (INdu. 71:4, 5; Funda IMizekeliso 3:19-26.) Ewe, uYehova uyakwazi okona kusilungeleyo, yaye unamandla okusinika. Bekuya kuba bubudenge obungathethekiyo ukugatya ukhokelo lwakhe. Noko ke, silufuna nini ukhokelo lwakhe?
Kunini Apho Silufuna Khona Ukhokelo?
6, 7. Kunini apho silufuna khona ukhokelo lukaYehova?
6 Enyanisweni, ukhokelo lukaThixo silufuna kubo bonke ubomi bethu, ukususela ebutsheni kuse ekwaluphaleni. Umdumisi wathi: “Lo Thixo nguThixo wethu ukusa kwixesha elingenammiselo, nangonaphakade. Yena uya kusikhokela de sife.” (INdu. 48:14) Njengomdumisi, amaKristu alumkileyo ahlala efuna ukhokelo lukaThixo.
7 Kakade ke, akho amaxesha esiye silufune ngokukhethekileyo uncedo. Maxa wambi sizibona ‘sisezingxakini ezinkulu,’ mhlawumbi intshutshiso, ukugula gqitha, okanye ukusuka uphelelwe ngumsebenzi singalindelanga. (INdu. 69:16, 17) Kumaxesha anjalo, kuthuthuzela ngokwenene ukuya kuYehova, siqinisekile ukuba uya kusipha amandla okunyamezela aze asikhokele senze izigqibo ezifanelekileyo. (Funda INdumiso 102:17.) Noko ke, sihlala silufuna uncedo lwakhe nangezinye izihlandlo. Ngokomzekelo, xa sisiya kuthetha nabamelwane bethu ngeendaba ezilungileyo zoBukumkani, sifuna asikhokele ukuze siphumelele ekunikeleni ubungqina. Nanini na sifuna ukwenza isigqibo—enoba sesokuzihlaziya, ukunxiba nokuzilungisa, unxulumano, umsebenzi wengqesho, imfundo, okanye nantoni na enye—senza ngobulumko kuphela xa sithobela ukhokelo lukaYehova. Enyanisweni, azipheli iimeko esilufuna kuzo ukhokelo lwakhe.
Iingozi Zokungalufuni Ukhokelo LukaThixo
8. Ziziphi izinto ezazithethwa kukudla kukaEva isiqhamo esalelweyo?
8 Simele sikhumbule ukuba imele isuke entliziyweni into yokuthobela ukhokelo lukaYehova. UThixo akayi kusinyanzela xa singafuni. Umntu wokuqala owakhetha ukungaluthobeli ukhokelo lukaYehova nguEva, ibe umzekelo wakhe ububonisa kakuhle ubungozi beso sigqibo. Cinga nje izinto ezazithethwa seso senzo. UEva wadla isiqhamo esalelweyo kuba nje efuna ‘ukuba njengoThixo, azi okulungileyo nokubi.’ (Gen. 3:5) Ngokwenjenjalo, wazibeka endaweni kaThixo, ezenzela izigqibo ngokulungileyo nokubi kunokulandela ukhokelo lukaYehova. Ngaloo ndlela, wayegatya ulongamo lukaYehova, efuna ukuzilawula. Nomyeni wakhe uAdam wamthelela kuloo mvukelo.—Roma 5:12.
9. Yintoni eyona nto siyenzayo ngokwenene xa sigatya ukhokelo lukaYehova, ibe kutheni ibubuyatha nje obo?
9 Nathi namhlanje, xa singaluthobeli ukhokelo lukaYehova, njengoEva sigatya ulongamo lwakhe. Ngokomzekelo, cinga ngomntu othanda ukubukela imifanekiso yamanyala. Ukuba ungumKristu, ukwazi kakuhle oko kuthethwa nguYehova ngalo mba. Into engahlambulukanga ayimele ikhankanywe kwaukukhankanywa, kungasathethwa ke ngokuyikrwaqula siyikhanuke. (Efe. 5:3) Ngokugatya ukhokelo lukaYehova, loo mntu ukhanyela ulongamo lukaYehova, uchasa nobuntloko bakhe. (1 Kor. 11:3) Bubuyatha ngokwenene obo, kuba njengokuba uYeremiya watshoyo, “asikokomntu ohambayo ukwalathisa inyathelo lakhe.”—Yer. 10:23.
10. Kutheni simele siyisebenzise ngenkathalo inkululeko yokuzikhethela esinayo?
10 Abanye basenokungavumelani nala mazwi kaYeremiya, bevakalelwa kukuba ekubeni inguYehova owasinika inkululeko yokuzikhethela, akanakusibeka tyala ngokuyisebenzisa kwethu. Kodwa, simele sikhumbule ukuba, inkululeko yokuzikhethela izisa imbopheleleko kanye njengokuba kunjalo ngesipho. Simele siziphendulele kuThixo ngezinto esikhetha ukuzithetha nokuzenza. (Roma 14:10) UYesu wathi: “Umlomo uthetha ngokuphuphuma kwentliziyo.” Waphinda wathi: “Entliziyweni kuphuma iingcinga ezingendawo, ukubulala, ukukrexeza, uhenyuzo, ubusela, ubungqina bobuxoki, izinyeliso.” (Mat. 12:34; 15:19) Ngoko ke, amazwi nezenzo zethu zityhila oko kusentliziyweni. Zibonisa kanye loo nto siyiyo. Yiloo nto umKristu olumkileyo efuna ukhokelo lukaYehova kuyo yonke into. Xa enjalo, uYehova umfumana ‘ethe tye entliziyweni’ aze ‘amenzele okulungileyo.’—INdu. 125:4.
11. Sifunda ntoni kwimbali kaSirayeli?
11 Khumbula imbali kaSirayeli. Xa eso sizwe sasisenza ukhetho olufanelekileyo, sithobela imiyalelo kaYehova, uYehova wayesikhusela. (Yosh. 24:15, 21, 31) Noko ke, sasisoloko siyisebenzisa kakubi inkululeko yaso yokuzikhethela. Ngomhla kaYeremiya, uYehova wathi ngabantu beso sizwe: “Abazange baphulaphule, bengazange bathobe nendlebe yabo, kodwa baqhubeka behamba ngamacebo abo ngobulukhuni bentliziyo yabo embi, kangangokuba baya ngasemva kungekhona ngaphambili.” (Yer. 7:24-26) Kwakubuhlungu ngokwenene oko. Ngamana singangaze sivumele ukuba neenkani okanye ukuzifica ngokugqithiseleyo kusenze sigatye ukhokelo lukaYehova size sikholose ngamacebo ethu, ngaloo ndlela ‘sisiya ngasemva kungekhona ngaphambili.’
Yintoni Efunekayo Ukuze Sithobele UThixo?
12, 13. (a) Luluphi uphawu olusenza sifune ukuthobela ukhokelo lukaYehova? (b) Kutheni lubalulekile nje ukholo?
12 Ukuthanda uYehova kusenza sithobele ukhokelo lwakhe. (1 Yoh. 5:3) Noko ke, uPawulos wathetha ngenye into ekufuneka sibe nayo xa wathi: “Sihamba ngokholo, kungekhona ngokubona.” (2 Kor. 5:6, 7) Lubaluleke ngantoni ukholo? Kaloku, uYehova usikhokelela “kumkhondo wobulungisa,” kodwa loo mkhondo awusikhokeleli ekuzuzeni ubutyebi okanye amawonga kweli hlabathi. (INdu. 23:3) Ngenxa yoko, amehlo ethu okholo simele siwatsolise kumvuzo wokomoya ongenakuthelekiswa nanto esiwufumana ngokukhonza uYehova. (Funda eyesi-2 kwabaseKorinte 4:17, 18.) Ukholo luphinda lusincede saneliswe zezo ntwana-ntwana ziphathekayo sinazo.—1 Tim. 6:8.
13 UYesu wabonisa ukuba unqulo lokwenyaniso lubandakanya ukuzincama, nto leyo efuna ukholo. (Luka 9:23, 24) Abanye abanquli abathembekileyo baye bancama izinto ezininzi, banyamezela ubuhlwempu, ingcinezelo, ukucalulwa, nkqu nentshutshiso eqatha. (2 Kor. 11:23-27; ISityhi. 3:8-10) Lukholo kuphela olubanceda bahlale bevuya phantsi kwezo meko. (Yak. 1:2, 3) Ukholo olomeleleyo lusenza siqiniseke ngokupheleleyo ukuba ukuthobela ukhokelo lukaYehova kusoloko kuyeyona nto ifanelekileyo neyingenelo kuthi. Asithandabuzi nakancinane ukuba abo banyamezela ngokuthembeka bafumana umvuzo ongenakuthelekiswa nayo nayiphi na imbandezelo yomzuzwana abayifumana ngoku.—Heb. 11:6.
14. Kwakutheni ukuze kufuneke uHagare athobeke?
14 Phinda ucinge ngendima yokuthobeka xa uthobela ukhokelo lukaYehova. Umzekelo kaHagare, isicakazana sikaSara ukubonisa kakuhle oku. Xa uSara wayengafumani bantwana, wanikela uHagare kuAbraham, ibe uHagare wakhulelwa umntwana ka-Abraham. Emva koko uHagare waba nekratshi wamnyusela impumlo umfazi wenkosi yakhe. Ngenxa yoko, uSara ‘wamcinezela, kangangokude abaleke emke’ uHagare. Ingelosi kaYehova yaya kuHagare yathi kuye: ‘Buyela kuye uze uzithobe phantsi kwesandla sakhe.’ (Gen. 16:2, 6, 8, 9) Kungenzeka ukuba uHagare wayengaluthandi olu lwalathiso. Kodwa ukuze athobele oko kwakuthethwa yingelosi, kwakuza kufuneka ayeke ikratshi. Noko ke, uHagare wenza oko akuxelelwa yingelosi, ibe unyana wakhe uIshmayeli wazalelwa kwindawo ekhuselekileyo, emzini ka-Abraham.
15. Chaza iimeko ekunokufuneka kuzo ukuthobeka ukuze sithobele ukhokelo lukaYehova namhlanje.
15 Ukuthobela ukhokelo lukaYehova kusenokuthetha ukuba simele sizithobe. Abanye kusenokufuneka bavume ukuba indlela abazihlaziya ngayo ayamkelekanga kuYehova. UmKristu usenokukhubekisa omnye kuze kufuneke acele uxolo. Okanye usenokuba wenze impazamo ngoku kufuneka avume ukuba uphazamile. Kuthekani ukuba uye wenza isono esinzulu? Kufuneka azithobe aze aye kuzichaza kubadala. Omnye umntu usenokude asuswe kubudlelane. Ukuze aphinde amkelwe ebandleni, umele azithobe aguquke aze ashiye ikhondo lakhe. Kwezi meko nezinye ezifana nazo, athuthuzela ngokwenene amazwi eMizekeliso 29:23 athi: “Ikratshi lomntu wasemhlabeni liya kumthoba, kodwa onomoya othobekileyo uya kufumana uzuko.”
UYehova Usikhokela Njani?
16, 17. Yintoni esinokuyenza ukuze singenelwe ngokupheleleyo kowona mthombo wokhokelo lukaThixo iBhayibhile?
16 Owona mthombo wokhokelo lukaThixo yiBhayibhile, iLizwi lakhe eliphefumlelweyo. (Funda eyesi-2 kuTimoti 3:16, 17.) Ukuze lisincede ngokupheleleyo eli Lizwi, kuya kuba bubulumko ukuba singalindi de sifikelwe bubunzima ngaphambi kokuba sifune amazwi aluncedo eZibhalweni. Endaweni yoko, siya kukwenza umkhwa wethu ukufunda iBhayibhile yonk’ imihla. (INdu. 1:1-3) Xa sisenjenjalo siya kutsho siqhelane ngakumbi namazwi aphefumlelweyo ayo. Iingcamango zethu ziya kuvisisana nezikaThixo, sihlale sikulungele ukujamelana neengxaki ezivela ngequbuliso.
17 Ukongezelela koko, kufuneka sicamngce ngoko sikufunda eZibhalweni size sikuthandazele. Xa siphonononga iindinyana ezithile zeBhayibhile, simele sicinge indlela ezinokusinceda ngayo kwiinkalo ezithile. (1 Tim. 4:15) Xa sijamelana neengxaki ezinzulu, sithandaza kuYehova sicela asincede sifumane ukhokelo esilufunayo. Umoya kaYehova uya kusinceda usikhumbuze imigaqo yeZibhalo eziluncedo esikhe sazifunda eBhayibhileni okanye kwiimpapasho ezisekelwe kuyo.—Funda INdumiso 25:4, 5.
18. UYehova usikhokela njani ngobuzalwana bobuKristu?
18 Ubuzalwana bethu bobuKristu ngomnye umthombo obalulekileyo esinokufuna kuwo ukhokelo lukaYehova. Inxalenye ebalulekileyo yobo buzalwana “likhoboka elithembekileyo neliyingqondi” nommeli walo iQumrhu Elilawulayo, elisilungiselela ukutya kokomoya rhoqo ngeencwadi, iintlanganiso neendibano. (Mat. 24:45-47; thelekisa IZe. 15:6, 22-31.) Ukongezelela kubuzalwana bobuKristu kukho abazalwana abaqolileyo, ngokukhethekileyo abo bangabadala, abakufanelekelayo ukunceda ngesiluleko seZibhalo. (Isa. 32:1) Bona abaselula abakhulela kumakhaya amaKristu baphinda babe nomthombo ongakumbi oxabisekileyo. Abazali babo abakholwayo ligunya elimiselwe nguThixo, ibe basoloko bekhuthazwa ukuba bafune ukhokelo kulo.—Efe. 6:1-3.
19. Ziziphi iintsikelelo esizifumana ngokuqhubeka sifuna ukhokelo lukaYehova?
19 Ewe, zininzi iindlela asikhokela ngazo uYehova, ibe kuya kusinceda ukuzisebenzisa. Ethetha ngexesha xa uSirayeli wayesathembekile, uKumkani uDavide wathi: “Oobawo babekholose ngawe; babekholosile, yaye waqhubeka ubasindisa. Badanduluka kuwe, baza basinda; bakholosa ngawe, yaye abazange badane.” (INdu. 22:3-5) Ukuba sikholosa ngokhokelo lukaYehova ngokuthembeka, nathi asiyi “kudana” kwithemba esinalo. Ukuba ‘siyiqengqela kuYehova indlela yethu,’ kunokuba sithembele kobethu ubulumko, siya kusikelelwa ngendlela engathethekiyo kwangoku. (INdu. 37:5) Ukuba sinyamezela ngokunyaniseka ekuthobeleni uYehova, ezo ntsikelelo siya kuzixhamla ngonaphakade. UKumkani uDavide wathi: “UYehova ngumthandi wokusesikweni, yaye akayi kubashiya abanyanisekileyo bakhe. Ngokuqinisekileyo baya kulindwa ukusa kwixesha elingenammiselo . . . Amalungisa aya kuwudla ilifa umhlaba, ahlale kuwo ngonaphakade.”—INdu. 37:28, 29.
Ungachaza Na?
• Kutheni sithembele kukhokelo lukaYehova?
• Yintoni ethethwa kukugatya kwethu ukhokelo lukaYehova?
• Ziziphi ezinye zeenkalo ekufuneka athobeke kuzo amaKristu?
• UYehova usikhokela njani namhlanje?
[Imifanekiso ekwiphepha 8]
Ngaba ulindela ukukhokelwa nguYehova kuzo zonke iinkalo zobomi bakho?
[Umfanekiso okwiphepha 9]
UEva walugatya ulongamo lukaYehova
[Umfanekiso okwiphepha 10]
Luluphi uphawu ekwafuneka abe nalo uHagare ukuze athobele ilizwi lengelosi?