Imbono YeBhayibhile

Kutheni Sifanele Sifune Ukukhokelwa YiBhayibhile?

“Sonke iSibhalo siphefumlelwe nguThixo kwaye siyingenelo ekufundiseni, ekohlwayeni, ekulungelelaniseni izinto.”—2 Timoti 3:16.

UYE ulifune phi icebiso? Namhlanje kukho intaphane yamacebiso phantse kuyo yonke nje imibandela. Sekunjalo, abantu abaninzi bakhangela kwiBhayibhile, imibhalo yamandulo ukuze bafumane icebiso.

Noko ke, inkoliso, ayiyixabisanga iBhayibhile, ingakumbi kweli xesha lekhompyutha nobunye ubugcisa bezi mini. Abanye abafundisi-ntsapho nezazinzulu bayayixhasa imbono yokuba iBhayibhile iphelelwe lixesha. Ngaba banyanisile? Nakuba kukho imithombo emininzi abantu abanokufuna kuyo amacebiso, kutheni abantu befanele bafune ukukhokelwa yiBhayibhile?

Incwadi Yenyaniso

Ngesinye isihlandlo uYesu Kristu wayehleli ngasequleni yaye encokola nomSamariyakazi. Wathi kuye: “UThixo unguMoya, nabo bamnqulayo bamele banqule ngomoya nenyaniso.” (Yohane 4:24) La mazwi abonisa ukuba ikho indlela ethile uThixo ayamkelayo afuna ukunqulwa ngayo. Ukuze sibe sinqula ngenyaniso, indlela esinqula ngayo ifanele ivisisane noko uYehova akutyhilileyo ngaye eBhayibhileni. Ilizwi likaThixo liyinyaniso.—Yohane 17:17.

Noko ke, kukho iicawa ezininzi ezizibanga zikholelwa eBhayibhileni, yaye iyileyo naleyo ifundisa into eyahlukileyo kwenye. Ngenxa yoko, abantu abayazi kanye kanye eyona nto ifundiswa yiBhayibhile. Ngaba uYesu unguThixo, okanye ngunyana kaThixo? Ngaba kukho indawo abaphila kuyo abantu emva kokuba befile okanye akunjalo? Ngaba isihogo sikho ngokwenene, apho abantu baqhotswa khona emva kokuba befile? Ngaba uSathana ngumntu wokwenene? Kubandakanya ntoni ukuba ngumKristu? Ngaba indlela esizenza ngayo izinto kwanendlela esicinga ngayo ibalulekile kuThixo? Ngaba ukuthandana ngokwenene sisizathu esibangela ukuba abantu babe neentlobano zesini ngaphambi komtshato? Ngaba kuphosakele ukusel’ utywala?a Iicawa ezahlukahlukeneyo zizibanga zifundisa inyaniso ngale mibandela. Kodwa iimfundiso zecawa ziyaphikisana. Azinakuba zichanile zonke.—Mateyu 7:21-23.

Ngoko ke, unokuyifumana njani inyaniso ngoThixo nangendlela ayamkelayo afuna simnqule ngayo? Mhlawumbi usenokufumanisa ukuba kufuneka kwenziwe utyando oluthile kuba ugula kakhulu. Unokwenza ntoni? Ukuba kuyenzeka, ubuya kukhangela oyena gqirha uyingcaphephe kolo tyando. Ubuya kufuna inkcazelo ethile ngaye, amava anawo, udibane naye uze uthethe naye. Ekugqibeleni, emva kokuba uqinisekile ukuba ngoyena gqirha ufanelekileyo, ubuya kumthemba uze umvumele ukuba akutyande. Abanye basenokuba nembono eyahlukileyo. Kodwa uyamthemba lo gqirha kuba ngoku noko unokuthile okwaziyo ngaye.

Ngendlela efanayo, ukuba ubuhlola ngokunyanisekileyo nangokucokisekileyo ubungqina obukhoyo, unokuba nokholo kuThixo naseBhayibhileni. (IMizekeliso 2:1-4) Ukuba ufuna iimpendulo kwimibuzo engendlela eyamkelekileyo esinokumnqula ngayo uThixo, unokuzikhethela. Unokukhangela iimfundiso neembono zabantu ezingqubanayo, okanye uqwalasele imbono yeBhayibhile.

Ichanile Kwaye Iluncedo

Ukuba uyihlolisisa ngokucokisekileyo iBhayibhile uya kufumana ubungqina obubambekayo bokuba “sonke iSibhalo siphefumlelwe nguThixo kwaye siyingenelo.”b (2 Timoti 3:16, 17) Ngokomzekelo, iBhayibhile izele ziziprofeto ezineenkcukacha. Amaxwebhu embali anobungqina bokuzaliseka kwazo. (Isaya 13:19, 20; Daniyeli 8:3-8, 20-22; Mika 5:2) Nangona iBhayibhile ingeyoncwadi efundisa ngenzululwazi, ichanile kwezenzululwazi. Iqulethe inkcazelo ethile ngendalo nangempilo, ekuye kwadlula amawaka eminyaka ngaphambi kokuba izazinzulu zingqinelane nayo.—Levitikus 11:27, 28, 32, 33; Isaya 40:22.

Ukongezelela, iBhayibhile isinceda senze izigqibo zobulumko. Iqulethe intaphane yamacebiso aluncedo kubomi bentsapho, ukugula ngokwasemzimbeni nangokweemvakalelo, ezoshishino, neminye imibandela yemihla ngemihla. IMizekeliso 2:6, 7 ithi: “Kuba uYehova unika ubulumko; emlonyeni wakhe kuphuma ukwazi nokuqonda. Abathe tye uya kubagcinela ubulumko bobuqili.” Ngokufuna icebiso leBhayibhile, unokuqeqesha amandla akho okuqonda ukuze ‘wahlule okulungileyo kokubi.’—Hebhere 5:14.

Kwakhona iLizwi likaThixo lisinceda ukuba siyazi injongo yobomi. (Yohane 17:3; IZenzo 17:26, 27) Lisichazela nangentsingiselo yeziganeko ezisehlabathini. (Mateyu 24:3, 7, 8, 14; 2 Timoti 3:1-5) Kulo uThixo usichazela indlela aza kubushenxisa ngayo ububi emhlabeni nokuba abantu baza kube beyimiqabaqaba, bephila ngonaphakade.—Isaya 33:24; Daniyeli 2:44; ISityhilelo 21:3, 4.

Abantu abaninzi baye bazibonela ngawabo amehlo ukuba iBhayibhile ngumthombo onokuthenjwa wobulumko obuluncedo. Abapapashi bakaVukani! bayakukhuthaza ukuba uwahlolisise amanqaku anomxholo othi “Imbono YeBhayibhile,” abakho kwinkupho nganye yeli phephancwadi. Ngokwenjenjalo, unokufumana ubungqina obongezelelekileyo bokuba iBhayibhile ngoyena mthombo onokubhenela kuwo.

[Imibhalo esemazantsi]

NGABA WAKHA WAZIBUZA?

◼ Luhlobo olunjani lonqulo uThixo alwamkelayo?—Yohane 4:24

◼ Unokwenza ntoni ukuze uzuze kubulumko bukaThixo?—IMizekeliso 2:1-4

◼ IBhayibhile ingumthombo wamacebiso aluncedo ngayiphi indlela?—Hebhere 5:14