Unokulufumana Phi Ukhokelo Olunokuthenjwa?
“NDIYAZI, Yehova, ukuba ayikhona emntwini indlela yakhe; akukhona endodeni ehambayo ukuqinisela ukunyathela kwayo. Ndithethise, Yehova.”—Yeremiya 10:23, 24.
Umbhali weBhayibhile uYeremiya wabhala loo mazwi malunga neenkulungwane ezingama-25 ezadlulayo. Imeko ebubugxwayiba olukuyo uluntu emva kwamawaka eminyaka yokusebenzisa ukhokelo lwabantu ingqina ukuba ayinyaniso emsulwa la mazwi. Kodwa usenokubuza uthi, ‘Lunokufunyanwa phi ukhokelo olunokuthenjwa?’
Isibhalo esicatshulwe ngasentla salatha kumthombo wokhokelo nolwalathiso olunokuthenjwa ophakame kakhulu kunabantu—uMdali womntu, uYehova uThixo. Ngokuqinisekileyo akukho namnye ukwaziyo ukubunjwa komntu neemfuno zakhe ngaphezu koMdali wethu. Sekunjalo, ngaba uThixo unomdla wokusinika olo khokelo nolwalathiso? Ukwenza njani oku? Ngaba lunokusebenziseka kula maxesha siphila kuwo?
Wenziwa Ngendlela Yokuba Afumane Ukhokelo LukaThixo
Akukho mntu ungaziyo ukuba eyona nto yahlula umntu kwizilwanyana yindlela akhiwe ngayo, amandla nemisebenzi yengqondo yomntu. Kwizilwanyana phantse yonke imisebenzi yobuchopho ilungiswe kwangaphambili koko kwaziwa ngokuba bubulumko bethuku. Akunjalo kubantu.—IMizekeliso 30:24-28.
Ngokungafaniyo nobuchopho bezilwanyana, inxalenye enkulu yobuchopho bomntu ayinankcazelo esele ilungiswe kwangaphambili. UThixo wabenza abantu banenkululeko yokuzikhethela, nto leyo ebenza bakwazi ukwenza izigqibo ezibonisa ubukrelekrele baze babonise iimpawu ezibalaseleyo, ezinjengothando, isisa, ukungazingci, okusesikweni nobulumko.
Ngaba kusengqiqweni ukucinga ukuba uThixo wayenokudala umntu enamandla engqondo anjalo aze angamlungiseleli ukhokelo ngeyona ndlela ilungileyo yokuwasebenzisa? UThixo wanikela ukhokelo olungqalileyo kubantu bokuqala. (Genesis 2:15-17, 19; 3:8, 9) Kwanasemva kokuba abantu bewele esonweni, uYehova waqhubeka ewakhokela amadoda nabafazi abathembekileyo, yaye eyona ndlela iphawulekayo ebeyisebenzisa liLizwi lakhe eliphefumlelweyo, iBhayibhile. (INdumiso 119:105) Oku kuye kwabangela ukuba abantu bakwazi ukujamelana ngokunempumelelo neengxaki zamihla le zobomi njengoko beyisebenzisa ngobulumko inkululeko yabo yokuzikhethela.
Ukuyilwa KweBhayibhile NguThixo
Yintoni eyenza ukuba iBhayibhile ibe ngumthombo wokhokelo onokuthenjwa? Phakathi kwezinye izinto, inikela inkcazelo enokunikelwa nguMdali kuphela. Ichaza imbali yeziganeko ezenzeka kwakude kudala ngaphambi kokuqalisa kobomi babantu. Ngokomzekelo, inikela imbali ngendlela umhlaba owalungiselelwa ngayo ngokwamanqanaba alandelelanayo de wafanelekela ukuxhasa ubomi babantu. (Genesis, isahluko 1, 2) Nangona oku kwabhalwa eBhayibhileni ngaphezu kweminyaka engama-3 000 eyadlulayo, kuyavisisana neengcamango zenzululwazi zanamhlanje.
Kwakude kudala ngaphambi kokuba uluntu ngokubanzi luyamkele ingcamango yokuba umhlaba wawusisazinge, iBhayibhile yathi: “[UThixo] ulaneka izulu langasentla enyanyeni, axhome ihlabathi phezu kokungeni.” (Yobhi 26:7) Ngaphezu koko, iBhayibhile ityhila ukuba “ngulo uhlala phezu kwesazinge sehlabathi, abemi balo ke benjengemicikwane.” (Isaya 40:22) NguThixo, uMdali, kuphela owayenokunikela ngezi nkcukacha.
Abantu ababuphiwanga ubuchule bokukubona kwangaphambili oko kuza kwenzeka. Kunoko, uMdali ulixela kwangaphambili eBhayibhileni ikamva. UThixo waphefumlela umprofeti uIsaya ukuba abhale ngaye athi: “NdinguThixo, akukho wumbi; ndinguThixo, akukho namnye unjengam; ukuxelayo kwasekuqaleni okungasemva, nakwabamandulo okungekenzeki.”—Isaya 46:9, 10.
IBhayibhile ibonisile ukuba inako ukuxela kwangaphambili okungasemva kwasekuqaleni ngendlela echane ngokumangalisayo. Ngokomzekelo, yaxela kwangaphambili ukuvela, ukuwa neempawu zamagunya ehlabathi abelawula ebudeni bamawaka eminyaka yembali yabantu. Ezi ziprofeto zimangalisayo zabhalwa kwiinkulungwane ngaphambi kokuzaliseka kwazo, kwiimeko ezithile kumawaka eminyaka ngaphambi kokuba zizaliseke. Ngaloo ndlela iBhayibhile yazixela kwangaphambili ngokuchanileyo iziganeko zalo mhla wethu, kunye nemiphumo yazo yokugqibela. Kwakhona iBhayibhile ikhethekile kuba ibonisa indlela yokusinda ebudeni bokutshatyalaliswa koorhulumente babantu abangafezekanga eArmagedon, ‘imfazwe yaloo mini inkulu kaThixo, uSomandla.’ UBukumkani bukaThixo obusezandleni zoNyana wakhe, uYesu Kristu, buya kusiphumeza eso senzo sibalaseleyo.—ISityhilelo 16:14, 16; 17:9-18; Daniyeli, isahluko 2, 8.
Isoloko Iyingenelo—Ayize Ibe Yingozi
Ubulumko babantu abufezekanga; ngenxa yoko, isiluleko somntu asisoloko siyingenelo, nangona sisenokuba sinikelwa ngeenjongo ezintle. Akunjalo ngesiluleko seBhayibhile. UThixo uthi: “Mna Yehova, . . . ndingokufundisa okungakuncedayo, ndikunyathelise ngendlela oya kuhamba ngayo. Akwaba imithetho yam ubuyibazele indlebe! Beluya kuba njengomlambo uxolo lwakho, nobulungisa bakho bube njengamaza olwandle.”—Isaya 48:17, 18.
Ukhokelo lukaThixo lusinceda siziqonde izinto eziza kuqala size sibambelele kwimilinganiselo ephakamileyo ebomini. Ngoxa ibutho labantu lanamhlanje ligxininisa kwizinto eziphathekayo elizifezileyo nelisazisukelayo, iBhayibhile igxininisa indlela okubaluleke ngayo ukuba ‘singaxuneli ezintweni ezibonwayo, sixunele kwezingabonwayo. Kuba ezibonwayo zezomzuzwana, ke zona ezingabonwayo zezonaphakade.’ (2 Korinte 4:18) Ngale ndlela sikhuthazwa ukuba sibe nolona sukelo lufanelekileyo ebomini, oko kukuthi, usukelo lokomoya olunokuthanani nokwenza ukuthanda kukaThixo, olona sukelo lwethu ibubomi obungunaphakade kwinkqubo entsha esesikweni.
Njengoko umKristu ezibhokoxa ekusukeleni olu sukelo luphakamileyo, iziluleko zeBhayibhile zimnceda aphile obona bomi bulungileyo anokubufumana kule nkqubo yezinto ingendawo. Ubulumko babantu banamhlanje butyekele ekukhuthazeni intandabulumko yokusebenza kancinane kodwa ufumane umvuzo omkhulu. Kwelinye icala, iBhayibhile isixelela ukuba “uba lihlwempu osebenza ngesandla esidangeleyo; ke sona isandla sabakhutheleyo siyatyebisa.” Umpostile uPawulos wabhalela amaKristu angamaHebhere wathi: “Ndiqinisekile ukuba mna andinasazela nganto; kaloku ndisoloko ndinqwenela ukwenza okulungileyo maxa onke.”—IMizekeliso 10:4; Hebhere 13:18, TE.
IBhayibhile ikwanikela iziluleko ezisebenzisekayo kwilungiselelo lentsapho. Iyimisela ngokucacileyo indima yendoda neyomfazi kwilungiselelo lomtshato, kwakunye nendlela echanileyo yokukhulisa nokufundisa abantwana. Ithi: “Amelwe amadoda ukubathanda abawo abafazi, njengokuba beyimizimba yawo. . . . Umfazi ke makayoyike indoda. Nina bantwana, baveni abazali benu . . . Nani boyise, musani ukubacaphukisa abantwana benu; bondleleni ekuqeqesheni nasekululekeni kweNkosi.” Ukulandela iziluleko ezibalaseleyo zoMdali kunegalelo kakhulu ekubeni intsapho ibe yelungeleleneyo neyonwabileyo.—Efese 5:21–6:4.
Ikamva Elinqabisekileyo Kwabo Balandela Ukhokelo LukaThixo
ILizwi likaThixo elibhaliweyo libonisa isicombululo uThixo asilungiselele zonke iingxaki zoluntu. Kungentsuku zatywala uYehova uThixo uza kuyiphelisa le nkqubo ikhoyo yezinto, kunye nazo zonke iintlungu, ukungabikho kokusesikweni nokubandezeleka kwayo, aze ayithabathele indawo ngenkqubo yakhe entsha yobulungisa. IBhayibhile iyakuchaza oku kweyesi-2 kaPetros 3:7-10, ize yongezelele ithi kwindinyana 13: “Thina ke ngokwedinga lakhe silinde elitsha izulu, nomtsha umhlaba, apho kumi ubulungisa.” Ezi zezona ndaba zilungileyo zinokudluliselwa kwintsapho yabantu. Sisigidimi kanye iBhayibhile esinikelayo neso amaNgqina kaYehova asishumayelayo kumazwe angaphezu kwama-200 nakwiziqithi zolwandle.
Xa ukuthanda kukaThixo kusenziwa kuwo wonke umhlaba, yonke intsapho yabantu iya kungenelwa ngokulandela ukhokelo olubalaseleyo loMdali wayo, uYehova. Akusayi kubuya kubekho iingxaki zobuhlwempu, ulwaphulo-mthetho neziyobisi. Uluntu alusayi kubuya luthwaxwe kukugula, ukwaluphala nokufa. Intsapho yabantu iya kuphakanyiselwa kwimfezeko ababenayo abazali bethu bokuqala ngaphambi kokuba bavukele ukhokelo lukaThixo.
Hayi indlela incwadi yokugqibela yeBhayibhile eyishwankathela kakuhle ngayo imeko yolonwabo yabo bakholosa ngokhokelo lukaThixo! ISityhilelo 21:4, 5 sithi: “Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.” UMdali wethu wakuqinisekisa oko, esithi: “Uyabona, izinto zonke ndizenza ntsha.” Aze ongezelele: “Lawo ngamazwi ayinyaniso, athembekileyo.”
Ukuba siza kufumana ezi ntsikelelo, uThixo ulindele ukuba senze ntoni? Umpostile uPawulos ucacisa ukuba ukuthanda kukaThixo kukuba “bangasindiswa bonke abantu, bafikelele ekuyazini inyaniso.” (1 Timoti 2:4) AmaNgqina kaYehova akumema ngokufudumeleyo ukuba uzuze olo lwazi luchanileyo lwenyaniso ngokufundisisa iBhayibhile ngokucokisekileyo. Ngokufunda ngokuthanda kukaThixo ngenyameko, nawe unokufumanisa ngokusuka kwawakho amava ukuba ubulumko bukaThixo bukuphela kokhokelo olunokuthenjwa kula maxesha anomngcipheko. Ukungxamiseka kwala maxesha kubangela ukuba kubaluleke ngakumbi kunanini na ngaphambili ukuba sibulandele!