Ukutshata Nokuba Ngumzali Kule Mihla Yokugqibela

“Ixesha eliseleyo lifinyele.”—1 KOR. 7:29.

1. (a) Ziziphi ezinye zeenguqu eziphakathi kwezinto ‘ekunzima ukujamelana nazo’? (b) Kutheni imilinganiselo etshintshayo yentsapho isixhalabisa nje?

ILIZWI likaThixo lachaza kusengaphambili ukuba ‘ixesha lesiphelo’ laliya kuphawulwa ngeemfazwe, iinyikima, iindlala neendyikitya zokufa. (Dan. 8:17, 19; Luka 21:10, 11) Kwakhona iBhayibhile yalumkisa ngelokuba eli xesha libalulekileyo kwimbali yoluntu laliya kuza neenguqu ezinkulu kwiimeko zabantu. Iingxaki zobomi bentsapho zaziya kuba phakathi kwezinto ‘ekwakuza kuba nzima ukujamelana nazo, kule mihla yokugqibela yamanqam.’ (2 Tim. 3:1-4) Kutheni zisixhalabisa nje ezo nguqu? Kungenxa yokuba zesamele yaye zinamandla kangangokuba zingayitshintsha indlela namhlanje amaKristu awujonga ngayo umtshato nakujonga ngayo ukuba ngumzali. Njani?

2. Ihlabathi ngokubanzi liwujonga njani umtshato noqhawulo-mtshato?

² Namhlanje, uqhawulo-mtshato luyinto elula nexhaphakileyo, yaye umlinganiselo walo wanda ngendlela engathethekiyo kumazwe amaninzi. Noko ke, sifanele sikhumbule kakuhle ukuba uYehova uThixo unembono eyahluke ngokupheleleyo ngomtshato noqhawulo-mtshato kunaleyo idla ngokwamkelwa lihlabathi. Unayiphi ke imbono uYehova?

3. UYehova noYesu Kristu bawujonga njani umtshato?

³ UYehova uThixo ulindele ukuba abo batshatileyo baqhubeke bethembekile kwisifungo sabo somtshato. Xa wamanyanisa indoda nomfazi wokuqala ngomtshato, uYehova wathi ‘indoda imele inamathele emfazini wayo baze babe nyama-nye.’ Kamva uYesu Kristu wawaphinda loo mazwi waza wongezelela ngelithi: “Oko uThixo akubophelele ngedyokhwe ndawonye makungahlukaniswa mntu.” UYesu wahlabela mgama esithi: “Nabani na oqhawula umtshato nomfazi wakhe, ngaphandle kwangesizathu sohenyuzo, aze atshate nomnye uyakrexeza.” (Gen. 2:24; Mat. 19:3-6, 9) Kungeso sizathu uYehova noYesu begqala umtshato njengeqhina eliphela xa elinye iqabane lisifa. (1 Kor. 7:39) Ekubeni umtshato ungcwele, akumele kube yinto elula ukuqhawula umtshato. Enyanisweni, iLizwi likaThixo lithi uYehova uyalucaphukela uqhawulo-mtshato olungaxhaswayo ziZibhalo.a—Funda uMalaki 2:13-16; 3:6.

Wuphathe Ngentlonelo Umtshato

4. Kutheni amanye amaKristu aselula ezisola kuba eye azityhoba emtshatweni?

⁴ Ihlabathi esiphila kulo elingathobeli Thixo lithe phithi sisini. Suku ngalunye, kuboniswa intaphane yemifanekiso yesini. Asikwazi kuliphepha igalelo enokuba nalo le mifanekiso kuthi, ingakumbi kwabo baselula bathandekayo ebandleni. AmaKristu aselula afanele asabele njani kule mpembelelo ingentle, nenokuvuselela umnqweno wesini azama ngamandla ukuwulwa? Abanye baye bazama ukulwa nawo ngokutshata besebancinane kakhulu. Ngaloo ndlela, banethemba lokuba baya kukuphepha ukuziphatha kakubi ngokwesini. Noko ke, akubi kudala abaninzi bazisole ngeso sigqibo. Ngoba? Kaloku lithi lakuphela ela bhongo belikho ngoxa bebesandul’ ukutshata, bafumanise ukuba abasadibani namaqabane abo xa kufikwa kwizinto abazithandayo kubomi bemihla ngemihla. Unokuyiqonda into yokuba, ezo zibini ziba neengxaki ezinzulu.

5. Yintoni eya kunceda izibini ezitshatileyo zihlale zithembekile kwizifungo zazo zomtshato? (Bona nombhalo osemazantsi.)

⁵ Ukutshata nomntu—enoba naye ungumKristu—uze ufumanise ukuba akayiyo into obucinga ukuba uyiyo kunokuba nzima gqitha. (1 Kor. 7:28) Noko ke, enoba kunzima kangakanani na, amaKristu okwenyaniso ayazi ukuba uqhawulo-mtshato olungekho Zibhalweni alusosicombululo kwiingxaki ezibangelwa lumanyano olungenalonwabo. Kungenxa yoko, abo baqhubeka besebenza nzima ukuze balondoloze imitshato yabo kuba befuna ukunyaniseka kwizifungo zabo zomtshato befanelwe yintlonelo noncedo lothando lwebandla lamaKristu.b

6. AmaKristu aselula afanele awujonge njani umtshato?

⁶ Ngaba uselula yaye akukatshati? Ukuba kunjalo, ufanele uwujonge njani umtshato? Unokuyiphepha intlungu ukuba uyalinda de ube ukulungele ngokwasemzimbeni, engqondweni nangokomoya ukutshata ngaphambi kokuba uthandane nomKristu wesini esahlukileyo. Kambe ke, iZibhalo azibeki minyaka ekunokutshatwa ngayo.c Noko ke, iBhayibhile iyatsho ukuba, uya kuba wenza kakuhle ukulinda de udlule kwixesha apho iimvakalelo zesini zinamandla kakhulu khona. (1 Kor. 7:36) Ngoba? Ngenxa yokuba iimvakalelo zesini ezinamandla zisenokuyisitha indlela ozijonga ngayo izinto uze wenze izigqibo ezingafanelekanga nto leyo enokuphumela kwintliziyo ebuhlungu kamva. Khumbula ukuba, icebiso likaYehova lobulumko ngomtshato, eliseBhayibhileni, ulenzele ukuba kungenelwe wena uze wonwabe.—Funda uIsaya 48:17, 18.

Ukuyijonga Nzulu Imbopheleleko Yobuzali

7. Ziziphi izinto ezidla ngokwenzeka kwezinye izibini eziselula, ibe kutheni zinokubangela ubunzima nje emtshatweni?

⁷ Ezinye izibini ezitshata ziselula zizibona sele ziza kufumana umntwana ngoxa kwazona zingekaphumi kwishumi elivisayo. Azikhange zifumane thuba laneleyo lokwazana kakuhle ngaphambi kokufika kosana, olufuna ukuhoywa kangangeeyure ezingama-24 ngemini. Xa ngokuqhelekileyo umfazi enikela ingqalelo kusana lwakhe, lo myeni uselula usenokukhweleta. Ukongezelela, ukungalali kwesi sibini sinyamekela usana kunokubangela amagingxigingxi neengxaki kulwalamano lwaso. Ngequbuliso sinokufumanisa ukuba siphulukene nenxalenye enkulu yenkululeko yaso. Ngoku sisenokungakwazi ukuya kwiindawo ebesisiya ngokukhululeka kuzo ngaphambili. Simele sikujonge njani ukutshintsha kweemeko zaso?

8. Yiyiphi indlela ekufanele kujongwe ngayo ukuba ngumzali, yaye ngoba?

⁸ Kanye njengokuba umtshato ufanele uhlonelwe, nokuba ngumzali kufanele kuhlonelwe njengelungelo nembopheleleko evela kuThixo. Enoba ukubakho kosana kunokubangela luphi utshintsho kwisibini esingamaKristu, sifanele sizame ukukwenza oku ngendlela eyiyo. Ekubeni inguYehova onike abantu amandla okuvelisa abantwana, abazali bafanele bagqale usana olusandul’ ukuzalwa ‘njengelifa elivela kuYehova.’ (INdu. 127:3) Abazali abangamaKristu baya kuzama ukuphumeza iimbopheleleko zabo ‘njengabazali ngokumanyene neNkosi.’—Efe. 6:1.

9. (a) Kubandakanya ntoni ukukhulisa umntwana? (b) Yintoni enokwenziwa ngumyeni ukunceda umfazi wakhe ahlale omelele ngokomoya?

⁹ Ukukhulisa abantwana kubandakanya iminyaka emininzi yokuzincama. Kufuna ixesha namandla amaninzi. Indoda engumKristu kufuneka iqonde ukuba kangangeminyaka emininzi emva kokuba usana luzelwe, umfazi wayo usenokuphazamiseka ebudeni beentlanganiso yaye usenokungabi nathuba kangako lokwenza ufundisiso lobuqu lweBhayibhile nokucamngca ngayo. Oku kunokuyenza buthathaka impilo yakhe yokomoya. Indoda ekujonga nzulu ukuba ngumzali yenza konke okusemandleni ayo ukuze incedise ekunyamekeleni umntwana wayo. Inokuzama ukuqinisekisa ukuba umfazi wayo akaphoswa nto kwiintlanganiso ngokuthi xa sele besekhaya imbalisele ngezinye izinto ebezixutyushwa apho. Inokuncedisa ngokunyamekela usana ukuze umfazi wayo afumane ithuba lokuba nesabelo ekushumayeleni iindaba ezilungileyo zoBukumkani.—Funda eyabaseFilipi 2:3, 4.

10, 11. (a) Abantwana bakhuliselwa njani “ekweyiselweni kwengqondo kuYehova”? (b) Kutheni abazali abaninzi abangamaKristu bekufanela nje ukunconywa?

¹⁰ Ukuyithabatha nzulu imbopheleleko yobuzali kuquka okungakumbi kunokuqiniseka ukuba umntwana ufumana ukutya, impahla, indawo yokuhlala nonyango. Ingakumbi kula maxesha anzima esiphelo, abantwana kufuneka bafundiswe besebancinane imigaqo yokuziphatha abamele baphile ngayo. Abantwana kufuneka bakhuliselwe “kwingqeqesho nasekweyiselweni kwengqondo kuYehova.” (Efe. 6:4) Oku ‘kweyiselwa kwengqondo’ kuquka ukufaka engqondweni yomntwana iingcamango zikaYehova eselusana de afikelele kwiminyaka enzima yeshumi elivisayo.—2 Tim. 3:14, 15.

¹¹ Xa uYesu waxelela abalandeli bakhe ukuba bafanele ‘benze abafundi abantu beentlanga zonke,’ ngokuqinisekileyo wayebhekisela nasekubeni abazali bafanele bancede abantwana babo ukuba babe ngabafundi. (Mat. 28:19, 20) Oko kulucelomngeni ngenxa yengcinezelo ebekwa leli hlabathi kubantu abaselula. Ngoko, abazali abaphumelelayo ekukhuliseni abantwana babo babe ngamaKristu azahluleleyo bafanele banconywe gqitha ngabo bonke ebandleni. Baye ‘bayoyisa’ impembelelo yehlabathi ngokholo lwabo nangokuthembeka kwabo njengabazali abayijonga nzulu imbopheleleko yabo.—1 Yoh. 5:4.

Abangatshatanga Okanye Abangenabantwana Ngenxa Yenjongo Ebalulekileyo

12. Kutheni amanye amaKristu ekhetha ukuhlala engatshatanga kangangexesha elithile?

¹² Ekubeni “ixesha eliseleyo lifinyele,” ‘nemeko yeli hlabathi itshintsha,’ iLizwi likaThixo lisibongoza ukuba sicinge ngeengenelo zokungatshati. (1 Kor. 7:29-31) Ngenxa yoko, amanye amaKristu akhetha ukungaze atshate okanye ahlale engatshatanga kangangeminyaka ethile aze atshate kamva. Okuncomekayo kukuba, akasebenzisi inkululeko yokungatshati ukuze atyebise iziqu zawo. Amaninzi ahlala engatshatanga ukuze akhonze uYehova “ngaphandle kwesiphazamiso.” (Funda eyoku-1 kwabaseKorinte 7:32-35.) Amanye amaKristu angatshatanga aba ngoovulindlela okanye abasebenzi baseBheteli. Abaninzi baye bafune ukusetyenziswa yintlangano kaYehova ngokufanelekela ukuya kwiSikolo Sokuqeqesha Abalungiseleli. Eneneni, abo baye bakwinkonzo yexesha elizeleyo kangangethuba elithile ngoxa bengekatshati baza kamva bagqiba kwelokuba batshate badla ngokutsho ukuba umtshato wabo uncedwa zizinto ezixabisekileyo abaye bazifunda kuloo minyaka yangaphambi kokutshata kwabo.

13. Kutheni ezinye izibini zikhetha ukuhlala zingenabantwana nje?

¹³ Kwezinye iindawo ehlabathini kuye kwakho olunye utshintsho kubomi bentsapho—izibini ezininzi ezitshatileyo ziye zagqiba kwelokuba zihlale zingenabantwana. Ezinye zikwenza oko ngenxa yezizathu zoqoqosho; ezinye zenjenjalo ukuze zizenzele imali ngokukhululekileyo. Phakathi kwamaKristu zikho nezinye izibini ezingenabantwana. Noko ke, ixesha elininzi zikwenza oko ukuze zikhonze uYehova ngokukhululeka. Oku akuthethi kuthi ezo zibini azinandiphi ubomi bomtshato obuqhelekileyo. Ziyabunandipha. Sekunjalo, zikulungele ukubeka izilangazelelo zoBukumkani ngaphezu kwamanye amalungelo ahambisana nomtshato. (1 Kor. 7:3-5) Ezinye kwezi zibini zikhonza uYehova nabazalwana bazo kumsebenzi wesiphaluka nowesithili okanye eBheteli. Ezinye zingoovulindlela okanye abathunywa bevangeli. UYehova akasayi kuze awulibale umsebenzi wazo nothando ezilubonisayo ngegama lakhe.—Heb. 6:10.

‘Imbandezelo Enyameni’

14, 15. Yiyiphi “imbandezelo enyameni” enokuviwa ngabazali abangamaKristu?

¹⁴ Umpostile uPawulos waxelela amaKristu atshatileyo ukuba ayeya kuba ‘nembandezelo enyameni yawo.’ (1 Kor. 7:28) Le mbandezelo isenokuquka impilo enkenenkene yesibini esitshatileyo, abantwana baso okanye abazali baso abalupheleyo. Isenokuquka iingxaki nentliziyo ebuhlungu enxulumene nokukhulisa kwaso abantwana. Njengoko kukhankanywe ekuqaleni kweli nqaku, iBhayibhile yaxela kwangaphambili ukuba ‘imihla yokugqibela’ iya kuza ‘namaxesha amanqam ekunzima ukujamelana nawo.’ Phakathi kwezinto ekunzima ukujamelana nazo iya kuba ngabantwana “abangathobeli bazali.”—2 Tim. 3:1-3.

¹⁵ Ukukhulisa abantwana kulucelomngeni kubazali abangamaKristu. Asigonywanga kwimiphumo ebuhlunga yala “maxesha amanqam.” Ngenxa yoko, abazali abangamaKristu kufuneka baqhubeke besilwa nempembelelo embi ‘inkqubo yezinto yeli hlabathi’ enokuba nayo ebantwaneni babo. (Efe. 2:2, 3) Yaye abasoloko beliphumelela eli dabi! Xa umntwana wentsapho engamaKristu eyeka ukukhonza uYehova, iba ‘yimbandezelo’ yokwenene kubazali abaye bazama ukumkhulisa ngenyaniso kaThixo.—IMize. 17:25.

“Kuya Kubakho Imbandezelo Enkulu”

16. Yiyiphi “imbandezelo” awaprofeta ngayo uYesu?

¹⁶ Nayiphi na ‘imbandezelo’ efunyanwa emtshatweni nangokukhulisa abantwana iya kodlulwa yenye imbandezelo enkulu kunayo. Kwisiprofeto esiphathelele ubukho bakhe nokupheliswa kwale nkqubo yezinto, uYesu wathi: “Kuya kubakho imbandezelo enkulu ekungazange kubekho injengayo ukususela ekuqaleni kwehlabathi de kube ngoku, nekungasayi kubakho injengayo kwakhona.” (Mat. 24:3, 21) Kamva uYesu wathi kukho isihlwele esikhulu esiya kusinda kule “mbandezelo inkulu.” Noko ke, uSathana uya kuqhubeka esilwa ehlasela amaNgqina kaYehova aseluxolweni. Akuthandabuzeki ukuba eli iya kuba lixesha elinzima kuthi sonke—kubantu abadala nabantwana ngokufanayo.

17. (a) Kutheni siqinisekile nje ngekamva? (b) Yintoni emele iphembelele indlela esiwujonga ngayo umtshato nokuba ngumzali?

¹⁷ Sekunjalo asifanele sibe nedyudyu ngokungeyomfuneko xa sicinga ngekamva. Abazali abathembekileyo kuYehova banethemba lokukhuselwa kunye nabantwana babo. (Funda uIsaya 26:20, 21; Zef. 2:2, 3; 1 Kor. 7:14) Kodwa, okwangoku ngamana ukwazi kwethu ngale mihla yamanqam siphila kuyo kungaphembelela indlela esiwujonga ngayo umtshato nokuba nabantwana kweli xesha lesiphelo. (2 Pet. 3:10-13) Ngaloo ndlela, ubomi bethu—enoba sitshatile okanye asitshatanga, sinabantwana okanye asinabo—buya kumzukisa uYehova nebandla lamaKristu.

[Imibhalo esemazantsi]

Impinda

• Kutheni amaKristu aselula engafanele azityhobe emtshatweni?

• Kubandakanya ntoni ukukhulisa umntwana?

• Kutheni amaKristu amaninzi ekhetha ukungatshati okanye ukuba atshatile ekhetha ukungabi nabantwana?

• Yiyiphi ‘imbandezelo’ efunyanwa ngabazali abangamaKristu?

[Umfanekiso okwiphepha 17]

Kutheni kububulumko ukuba amaKristu aselula alinde de akhule ngokwaneleyo ngaphambi kokutshata?

[Umfanekiso okwiphepha 18]

Kuninzi okunokwenziwa yindoda ukunceda umfazi wayo abe negalelo ngokupheleleyo kwizinto zokomoya

[Umfanekiso okwiphepha 19]

Kutheni amanye amaKristu ekhetha ukungabi nabantwana?