Ileta Evela EOstreliya

“Ndiza Kuhlala Phantsi Ndize Ndiyifunde Ngasemlilweni”

XA KUTHETHWA ngamaphandle aseOstreliya engqondweni kuthi qatha iintlango ezomileyo, ingqatsini yelanga nemihlaba emikhulu. Kodwa kuloo ntlango kuhlala abantu abali-180 000, aba bantu bamalunga nesinye ekhulwini sabantu beli lizwe.

Xa ndandisemncinane ndandidla ngokupheleka abazali bam xa beye kushumayela kuloo magqagala. Kwakusithi ngco ngaphakathi xa ndiwondele. Ndandibathanda abantu balapha kuba babe nemizimba emihle benobubele. Ngoku ekubeni nam ndineyam intsapho ndifuna umfazi wam nabantwana bam ababini, omnye uneminyaka eli-10 ubudala omnye eli-12 ubudala nabo baxhamle le nyhweba.

Ukuceba Uhambo

Saqala sahlala phantsi sabal’ indleko. Sasinemali engakanani? Sasinokuhamba ixesha elide kangakanani? Saye sathelelwa sisibini esitshatileyo noodade ababini abangabashumayeli bexesha elizeleyo ebandleni lethu. Sagqiba ekubeni siye phakathi enyakeni xa izikolo zivaliwe. Sabhalela iofisi yesebe lamaNgqina kaYehova yaseOstreliya sicela intsimi esasiza kuyisebenza. Sanikwa umhlaba okufuphi nedolophana esemaphandleni iGoondiwindi ekwintshona yeBrisbane apho sihlala khona.

Savuya gqitha sakufumanisa ukuba kwakukho ibandla elincinane lamaNgqina kaYehova eGoondiwindi. Ukudibana namanye amaNgqina yayiza kuba yimbalasane yohambo lwethu. Saqhagamshelana nelo bandla ukuze silazise ngotyelelo lwethu. Ukulangazelela kwabo ukuza kwethu kwasenza saqiniseka ukuba babekhangele phambili ekudibaneni nathi.

Saxubusha indlela esasiza kushumayela ngayo kubantu basemaphandleni ngaphambi kokuba sinduluke. Sasingafuni ukukhubekisa abantu boMthonyama esasinokudibana nabo. Ngokomzekelo, ezinye izizwe zalapho zizigqala iindawo ezihlala kuzo njengemihlaba yazo. Ngoko ke, ukungathobeli isithethe salapho kunokujongwa njengendelelo.

Ukufika Kwethu Emaphandleni

Ekugqibeleni yafik’ imini ebikad’ ixelwa. Sayibopha yamincinane imithwalo yethu saza sajongisa imibombo emaphandleni. Sacand’ amathafa, sishiya ngasemva amasimi alinyiweyo kwelo langa lifudumeleyo lasebusika eligqatsa kamnandi. Emva kweeyure ezithile safika kwidolophu yaseGoondiwindi saza salala kumagumbi aqeshisayo.

Ngecawa imozulu yayintle yaye saya kushumayela. Ehlotyeni iqondo lobushushu lidla ngokuba ngaphezu kwama-40 ngokukaCelcius. Indawo yokuqala esamisa kuyo yayiyeyabemi boMthonyana ekumgama weekhilomitha ezingama-30 ukusuka kwindawo esasifikele kuyo. Sathunyelwa kuJenny, inkondekazi engusibonda walapha. Wasiphulaphula ngenyameko isigidimi sethu waza wayamkela ngovuyo incwadi ethi Funda Kumfundisi Omkhulu.a Emva koko wasivumela ukuba sishumayele kweso siphaluka sakhe.

Abantwana babaleka bayokuchazela abantu ukuba sifikele. Bonke abantu esathetha nabo basiphulaphula isigidimi sethu yaye balwamkela uncwadi lweBhayibhile. Ngexesha nje elingephi uncwadi lwethu lwaluphelile yaye kwafuneka sibuyele edolophini ukuze siye kwiintlanganiso. Ngaphambi kokuba sihambe sathembisa ukubuyela kubo bonke abo singakhange sifumane thuba lakuncokola nabo.

Ngaloo mvakwemini iHolo yoBukumkani yayizele ngabantu ababechwayitile, bencokola yaye besakha namaqhina obuhlobo. AmaNgqina alapha angama-25 ebesoloko edlulisela isigidimi soBukumkani kubantu balapha abali-11 000 abasasazeke kumhlaba ozizikwekhilomitha ezingama-30 000. Elinye iNgqina lalapha labulela lathi: “Sibamba ngazibini ngokusinceda kwenu.” Emva kweentlanganiso ezihlaziyayo saya kufumana into esiwa phantsi kwempumlo. Ngaphambi kokuba silale samana ukuphosela ukutya izilwanyana zasendle ezaziyabula kufutshane nalo ndawo sasiqashe kuyo.

“Ebusuku Ngasemlilweni”

Kwiintsuku ezimbini ezalandelayo, saya kwimimandla esemaphandleni eyayikufuphi nomda waseQueensland-New South Wales. Inxalenye enkulu yalo mmandla womile, kukho ingca, namatyholo egam adliwa ziigusha neenkomo. Ecaleni kwendlela sabona iikangaroo ezathi zakusibona zathi nta iindlebe. Iinciniba zaseOstreliya zazinyalasa mgama kumadlelo abiyelweyo.

Emva kwemini ngoLwesibini sadibana nomhlambi weenkomo uthe chu ecaleni kwendlela. Ngamaxesha embalela abelusi behla benyuka nemfuyo yabo kulo mmandla. Akuzange kube kudala sadibana nomalusi ekhwel’ ihashe. Ndemis’ imoto ndaphuma ndambulisa. Waphendula wathi: “Ewe ke.” Le ndoda iliqina eyayisalusa nenja yayo yema sancokola.

Emva kokuncokola ngembalela ndangena eBhayibhileni. Le ndoda yathi: “Andizange ndive ngeBhayibhile ukususela ebuntwaneni.” Yalibeka kubefundisi ityala ngokuwohloka kwemilinganiselo yokuziphatha ehlabathini. Sekunjalo, yayinentlonelo enzulu ngeBhayibhile. Emva kwengxubusho yeZibhalo ndayishiyela incwadi ethi Yintoni Ngokwenene Efundiswa YiBhayibhile?b Yayithabatha yayifaka epokothweni yehempe yaza yathi: “Ukuba iza kundixelela oko kufundiswa yiBhayibhile, ndiza kuhlala phantsi ecaleni komlilo ngobu busuku ndize ndiyifunde.”

Ukubuyel’ ekhaya

Ngobo busuku eHolweni yoBukumkani sabalisela abazalwana noodade amava. Bathembisa ukubuyela kwabo babebonakalise umdla esasidibene nabo. Emva kweentlanganiso kwakunzima ukwahlukana nabo. Kwakukho ulwalamano oluluqilima phakathi kwethu. Somelezwa kukukhuthazana ngokomoya.

Ngengomso sabuyel’ ekhaya. Xa sicinga ngohambo lwethu siyaqonda ukuba uYehova wayisikelela imigudu yethu. Saziva sihlaziyekile ngokomoya. Ukufika kwethu ekhaya, ndabuza abantwana ukuba: “Ningathand’ ukulichithela phi ikhefu lenu kwixesha elizayo? Ezintabeni?” Baphendula bathi: “Hayi Tata masiye kushumayel’ emagqagaleni kwakhona.” Inkosikazi yathi: “Ninyanisile masiphindeni siye. Lelona khefu belimnandi!”

[Imibhalo esemazantsi]