“Intwazana YomSirayeli” Yomhla Wethu
NGOWAMA-2006, iiveki ezimbini ngaphambi kweSikhumbuzo sokufa kukaYesu lungu ngalinye lentsapho yakwaSales ePraia Grande, eBrazil, lenza uludwe lwabantu oluza kubamema. UAbigayl oneminyaka emithandathu ubudala wanikwa isimemo emva koko wabuzwa ukuba ufuna ukusinika bani.
Waphendula wathi: “Ndiza kusinika la tata udla ngokundincumela.”
Abazali bakhe bambuza: “Ngubani loo tata?
Waphendula wathi: “Ngula tata uhamba ngesitulo esinamavili.”
Emva kweentsuku ezine uAbigayl wabonisa abazali bakhe lo tata. Le ndoda egama linguWalter yayihlala kufutshane neHolo yoBukumkani. Kwiminyaka eli-15 eyadlulayo, xa yayineminyaka engama-28 ubudala yafumana ingozi yemoto eyayishiya ife umzimba ongezantsi. Ekubeni yayiyindoda enemali yayinabantu ababini ababeyigada. Emva kokuba uAbigayl efumene imvume yokuthetha nayo, abazali bakhe bayichazela le ndoda ukuba intombi yabo ifuna ukumnika isimemo.
Esakugqiba ukuthetha, uAbigayl wathi: “Bonke abanye abantu abakwiHolo yoBukumkani banezimemo ezininzi kodwa mna ndinesimemo esinye kuphela. Ngenxa yoko ndimema wena kuphela. Ukuba awuzi akukho mntu uya kuhlala nam. Kodwa ukuba uzile ndiya konwaba gqitha kodwa uYehova uya konwaba ngakumbi.”
Ngosuku lweSikhumbuzo, amaNgqina kuquka noAbigayl ayecoca iHolo yoBukumkani elungiselela iSikhumbuzo. Ngaloo mvakwemini uWalter wadlula wathi akubona uAbigayl wayalela umqhubi ukuba amise imoto. Wavula ifestile waza wabuza uAbigayl ukuba wenza ntoni. Wamxelela ukuba bacoca iHolo yoBukumkani ukuze afike ikwimeko entle.
Ngaloo ngokuhlwa uAbigayl wayexhalabile. Intetho yaqalisa yaye wayemana ejonga ukuba uWalter akakafiki na. Kungekudala uWalter wafika ehamba nonogada bakhe. Watsho ngoncumo olugoso. Emva kwentetho uWalter wachaza ukuba ebesiya kwesinye isixeko kodwa uye wajika esithubeni kuba ecinga ngeSikhumbuzo. Wolek’ umsundulu esithi: “Le ntetho ihlab’ emxholweni.” Wacela ukuqhutyelwa isifundo seBhayibhile waza waqalisa ukuya kwiintlanganiso.
Udadebo Walter wathi ufuna ukudibana noAbigayl kuba ubhuti wakhe usoloko ethetha ngaye. Ekugqibeleni wade wambona. Wathi: “Ndiyasibona isizathu sokuba ubhuti onwabe kangaka.
UWalter usaqhubeka efundelwa yaye uyaya nakwiintlanganiso. Ude athethe nabanye ngezinto aye wazifunda. Ngokuqinisekileyo uAbigayl usikhumbuza ngentwazana yakwaSirayeli eyanceda uNahaman ukuba azi ngoThixo oyinyaniso uYehova.—2 Kumkani 5:2-14.