Ubuthathaka Bomntu Buphakamisa Amandla KaYehova

“Wonke umntu wayecinga ukuba ndonwabe gqitha yaye ndingumlungiseleli odlamkileyo wexesha elizeleyo. Ndandisoloko ndibanceda abanye kwiingxaki abanazo. Noko ke, kwangaxeshanye, ndandivakalelwa ngokungathi ndiyafa ngaphakathi. Ndandidliwa ngumvandendwa kwaye ndicinezelekile ngokwasengqondweni. Ndaqalisa ukuba likheswa. Ndandifuna nje ukuhlala ekhaya ndilale. Kangangeenyanga, ndandibongoza uYehova ukuba andivumele ndife.”—Vanessa.

NJENGAKWIMEKO ekhankanywe apha ngasentla kufanele kulindelwe ukuba maxa wambi abakhonzi bakaYehova baya kujamelana nemiphumo yokuphila kula ‘maxesha amanqam ekunzima ukuqhubana nawo.’ (2 Timoti 3:1) Bambi basenokude badimazeke. (Filipi 2:25-27) Xa kungapheli, ukuphelelwa lithemba kusenokusenza siphelelwe ngamandla, kuba iBhayibhile ithi: “Uthe waphelelwa ngemini yembandezelo, oba ebandezelwe amandla akho.” (IMizekeliso 24:10) Ewe, xa sidimazekile, sifuna amandla—mhlawumbi kwanoko umpostile uPawulos wakubiza ngokuthi ‘ngamandla angaphaya kokuqhelekileyo.’—2 Korinte 4:7.

UYehova uThixo ungumthombo wamandla angenakuphela. Oku kunokubonwa xa sihlolisisa indalo yakhe. (Roma 1:20) Ngokomzekelo, qwalasela ilanga. Umhlaba wamkela ukuhamba okuthe chu kwamandla obushushu angamawaka ezigidi ezingama-240 avela elangeni. Sekunjalo, eli nani limela isiqingatha senxalenye enye yewaka lezigidi kuphela yoko kuveliswa ngamandla elanga. Yaye ilanga lincinane xa lithelekiswa neenkwenkwezi ezibizwa ngokuba ziinkwenkwezi ezinkulu. Phakathi kwezi yiRigel, inkwenkwezi ephakathi kweqela leenkwenkwezi zeOrion enkulu ngokuphindaphindwe kangangama-50 kunelanga yaye ikhupha amandla awongezelelekileyo kangangezihlandlo ezingama-150 000!

UMdali waloo mandla asezulwini umele ukuba naye “ukhaliphile ngamandla.” (Isaya 40:26; INdumiso 8:3, 4) Eneneni, umprofeti uIsaya wathi uYehova “akatyhafi, akadinwa.” Yaye uThixo ukulungele ukwabelana naye nabani na ngamandla akhe kwabo bathi, ngenxa yobuthathaka bomntu, bavakalelwe kukuba bayatyhafa. (Isaya 40:28, 29) Indlela akwenza ngayo oku iboniswa kwimeko yompostile uPawulos ongumKristu.

Ukuhlangabezana Nezilingo

UPawulos waxelela abaseKorinte ngomqobo ekwakuza kufuneka ewunyamezele. Wawubiza ngokuthi ‘liliva elisenyameni.’ (2 Korinte 12:7) Eli “liva” kusenokuba yayiyingxaki yempilo, mhlawumbi ukungaboni kakuhle. (Galati 4:15; 6:11) Okanye uPawulos kusenokuba wayebhekisela kubapostile bobuxoki nabanye abaphazamisi ababecel’ umngeni ukuba ngumpostile kwakhe nomsebenzi wakhe. (2 Korinte 11:5, 6, 12-15; Galati 1:6-9; 5:12) Enoba laliyintoni na, eli “liva lisenyameni” lamxhwalekisa ngokunzulu uPawulos, yaye ngokuphindaphindiweyo wayethandazela ukuba lisuswe.—2 Korinte 12:8.

Noko ke, uYehova akazange amnike uPawulos oko wayekucela. Kunoko, wathi kuPawulos: “Ububele bam obunganifanelanga bukulingene.” (2 Korinte 12:9) UYehova wayethetha ukuthini ngoku? Kaloku, xa siqwalasela ikhondo langaphambili likaPawulos lokutshutshisa amaKristu, kwakungenxa yobabalo olwalungamfanele kuphela awayenokuthi abe nolwalamano noThixo—kungasathethwa ke ngokukhonza njengompostile!a (Thelekisa uZekariya 2:8; ISityhilelo 16:5, 6.) Kusenokuba uYehova wayexelela uPawulos ukuba ilungelo lokuba ngumfundi ‘lalanele.’ Lalingenakunxulunyaniswa nokususwa kweengxaki zoluntu ngokungummangaliso. Eneneni, obunye ubunzima busenokuza ngenxa yamalungelo ongezelelekileyo. (2 Korinte 11:24-27; 2 Timoti 3:12) Enoba kwakutheni na uPawulos wayemele alinyamezele elo “liva lisenyameni.”

Noko ke, oku kwakungathethi ukuba uYehova ngolunya wayemlahla uPawulos. Kunoko, wathi kuye: “Kuba amandla am enziwa agqibelele kubuthathaka.” (2 Korinte 12:9) Ewe, ngothando uYehova wayeya kumnika amandla uPawulos ukuze akwazi ukuhlangabezana nemeko yakhe. Ngaloo ndlela, “iliva elisenyameni” kuPawulos lamfundisa okuthile. Wafunda ukuthembela emandleni kaYehova kunawakhe. Kuyabonakala ukuba uPawulos wasifunda kakuhle esi sifundo, kuba kwiminyaka eyalandelayo kamva wabhalela abaseFilipi esithi: “Ndiye ndafunda ukuthi, nakwiziphi na iimeko endikuzo, ndaneliseke. Ezintweni zonke ndinamandla ngenxa yalowo undomelezayo.”—Filipi 4:11, 13.

Kuthekani ngawe? Ngaba unyamezele uhlobo oluthile ‘lweliva enyameni,’ mhlawumbi ukugula okanye imeko ethile ebomini ekubangela ukuba uxhalabe gqitha? Ukuba kunjalo, thuthuzeleka. Ngoxa uYehova engenakuwususa ngokungummangaliso loo mqobo, usenokukunika ubulumko nenkalipho ukwazi ukuhlangabezana nawo njengokuba uqhubeka ubeka izilangazelelo zoBukumkani kuqala ebomini.—Mateyu 6:33.

Ukuba ukugula okanye ukwaluphala kuya kuthintela ekuphumezeni kangangoko ufuna kumsebenzi wobuKristu, ungalahl’ ithemba. Kunokuba ujonge isilingo sakho njengesikusikel’ umda enkonzweni yakho kuYehova, sijonge njengethuba lokwandisa intembelo yakho kuye. Kwakhona, khumbula ukuba, ukuxabiseka kwenkonzo yamaKristu akuthelekiswa nobungakanani abuphumeze kwinkonzo yakhe, kodwa ngokholo nangobunzulu bothando lwakhe. (Thelekisa uMarko 12:41-44.) Ukuthanda uYehova ngomphefumlo wakho uphela kuthetha ukuba umkhonza ngawo onke amandla onawo—hayi ngawomnye umntu.—Mateyu 22:37; Galati 6:4, 5.

Ukuba elo ‘liva lakho lisenyameni’ liquka imeko exhwalekisayo ebomini, enjengokufa komthandayo, phulaphula isiluleko seBhayibhile esithi: “Umthwalo wakho wulahlele kuYehova; yena wokuzimasa. Akayi kuliyekela ilungisa lishukunyiswe naphakade.” (INdumiso 55:22) Ibhinqa elingumKristu uSylvia lakwenza oku. Kwithuba nje leminyaka embalwa, lafelwa ngumyeni walo emva kweminyaka engama-50 betshatile kwanamalungu entsapho asithoba—kuquka abazukulwana ababini abaselula. USylvia uthi: “Ukuba kwakungekho ngenxa kaYehova, ndandiya kuba buhlungu ngokungalawulekiyo. Kodwa ndifumana intuthuzelo engakumbi emthandazweni. Ndiba nencoko engapheliyo noYehova. Ndiyazi ukuba undipha amandla okukwazi ukunyamezela.”

Hayi indlela ekuthuthuzela ngayo ukwazi ukuba “uThixo wentuthuzelo yonke” unokunika abo basentlungwini amandla okukwazi ukunyamezela! (2 Korinte 1:3; 1 Tesalonika 4:13) Sikwazi oku, sinokuwaqonda amazwi uPawulos awuqukumbela ngawo lo mbandela. Wabhala: “Ndiyakholiswa bubuthathaka, kukuthukwa, kukuswela, ziintshutshiso neenzima, ngenxa kaKristu. Kuba xa ndibuthathaka, ndithi ke ndibe namandla.”—2 Korinte 12:10.

Ukuhlangabezana Nokungafezeki

Sonke sinesono esasizuz’ ilifa kubazali bethu bokuqala abangabantu. (Roma 5:12) Ngenxa yoko, sisedabini lokulwa nomnqweno wenyama ebuthathaka. Hayi indlela ekutyhafisa ngayo ukufumanisa ukuba imikhwa “yomntu omdala” ibambelele kakhulu kuthi kunokuba besicinga! (Efese 4:22-24) Ngamaxesha anjalo sisenokuvakalelwa ngendlela umpostile uPawulos awavakalelwa ngayo, owabhala wathi: “Ngokwenene ndiyayoliswa ngumthetho kaThixo ngokomntu endinguye ngaphakathi, kodwa ndibona omnye umthetho emalungwini am usilwa ngokunxamnye nomthetho wengqondo yam yaye undikhokelela ndithinjiwe kumthetho wesono osemalungwini am.”—Roma 7:22, 23.

Kwanathi, sisenokuzenza sikulungele ukufumana amandla avela kuYehova. Xa usilwa nobuthathaka bakho, ungaze uyeke ukusondela kuye ngomthandazo, uzingisa ufuna ukuxolelwa nguye kungakhathaliseki ukuba uthethe ngokufuthi kangakanani naye ngengxaki enye. Ngenxa yobabalo lwakhe olungasifanele, uYehova, “ongumlinganisi weentliziyo” nonokubona ubunzulu bokunyaniseka kwakho, uya kukunika isazela esicocekileyo. (IMizekeliso 21:2) Ngoncedo lomoya wakhe oyingcwele, uYehova unokukunika amandla okuqhubeka nomlo wenyama ebuthathaka.—Luka 11:13.

Kwakhona sifuna amandla avela kuYehova xa siqhubana nokungafezeki kwabanye. Ngokomzekelo, umKristu usenokuthetha nathi “njengokuhlaba kwekrele.” (IMizekeliso 12:18) Oku kusenokusenzakalisa ngokunzulu, ngokungakumbi ukuba kuvela kumntu esivakalelwa kukuba umele azi bhetele. Sisenokuphazamiseka ngokunzulu. Abanye baye basebenzisa ukoniwa okunjalo njengesingxengxezo sokushiya uYehova—eyona mpazamo inkulu!

Noko ke, isimo sengqondo esifanelekileyo siya kusinceda sikwazi ukuqwalasela ubuthathaka babanye ngendlela efanelekileyo. Asinakulindela imfezeko kubantu abangafezekanga. Indoda esisilumko uSolomon iyasikhumbuza: “Ngokuba akukho mntu ungoniyo.” (1 Kumkani 8:46) UArthur, ongumKristu othanjisiweyo owakhonza uYehova ngokuthembeka kangangamashumi asixhenxe eminyaka, wathi: “Ubuthathaka bomnye umkhonzi businika ithuba lokuba sibonise ingqibelelo yethu, sivavanye ukomelela kobuKristu bethu. Ukuba sivumela oko kuthethwa ngabantu okanye bakwenzayo kungenelele ekukhonzeni kwethu uYehova, sikhonza abantu. Ngaphezu koko, abazalwana bethu bamele ukuba nabo bayamthanda uYehova. Ukuba sikhangela iimpawu ezintle kubo, kungekudala siya kubona ukuba kakade ke abababi kangako.”

Amandla Okushumayela

Ngaphambi kokuba anyukele ezulwini, uYesu wabaxelela oku abafundi bakhe: “Niya kwamkela amandla xa umoya oyingcwele ufika kuni, yaye niya kuba ngamangqina am kokubini eYerusalem nakulo lonke elakwaYuda naseSamariya kude kuse nakwezona nxalenye zikude zomhlaba.”—IZenzo 1:8.

Ngokuvumelana namazwi kaYesu, lo msebenzi ngoku wenziwa ngamaNgqina kaYehova emhlabeni wonke kumazwe angama-233. Ewonke, achitha ngaphezu kwewaka lezigidi zeeyure nyaka ngamnye enceda abanye ukuze bazuze ulwazi ngoYehova. Ukuphumeza lo msebenzi akusoloko kulula. Kwamanye amazwe umsebenzi wokushumayela ngoBukumkani uvaliwe okanye ubekelwe imiqathango. Kwakhona, cinga ukuba ngoobani abenza lo msebenzi—ngabantu ababuthathaka nabangafezekanga, ngamnye wabo eneengxaki nezinto ezithile ezimxhalabisayo. Sekunjalo umsebenzi uyaqhubeka, yaye ngenxa yoko kule minyaka mithathu idluleyo, abantu abangaphezu kwesigidi baye bahlulela ubomi babo kuYehova baza babonakalisa ukuzahlulela kwabo ngokubhaptizwa emanzini. (Mateyu 28:18-20) Enyanisweni, lo msebenzi ufezwa kuphela ngamandla kaThixo. UYehova wathi ngomprofeti uZekariya: “Akungabukroti, akungamandla, kungoMoya wam.”—Zekariya 4:6.

Ukuba ungumvakalisi weendaba ezilungileyo, unesabelo—kungakhathaliseki ukuba sikhangeleka sisincinane kangakanani—kulo msebenzi mkhulu uphunyezwayo. Kungakhathaliseki ‘ameva’ ekufuneka uwanyamezele, unokuqiniseka ukuba uYehova akasokuze awulibale ‘umsebenzi wakho nothando olubonisileyo ngegama lakhe.’ (Hebhere 6:10) Ngoko qhubeka uthembela kulo Mthombo ukhaliphileyo ngamandla ukuze ufumane inkxaso. Khumbula ukuba, sinokuncedwa ngamandla kaYehova kuphela ukuze sinyamezele; amandla akhe enziwa agqibelela ngenxa yobuthathaka bethu.

[Imibhalo esemazantsi]

[Umfanekiso okwiphepha 26]

Umsebenzi wokushumayela ufezwa ngamandla kaYehova kuphela