IBhayibhile Itshintsha Ubomi Babantu
Yintoni eyenza ilungu leqela lemigulukudu laseMexico elibizwa ngokuba yiJunior Satans litshintshe lize libe ngumntu onyanisekileyo nokhutheleyo? Yintoni eyabangela ibhinqa elingusomashishini laseJapan liyeke usukelo lwalo lokuzifunela ubutyebi kwaye liziva njani ngeenguqulelo elizenzileyo ebomini balo? Yintoni eyabangela umrhwebi wezixhobo waseRashiya ale ukunaniselana ngokungekho mthethweni? Makhe sibayeke bazithethele.
INGXELO NGOBOMI
IGAMA: ADRIAN PEREZ
IMINYAKA: 30
ILIZWE: MEXICO
UBOMI BANGAPHAMBILI: ILUNGU LEQELA LEMIGULUKUDU
UBOMI BANGAPHAMBILI: Xa ndandineminyaka eli-13 ubudala intsapho yakowethu yafudukela e-Ecatepec de Morelos, eMexico State. Ngelo xesha, lo mmandla wawuzaliswe lulutsha oluzinjubaqa, olwalonakele nolwaluphila ngeziyobisi. Ngokukhawuleza ndaqalisa ukusebenzisa kakubi utywala, ndisonakalisa izinto zabantu yaye ndiziphethe kakubi.
Kamva, sabuyela kwidolophu yaseSan Vicente apho ndazalelwa khona. Noko ke ayesela andile amakhoboka eziyobisi kulo dolophu. Yayiyinto eqhelekileyo ukubona ulutsha luthe naa ezitratweni. Ndazibandakanya neqela elibizwa ngokuba yiJunior Satans. Sasisiba yaye sisebenzisa neziyobisi njengokufunxa imichiza okanye iglue. Amaxesha amaninzi ndandingayazi ukuba ndiye ndagoduka njani yaye maxa wambi ndandisithi natya esitratweni ndingekho zingqondweni. Abanye babahlobo bam baphelel’ entolongweni ngenxa yobusela nokubulala.
Phezu kwazo nje izinto ezimbi endandizenza, ndandikholelwa kuThixo. Ukuze ndidambise umvandedwa endandinawo, kwiVeki Engcwele ndandisiya kwimibhiyozo yecawa ndikhase kwindlela yomnqamlezo. Emva koko sonke kuquka nomlinganiswa owayesiba nguKristu sasibhiyozela ukuba nenxaxheba kwethu kwesi siganeko ngokunxila.
INDLELA IBHAYIBHILE EYABUTSHINTSHA NGAYO UBOMI BAM: Ngasekupheleni kweminyaka yam yokuba kwishumi elivisayo, ndaqalisa ukufunda iBhayibhile namaNgqina kaYehova. Ndandiqonda ukuba ubomi bam babungenanjongo ukuba ndandinokuqhubeka ndiphila ngaloo ndlela izinto zazingazo kundihambela kakuhle. Eyona nto yandichukumisayo ngamazwi abhalwe kumaGalati 6:8 athi: “Lowo uhlwayelela eyakhe inyama uya kuvuna ukonakala ngokwasenyameni, kodwa lowo uhlwayelela umoya uya kuvuna ubomi obungunaphakade ngokwasemoyeni.” Lo mbhalo wandenza ndaqonda ukuba ukuze izinto zindihambele kakuhle, kwakuza kufuneka ndizilungiselele ikamva.
Njengokuba ndandifunda iBhayibhile, ndaqala ndaqonda ukuba uYehova nguThixo ophilayo, onomdla kum yaye ukulungele ukuxolela izono endizenze kwixesha elidlulileyo. Ndazibonela ngokwam ukuba uyayiphulaphula kwaye uyayiphendula imithandazo.
Kwakungelula ukutshintsha indlela endandiphila ngayo. Kwakunzima ukushiya iqela lemigulukudu. Kwakungelula ukudlula kweminye imimandla nangona ndandingaselilo ilungu lemigulukudu. Maxa wambi ndandizifihla kwabo babefudula ingabahlobo bam ngenxa yokuba babefuna ndibuyele kwimikhuba yangaphambili.
Ngokwahlukileyo koko, xa ndandiqala ukuya kwiintlanganiso zamaNgqina kwiHolo yoBukumkani ndaziva ndamkelekile yaye ndithandwa. Ndachukunyiswa lukholo lwawo olomeleleyo nangokuphila kwawo ngokuvisisana nezinto azifundisayo. Kwakwahluke ngokupheleleyo koko ndandikuqhelile.
IINZUZO: Sele ndineminyaka elishumi ndibhaptizwe njengeNgqina likaYehova. Ndenza konke okusemandleni ukuze ndiphile ngokuvumelana neemfundiso zeBhayibhile. Ngenxa yoko ndiye ndahlonelwa yintsapho yakowethu. Ngoku ndisebenza nzima yaye ndiyabanceda ngokwasezimalini. Umama waqalisa ukufunda iBhayibhile yaye sithethanje liNgqina likaYehova. Utata naye wenza iinguqulelo ebomini bakhe. Ekhaya asingabo bonke abangamaNgqina kaYehova kodwa emva kokuphawula iinguqulelo endizenzileyo bayavuma ukuba iBhayibhile inokubutshintsha ubomi bomntu.
INGXELO NGOBOMI
IGAMA: YAYOI NAGATANI
IMINYAKA: 50
ILIZWE: JAPAN
UBOMI BANGAPHAMBILI: IBHINQA ELINGUSOMASHISHINI
UBOMI BANGAPHAMBILI: Ndikhulele kwidolophu esemaphandleni enabantu abanobubele. Edolophini utata wayenevenkile enkulu yaye wayeqeshe abasebenzi abalishumi. Indlu yasekhaya yayisecaleni kwevenkile, nangona uTata noMama babexakekile ndandingelololo.
Ndingumafungwashe kwiintombi ezintathu yaye ndiseyintwazana ndaqeqeshelwa ukuba ndibe ngusomashishini. Ndatshata ndiselula. Umyeni wawuyeka umsebenzi wakhe wasebhankini waza weza kuncedisa kwishishini lasekhaya. Sakhawuleza sanabantwana abathathu. Umama wayenyamekela abantwana neminye imisebenzi yasekhaya ngoxa mna ndisebenza imini nobusuku. Nakuba kwakunjalo sasilifumana ixesha lokuba kunye njengentsapho.
Ukudodobala kwezoqoqosho kwachaphazela ishishini lethu. Ukuze simelane nale meko savula elinye ishishini lezinto zokwakha kufutshane nohola wendlela. Ngosuku olungaphambi kokuvulwa kweli shishini, utata, owayesongamela loo nkampani wawa ngenxa yokuphazamiseka okuthile engqondweni. Kwamshiya engakwazi ukuthetha yaye imbopheleleko yeli shishini litsha yaba semagxeni am. Umyeni wam wayejongene neshishini lokuqala. Saxakeka nangakumbi.
Ishishini lethu elitsha lalihambela phambili. Ndaba nelunda yaye ndancama nobuthongo. Nangona ndandibathanda abantwana bam eyona nto yayisengqondweni yayingumsebenzi. Ndandingenalo ixesha lokuncokola nomyeni wam, sasisoloko sixambulisana. Ukuze ndimelane nolo xinezeleko ndaqalisa ukuzikhupha busuku ngabunye nabahlobo bam nabanye oosomashishini siye kusela. Ekuphela kwento endandiyenza kukusebenza, ukusela nokulala. Ndandimi kakuhle ngokwasezimalini kodwa ndandingonwabanga yaye ndandingazi ukuba kwakutheni.
INDLELA IBHAYIBHILE EYABUTSHINTSHA NGAYO UBOMI BAM: Xa ndaqalisa ukufunda iBhayibhile namaNgqina kaYehova iindinyana ezintathu zeBhayibhile zandichukumisa. Emva kokuqonda intsingiselo kaMateyu 5:3 ndalila, uthi: “Banoyolo abo bayiphapheleyo intswelo yabo yokomoya, kuba ubukumkani bamazulu bobabo.” Le ndinyana yasichaza isizathu sokuba ndingonwabi nangona ndandiphumelela ngokwasezimalini yaye ndithathelwa phezulu ngabahlobo bam. Ndaqonda ukuba kufuneka ndiphaphele intswelo yam yokomoya ukuze ndonwabe.
Ngelo xesha, imeko yezoqoqosho yaseJapan yayijongise umetyiso ezantsi yaye ndabubona ubunyaniso bamazwi akweyoku-1 kuTimoti 6:9 athi: “Abo bazimisele ukuba zizityebi beyela ekuhendweni nasemgibeni, nakwiminqweno emininzi engekho ngqiqweni neyenzakalisayo, ekhokelela entshabalalweni nasekonakaleni.” Amazwi kaYesu abhalwe kuMateyu 6:24 athi, “aninakukhonza uThixo nobuTyebi” ayejoliswe kum, ngenxa yoko ndazama ukuyitshintsha indlela endandiphila ngayo.
Ndaphawula ukuba ndandingabahoyanga abazali, umyeni nabantwana bam. Yayicace nakuthathatha into yokuba ndandisele ndinemikhwa emibi. Ndandikrwada, ndingenamonde xa ndiqhubana nabantuyaye ndicaphuka msinya. Ekuqaleni, ndandicinga ukuba ndandingenakutshintsha ndize ndibe ngumKristu. Noko ke, ndandibathanda abantwana bam yaye ndaphawula ukuba ukusebenzisa isiluleko seBhayibhile xa ndiqhubana nentsapho, abantwana bam babesabela kakuhle. Ndandichitha ixesha elongezelelekileyo nabo yaye ndandisiya nabo kwiintlanganiso zamaKristu.
IINZUZO: Ukwazi injongo yobomi, ukukhonza uThixo nokuphila ubomi obumkholisayo kuyandivuyisa yaye kundenza ndizive ndanelisekile. Andiselilo ikhoboka lomsebenzi ndizuze nentlonelo ebendingayifumani.
Ekuboneni ubuntu bam bahlukile ngenxa yokusebenzisa imigaqo yeBhayibhile oko kwashukumisela umama ukuba afunde iBhayibhile aze abe ngumKristu. Okuvuyisayo kukuba utata kuquka nomyeni baye bazihlonela izigqibo zethu. Ndisondelelene ngakumbi nabantwana bam yaye ngoku ndonwabela ubomi bentsapho.
INGXELO NGOBOMI
IGAMA: MIKHAIL ZUYEV
IMINYAKA: 51
ILIZWE: RASHIYA
UBOMI BANGAPHAMBILI: UMRHWEBI WEZIXHOBO ONGEKHO MTHETHWENI
UBOMI BANGAPHAMBILI: Idolophu endandihlala kuyo iKrasnogorsk yayingqongwe ngamadlelo aluhlaza. UMlambo waseMoscow uhlela ngasemazantsi. Ngasentshona nangasentla iidolophana zingqongwe ngamahlathi.
Ndisemtsha ndandidlala amanqindi yaye ndinazo nezixhobo. Ixesha elininzi ndandizilolonga. Kwakhona ndandisenza imipu ngokungekho mthethweni, iimbumbulu neemela. Ekuhambeni kwexesha elo yaba lishishini lam. Ndandilungelelene yaye ndiphumelela ekuthengiseni ezo zinto kwizaphuli-mthetho.
INDLELA IBHAYIBHILE EYABUTSHINTSHA NGAYO UBOMI BAM: Ekuqaleni kweminyaka yee-1990 ndadibana namaNgqina kaYehova kodwa ndandingawathembi. Ayenemibuzo emininzi awayendibuza yona.
Ngenye imini, omnye wawo wandifundela amaRoma 14:12 athi: “Ngamnye wethu uya kuziphendulela kuThixo.” Ndandizibuza ukuba ndiza kuthini xa ndiphendula. Lo mbhalo wandenza ndafunda ngoko uThixo akufunayo kum.
Ndandisenza konke okusemandleni ukusebenzisa isiluleko seBhayibhile esibhalwe kumaKolose 3:5-10 esithi: “Bhubhisani, ke ngoko, amalungu enu omzimba asemhlabeni, uhenyuzo, ukungahlambuluki, inkanuko yesini, umnqweno owenzakalisayo, nokubawa, okulunqulo-zithixo. Iza ngenxa yezo zinto ingqumbo kaThixo. . . . Lahlani konke, ingqumbo, umsindo, ububi, yaye makungaphumi ntetho itshabhisayo, nantetho ingamanyala emlonyeni wenu. Musani ukuxokisana. Buhlubeni ubuntu obudala kunye noqheliselo lwabo, nize nambathe ubuntu obutsha.”
Kwakunzima ukwenza ezo nguqu. Abo ndandisakuqhuba ishishini nabo babendinika imali yezixhobo, kwakungelula ukungayamkeli yaye ndandingakwazi ukuzibamba xa abantu bendithuka. Nakuba kwakunjalo, ndazitshabalalisa zonke ezo zixhobo. Njengokuba ndafunda ngothando lukaThixo nolukaKristu abandibonisa lona nam ndafunda ukubathanda. Ndazingisa kufundisiso lwam lobuqu lweBhayibhile, ndisiya kwiintlanganiso yaye ndithandazela uncedo lukaThixo.
IINZUZO: Ngokuthe ngcembe kuloo mizamo nangoncedo lwabazalwana bam ndahlakulela imikhwa emihle. Ukwazi ukuba uYehova uThixo ukhathalele ngamnye wethu kuquka nabantu abafayo kwandichukumisa. (IZenzo 24:15) Ndakuxabisa ukunyaniseka kwamaNgqina kaYehova. Ndinombulelo ngomdla abawubonakalisileyo kum nokunyaniseka kwabo kuThixo.
Ekuqaleni amanye amalungu entsapho nabahlobo bam babendichasa. Kodwa ekugqibeleni bathuthuzelwa kukuba ndandingumntu wonqulo kunoba ndibe sisaphul’ umthetho. Ndiyavuya kuba ubomi bam andisabunikelanga ekuthengiseni izixhobo zemfazwe kodwa ndibunikele ekuncedeni abanye bafunde ngoThixo woxolo.
[Umfanekiso okwiphepha 27]
Ukuze ndidambise umvandedwa endandinawo, kwiVeki Engcwele ndandisiya kwimibhiyozo yecawa yamaKatolika
[Umfanekiso okwiphepha 28]
Ndandiphumelela ngokwasezimalini kodwa ndandingonwabanga