“Ayikafik’ Imini Yam”
Umqhubi wesigadla esithutha inkunkuma akazange akwazi ukulawula isithuthi sakhe. Saphuma endleleni saza satshayisa indoda nomfazi wayo, nenye indoda eneminyaka engama-23 ubudala eyayihamba ngeenyawo. Ngokutsho kwephephandaba iNew York City, eso sibini safa ngoko nangoko laza lona elo tyendyana lomfana lamkelwa ziingqondo. Xa labuyela ezingqondweni laza labona oko kwakwenzekile lathi: ‘Andiyikholelwa lento. Thixo ndicela undihlangule.’ Laphinda lathi, “Ayikafik’ imini yam.”
MHLAWUMBI NAWE wakhe weva kuthethwa kanje. Xa umntu esinda cebetshu engozini, abantu badla ngokuthi, ‘Ibingekafiki imini yakhe,’ kodwa xa esifa ngendledlana engaqondakaliyo, bathi, ‘Ibiyimini yakhe’ okanye ‘Kuthande uThixo.’ Enoba bathi oko kumiselwe kwangaphambili, lithamsanqa okanye nguThixo, le nkolelo iyafana. Abantu abaninzi bakholelwa ukuba izinto ezenzeka ebomini babo zimiselwe kwangaphambili yaye akukho nto banokuyenza ngaloo nto. Abantu abayithethi le nto kuphela xa kufiwe okanye kwehle ingozi, ibe le nkolelo ayikho ntsha kodwa indala inenkqayi.
Ngokomzekelo, abantu baseBhabhiloni yamandulo babekholelwa ukuba ubomi babantu bulawulwa yindlela ezihamba ngayo inkwenkwezi. Ngenxa yoko babekhangela esibhakabhakeni ukuze bafumane imiqondiso yokubakhokela. AmaGrike namaRoma ayenqula uthixokazi wekamva, omandla akhe okwenzela abantu ithamsanqa okanye ilishwa ngamanye amaxesha ayesongamela nkqu noothixo abakhulu nje ngoZeyus noJupiter.
EMpuma, amaHindu namaBhuda akholelwa ukuba izinto ezenzeka emntwini ngoku ziyimiphumo yezinto awazenza kubomi bakhe bangaphambili, nokuthi izinto azenza kweli phakade ziya kugqiba into eya kwenzeka kwelizayo. Ezinye iinkonzo—kuquka iicawa ezininzi zeNgqobhoko—ziya zamkela iinkolelo ezinjalo ngokufundisa ukuba ikamva lomntu limiselwa kwangaphambili.
Akumangalisi ke ngoko ukuba nakweli xesha lethu lokhanyo, apho abantu abaninzi bekholelwa kwizinto ezinobungqina obucacileyo, kube kusekho abantu abaninzi abakholelwa ukuba umphumo wezinto abazenza imihla ngemihla nekamva labo zimiselwe kwangaphambili yaye akukho nto banokuyenza ngaloo nto. Ngaba nawe ucinga ngaloo ndlela? Ingaba izinto ezenzeka ebomini, impumelelo nokusilela—sitsho ukufa nokuzalwa—ngokwenene zimiselwa kusengaphambili? Ngaba ubomi bakho bumiselwe kusengaphambili? Makhe siye eBhayibhileni siye kufumana iimpendulo zale mibuzo.
[Inkcazelo Ngomfanekiso okwiphepha 3]
Ken Murray/New York Daily News