Iingozi—Ngaba Zimiselwa Kwangaphambili Okanye Zilawulwa Ziimeko?
NJENGOKUBA uCristina, inzwakazi eselula nebonisa ngempahla ethengiswayo wayewela iNove de Julho Avenue ephithizelayo eSão Paulo, eBrazil, akazange ambone uduladula owayesiza. Umqhubi wazama konke okwakuse-mandleni akhe ukuba asimise isithuthi sakhe, kodwa wayesele ekufutshane gqitha. UCristina wagilwa laza itshoba lalal’ umbethe.
Le ngozi imanyumnyezi yabhalwa kwiphepha lokuqala lephephandaba laseBrazil iO Estado de S. Paulo. (Julayi 29, 1990) Kanti le yayiyenye nje yeengozi zeenqwelo-mafutha ezingama-50 000 ezenzeka nyaka ngamnye eBrazil. Yaye ngoxa amawaka angakumbi eba neziphene ngenxa yeengozi ezinjalo, abanye ababi nawo nomkrwelo. Ngoko, kwakutheni ukuze le ntombazana ingasindi? Ngaba kwakumiselwe ukuba ife ngolo suku?
Abantu abaninzi baya kuma ngelokuba oku kunjalo. Bakholelwa kwilishwa, bekholelwa ukuba iziganeko ezikhulu, njengexesha lokufa kukabani, zimiselwa kwangaphambili. Le nkolelo iye yabangela ukuba kuvele amabinzana anjengathi “Akukho mntu unokukuthintela oko kumiselwe kwangaphambili,” “Ixesha lakhe lifikile,” okanye “Okwenzekileyo kufana nokudaliweyo.” Ngaba iintetho eziqhelekileyo ezinjengezi zinobunyaniso obuthile? Ngaba singamaxhoba nje angenakuzenzela nto elishwa?
Ilishwa, okanye ingcamango yokuba zonke iziganeko zimiselwa kwangaphambili, yayibalasele phakathi kwamaGrike namaRoma amandulo. Nanamhlanje le ngcamango isekho ngamandla kwiinqulo ezininzi. Ngokomzekelo, amaSilamsi akholelwa emazwini eKoran athi: “Akukho mphefumlo unokuze ufe ngaphandle kokuthanda kuka-Allah nangexesha olimiselweyo.” Kwakhona ukukholelwa kwilishwa kuqhelekile kwiNgqobhoko yaye kuye kwakhuliswa yimfundiso yokuba izinto zimiselwa kwangaphambili, eyafundiswa nguJohn Calvin. Ngoko ke, kuqhelekile ngabefundisi ukuba baxelele izalamane ezisentlungwini ukuba ingozi ethile ‘ibikukuthanda kukaThixo.’
Noko ke, ingcamango yokuba iingozi zibangelwa lilishwa iyaphikisana nendlela eqhelekileyo yokucinga, amava kunye nengqiqo. Phakathi kwezinye izinto, iingozi zeenqwelo-mafutha azinakuba yimiphumo yokungenelela kukaThixo, ekubeni uhlolisiso lwenyameko ngokufuthi luya kuvelisa ngokusegqiqweni oyena nobangela. Ngaphezu koko, iingxelo ezingobalo lwamanani eengozi zibonisa ngokucacileyo ukuba ukwamkela izilumkiso ezisengqiqweni—njengokubopha iibhanti ezisesihlalweni—kuwanciphisa kakhulu amathuba okwenzeka kwengozi ebulalayo. Ngaba nawaphi na amanyathelo obulumko angokhuselo anokukuthintela ngokwenene ukuthanda kukaThixo okumiselwe ngaphambili?
Noko ke, ukukholelwa kwilishwa kunemiphumo ebuhlungu kumntu okholelwa kulo. Ngaba akukhuthazi izenzo zokungakhathali, ezinjengokungasijongeli ntweni isantya esimisiweyo nemiqondiso yeenqwelo-mafutha okanye ukuqhuba uphantsi kweempembelelo zotywala okanye zeziyobisi? Okubi ngakumbi kukuba ukukholelwa kwilishwa kubangela abantu abathile bambek’ ityala uThixo xa besehlelwa yingozi. Benomsindo yaye bengenakuzinceda, kwaye beqinisekile ukuba uThixo akakhathali, basenokude baphulukane nokholo. Imbongi uEmerson ngokufanelekileyo yathi: “Oyena thunywashe mbi nolusizi ebomini kukukholelwa kwiLishwa okanye kukuMiselwa Kwezinto Kwangaphambili.”
Kodwa ithini iBhayibhile ngezinto ezimbi ezenzekayo neengozi? Ngaba ngokwenene ifundisa ukuba zibangelwa lilishwa? Ukongezelela, ithini ngamathemba ethu okusindiswa? Ngaba sinalo naluphi na ukhetho kulo mbandela?
[Amagama acatshulweyo akwiphepha 4]
“Oyena thunywashe mbi nolusizi ebomini kukukholelwa kwiLishwa okanye kukuMiselwa Kwezinto Kwangaphambili.”—URalph Waldo Emerson