Akaphili Ngasonka Sodwa Umntu—Indlela Endasinda Ngayo Kwiintolongo ZamaNazi

Kubalisa uJoseph Hisiger

Ndakhe ndabuza elinye ibanjwa ndathi: “Yintoni le uyifundayo?” Lathi kum: “YiBhayibhile,” laza laleka umsundulo lisithi: “Ndingakunika yona ukuba ungandinika isonka sakho seveki.”

NDAZALWA ngoMatshi 1, 1914, eMoselle, ngoko eyayiphantsi kweJamani. Emva kweMfazwe Yehlabathi Yokuqala ngowe-1918, iMoselle yabuyiselwa kwiFrance. Kodwa ijamani yaphinda yayithimba ngowe-1940. Yabuyela kwiFrance kwakhona emva kokuphela kweMfazwe Yehlabathi II ngowe-1945. Ngenxa yaloo nto ndafunda ukuthetha isiFrentshi nesiJamani.

Abazali bam babengamaKatolika angagungqiyo. Ekhaya sasingalali singakhange siguqe ngedolo sithandaze. NgeCawa nangeeholide zelizwe sasisiya ecaweni. Ndandiluthanda unqulo yaye sasihlanganisana siliqela lamaKatolika size sifunde kunye.

Ukuzinikela Kumsebenzi WamaNgqina

Ngowe-1935 abazali bam batyelelwa ngamaNgqina kaYehova amabini. Bancokola ngokubandakanyeka konqulo kwimfazwe yehlabathi yokuqala. Emva koko ndaba nomdla ngakumbi eBhayibhileni, yaye ngowe-1936, ndaxelela umfundisi ukuba ndandifuna ukuba neyam iBhayibhile. Wathi kwakuza kufuneka ndifunde ezakwalizwi ukuze ndiyiqonde. Loo nto yandenza ndayifuna nangakumbi iBhayibhile yam ibe ndandifuna ukuyifunda.

NgoJanuwari 1937 uAlbin Relewicz, endandisebenza naye nowayeliNgqina likaYehova wathetha nam ngezinto ezifundiswa yiBhayibhile. “Unayo eyakho mos?” Ndambuza. Wayenayo ibe emva koko wandibonisa igama likaThixo uYehova kwinguqulelo yeGerman Elberfelder awandinika yona. Ndayifunda ngomdla ndaza ndaya nakwiintlanganiso zamaNgqina kaYehova kwidolophu yaseThionville.

NgoAgasti 1937, ndaya kwindibano yezizwe ngezizwe yamaNgqina kaYehova eParis kunye noAlbin. Apho ndaqalisa ukushumayela kwizindlu ngezindlu. Kungekudala emva koko ndabhaptizwa yaye ekuqaleni kowe-1939, ndaqalisa ukushumayela ngokusisigxina. Ndathunyelwa kwisixeko saseMetz. Kwathi ngoJulayi, ndabizwa ukuba ndiye kusebenza kwiofisi yesebe yamaNgqina kaYehova eParis.

Ukuvavanywa Ngexesha Lemfazwe

Andizange ndihlale ixesha elide kwiofisi yesebe kuba ngoAgasti 1939 ndabizelwa emkhosini waseFransi. Isazela sam asizange sindivumele ukuba ndilwe emfazweni, yaye ngenxa yoko ndavalelwa entolongweni. Kunyaka olandelayo ngoMeyi ngoxa ndandisesentolongweni ngequbuliso amaJamani ahlasela iFransi. NgoJuni, iFransi yoyiswa yaye kwakhona ndaba ngowaseJamani. Ngoko ngoJulayi 1940 xa ndakhululwa entolongweni ndaya kuhlala nabazali bam.

Ekubeni sasihlala kwilizwe elalilawulwa ngamaNazi kwakufuneka singabonwa xa sifunda iBhayibhile. IiMboniselo sasizifumana kuMaryse Anasiak, udade owayekhaliphile endadidla ngokudibana naye kwivenkile yeNgqina likaYehova eyayibhaka izonka. Ndandisoloko ndisinda kwiinzima awayehlangabezana nazo amaNgqina kaYehova aseJamani de kwangowe-1941.

Ngenye imini kwafika amaGestapo eze kundibona. Emva kokuba igosa lindixelele ukuba amaNgqina ayevalwe umlomo, landibuza enoba ndandisazimisele ukuba lilo kusini na. Ndathi ndakuthi “Ewe” lathi mandililandele. Umama wothuka wafa isiqaqa. Igosa leGestapo lathi lakubona loo nto lathi mandishiyeke ukuze ndimonge.

Kumzi mveliso endandisebenza kuwo ndandingambulisi ngokuthi “Heil Hitler!” umphathi wam. Kwakhona ndala ukuba lilungu lamaNazi. Ngoko ngenye imini ndabanjwa ngamaGestapo. Xa ndandincinwa andizange ndiwachaze amagama amanye amaNgqina. Igosa elalindincina landibetha ngomva wompu kabuhlungu entloko ndaza ndamkelwa ziingqondo. NgoSeptemba 11, 1942, iSondergericht (Inkundla Ekhethekileyo) yaseMetz yandigweba iminyaka emithathu entolongweni “ngokusasaza ubuxoki boMbutho wamaNgqina kaYehova kunye naBafundi beBhayibhile.”

Kwiiveki ezimbini kamva ndemka kwintolongo yaseMetz ndaya kwinkampu ekwakusetyenzwa nzima kuyo eZweibrücken. Apho ndandisebenza neqela elalilungisa umzila kaloliwe. Sasikhupha imizila kaloliwe yentsimbi esindayo size sifake eminye, emva koko sifake amatye. Ekuphela kokutya esasikunikwa yayiyikomityi yekofu kunye nesonka esiziigrem ezingama-75 ekuseni size emini nasebusuku sifumane isitya sesuphu. Emva koko ndathunyelwa kwenye intolongo apho ndandisebenza kwivenkile eyayithunga izihlangu. Emva kweenyanga eziliqela ndabuyiselwa eZweibrücken, kwesi sihlandlo ukuze ndisebenze emasimini.

Ukungaphili Ngesonka Sodwa

Ndandivalelwe esiseleni esinye nelinye ityendyana lomfana waseNetherlands. Ekubeni ndaye ndazama ukufunda ulwimi lwakhe ndakwazi ukumchazela iinkolelo zam. Wenza inkqubela ngokomoya kangangokuba wandicela ukuba ndimbhaptize emlanjeni. Ukuphuma kwakhe emanzini wandanga waza wathi, “Joseph, Ndingumzalwana wakho!” Sahlukana xa ndaya kusebenza kwimizila kaloliwe kwakhona.

Ngesi sihlandlo ndavalelwa esiseleni kunye nelinye ibanjwa elingumJamani. Ngobunye ubusuku ndambona efunda enye incwadi encinane—iBhayibhile! Bobo busuku kanye awanditshintshisela ngabo iBhayibhile ngomxhesho wam wesonka seveki. “Kulungile!” Ndavumela phezulu. Kwakungelula kona ukuncama isonka seveki kodwa ke andizange ndizisole. Ndawaqonda kakuhle amazwi kaYesu athi: “Akaphili ngasonka sodwa umntu, uphila ngamazwi onke aphuma emlonyeni kaYehova.”—Mateyu 4:4.

Ekubeni ngoku ndandinayo iBhayibhile, into eyayizakuba nzima yayikukuyigcina. Nangona amanye amabanjwa ayenokuba nayo iBhayibhile, kodwa wona angamaNgqina kaYehova ayengavumelekanga. Ngoko ndandidla ngokuyifunda ndizogqume ngengubo ebusuku. Emini ndandiyifihla ngaphantsi kwehempe yam. Ndandingenakuyishiya esiseleni kuba kwakugqogqwa.

Ngenye imini xa sasibalwa ngaphambi kokuba siqalise ukusebenza ndakhumbula ukuba iBhayibhile yam ndandiyishiye esiseleni. Ngorhatya lwalo mini ndabuyela esiseleni ndibhabha, kodwa ndafika ingekho iBhayibhile yam. Emva kokuthandaza kuThixo ndaya kuchazela ipolisa ukuba kukho umntu othathe incwadi yam ethile, kwaye ndiyayifuna. Lingakhathali landivumela ndayikhangela ndaza ngaloo ndlela ndayifumana iBhayibhile yam. Ndambulela ngentliziyo yam yonke uYehova!

Ngenye imini kwathiwa mandiye kuhlamba. Ndathi xa ndikhulula ndayiwisa iBhayibhile yam. Ndathi ndisakubona ukuba ipolisa alijonganga ndayityhalela ecaleni ngonyawo ndayifihla ndaza ndahlamba. Ukuphuma kwam emanzini ndaphinda ndayitsala ngonyawo ndayikhupha apho ndandiyifihle khona ndaza ndayikhabela phantsi kweempahla endandiza kuzinxiba.

Amahla Ndinyuka Okuba Libanjwa

Ngenye intsasa yowe-1943 ngoxa sasingaphandle kwezisele ndabona uAlbin! Naye wayebanjiwe. Wandijonga waza wenza uphawu lobuzalwana lokubeka isandla entliziyweni. Wathetha nam ngezandla endichazela ukuba wayeza kundibhalela. Wathi xa edlula kum ngosuku olulandelayo wandinyengezela isibhilivana. Kodwa ke ipolisa lasibona saza sohlwaywa ngokuvalelwa sodwa eziseleni iiveki ezimbini. Sasinikwa isonka esingundileyo kuphela namanzi size silaliswe emaplangeni singombathanga ngubo.

Emva koko ndathunyelwa kwintolongo yaseSiegburg, apho ndandisebenza kwivenkile yeentsimbi. Sasisebenza nzima ibe nokutya kwakukuncinane. Ebusuku ndandiye ndiphuphe ndisitya izimuncumuncu—amaqebengwane neziqhamo—ndize ndivuke amathumbu ekhala nomqala womile. Ubunzima bam babungaphantsi kweekilogrem ezingama-50. Nakuba kwakunjalo, suku ngalunye ndandifunda iBhayibhile yam eyayindinika isizathu sokuphila.

Inkululeko Ekugqibeleni!

Ngephanyazo ngenye intsasa yangoAprili 1945, amapolisa ababelek’ abasicatyana eshiya loo masango entolongo evuleke genge. Ndatsho ndakhululeka! Kodwa kwafuneka ndihlale ixesha elithile esibhedlele ukuze ndichache. Ndafika ekhayeni labazali bam ngasekupheleni kukaMeyi. Babecinga ukuba ndandifile. Umama akazange akwazi ukuzibamba iinyembezi esakundibona. Okubuhlungu kukuba abazali bam bafa kungekudala emva koko.

Ndabuyela eBandleni laseThionville. Kwandivuyisa ngokwenene ukubonana nentsapho yam yokomoya kwakhona! Ndavuya ndisakuva indlela abaye bathembeka ngayo nangona babevavanywa. Umhlobo wam othandekayo uAlbin wafela eRegensburg, eJamani. Kamva ndafumanisa ukuba ukayise, uJean Hisiger waba liNgqina waza wabulawa kuba engazange avume ukuya emkhosini. UJean Queyroi endandisebenze naye kwiofisi yesebe eParis wathothoza iminyaka emihlanu kwinkampu yaseJamani.a

Ngokukhawuleza ndabuyela kwidoluphu yaseMetz ndaya kushumayela. Apho ndandidla ngokudibana nentsapho yakwaMinzani. Intombi yabo uTina yabhaptizwa ngoNovemba 2, 1946. Wayenenzondelelo entsimini yaye ethandeka. Satshata ngoDisemba 13, 1947. NgoSeptemba 1967, uTina waqalisa umsebenzi wokushumayela ngokusisigxina, yaye wawenza wada wasweleka ngoJuni 2003, eneminyaka engama-98 ukubudala. Kowu, ndiyamkhumbula uTina wam.

Ngoku ndineminyaka engaphezu kwama-90, yaye ndiyaqonda ukuba iLizwi likaThixo belisoloko lindomeleza ukuze ndoyise izilingo. Maxa wambi bendikhe ndingabi nayo into esiwa phantsi kwempumlo, kodwa ke bendisoloko ndisondla ingqondo nentliziyo yam ngeLizwi likaThixo. UYehova uye wandomeleza. ‘ILizwi lakhe lindigcine ndiphila.’—INdumiso 119:50

[Umbhalo osemazantsi]

[Umfanekiso okwiphepha 21]

Umhlobo wam osenyongweni uAlbin Relewicz

[Umfanekiso okwiphepha 21]

UMaryse Anasiak

[Umfanekiso okwiphepha 22]

IBhayibhile endayifumana ngokuncama isonka seveki

[Umfanekiso okwiphepha 23]

Ndikunye noTina,ngowe-1946 ngaphambi kokuba sitshate

[Umfanekiso okwiphepha 23]

UJean Queyroi nomfazi wakhe uTitica