Ubomi—Isipho Esimele Silondolozwe

XA UYEHOVA uThixo wanika intsapho engabantu ilungelo lokuzala abantwana, esinjani sona isipho eyaba siso! Usana oluhle lwaluza kufikela ezandleni ezishushu ezilulindeleyo zesibini esonwabileyo nesithandanayo esasikulungele ukulondoloza nokunyamekela esi siqhamo sincinane somanyano lwaso lomtshato. Le ntsapho ingalindela uvuyo kuphela njengoko ubomi bomntwana butyhileka ngokutyhileka.

Kodwa isono sikaAdam noEva sazisa imiphumo elusizi kwiintsana ezizalelwa isizwe sabantu. Ngenxa yesono, umama wethu wokuqala waqalekiswa ngokubulaleka nokuva intlungu engokwasemzimbeni njengoko wayezala abantwana. Yaye imekobume yesono eyafikela kuyo inzala yabo yenza ukukhulisa abantwana kwaba lucelomngeni olukhulu. Ngenxa yoko, kwihlabathi lanamhlanje elinobugocigoci, akumangalisi ukuba ngokufuthi ukukhawulwa komntwana kungahlangatyezwana nako ngovuyo. Sekunjalo, iyintoni imbono yoMdali ngosana olungekazalwa? Ngaba iye yaguquka ngenxa yokuguquka komsinga wokuziphatha? Ngokuqinisekileyo akunjalo. Imbono yakhe nenkxalabo yakhe ngabantwana basemhlabeni abangekazalwa isemi imi.

IZibhalo zikwenza kucace ukuba ngaphakathi kumama kukho umntu owahlukileyo okhulayo. Ubomi buqalisa kwasekukhawulweni. Ukuzalwa komntwana emhlabeni sele ikukutyhilela nje abantu oko uThixo sele ekubonile kakade. UHezekile uthetha ngayo “yonke into [“umntwana,” NW] evula isizalo.” (Hezekile 20:26) UYobhi uthetha ‘ngeengcango zesizalo esandizalayo,’ yaye ukubiza ukuphuma kwesisu ngokuthi ‘ngabantwana abangabonanga kukhanya.’—Yobhi 3:10, 16.

Phawula ingqalelo yothando uYehova uThixo anayo ngobomi obuethe-ethe njengoko bukhula ngaphakathi esibelekweni. Wathetha oku kuYeremiya: “Ndingekakubumbi esizalweni, bendikwazi; ungekaphumi embilinini, ndakungcwalisa.” (Yeremiya 1:5) UDavide wathi: “Ayengagushekile kuwe amathambo am, mna ndenzelwayo entsithelweni, ndalukwa ndayimfakamfele ezinzulwini zomhlaba. Amehlo akho andibona ndiseyimbumba.” (INdumiso 139:15, 16) UYobhi umbiza uThixo ‘njengaLowo wandenzayo ezibilinini,’ ‘nowasimilisayo esizalweni.’—Yobhi 31:15.

Kodwa kuthekani ngokuxhalabela kukaThixo umama okhulelweyo ophelelwe lithemba ongamfuniyo umntwana? Ngaphezu kunaye nawuphi na umntu, uMdali uyaziqonda iimbopheleleko ezinzima zokuba ngumzali. Ukuba umama okhulelweyo, nangona ephantsi kweemeko ezinzima, ukhethe ukulugcina usana lwakhe ngenxa yokuhlonela imilinganiselo kaThixo, ngaba akayi kusisikelela eso sigqibo sakhe? Umzali unokuthandaza yaye ngokufanelekileyo ufanele athandazele uncedo lwakhe ekukhuliseni umntwana owonwabileyo. ELizwini lakhe, uThixo sele elinikele icebiso elifanelekileyo elifunekayo ekukhuliseni abantwana. Ukusebenzisa imigaqo yeBhayibhile kubomi bentsapho kuya kuvelisa imiphumo esikelelekileyo. Uvuyo nemivuzo yokukhulisa abantwana abahlonela uThixo kukudlula lee nakuphi na ukuzincama okwenziweyo ebudeni beli phulo, njengoko nawuphi na umzali oneqhayiya enokukungqina oko.

Ngaba uYehova uyijonga ngokwahlukileyo imicimbi ukuba usana luvele ngenxa yokudlwengulwa okanye ngenxa yombulo? Nangona isenzo esenziwa kumama sona ngokwaso sasikukwaphula umthetho, usana alubekeki tyala. Ukubucima ubomi balo ibiya kuba nje kukulwa esinye isenzo sogonyamelo ngesinye. Ngokuqinisekileyo uYehova uyayiqonda intlungu engokweemvakalelo loo maxhoba ayivayo yaye unokumnceda umama kunye nomntwana wakhe bahlangabezane nemiphumo yeso senzo ngendlela elungeleleneyo.

Kuthekani ukuba ugqirha uxelela ibhinqa elikhulelweyo ukuba ukukhulelwa kwalo umntwana de kufike ixesha lokuba azalwe kusenokuyibeka engozini impilo yalo? UGqr. Alan Guttmacher wathi: “Namhlanje kuyinto enokwenzeka phantse kuye nawuphi na umguli ukuba aqhubeke ephila ngoxa ekhulelwe, ngaphandle kokuba unesifo esibulalayo esinjengomhlaza okanye ileukemia, yaye ukuba kunjalo, akunakwenzeka ukuba ukuqhomfa kubandise ubomi bakhe, kungenakwenzeka ngakumbi ukuba kusindise ubomi.” IThe Encyclopedia Americana ithi: “Ekubeni inkoliso yamabhinqa inokuqhubeka ikhuselekile ngoxa ikhulelwe kwanaxa ineengxaki ezinzulu zonyango, zimbalwa iimeko apho ukuqhomfa kuyimfuneko ukuze kukhuselwe impilo kamama. Uninzi lwamabhinqa lufuna ukuqhomfa ukuze luphephe ukuba nomntwana.” Ngoko iimeko ezilolo hlobo azifane zibekho. Noko ke, ukuba kuyenzeka zivele ngexesha lokuzala, ngoko abazali bamele bakhethe phakathi kokuba kuphile umama okanye kuphile umntwana. Eso sisigqibo sabo.

Ngaba kuyinto emangalisayo ukuba uMdali wobomi abe ubeke imigaqo ecacileyo engokusetyenziswa kwamandla ethu okuzala? Emehlweni akhe, ukuyila kukabani ubomi angazimiselanga kubunyamekela kusisono, kanye njengokuba ukubucima ubomi kusisono.

Ngokuqinisekileyo, le mpikiswano iya kuqhubeka de kupheliswe le nkqubo yezinto. Kodwa kuMdali wobomi, uYehova uThixo, kwanabo bayithandayo imithetho yakhe, akukho mathandabuzo konke konke. Ubomi buxabisekile—busisipho esimele sikhuliswe size silondolozwe kwasekuqaleni.

Ukuba, emva kokufunda eli phephancwadi, unayo nayiphi na imibuzo ngeBhayibhile, zive ukhululekile ukuqhagamshelana namaNgqina kaYehova kwiHolo yoBukumkani ekummandla okuwo, okanye ubhalele abapapashi beli phephancwadi. (Bona iphepha 5.)

[Ibhokisi ekwiphepha 32]

Ukuba Nembono KaThixo Ngokuqhomfa

KUTHEKANI ngentombazana eselula ekhulelwayo ngaphandle kweqhina lomtshato yaye ingakulungelanga ngokupheleleyo ukuba ngumama? Ngaba ifanele ivunyelwe iluzale usana? Indlela uThixo avakalelwa ngayo ngosana ayiguqukanga kuba nje unina walo eye wenza ngendlela engeyoyabulumko neyokuziphatha okubi. Eneneni ukuluzala kwakhe usana kusenokumnceda unina walo aqonde imiphumo yemvelo yokuziphatha kwakhe okubi kuze ngaloo ndlela kubethelele kuye ubulumko bemithetho kaThixo. Ukuyibaleka imiphumo yesenzo sakhe sokuba neentlobano zesini ezingekho mthethweni kusenokumshiya enentlungu yokuziva enetyala, okanye kusenokumkhuthazela ukuba aqhubele phambili nezenzo zakhe zokuziphatha okubi.

Xa utata engekho ukuze kwabelwane ngomthwalo, ukukhulisa umntwana akuyi kuba lula. Kodwa ukuba nolwalamano oluqinileyo noBawo wethu wasezulwini kunokunikela kumama amandla okukwazi ukuziphatha nokuqhubana neemvakalelo, kumnike inkxaso nokhokelo lokwenza ngolo hlobo. Kwakhona ulungiselele ibandla lamaKristu ukunceda ekuwenzeni lula umthwalo wabazali abangenamaqabane omtshato.