Ngaba UThixo Ukuthembisa Ngobutyebi?
‘UThixo ufuna ube sisityebi—ube neemoto neshishini elingenisa imali. Into efunekayo nje kukuba ukholwe uze unikele kangangoko unako.’
NGOKUTSHO kwelinye iphephandaba laseBrazil le ntshumayelo ingasentla ixhaphakile kwiicawa ezithile zalapho, kwaye abantu abaninzi bayayikholelwa. Iphephancwadi iTime lithi uhlolisiso olwenziwa kubantu abathi bangamaKristu eUnited States lwabonisa ukuba: “Abantu abangama-61 ekhulwini bakholelwa ukuba uThixo ufuna abantu babezizityebi. Bona abangama-31 . . . bathi xa unikela ngemali yakho ukusikelela ngengakumbi.”
Ezi nkolelo, ezibizwa ngokuba ziintshumayelo zobutyebi, zanda ngokukhawuleza ngokukodwa kumazwe akwiLatin America, njengaseBrazil, yaye abantu bayathontelana kwiicawa ezithembisa iintsikelelo zobutyebi. Kodwa ngaba uThixo ubathembisa ngokubenza izityebi abantu abamkhonzayo? Ngaba kanene babezizityebi bonke abakhonzi bakaThixo bamandulo?
Yinyaniso ukuba iZibhalo zesiHebhere zidla ngokunxulumanisa intsikelelo kaThixo nokuba sisityebi. Ngokomzekelo, kwiDuteronomi 8:18, sifunda oku: “Uze umkhumbule uYehova uThixo wakho, ngokuba nguye okunike amandla okuzuza indyebo.” La mazwi aqinisekisa amaSirayeli ukuba uThixo wayeza kulunika ubutyebi uhlanga lwawo xa lumthobela.
Kuthekani ngabantu ngabanye? Indoda ethembekileyo uYobhi yayisisityebi esingawothiyo umlilo yaye emva kokuba uSathana etshabalalise izinto zayo, uYehova waphinda wayityebisa “ngokuphindiweyo.” (Yobhi 1:3; 42:10) NoAbraham wayesisityebi. IGenesis 13:2 ithi “wayenomhlambi nesilivere negolide eninzi.” Xa imikhosi emanyeneyo yookumkani abane baseMpuma yathimba umtshana wakhe uLote, uAbraham “wahlanganisa amadoda akhe aqeqeshiweyo, amakhoboka angamakhulu amathathu aneshumi elinesibhozo azalelwe endlwini yakhe.” (Genesis 14:14) Into yokuba uAbraham wayenamadoda angama-318 “aqeqeshiweyo” nakwaziyo ukulwa ibonisa ukuba yayinkulu indlu yakhe. Isibakala sokuba wayekwazi ukondla intsapho engako sibubungqina bokuba wayesisinhanha, esasinemihlambi emikhulu yemfuyo.
Mandulo abakhonzi bakaThixo abaninzi—uAbraham, uIsake, uYakobi, uDavide, noSolomon ukukhankanya nje abambalwa—babezizityebi. Ngaba loo nto ithetha ukuba uThixo uya kubenza izityebi bonke abantu abamkhonzayo? Kwangaxeshanye, ngaba ukuba lihlwempu komntu kuthetha ukuba akasikelelwa nguThixo? Le mibuzo iza kuphendulwa kwinqaku elilandelayo.