Ukuxabiseka Kwemfundo Yobuthixo

“Ndikwazigqala zonke izinto ziyilahleko ngenxa yexabiso eligqwesileyo lolwazi olungoKristu Yesu.”—FIL. 3:8.

1, 2. Yintoni amanye amaKristu aye akhethe ukuyenza yaye ngoba?

ESEKUMABANGA aphantsi, uRobert wayenkqenkqeza phambili esikolweni. Xa wayeneminyaka esibhozo ubudala, omnye wootitshala bakhe waya kowabo waza wamxelela ukuba angaba yiyo nantoni na afuna ukuba yiyo. Wathi angakwazi nokuba ngugqirha xa efuna. Ngenxa yokuphumelela emagqabini kumabanga aphakamileyo, wakufanelekela ukuya kufunda kwezona yunivesithi ziphambili kwilizwe lakowabo. Kodwa uRobert wenza isigqibo sokuliyeka elo thuba laligqalwa njengelibalaseleyo ngabaninzi, waza waba nguvulindlela othe ngxi.

² NjengoRobert, amaKristu amaninzi—aselula nakhulileyo—avulekelwa ngamathuba okuhambela phambili kule nkqubo yezinto. Amanye akawasebenzisi loo mathuba kuba efuna ukunikela ingqalelo kwizinto zokomoya. (1 Kor. 7:29-31) Yintoni ekhuthaza amaKristu afana noRobert ukuba azibhokoxe kumsebenzi wokushumayela? Esona sizathu siphambili kukuba ayamthanda uYehova yaye ngaphezulu ayayiqonda indlela ekubaluleke ngayo ukufundiswa nguye. Ngaba mvanje ukhe wayicinga into yokuba ubomi bakho ngebunjani ukuba ubungafundanga inyaniso? Ukucinga ngeentsikelelo esiye sazifumana ngenxa yokufundiswa nguYehova kuya kusinceda sihlale sinoxabiso ngeendaba ezilungileyo size sizishumayele ngenzondelelo.

Ilungelo Lokufundiswa NguThixo

3. Kutheni sinokuqiniseka ukuba uYehova ukulungele ukufundisa abantu abangafezekanga?

³ Ngenxa yokulunga kwakhe, uYehova ukulungele ukufundisa abantu abangafezekanga. Eprofeta ngamaKristu athanjisiweyo, uIsaya 54:13 uthi: “Bonke oonyana bakho baya kufundiswa nguYehova, lube lukhulu uxolo loonyana bakho.” Loo mazwi ayasebenza ‘nakwezinye izimvu’ zikaKristu. (Yoh. 10:16) Oku sikubona kwisiprofeto esizalisekayo namhlanje. Embonweni uIsaya wabona abantu abaphuma kwiintlanga zonke bengumsinga ukuya kunqulo lwenyaniso. Uthi, babesithi omnye komnye: “Masinyuke siye entabeni kaYehova, endlwini kaThixo kaYakobi; asiyalele ngeendlela zakhe, ukuze sihambe emendweni wakhe.” (Isa. 2:1-3) Lilungelo ngokwenene ukufundiswa nguThixo!

4. Yintoni uYehova ayilindeleyo kwabo abafundisayo?

⁴ Yintoni ekufuneka siyenze ukuze sikufanelekele ukufundiswa nguYehova? Kufuneka silulame. Umdumisi uDavide wabhala wathi: “Ulungile yaye uthe tye uYehova. . . . Uya kubangela abalulamileyo bahambe kwimimiselo yakhe.” (INdu. 25:8, 9) UYesu wathi: “Ndikudumisa esidlangalaleni, Bawo, Nkosi yezulu nomhlaba, ngenxa yokuba uzifihle ngenyameko ezi zinto kwizilumko nakwabo baziingqondi, wazityhilela iintsana.” (Luka 10:21) Ngaba akuziva ufuna ukusondela kuThixo ‘obanika ububele obungasifanelanga abo bathobekileyo’?—1 Pet. 5:5.

5. Yintoni esincedileyo ukuze sazi uThixo?

⁵ Njengabakhonzi bakaYehova, ngaba sincedwe bubulumko bethu ukuze sazi inyaniso? Akunjalo. Eneneni, besingenakusuke nje simazi uThixo. UYesu wathi: “Akukho mntu unako ukuza kum ngaphandle kokuba uBawo, owandithumayo, amtsale.” (Yoh. 6:44) UYehova utsala abantu abanjengezimvu, “izinto ezinqwenelekayo zazo zonke iintlanga,” ngomsebenzi wokushumayela nangomoya wakhe oyingcwele. (Hag. 2:7) Ngaba akuyivuyeli into yokuba nawe uYehova ekutsalile ngoNyana wakhe?—Funda uYeremiya 9:23, 24.

Amandla Okuguqula Ubomi

6. Kubancede njani abantu ukungenisa ‘ulwazi ngoYehova’?

⁶ Isiprofeto sikaIsaya sisizobela umfanekiso ocacileyo weenguqu ezenziwa ngabantu kweli xesha lethu. Abantu ababekade bendlongondlongo bahlelisene ngoxolo nabanye. (Funda uIsaya 11:6-9.) Abantu ababekade beziintshaba ngenxa yobuhlanga, ubuzwe, okanye imvelaphi, baye bahlala bemanyene. Ngokungathi kunjalo, baye ‘bakhanda amakrele abo aba ngamakhuba.’ (Isa. 2:4) Zibangelwa yintoni ezi nguqu? Aba bantu baye bangenisa ‘ulwazi ngoYehova’ baza balusebenzisa ebomini babo. Nangona abakhonzi bakaThixo bengafezekanga, bamanyene ehlabathini lonke. Indlela iindaba ezilungileyo ezamkelwa ngayo nezibuchaphazela ngayo ubomi babantu ehlabathini jikelele, ibonisa ukubalasela kwemfundo evela kuThixo.—Mat. 11:19.

7, 8. (a) Ziziphi ezinye ‘zezinto ezinqatyisiweyo’ eye imfundo yobuthixo yanceda abantu ukuba bahlukane nazo? (b) Yintoni ebonisa ukuba imfundo yobuthixo izisa udumo kuYehova?

⁷ Umpostile uPawulos wafanisa umsebenzi wokushumayela owenziwa ngabakhonzi bakaThixo nemfazwe yokomoya. Wathi: “Izixhobo zethu zemfazwe ayizizo ezenyama, kodwa ngaye uThixo zinamandla okubhukuqa izinto ezinqatyisiweyo. Kuba sibhukuqa iingcinga nayo yonke into ephakamileyo ephakanyiswa nxamnye nolwazi lukaThixo.” (2 Kor. 10:4, 5) Ziziphi ezinye zezo ‘zinto zinqatyisiweyo’ esiye sakhululwa kuzo yimfundo yobuthixo? Ezinye zazo ziimfundiso zobuxoki, iinkolelo, nentanda-bulumko. (Kol. 2:8) Imfundo yobuthixo inceda abantu bahlukane nemikhwa emibi baze baphile ngendlela ekholisa uThixo. (1 Kor. 6:9-11) Inceda iintsapho zihlale ngoxolo. Ikwanceda nabo baphelelwe lithemba ukuba baphile ubomi obunenjongo. Le yeyona mfundo ifunekayo namhlanje.

⁸ Olunye lweempawu uYehova anceda abantu babe nazo kukunyaniseka, njengoko la mava alandelayo ebonisa. (Heb. 13:18) Elinye ibhinqa laseIndiya lavuma ukuqhutyelwa isifundo seBhayibhile yaye ekuhambeni kwexesha lakufanelekela ukuba ngumvakalisi ongabhaptizwanga. Ngenye imini lalivela kumsebenzi wokwakha iHolo yoBukumkani laza lachola ikhonkco legolide elixabisa iirandi ezingamawaka asibhozo kufuphi nesikhululo sebhasi. Nangona eli bhinqa lalilihlwempu, lathabatha eli khonkco laza lalisa emapoliseni. Ipolisa elalilapho lothuka! Elinye lambuza, “Yintoni ebangele ukuba ulizise?” Eli bhinqa lathi, “Ukufunda iBhayibhile kuye kwabuguqula ubomi bam, yaye ngoku ndinyanisekile.” Lichukumisekile ipolisa lathi kumdala ongumKristu owayehamba neli bhinqa: “Kukho abantu abangaphezu kwezigidi ezingama-38 kweli lizwe. Ukuba unganceda abantu abalishumi bafane neli bhinqa, uya kuba usebenze gqitha.” Xa sicinga ngezigidi zabantu abaye batshintsha indlela abaphila ngayo ngenxa yemfundo yobuthixo, ngaba asifanele simdumise uYehova?

9. Yintoni enokunceda abantu benze iinguqulelo eziphawulekayo ebomini babo?

⁹ Abantu benza iinguqulelo ebomini babo ngoncedo lwamandla eLizwi likaThixo aguqulayo nomoya oyingcwele kaYehova. (Roma 12:2; Gal. 5:22, 23) EyabaseKolose 3:10 ithi: “Nambathe ubuntu obutsha, obuthi ngolwazi oluchanileyo benziwe bube butsha ngokomfanekiso waLowo wabudalayo.” Isigidimi esifumaneka eLizwini likaThixo, iBhayibhile siyakwazi ukuveza oko kungaphakathi emntwini yaye sinokuguqula indlela acinga ngayo nenza ngayo izinto. (Funda amaHebhere 4:12.) Xa umntu enolwazi oluchanileyo lweZibhalo aze avisisanise ubomi bakhe nemilinganiselo kaYehova yobulungisa, unokuba ngumhlobo kaThixo aze abe nethemba lokuphila ngonaphakade.

UYehova Usixhobisela Ikamva

10. (a) Kutheni inguYehova kuphela onokusinceda sixhobele ikamva? (b) Ziziphi iinguqulelo eziya kuchaphazela lonke ihlabathi kungekudala?

¹⁰ NguYehova kuphela onokusinceda silungele ikamva kuba uyayazi into eza kwenzeka kungekudala. Nguye olaziyo ikamva loluntu. (Isa. 46:9, 10) Isiprofeto seBhayibhile sithi “imini enkulu kaYehova ikufuphi.” (Zef. 1:14) Ngaloo mini, la mazwi eMizekeliso 11:4 aya kungqineka eyinyaniso: “Izinto ezixabisekileyo aziyi kuba yingenelo ngemini yokuvutha komsindo, kodwa ubulungisa buya kuhlangula ekufeni.” Xa kufika ixesha lokuba uYehova agwebe eli hlabathi likaSathana, eyona nto iya kube ibalulekile lulwalamano lwethu noThixo. Imali ayiyi kusinceda nganto. Enyanisweni uHezekile 7:19 uthi: “Baya kuyiphosa ezitratweni loo silivere yabo, negolide yabo iya kuba yinto eyenyanyekayo.” Ukwazi oko kusinceda senze izigqibo zobulumko kanye ngoku.

11. Yiyiphi enye indlela imfundo yobuthixo esixhobisela ngayo ikamva?

¹¹ Enye indlela ephawulekayo imfundo yobuthixo esixhobisela ngayo imini kaYehova kukusinceda sizazi izinto eziza kuqala ebomini. Umpostile uPawulos wabhalela uTimoti wathi: “Bayale abo bazizityebi kule nkqubo yezinto ukuba bangaziphakamisi, bangathembeli kubutyebi obungaqinisekanga, kodwa mabathembele kuThixo.” Enoba asizozityebi, sinokungenelwa kwesi siluleko sobuthixo. Yintoni ebandakanyekileyo koku? Kunokuba siqokelele izinto ezininzi eziphathekayo, sifanele sizame ‘ukwenza okulungileyo, size sityebe emisebenzini emihle.’ Xa sibeka izinto zokomoya kuqala ebomini bethu, ‘siziqwebela isiseko esihle sekamva.’ (1 Tim. 6:17-19) Ukuphila ubomi obunjalo likhondo lobulumko, kuba njengoko uYesu watshoyo, “koba nayiphi na ingenelo ngomntu ukuzuza ihlabathi liphela kodwa aphulukane nomphefumlo wakhe?” (Mat. 16:26, 27) Ngenxa yokuba imini kaYehova isondele, ngamnye kuthi ufanele azibuze: ‘Bubuphi ubuncwane endiziqwebele bona? Ngaba ndikhonza uThixo okanye ubuTyebi?’—Mat. 6:19, 20, 24.

12. Kutheni singafanele sidimazeke xa abanye bewujongela phantsi umsebenzi wethu wokushumayela?

¹² Kule ‘misebenzi mihle’ ichazwe eLizwini likaThixo nemele yenziwe ngamaKristu, owona ubalulekileyo ngumsebenzi wokushumayela ngoBukumkani nowokwenza abafundi. (Mat. 24:14; 28:19, 20) Njengoko kwakunjalo ngenkulungwane yokuqala abanye basenokuwujongela phantsi umsebenzi wethu wokushumayela. (Funda eyoku-1 kwabaseKorinte 1:18-21.) Kodwa loo nto ayithethi kuthi isigidimi sethu asixabisekanga, yaye ayithethi kuthi simele siyeke ukunika abanye ithuba lokukholelwa kuThixo ngoxa besenako ukwenjenjalo. (Roma 10:13, 14) Xa sinceda abanye ukuba bangenelwe kwimfundo yobuthixo siya kusikelelwa kakhulu.

Uyasisikelela Xa Sizincama

13. Yintoni awayincamayo umpostile uPawulos ngenxa yeendaba ezilungileyo?

¹³ Ngaphambi kokuba abe ngumKristu, umpostile uPawulos wayeqeqeshelwa ukuba aphumelele kwinkqubo yobuYuda. Xa wayemalunga ne-13 leminyaka ubudala, wafuduka kwisixeko saseTarso waya eYerusalem ukuze afundiswe ngumfundisi obalaseleyo kwezoMthetho uGamaliyeli. (IZe. 22:3) Ekuhambeni kwexesha uPawulos wankqenkqeza phambili kangangokuba ukuba wayeye waqhubeka nale mfundo, wayeya kubalasela ebuYudeni. (Gal. 1:13, 14) Emva kokuba amkele iindaba ezilungileyo waza waqalisa ukushumayela, wakushiya konke oko. Ngaba uPawulos wazisola? Nakanye! Eneneni wabhala wathi: “Ndikwazigqala zonke izinto ziyilahleko ngenxa yexabiso eligqwesileyo lolwazi olungoKristu Yesu iNkosi yam. Ngenxa yakhe ndiye ndalahlekelwa zizinto zonke yaye ndizigqala njengenkunkuma eninzi.”—Fil. 3:8.

14, 15. Ziziphi iintsikelelo esizifumanayo ngokuba ‘ngabasebenzi abangamadlelane kaThixo’?

¹⁴ Ngokufanayo noPawulos, amaKristu namhlanje ancama izinto ezininzi ukuze ashumayele iindaba ezilungileyo. (Marko 10:29, 30) Ngaba ikho into esiphosayo ngenxa yoko? URobert ekuthethwe ngaye ekuqaleni uvakalelwa ngendlela efanayo nabaninzi xa esithi: “Andizisoli konke konke. Inkonzo yexesha elizeleyo indenze ndonwaba, ndaneliseka yaye ndiye ndakwazi ‘ukungcamla ndaza ndabona ukuba uYehova ulungile.’ Xa ndincama okuthile ngenxa yosukelo lokomoya, uYehova usoloko endisikelela ngezinto ezingakumbi kunezo ndizincamileyo. Kuba ngathi akukho kwanto ndiye ndayincama. Ndizuze intabalala!”—INdu. 34:8; IMize. 10:22.

¹⁵ Ukuba nawe sele unethuba usenza lo msebenzi wokushumayela nokufundisa, ngokuqinisekileyo uye walifumana ithuba lokungcamla nelokubona ukuba uYehova ulungile. Ngaba ukhe uvakalelwe kukuba uyakunceda ngomoya wakhe xa ushumayela iindaba ezilungileyo? Ngaba ukhe uyibone imincili kwabanye xa uYehova evula iintliziyo zabo ukuze baphulaphule isigidimi sethu? (IZe. 16:14) Ngaba uYehova uye wakunceda woyisa imiqobo, waza wafumana ithuba lokwandisa ubulungiseleli bakho? Ngaba uye wakuxhasa ngamaxesha obunzima, ekunceda ukuba uqhubeke umkhonza naxa uvakalelwa kukuba uphelelwe ngamandla? (Fil. 4:13) Xa uYehova esinceda kubulungiseleli bethu simgqala njengomntu wokwenene nangakumbi size sisondele kakhulu kuye. (Isa. 41:10) Ngaba akuziva usikelelekile ngokuba ‘ngumsebénzi olidlelane likaThixo’ kulo msebenzi ubalaseleyo wokufundisa abanye ngoThixo?—1 Kor. 3:9.

16. Uvakalelwa njani ngokuzibhokoxa nokuzincama kwakho ukuze ufundise abanye ngoYehova?

¹⁶ Abantu abaninzi baye babe nethemba lokuphumeza okuninzi ebomini babo. Siye sabona ukuba nezona zinto ziphambili eziye zaphunyezwa ngabantu zikhawuleza zilibaleke. Noko ke, umsebenzi ophunyezwa nguYehova namhlanje ukuze kungcwaliswe igama lakhe awusokuze ulibaleke. Uya kuhlala ukhunjulwa ngonaphakade. (IMize. 10:7; Heb. 6:10) Masilixabise ilungelo esinalo lokuba nesabelo kumsebenzi ongasokuze ulibaleke wokufundisa abanye ngoYehova.

Ubuya Kuphendula Uthini?

• Yintoni uYehova ayilindeleyo kwabo abafundisayo?

• Imfundo yobuthixo ibancede njani abantu abaninzi?

• Kutheni sinokuthi sisikelelekile ngokunceda abanye bangenelwe yimfundo yobuthixo?

[Umfanekiso okwiphepha 23]

Abo bafundiswa nguYehova bamanyene

[Umfanekiso okwiphepha 24]

Ngaba akuziva usikelelekile ngokuba ‘ngumsebénzi olidlelane likaThixo’?