Ngaba Singakwazi Ukuba Nokholo Kumdali?

“KWAKUNDICAPHUKISA gqitha ukucinga ukuba kukho umdali onamandla okuthintela ukubandezeleka kwabantu kodwa abe engenzi nto!” La mazwi athethwa ngomnye umntu owayekade engakholelwa kubukho bukaThixo, emva kokubulawa kwamalungu entsapho yakhe, xa amaNazi ayebulala amaYuda eJamani. Asinguye yedwa umntu owakha wavakalelwa ngaloo ndlela.

Kuba nzima kubantu abaninzi ukukholelwa kuThixo yaye bade bazithuthuzele ngokuthi akakho, xa bephathwa ngenkohlakalo. Ziintoni ezidla ngokwenza abantu bangakholelwa kubukho bukaThixo? Ngaba abantu bebeya kuphila bhetele ukuba belungekho unqulo okanye uThixo njengokuba abanye becinga njalo? Ngaba umntu othi akukho Thixo unako ukutshintsha aze amthande uMdali?

Ukusilela Konqulo

Into engumnqa kukuba unqulo lunkqenkqeza phambili kwizizathu zokuba abantu bangakholelwa kubukho bukaThixo. Isazi-mbali uAlister McGrath uthi: “Eyona nto yenza abantu bangakholelwa kubukho bukaThixo kukukruqulwa zizinto ezenziwa ezicaweni.” Unqulo lusoloko lujongwa njengonobangela weemfazwe nogonyamelo. Isithandi sobulumko esasingakholelwa kubukho bukaThixo uMichel Onfray uxakwa yindlela enokwenzeka ngayo into yokuba incwadi enye yonqulo yenze abantu bacinge izinto ezahlukeneyo, omnye imenze “azabalazele ukuba ngcwele” ngoxa isenza omnye “enze izinto ezikhohlakeleyo ebantwini”—njengobugrogrisi.

Ekuphela kwento abayikhumbulayo abantu abaninzi ngeCawa zizinto ezimbi ezabehlelayo ngoxa babehamba kuyo. UBertil, ityendyana laseSweden, ukhumbula ukuba xa wayesemkhosini weva umfundisi ethethelela ukusetyenziswa kwezixhobo ngokucaphula isilumkiso sikaYesu sokuba abantu abathabatha ikrele batshabalala kwangalo. Lo mfundisi wayeqiqa ngelithi kumele kubekho isicaka esiza kuphatha elo krele lokutshabalalisa abo babulala ngekrele, watsho esithi ngamajoni ke izicaka zikaThixo.—Mateyu 26:52.a

UBernadette owafelwa nguyise kwimfazwe yehlabathi yesibini eFransi ukhumbula indlela awacatshukiswa ngayo ngumfundisi owathi kumngcwabo kakanina wakhe owayeneminyaka emithathu ubudala: “UThixo umthathile lo mntwana ukuze abe yingelosi yakhe.” Kamva uBernadette wazala umntwana okhubazekileyo ibe icawa ayizange imthuthuzele.

UCiarán owakhulela kuMntla Ireland ekwakugquba ugonyamelo kuwo, wayeyicaphukela gqitha imfundiso yesihogo. Wayelikhupha litsole elokuba wayemthiyile uThixo owenza inkohlakalo enjalo de amcele umngeni esithi ukuba ukho angambulala ukuba uyathanda. AsingoCiarán kuphela ozicaphukelayo iimfundiso ezinjalo zecawa. Kusenokwenzeka ukuba ikwaziimfundiso zecawa ezahlahla indlela yemfundiso yendaleko. Ngokutsho kuka-Alister McGrath, into eyabangela ukuba uDarwin angakholelwa kubukho bukaThixo “kukuthiy’ egazini” kwakhe imfundiso yesihogo, kungekhona ukukholelwa kwakhe kwindaleko. Lo kaMacGrath uphinda athi “uDarwin wenzakaliswa gqitha kukusweleka kwentombi yakhe.”

Abanye bajonga abantu abanqulayo njengabashiywe ziingqondo nabanenzondelelo yempambano. UIrina owayekruqulwe ziintshumayelo zasecaweni ezingenangqiqo kunye nezicengcelezo zemithandazo uthi: “Kum kwakubonakala ngathi abantu abahamba icawa abakwazi kucinga.” ULouis owayecatshukiswe zizenzo zenkohlakalo ezazisenziwa ngabantu abanenzondelelo ngonqulo waza waluthiya ngakumbi, uthi: “Kangangeminyaka unqulo beluyindinisa kum kodwa ngoku lundivezele elinye icala lalo, inkohlakalo. Loo nto yandenza ndathiya kwanto elunqulo.”

Ngaba Abantu Banokonwaba Ngaphandle KukaThixo?

Akumangalisi ke ngoko ukuba abantu abaninzi balubone unqulo lungumqobo kwinkqubela yabantu noxolo. Abanye bade bazibuza enoba abantu bebengayi kuphila bhetele na ngaphandle kukaThixo nonqulo. Kodwa ke ngaba bekungayi kubangela iingxaki ukugatya kwanto ilunqulo?

UVoltaire owayesisithandi sobulumko ngenkulungwane ye-18 wakugxeka ukuxhatshazwa kwabantu ziicawa zomhla wakhe. Nakuba kunjalo, wavuma ukuba ukuze abantu bakwazi ukuziphatha bamele balawulwe nguMongami. Kamva isithandi sobulumko saseJamani uFriedrich Nietzsche wathi uThixo ufile, kodwa ke wayekoyika ukuwohloka kwemilinganiselo yokuziphatha neengxaki ezaziza kubangelwa kukucinga kwabantu ukuba akukho Thixo. Ngaba wayefanele ayoyike loo nto?

Umbhali uKeith Ward uthi kwimihla yethu izenzo zenkohlakalo azikhange zinciphe kunoko “ziye zathi kratya ngendlela engazange ibonwe ngaphambili.” Nayo inkolelo yokungabikho kukaThixo ayikhange ibakhulule abantu kwiingxaki zabo ezifana nobuqhetseba nokunganyamezelani. Zezi zibakala ke ezenze abantu abaninzi abakwaziyo ukucinga, kuquka nabantu abangakholelwa kubukho bukaThixo, bakuqonda ukubaluleka kokukholelwa kuThixo.

UKeith Ward ugxininisa impembelelo entle ebangelwa kukukholelwa kuThixo, uthi: “Ukholo lusenza sifune ukuphila ngemilinganiselo eyamkelekileyo, size siwukhathalele umhlaba odalwe nguThixo.” Uphando oluye lwenziwa kutshanje lubonisa ukuba amakholwa amaninzi ayixhalabele impilo-ntle yabanye abantu. Ukunceda abanye abantu kusenza saneliseke ngomlinganiselo othile. Olo phando luxhasa umgaqo owachazwa nguYesu othi: “Kunoyolo ngakumbi ukupha kunokwamkela.”—IZenzo 20:35.

Omnye unontlalo-ntle owayekade engakholelwa kubukho bukaThixo wachukunyiswa yindlela iBhayibhile ekwazi ngayo ukutshintsha ubomi babantu. Wathi: “Ndiye ndachitha iminyaka emininzi ndisiwa ndivuka kwimizamo elilize yokunceda abantu batshintshe kwindlela eyingozi abaziphethe ngayo, kodwa kundimangalise gqitha ukubabona betshintshwa yiBhayibhile. Kwakhona ndiye ndabona ukuba ibatshintsha ngokupheleleyo.”

Nakuba kunjalo abanye abantu abangakholelwayo kubukho bukaThixo basame ngelithi ukukholelwa kuThixo kuye kwabangela ukuba abantu babulalane, kubekho iingxwabangxwaba kunokuba kubenze balunge baze babe novelwano. Basenokuba bayabona ukuba ukholo luye lwabanceda abanye abantu kodwa bona abade baluthembe unqulo. Ibangelwa yintoni loo nto?

Ezinye Izinto Ezibangela Abantu Bangakholwa

Abanye bafundiswa ukuba imfundiso yendaleko iyinyaniso engenakuphikiswa. Ngokomzekelo uAnila owafunda kwilizwe laseAlbania elingakholelwayo kubukho bukaThixo, uthi: “Esikolweni sasifundiswa ukuba ukukholelwa kuThixo akunangqiqo yaye yinto yamaqaba. Ndandisoloko ndifunda izinto ezimangalisayo ngezityalo nezinye izinto eziphilayo kodwa ke ndisithi zonke ezo zinto zazivelela kuba oko kwakusenza sibonakale sihambisana nenzululwazi.” Kodwa ke ngoku uyavuma ukuba “ubungqina obabunikezwa babebamkela ngaphandle kokubuphonononga.”

Ukuba buhlungu ngenxa yezinto ezenziwa lunqulo kunokwenza abanye bangalufuni. AmaNgqina kaYehova adla ngokudibana nabantu abanjalo xa encokola nabantu ngeBhayibhile. UBertil ekuthethwe ngaye ngaphambili watyelelwa lelinye iNgqina likaYehova eliselula. Ukhumbula ukuba ukufika kwalo wayesithi ngaphakathi: ‘Akwaba ubusazi lusizana ndini lunenzondelelo yempambano ukuba uze kuzinqikela ilitye elineembovane!’ Uthi: “Ndanela nje ukulingenisa ndabe sendilixelela indlela endingamfuni ngayo uThixo, iBhayibhile nolo nqulo lwakhe.”

UGus waseScotland wayekhathazwa kukungabikho kokusesikweni. Ekuqaleni wayephikisa kwanto eyayithethwa ngamaNgqina kaYehova. Wayebuza imibuzo efana nqwa naleyo yayibuzwa nguHabhakuki, umprofeti ongumHebhere kuThixo esithi: “Kutheni undenza ndibone okwenzakalisayo, uze uqhubeke ujonga inkathazo?”—Habhakuki 1:3.

Kudala abantu bekhathazwa yinto yokuba uThixo ebonakala ngathi akakuhoyanga ukubandezeleka kwabo. (INdumiso 73:2, 3) Umbhali ongumFrentshi, uSimone de Beauvoir wakha wathi: “Kwakulula kum ukucinga ngehlabathi elingenamdali kunocinga ngomdali othi ekho libe ihlabathi lizaliswe bububi.”

Kodwa ngaba ukungakwazi kweenkonzo ezininzi ukuchaza unobangela wobubi kuthetha ukuba ayikho impendulo? UGus uthi ekugqibeleni wada wazifumana “izizathu ezanelisayo zokuba uMdali onamandla eye wavumela ukuba abantu babandezeleke okwethutyana.” Uthi: “Kwandinceda gqitha ukufumana loo mpendulo.”b

Abanye abantu abathi abakholelwa kubukho bukaThixo basenokuba bayayithandabuza into yokuzivelela kwendalo, bayaqonda ukuba bafanele bakhonze uThixo yaye basenokude bathandaze nokuthandaza. Makhe sihlole izizathu zokuba abanye abantu ababekade bengakholelwa kuThixo nababesithi akukho bungqina bokuba ukho, bacingisise nzulu baze ekugqibeleni bakhonze uMdali.

Yintoni Eye Yabenza Banokholo KuMdali?

Eli tyendyana lo mfana elatyelela uBertil laqiqa naye limbonisa ubungqina obunamandla bokuba kukho umahluko omkhulu phakathi kwamaKristu okwenyaniso nabo bathi bangamaKristu nje ngegama. UBertil uthi ikho enye into awayithandayo ngeli tyendyana, ngaphandle nje kwezibakala ezixhasa ubukho boMdali. Uthi: “Wandichukumisa gqitha umonde wakhe. . . . Wayesoloko ezolile, wayendiphathela uncwadi yaye elungiselela ngaphambi kokuba athethe nam.”c

USvetlana owayefundiswe ngendaleko nobuKomanisi, wayekholelwa ukuba lo mhlaba asingoweenkenenkene. Nakuba kunjalo wayekhathazwa kukubona indlela obungenalusini ngayo ubomi. Izinto awayezifundiswe xa wayefundela ukuba ngugqirha zongeza koku kudideka kwakhe, uthi: “Esikolweni xa sasifundiswa ngokungabikho kukaThixo, kwakudla ngokuthiwa kweli hlabathi kusinda abanamandla kuphela. Kodwa kwizifundo zobugqirha sasifundiswa ukuba simele sibancede abantu ababuthathaka.” Kwakhona yayimxaka into yokuba abantu ekuthiwa bavela ezinkawini, bagule ngokweemvakalelo, nto leyo ezingaguli yiyo iinkawu. Impendulo wayifumana kumntu awayengayilindelanga kuye. Uthi: “Umakhulu wandibonisa eBhayibhileni ukuba kukungafezeki kwethu okusenza sidandatheke.” Naye uSvetlana kwamvuyisa gqitha ukuva iimpendulo zeBhayibhile kwimibuzo efana nothi kutheni abantu abanyanisekileyo bebandezeleka.

ULeif oyinzalelwane yaseScandinavia, wayekholelwa gqitha kwimfundiso yendaleko yaye esithi iBhayibhile yincwadi nje yeentsomi. Noko ke, ngenye imini umhlobo wakhe wamphek’ emophula ngemibuzo eyamenza wacingisisa ngoko wayekukholelwa esithi: “Uyaqonda phofu ukuba uthetha nje undiva, ukanti awazi nowathwethwa ngeBhayibhile?” Echaza indlela awachukunyiswa ngayo ngaloo mazwi uLeif uthi: “Ndaqonda ukuba andizange khe ndiyicingisise into yokuzivelela kwendalo kunoko ndasuka nje ndayamkela. . . . Ndicinga ukuba ukwazi iziprofeto zeBhayibhile nokuzaliseka kwazo yenye yezinto ezinokunceda umntu ongakholelwayo kubukho bukaThixo ayicingisise loo nto.”—Isaya 42:5, 9.

Yena uCiarán ekuthethwe ngaye ngaphambili watyhafiswa kukubona ukusilela kwezopolitiko. Xa ecingisisa ngobomi, kwathi qatha le ngcamango: NguThixo onamandla nonothando kuphela onokukwazi ukucombulula iingxaki zomhlaba aze amncede ambonise indlela yokuphuma kwiingxaki awayekuzo. Wavakala esithi, ‘Akwaba bendinokumfumana loo Thixo.’ Wathandaza esentlungwini esithi: “Ukuba uyandiva, ndicela undibonise indlela yokuphuma kwezi ngxaki zam uze uphelise nokubandezeleka kwabantu.” Kwiintsuku ezimbalwa kamva, kwafika iNgqina likaYehova emzini wakhe. Eli Ngqina lamchazela oko kuthethwa yiBhayibhile ngobungendawo obuphembelela oorhulumente babantu. (Efese 6:12) Le nkcazelo yaqinisekisa izinto awayezibona uCiarán yaza yamenza wafuna ukwazi okungakumbi. Emva kokufunda iBhayibhile izihlandlo eziliqela, ukholo lwakhe kuMdali lwaya lusomelela.

Ukuba Nolwalamano NoMdali Wakho

Uhanahaniso lonqulo, iimfundiso zabantu abangakholelwayo kubukho bukaThixo njengendaleko, nokugqugqisa kobungendawo kuye kwabangela abaninzi babuthandabuza de bambi babukhanyela ubukho boMdali. Noko ke, ukuba uyayifunda, iBhayibhile inokukunceda ufumane iimpendulo ezanelisayo kwimibuzo onayo. Ityhila kwaneengcamango zikaThixo, ‘iingcamango zoxolo, kungekhona ezentlekele, kodwa ezokuba asinike ikamva nethemba.’ (Yeremiya 29:11) Elo themba laba ngathi libhandeji kumanxeba awayenawo uBernadette, owazala umntwana onesiphene nowayebuthandabuza ubukho boMdali.

Indlela iBhayibhile ekuchaza ngayo ukuvumela kukaThixo ukubandezeleka iye yachukumisa abantu abaninzi ababekade bengakholelwa kubukho bukaThixo. Ukuba uzipha ixesha lokufumana iimpendulo zeBhayibhile kwimibuzo ebalulekileyo efana naleyo, nawe unokweyiseka ukuba ukho uThixo yaye enyanisweni ‘akakude kuye ngamnye wethu.’—IZenzo 17:27.

[Imibhalo esemazantsi]

[Ibhokisi ekwiphepha 13]

Imibuzo Engakhange Iphendulwe Yimfundiso Yendaleko

• Into engaphiliyo inokuyivelisa njani into ephilayo?—INDUMISO 36:9.

• Kutheni izilwanyana nezityalo zivelisa kuphela ezinye ezifana kwanazo?—GENESIS 1:11, 21, 24-28.

• Ukuba abantu bavela ezinkawini, kutheni kungekho namnye umntu ofana nenkawu namhlanje?—INDUMISO 8:5, 6.

• Yenzeka njani into yokuba kubekho abantu abanovelwano ukuba lo mhlaba ulungele ukuba kuphile abantu abanamandla kuphela?—ROMA 2:14, 15.

• Ngaba izinto ziya kuze zibahambele kakuhle abantu?—INDUMISO 37:29.

[Imifanekiso ekwiphepha 12, 13]

Inokwenzeka njani into yokuba uThixo onothando adale ihlabathi elinabantwana abasokolayo?

Uhanahaniso olwenziwa ezicaweni luye lwashiya abaninzi bengafuni nokuva ngoThixo