Ngaba Imfazwe Iyavumelana Nemfundiso YobuKristu?

“Ngumthetho kabani owenza imfazwe ibe lityala okanye isono? Kunzima ukufumana impendulo yalo mbuzo.”—Oliver O’Donovan, unjingalwazi kwimibandela yobuKristu.

UMZOBO okwiCanadian War Museum,obizwa ngokuba yiSacrifice nobonisa izinto ezenzeka ngeMfazwe Yehlabathi I, unamajoni abuleweyo, abantu abadiniweyo ngenxa yokulwa emfazweni kunye neentsapho zabo zisekhaya. Kumantla alo mzobo kuzotywe uYesu Kristu ebethelelwe emnqamlezweni. Abanye abantu bayothuka xa bebona uYesu “Inkosana Yoxolo” ezotywe kwimifanekiso yemfazwe. (Isaya 9:6) Kanti abanye abakuxabisayo ukuzincama kwamajoni amazwe abo bavakalelwa kukuba uThixo noNyana wakhe balindele ukuba amaKristu alwe amadabi akhusela inkululeko yamazwe abo.

Sele iziinkulungwane abefundisi beshumayela isigidimi esixhasa imfazwe. Ngonyaka we-417 C.E isazi sezakwalizwi uAugastine wabhala wathi: “Ningaze nicinge ukuba abantu abangamajoni okanye abasebenzisa izixhobo zemfazwe abamkelekanga kuThixo. . . . Abanye banilwela neentshaba ezingabonakaliyo ngokuthandaza, ngoxa nina nibalelwa kubahedeni ababonakalayo.” Ngenkulungwane ye-13 uThomas Aquinas wathi “iimfazwe ziyimfuneko logama nje ziza kukhusela amahlwempu nesizwe siphela kwiintshaba ezikhohlakeleyo.”

Ucinga ntoni wena? Ngaba uThixo uyayisikelela imfazwe xa isiliwa ngezizathu ezivakalayo njengokukhusela isizwe okanye ukuhlangula abantu abacinezelekileyo? “Ngumthetho kabani” anokukhangela kuwo amaKristu ukuze aqonde ukuthanda kukaThixo ngalo mbandela?

Umzekelo KaYesu Kristu

Ngaba singayazi imbono kaThixo kumbandela ontsonkothe njengeemfazwe eziliwayo namhlanje? Umpostile uPawulos wayeyiqonda le ngxaki yaye wabuza: “‘Ngubani na oyaziyo ingqondo kaYehova, ukuze amyalele?’ Kodwa sinayo ingqondo kaKristu.” (1 Korinte 2:16) UYehova uThixo wasinceda ngokuthumela uYesu emhlabeni ukuze asibonise indlela esifanele siphile ngayo. Izinto awazithethayo nawazenzayo uYesu zazibonisa indlela acinga nenza ngayo izinto uYehova. Ngoko ke wathini uYesu ngemfazwe? Wayeyijonga njani imfazwe?

Abanye basenokucinga ukuba ayikho enye into eyayimele ikhuselwe ngezixhobo njengobomi bukaYesu Kristu. Nomnye wabapostile bakhe wayevakalelwa ngaloo ndlela. Xa uYesu wangcatshwa waza wabanjwa lihlokondiba elalixhobe lafohlela ezinzulwini zobusuku, umhlobo wakhe uPetros “wolula isandla sakhe, wathi rhuthu ikrele lakhe, waxabela ikhoboka lombingeleli omkhulu waza wayisusa indlebe yalo.” Ngaba wayefanele amkhusele ngolo hlobo uYesu? UYesu wathi kuPetros: “Buyisela ikrele lakho endaweni yalo, kuba bonke abathabatha ikrele baya kutshabalala ngekrele.”—Mateyu 26:47-52.

Ayothusi indlela asabela ngayo uYesu. Kwiminyaka emibini ngaphambili wayethe: “Nivile ukuba kwathiwa, ‘Uze umthande ummelwane wakho, uluthiye utshaba lwakho.’ Ke mna, ndithi kuni: Qhubekani nizithanda iintshaba zenu, nibathandazele abo banitshutshisayo; ukuze nizingqine ningoonyana boYihlo osemazulwini, ekubeni elenza ilanga lakhe liphume kubantu abangendawo nabalungileyo nemvula eyinisa kubantu abangamalungisa nabangengomalungisa.” (Mateyu 5:43-45) Ngaba isengqiqweni into yokucinga ukuba umKristu angakwazi ukuthanda utshaba lwakhe aze aluthandazele ngoxa esilwa nalo?

Kwimbali sifunda ukuba amaKristu ayeneentshaba ezininzi. Ngokomzekelo, amaRoma amgweba aza ambulala uYesu. Kungekudala emva koko, umntu wayebulawa xa esithi ungumKristu. UYesu wayeqonda ukuba namaKristu ayesenokufuna ukuphakamisa izigalo aze avukele ingcinezelo yamaRoma, njengamanye amaYuda. Yiloo nto uYesu wathi ngabafundi bakhe: “Abayonxalenye yehlabathi, kanye njengoko nam ndingeyonxalenye yehlabathi.” (Yohane 17:16) AmaKristu akazange athathe cala kwipolitiki. Akazange akubone kufanelekile ukubhenela kwizigalo naxa ayexhatshazwa okanye esongelwa kumazwe ayehlala kuwo.

Abaxhasi Abangagungqiyo BobuKumkani BukaThixo

AmaKristu okwenene ayawuthobela umyalelo kaYesu wokungathathi cala kwipolitiki. Khawucinge nje ngento eyenzeka eIkoniyo, isixeko samandulo saseAsia Minor. “Xa kwabakho ilinge logonyamelo kubo abantu beentlanga namaYuda nabalawuli bawo, ukuba babaphathe [uPawulos noBharnabhas] ngokusa baze babagibisele ngamatye, bona, bakwaziswa ngako, basabela kwizixeko zaseLikawoniya, iListra neDerbhe nelizwe elijikelezileyo; yaye apho baqhubeka bezivakalisa iindaba ezilungileyo.” (IZenzo 14:5-7) Phawula ukuba xa amaKristu ehlaselwa ziintshaba zawo, ayengabheneli kwizikrweqe okanye aziphindezelele. Kunoko aye aqhubeka eshumayela “iindaba ezilungileyo.” Ziziphi ezo ndaba zilungileyo ayezishumayela?

AmaKristu ayeshumayela kwa isigidimi esasishunyayelwa nguYesu. Wathi: “Ndimele ndizivakalise iindaba ezilungileyo zobukumkani bukaThixo.” (Luka 4:43) UYesu nabalandeli bakhe babuxhasa ngokungagungqiyo uBukumkani bukaThixo. UKristu akazange asebenzise umkhosi ukuze akhusele obo Bukumkani. Wathi: “Ubukumkani bam abuyonxalenye yeli hlabathi. Ukuba ubukumkani bam bebuyinxalenye yeli hlabathi, abalindi bam bebeya kulwa ukuze ndinganikelwa kumaYuda. Kodwa ubukumkani bam abusuki kulo mthombo.”—Yohane 18:36.

‘Nimele Nithandane’

Ukungabi nanxaxheba xa kusiliwa imfazwe luphawu olwahlula unqulo lokwenyaniso. UYesu wathi: “Ngako oko bonke baya kwazi ukuba ningabafundi bam, ukuba ninothando phakathi kwenu.” (Yohane 13:35) Kukho izigidi zabantu eziye zavuyiswa kukufumana iqela labantu abathandana ngaloo ndlela, naxa bethukwa, bevalelwa ezintolongweni bambi bebulawa ngenxa yokwala kwabo ukuphakamisa izigalo.

KwiYurophu eyayilawulwa ngamaNazi, abasemagunyeni babamba baza bavalela amaNgqina kaYehova amalunga ne-10 000 ngenxa yokungalwi kwawo emfazweni kuquka namanye amalunga nama-3 000 awavalelwa kwiinkampu zoxinaniso. Kanye ngelo xesha, kwelinye icala eUnited States kwakuvalelwe amaNgqina angaphezu kwama-4 300 ngenxa yokwala ukungenela umkhosi. Akukho nalinye kumaNgqina aseJamani nawaseUnited States elathabatha izixhobo laya kulwa namanye amaKristu okanye abanye abantu. Ayenokuya njani emfazweni aze aphinde athi ayabathanda abazalwana bawo nabanye abantu?

Abantu abaninzi bathi kufanelekile ukulwa imfazwe xa uzikhusela. Kodwa ke: AmaKristu enkulungwane yokuqala asinda nakuba ayetshutshiswa ngenkohlakalo yaye engaziphindezeli. UBukhosi baseRoma obabunamandla abuzange bukwazi ukubutshayela ubuKristu. AmaKristu okwenyaniso asaqhubeka esanda nanamhlanje, yaye akakagungqi kwinto yokungathath’ icala. Kunokuba azame ukuziphindezela, alindele kuThixo ukuba awancede. ILizwi likaThixo iBhayibhile lithi: “Musani ukuziphindezelela, zintanda, kodwa yikhweleleni ingqumbo; kuba kubhaliwe kwathiwa: ‘Impindezelo yeyam; kuya kubuyekeza mna, utsho uYehova.’”—Roma 12:19.

[Ibhokisi ekwiphepha 30]

IIMFAZWE EZAZISIKELELWA NGUTHIXO

USirayeli wamandulo, uhlanga olwanyulwa ngokukhethekileyo nguThixo kwiinkulungwane ngaphambi kobuKristu, maxa wambi wayeyalelwa ukuba aye kulwa imfazwe. Ngaphambi kokuba angene kwaKanan ilizwe uThixo awayelithembise uAbraham, amaSirayeli axelelwa oku: “[Iintlanga ezisixhenxe] uya kuzinikela kuwe ngokuqinisekileyo uYehova uThixo wakho, kwaye uya kuzoyisa. Uze uzitshabalalise ngenene. Uze ungenzi mnqophiso nazo okanye ubonise ubabalo kuzo.” (Duteronomi 7:1, 2) Ngoko ke, iNjengele yamaSirayeli uYoshuwa yazoyisa ezo ntshaba “kanye njengoko uYehova uThixo kaSirayeli wayeyalele.”—Yoshuwa 10:40.

Ngaba amaSirayeli ayezitshayela ngokungenalusini iintlanga kuba nje ayefuna umhlaba wazo? Akunjalo. Ezo ntlanga zazizinikele ekunquleni izithixo, ekuphalazeni igazi nasekuziphatheni kakubi ngokwesini. Zazide zibingelele nangabantwana bazo emlilweni. (Numeri 33:52; Yeremiya 7:31) Ngenxa yokuba ngcwele kwakhe, ukuthanda okusesikweni kunye nabantu bakhe kwamnyanzela ukuba uThixo abusiphule neengcambu bonke ububi kwelo lizwe. Sekunjalo, uYehova waye wakhangela abo baneentliziyo ezintle—nto leyo ekungekho nkumanda enokukwazi ukuyenza namhlanje—waza wabasindisa abo babezimisele ukuguquka bamkhonze.

[Umfanekiso okwiphepha 31]

Ngaba uYesu wayelindele ukuba abalandeli bakhe baphakamise izigalo ukuze bamkhusele okanye bakhusele amanye amaKristu?

[Umfanekiso okwiphepha 31]

Iqela lamaNgqina kaYehova emva kokuba likhululwe kwinkampu yoxinaniso yaseBuchenwald ngowe-1945