Ukufumana Ukuhlaziyeka Kwizinto Zokomoya
“Thabathani idyokhwe yam . . . , kwaye niya kuyifumanela ukuhlaziyeka imiphefumlo yenu.”—MAT. 11:29.
1. Liliphi ilungiselelo elenziwa nguThixo kwiNtaba yaseSinayi ibe walenza ngayiphi injongo?
UMNQOPHISO woMthetho owamiselwa kwiNtaba yeSinayi wawuquka ilungiselelo leSabatha yeveki ngeeveki. Esebenzisa isithethi sakhe uMoses, uYehova wanika uhlanga lakwaSirayeli lo myalelo: “Uze uwenze umsebenzi wakho imihla emithandathu; kodwa uze uwuyeke ngomhla wesixhenxe, ukuze iphumle inkunzi yakho yenkomo ne-esile lakho, akhe azihlaziye unyana wekhobokazana lakho nomphambukeli.” (Eks. 23:12) Ebonisa ulwazelelo kwabo baphantsi koMthetho, uYehova wenza ilungiselelo lothando lokuba kubekho usuku lokuphumla ukuze abantu bakhe ‘bahlaziyeke.’
2. USirayeli wangenelwa njani ngokugcina iSabatha?
2 Ngaba iSabatha yayilusuku nje lokuphumla? Akunjalo, yayiyinxalenye ebalulekileyo yonqulo olwalunikelwa ngamaSirayeli kuYehova. Ukugcina iSabatha kwakunika iintloko-ntsapho ithuba lokufundisa iintsapho zazo ukuze ‘zigcine indlela kaYehova, zenze ngokobulungisa.’ (Gen. 18:19) Kwakukwanika iintsapho nabahlobo ithuba lokuba kunye ukuze bacamngce ngemisebenzi kaYehova baze bonwabe. (Isa. 58:13, 14) Okubaluleke ngakumbi kukuba, iSabatha yayifuzisela ixesha lokuhlaziyeka kokwenene okuza kubakho kuLawulo lukaKristu Lweminyaka Eliwaka. (Roma 8:21) Kuthekani kule mihla yethu? AmaKristu okwenene anomdla wokuphila ngeendlela zikaYehova, anokulufumana phi yaye njani olo hlaziyeko?
Fumana Ukuhlaziyeka Ngokunxulumana NamaKristu
3. AmaKristu enkulungwane yokuqala ayexhasana ngayiphi indlela yaye oko kwaba nawuphi umphumo?
3 Umpostile uPawulos wafanisa ibandla lamaKristu ‘nentsika nesixhaso senyaniso.’ (1 Tim. 3:15) AmaKristu okuqala ayexhasana, ekhuthazana yaye esakhana ngothando. (Efe. 4:11, 12, 16) Xa wayese-Efese, uPawulos wakhuthazwa ngamalungu ebandla laseKorinte awayemtyelele. Phawula indlela uPawulos awavakalelwa ngayo, wathi: “Ndinemihlali ngenxa yobukho bukaStefana noFortunato noAkhayiko, . . . kuba bawuhlaziyile umoya wam nowenu.” (1 Kor. 16:17, 18) Ngokufanayo, xa uTito waya kutyelela abazalwana eKorinte, uPawulos wabhalela elo bandla wathi: “Niye nawuhlaziya umoya wakhe.” (2 Kor. 7:13) Nanamhlanje, kuyawahlaziya amaNgqina kaYehova ukuba kunye namanye amaKristu.
4. Zisihlaziya njani iintlanganiso zethu?
4 Ngokuqinisekileyo, nawe uyazi ukuba kuyavuyisa ukuba kwiintlanganiso zebandla. Xa silapho ‘siyakhuthazana elukholweni.’ (Roma 1:12) Asifanele siphathe abazalwana noodadewethu abangamaKristu njengabantu esingaqhelananga nabo. Bangabahlobo bokwenene, abantu esibathandayo nesibahlonelayo. Kuyasivuyisa yaye kuyasikhuthaza ngokwenene ukuba kunye nabo kwiintlanganiso zethu.—Filem. 7.
5. Sinokuhlaziyana njani kwiindabano zesithili nezesiphaluka?
5 Enye into esihlaziyayo ziindibano zesithili nezesiphaluka esiba nazo nyaka ngamnye. Ukongezelela ekusinikeni amanzi enyaniso anika ubomi akwiLizwi likaThixo, iBhayibhile, ezi ndibano zisinika ithuba ‘lokuphangalala’ kunxulumano lwethu. (2 Kor. 6:12, 13) Kodwa kuthekani ukuba sineentloni yaye sikufumanisa kunzima ukuya kuzazisa ebantwini? Ukusebenza endibanweni kunokusinceda siqhelane nabazalwana noodadewethu. Emva kokuncedisa kwindibano yezizwe ngezizwe, omnye udade wathi: “Kwakungekho bantu bangako ndibaziyo ngaphandle kwentsapho yam neqaqobana labahlobo. Kodwa xa ndandincedisa ekucoceni, ndadibana nabazalwana noodade abaninzi! Kwakumnandi gqitha!”
6. Yiyiphi enye indlela esinokuhlaziyeka ngayo xa sikwiholide?
6 AmaSirayeli ayedla ngokuya kunqula eYerusalem kwimithendeleko emithathu ngonyaka. (Eks. 34:23) Kwakudla ngokufuneka ashiye amasimi neevenkile zawo aze athabathe iintsuku ehamba ngeenyawo kwiindlela ezinothuli. Sekunjalo, ukuya etempileni kwakuwenza abe ‘nemihlali kakhulu’ njengoko abo babelapho “babenikela indumiso kuYehova.” (2 Kron. 30:21) Nanamhlanje, kubavuyisa gqitha abakhonzi bakaYehova abaninzi ukuhamba neentsapho zabo besiya kutyelela eBheteli, izakhiwo zamasebe amaNgqina kaYehova ezikufuphi nabo. Ngaba kwiholide yenu elandelayo njengentsapho aninakukhe nityelele apho?
7. (a) Zinokuba yingenelo njani iimbutho? (b) Yintoni enokubangela ukuba imbutho ihlale ikhumbuleka yaye ibe yeyakhayo?
7 Ukuba kunye nentsapho nabahlobo kunokukhuthaza. UKumkani uSolomon osisilumko wathi: “Akukho nto elunge ngakumbi emntwini kunokuba adle, asele aze enze umphefumlo wakhe ubone okulungileyo ngenxa yokusebenza kwakhe nzima.” (INtshu. 2:24) Iimbutho azihlaziyi umphefumlo nje kuphela kodwa zisenza sithandane ngakumbi njengoko sisiya sisazana kakuhle njengamaKristu. Ukuze iimbutho zethu zihlale zikhumbuleka yaye zibe zezakhayo, kufanele kungabikho bantu baninzi yaye siqiniseke ukuba yonke into ihamba ngocwangco ingakumbi ukuba kuza kubakho utywala.
Ubulungiseleli Buyahlaziya
8, 9. (a) Thelekisa isigidimi sikaYesu nesababhali nabaFarisi. (b) Singenelwa njani ngokuxelela abanye ngenyaniso yeBhayibhile?
8 UYesu wayenenzondelelo kubulungiseleli yaye wakhuthaza nabafundi bakhe ukuba bamxelise. Oku sikubona kula mazwi akhe athi: “Isivuno sikhulu, kodwa abasebenzi bambalwa. Ngoko ke, bongozani iNkosi yesivuno ukuba ikhuphe abasebenzi baye esivunweni sayo.” (Mat. 9:37, 38) Isigidimi esasifundiswa nguYesu sasihlaziya ngokwenene; ‘sasiziindaba ezilungileyo.’ (Mat. 4:23; 24:14) Oku kwakwahluke gqitha kwimithetho eluxanduva abaFarisi ababeyithwalise abantu.—Funda uMateyu 23:4, 23, 24.
9 Xa sixelela abanye isigidimi soBukumkani, siyabahlaziya ngokomoya yaye kwangaxeshanye sandisa ulwazi noxabiso lwethu ngenyaniso yeBhayibhile. Umdumisi wathi: “Dumisani uYa! kuba kulungile ukuculela uThixo wethu uncuthu lwengoma; kuba kuyathandeka.” (INdu. 147:1) Ngaba unokuba novuyo olungakumbi ngokudumisa uYehova kubamelwane?
10. Ngaba impumelelo yethu kubulungiseleli ixhomekeke ekufamaneni abantu abaphulaphula isigidimi sethu? Cacisa.
10 Liyinyaniso elokuba, kweminye imimandla abantu bayaziphulaphula iindaba ezilungileyo ngoxa kwezinye kungenjalo. (Funda iZenzo 18:1, 5-8.) Ukuba uhlala kummandla apho singaphulaphulwa kangako isigidimi soBukumkani, zama ukunikel’ ingqalelo kwiingenelo ozifumanayo kubulungiseleli. Khumbula ukuba ukuqhubeka usenza umgudu wokuphakamisa igama likaYehova akulolize. (1 Kor. 15:58) Ngaphezu koko, impumelelo yethu kubulungiseleli ayixhomekekanga kwindlela abantu abasabela ngayo kwiindaba ezilungileyo. Sinokuba nentembelo yokuba uYehova uya kuqiniseka ukuba abo baneentliziyo ezinyanisekileyo bafumana ithuba lokuva isigidimi soBukumkani.—Yoh. 6:44.
Unqulo Lwentsapho Luyahlaziya
11. Yiyiphi imbopheleleko uYehova ayinike abazali yaye banokuyifeza njani?
11 Abazali abahlonel’ uThixo bafanele bafundise abantwana babo ngoYehova neendlela zakhe. (Dut. 11:18, 19) Ukuba ungumzali, ngaba unexesha olibekele ecaleni ukuze ufundise abantwana bakho ngoBawo wethu wasezulwini onothando? Ukuze ukwazi ukuphumeza le mbopheleleko ibalulekileyo uze unyamekele iintswelo zentsapho yakho, uYehova ulungiselele ukutya kokomoya okuninzi okufumaneka kwiincwadi, kumaphephancwadi, kwiividiyo nakwiimpapasho ezirekhodiweyo.
12, 13. (a) Iintsapho zinokungenelwa njani kwingokuhlwa yoNqulo Lwentsapho? (b) Abazali banokuqinisekisa njani ukuba unqulo lwentsapho luyahlaziya?
12 Ukongezelela, udidi lwekhoboka elithembekileyo neliyingqondi lulungiselele ingokuhlwa yoNqulo Lwentsapho. Le ngokuhlwa ibekelwe bucala ukuze kuqhutywe isifundo seBhayibhile sentsapho. Abaninzi baye bafumanisa ukuba eli lungiselelo liye labamanyanisa ngakumbi njengentsapho laza lomeleza ulwalamano lwabo noYehova. Kodwa abazali banokuqinisekisa njani ukuba unqulo lwentsapho luyahlaziya ngokomoya?
13 Ingokuhlwa yoNqulo Lwentsapho ayifanele ibe sisihlandlo esikruqulayo nesenza abantu bangakhululeki. Ngapha koko, sinqula ‘uThixo onoyolo,’ ibe ufuna simkhonze ngovuyo. (1 Tim. 1:11; Fil. 4:4) Kuyintsikelelo ngokwenene ukuba nengokuhlwa yokuxubusha ngenyaniso exabisekileyo eseBhayibhileni. Abazali bafanele bacinge ngeendlela ezahlukahlukeneyo abanokufundisa ngazo. Ngokomzekelo, enye intsapho yavumela unyana wayo uBrandon, oneminyaka elishumi ubudala, ukuba athethe ngomxholo othi “Kwakutheni Ukuze uYehova Asebenzise Inyoka Ukuba Imele USathana?” Le nto yayimkhathaza uBrandon kuba wayezithanda iinyoka yaye yayimenza buhlungu into yokuba zinxulunyaniswa noSathana. Ezinye iintsapho ziye zidlale umdlalo weBhayibhile, apho ilungu lentsapho ngalinye lidlala indawo yomlinganiswa othile oseBhayibhileni kanti ezinye ziye zenze umdlalo wesiganeko esithile. Ezi ndlela zokufundisa azonwabisi nje kuphela kodwa zenza abantwana bakho babe nenxaxheba, ukuze imigaqo yeBhayibhile ichukumise iintliziyo zabo.a
Ziphephe Izinto Ezinokukudimaza
14, 15. (a) Ukuxinezeleka nokunganqabiseki kuye kwanda njani kwimihla yokugqibela? (b) Luluphi olunye uxinezeleko esinokujamelana nalo?
14 Kule mihla yokugqibela yale nkqubo yezinto ingendawo luye lusanda uxinezeleko nokunganqabiseki. Izigidi zabantu zithwaxwa kukungabi namsebenzi nobunye ubunzima bezoqoqosho. Nabo baphangelayo badla ngokuvakalelwa ngathi imali yabo ingena kwingxowa evuzayo, kuba abakwazi ukuzanelisa zonke iintswelo zeentsapho zabo. (Thelekisa uHagayi 1:4-6.) Abezopolitiko nezinye iinkokeli batsho phantsi kwimizamo yabo yokuphelisa ubunqolobi nobunye ubungendawo. Abantu abaninzi badinyazwa ziimpazamo zabo.—INdu. 38:4.
15 AmaKristu okwenyaniso nawo aneengxaki yaye iyawacinezela le nkqubo kaSathana yezinto. (1 Yoh. 5:19) Kwezinye iimeko, abafundi bakaKristu basenokuxinezeleka ngakumbi njengoko bezama ukuhlala bethembekile kuYehova. UYesu wathi: “Ukuba banditshutshisile mna, baya kunitshutshisa nani.” (Yoh. 15:20) Noko ke, enoba “siyatshutshiswa . . . asishiywa enyanyeni.” (2 Kor. 4:9) Kutheni sisitsho nje?
16. Yintoni enokusinceda sihlale sivuya?
16 UYesu wathi: “Yizani kum, nonke nina nibulalekayo nenisindwa ngumthwalo, yaye ndiza kunihlaziya.” (Mat. 11:28) Ukuba nokholo ngokupheleleyo kwintlawulelo kaKristu, kufana nokubeka ubomi bethu ezandleni zikaYehova. Loo nto isenza sifumane “amandla angaphaya koko kuqhelekileyo.” (2 Kor. 4:7) “Umncedi,” umoya oyingcwele kaThixo, womeleza ukholo lwethu ukuze singanyamezeli iimvavanyo neembandezelo kuphela kodwa sihlale sivuya.—Yoh. 14:26; Yak. 1:2-4.
17, 18. (a) Nguwuphi umoya esifanele siwuphephe? (b) Yintoni enokwenzeka xa ulonwabo luyeyona nto iphambili kuthi?
17 Namhlanje amaKristu okwenyaniso afanele akuphephe ukuphenjelelwa ngumoya weli hlabathi wokuthi phithi ziziyolo. (Funda eyabase-Efese 2:2-5.) Ukuba asikwenzi oko, sinokubanjiswa ‘yinkanuko yenyama nenkanuko yamehlo nokuqhayisa ngezinto zobu bomi.’ (1 Yoh. 2:16) Okanye sisenokuphazama sicinge ukuba ukunikezela kwiminqweno yenyama kuya kusihlaziya. (Roma 8:6) Ngokomzekelo, abanye abantu baye bangamakhoboka eziyobisi notywala, imifanekiso engamanyala, imidlalo eyingozi nezinye izinto ezingcolileyo bezama ukuzonwabisa. ‘Amaqhinga’ kaSathana enza abantu babe nembono egqwethekileyo ngokuzihlaziya.—Efe. 6:11.
18 Eneneni, akukho nto iphosakeleyo ngokutya, ukusela nokuzonwabisa xa oko kusenziwa ngomlinganiselo ofanelekileyo. Sekunjalo, asivumeli ezo zinto zibe yeyona nto iphambili ebomini bethu. Kubalulekile ukuba silungelelane size sizeyise, ingakumbi kweli xesha siphila kulo. Ukusukela izinto zobuqu kunokusidimaza de ‘singabi nasiqhamo ngokubhekisele kulwazi oluchanileyo lweNkosi yethu uYesu Kristu.’—2 Pet. 1:8.
19, 20. Lunokufumaneka njani ulonwabo lokwenene?
19 Xa sisenza ngokuvisisana nemiyalelo kaYehova, siyaqonda ukuba naluphi na ulonwabo olufumaneka kweli hlabathi lolokwexeshana. UMoses wayeyiqonda loo nto, nathi siyayiqonda. (Heb. 11:25) Inyaniso kukuba, ukuhlaziyeka kokwenene, okuzisa uvuyo nolwaneliseko oluhlala luhleli, kubangelwa kukwenza ukuthanda kukaBawo wethu wasezulwini.—Mat. 5:6.
20 Ngamana singahlala sifumana ukuhlaziyeka kwizinto zokomoya. Xa sisenjenjalo, ‘siyazilumla ekungabini nabuthixo nakwiminqweno yehlabathi, ngoxa silinde ithemba elonwabisayo nembonakaliso ezukileyo yoThixo omkhulu neyoMsindisi wethu, uKristu Yesu.’ (Tito 2:12, 13) Ngoko masizimisele ukuhlala sikwidyokhwe kaYesu ngokuzithoba kwigunya nakulwalathiso lwakhe. Ukuba senjenjalo, siya konwaba size sihlaziyeke ngokwenene!
[Umbhalo osemazantsi]
a Ukuze ufumane inkcazelo eyongezelelekileyo ngendlela yokwenza isifundo sentsapho sibe sesibangel’ umdla nesakhayo, funda Ubulungiseleli Bethu BoBukumkani bukaDisemba 1990, iphepha 1-2.
Ungaphendula Uthini?
• Abantu bakaYehova bakufumana njani ukuhlaziyeka namhlanje?
• Yiyiphi indlela obusihlaziya ngayo ubulungiseleli thina nabo sithetha nabo?
• Yintoni enokwenziwa ziintloko-ntsapho ukuqinisekisa ukuba unqulo lwentsapho luyahlaziya?
• Ziziphi izinto ezisidimazayo ngokomoya?
[Imifanekiso ekwiphepha 26]
Xa sithabatha idyokhwe kaYesu, siye sihlaziyeke ngeendlela ezininzi