Ukujamelana Nokungcatshwa Liqabane

UMARGARITA nomyeni wakhe, uRaúl, babeneminyaka emininzi bekhonza uYehova njengabalungiseleli bexesha elizeleyo.a Kodwa emva nje kokuzalwa komntwana wabo wokuqala, uRaúl waqalisa ukumshiya uYehova. Ekugqibeleni, uRaúl waziphatha kakubi waza wasuswa ebandleni lamaKristu. UMargarita uthi: “Xa kwakusenzeka zonke ezi zinto, kwakungathi ndiza kufa. Intliziyo yam yayibuhlungu yaye ndandingayazi into emandiyenze.”

Kamsinya emva kokuba uJane etshatile, umyeni wakhe wabonisa ukungathembeki, kodwa ngenye indlela. Waqalisa ukumbetha. UJane uthi: “Xa wandibetha ngenqindi okokuqala, ndothuka, ndaba neentloni ndaza ndaziva ndingenasidima. Wayesoloko endibetha, akugqiba andicenge ukuba ndimxolele. Ndandicinga ukuba njengomKristu ndinyanzelekile ukuba ndimxolele. Ndandicinga ukuba ndiya kuba andithembekanga xa ndichazela abanye ingxaki yethu—nkqu nabadala abasebandleni lethu. Le nto yaqhubeka kangangeminyaka. Lonke eli xesha ndandicinga ukuba ikho into endinokuyenza ukuze umyeni wam andithande. Xa ekugqibeleni wandishiyayo nentombi yethu, ndavakalelwa kukuba ndisilele ngandlel’ ithile, okanye ikho into engendandiyenzile ukuze ndisindise umtshato wethu.”

NjengoMargarita noJane, kusenokwenzeka ukuba ukhathazekile, uneengxaki zemali okanye uphelelwa lukholo ngenxa yokuba umyeni wakho ekungcatshile. Okanye kusenokwenzeka ukuba uyindoda enentliziyo ebuhlungu nejamelene nobunzima kuba umfazi wakho eye akathembeka. Ngokungathandabuzekiyo, siphila ‘kumaxesha amanqam ekunzima ukujamelana nawo,’ njengoko iBhayibhile yaxela kwangaphambili. Esi siprofeto sibonisa ukuba “ngemihla yokugqibela,” iintsapho zaziya kuhlaselwa yaye uthando lwabaninzi lwaluya kuphela. Abanye babeya kuthi bakhonza uThixo kodwa izenzo zabo zaziya kubangqina bengamaxoki. (2 Tim. 3:1-5) NamaKristu okwenyaniso anazo ezi ngxaki; ngoko yintoni onokuyenza ukuze ujamelane nazo ukuba uye wangcatshwa?

Zijonge Ngendlela UYehova Akujonga Ngayo

Ekuqaleni, isenokungakholeleki into yokuba umntu omthandayo akukhathaze kangangaka. Usenokude ucinge ukuba nguwe obangele ukuba enze isono.

Kodwa ke, khumbula ukuba noYesu owayefezekile wangcatshwa ngumntu awayemthembile nawayemthanda. UYesu wathandaza ngaphambi kokuba akhethe abapostile, abona bahlobo bakhe basondeleyo kuye. Ngelo xesha, bonke aba bali-12 babengabakhonzi abathembekileyo bakaYehova. Ngoko ufanele ukuba wakhathazeka uYesu xa uYudas ‘ejika esiba ngumngcatshi.’ (Luka 6:12-16) Sekunjalo, uYehova akazange ambek’ ityala uYesu ngenxa yezenzo zikaYudas.

Kakade ke, alikho iqabane lomtshato elifezekileyo. Omabini amaqabane aza kuzenza iimpazamo. Umdumisi waphefumlelwa ukuba abhale athi: “Ukuba ubulinda iziphoso, Ya, Owu Yehova, ngubani na obenokuma?” (INdu. 130:3) Exelisa uYehova, omabini amaqabane afanele akulungele ukuxolelana.—1 Pet. 4:8.

Noko ke, “ngamnye wethu uya kuziphendulela kuThixo.” (Roma 14:12) Ukuba iqabane lisoloko lithetha rhabaxa okanye libetha iqabane lalo, lilo elifanele liphendule kuYehova. UYehova uluthiyile ugonyamelo nentetho etshabhisayo, ngoko akukho mntu unokuzithethelela xa ephatha iqabane lakhe ngendlela engabonisi thando nentlonelo. (INdu. 11:5; Efe. 5:33; Kol. 3:6-8) Enyanisweni, ukuba umKristu usoloko egqajukelwa ngumsindo yaye akaguquki, ufanele asuswe ebandleni lamaKristu. (Gal. 5:19-21; 2 Yoh. 9, 10) Iqabane lomtshato alifanele lizive linetyala xa lichazela abadala ngesi senzo singawafanelanga amaKristu. Eneneni, uYehova unovelwano ngabo baphathwa kakubi ngolu hlobo.

Ukuba iqabane lomtshato liyakrexeza, alipheleli nje ngokona iqabane lalo, kodwa lona noYehova. (Mat. 19:4-9; Heb. 13:4) Ukuba iqabane elimsulwa liphila ngokuvisisana nemigaqo eseBhayibhileni, akukho mfuneko yokuba lizive linetyala.

Khumbula ukuba uYehova uyayazi indlela ovakalelwa ngayo. Uzichaza njengendoda engumnini wohlanga lukaSirayeli yaye iLizwi lakhe lineendinyana ezininzi ezichukumisayo ezibonisa indlela awaba buhlungu ngayo xa olo hlanga lungazange luthembeke kuye. (Isa. 54:5, 6; Yer. 3:1, 6-10) Qiniseka ukuba uYehova uyayazi intlungu okuyo ukuba uye ngandlel’ ithile wangcatshwa liqabane lakho lomtshato. (Mal. 2:13, 14) Uyazi ukuba ufuna ukuthuthuzelwa nokukhuthazwa.

Indlela UYehova Asithuthuzela Ngayo

Enye indlela uYehova asithuthuzela ngayo kukusebenzisa ibandla lamaKristu. UJane wayifumana loo nkxaso. Uthi: “Utyelelo lomveleli ohambahambayo lwafika ngexesha endandidandatheke ngalo. Wayeyazi indlela endandixinezeleke ngayo ngenxa yomyeni wam owayeqhawula umtshato wethu. Wandinceda ndaqiqa ngeZibhalo ezifana neyoku-1 yabaseKorinte 7:15. Ndancedwa zezo ndinyana zeBhayibhile nayindlela awathetha ngobubele ngayo ukuze ndingazibek’ ityala nokuze ndibe noxolo lwengqondo.”b

UMargarita, ekuthethwe ngaye ngaphambili, wafunda ukuba uYehova usebenzisa ibandla lamaKristu ukuze asincede. UMargarita uthi: “Xa kwabonakala ukuba umyeni wam akazimiselanga kuguquka, ndathabatha abantwana bam ababini ndaza ndafudukela kwesinye isixeko. Xa ndifika apho, ndaqesha indlu enamagumbi amabini. Ngosuku olulandelayo, ndathi ndisakhupha iimpahla ndikhathazekile, kwankqonkqoza umntu emnyango. Ndandicinga ukuba libhinqa elingumnini wendlu endandiqeshe kuyo. Ndamangaliswa kukubona ukuba yayingudade owayeqhubele uMama isifundo seBhayibhile waza wanceda intsapho yasekhaya ukuba ifumane inyaniso. Wayengalindelanga ukundibona, kuba wayeze kuqhuba isifundo seBhayibhile neli bhinqa ndandiqeshe kulo. Andizange ndikwazi ukuzibamba iinyembezi. Ndamchazela imeko yam, salila sobabini. Wenza amalungiselelo okuba siye kwiintlanganiso ngaloo mini. Ibandla lasamkela yaye abadala benza amalungiselelo okusinceda kwizinto zokomoya.”

Indlela Abanye Abanokunceda Ngayo

Eneneni amalungu ebandla lamaKristu anokuba luncedo ngeendlela ezininzi. Ngokomzekelo, kwafuneka uMargarita afune umsebenzi. Enye intsapho ebandleni yavuma ukumgcinela abantwana ukuphuma kwesikolo xa kuyimfuneko.

UMargarita uthi: “Eyona nto ndiyixabisayo kuxa abazalwana noodade behamba nam nabantwana bam entsimini.” Xa amalungu ebandla encedana ngolo hlobo, ‘athwala elowo uxanduva lomnye’ yaye azalisekisa “umthetho kaKristu.”—Gal. 6:2.

Abo babandezeleka ngenxa yezono zabanye bayaluxabisa olu ncedo. UMonique, owashiywa ngumyeni, emshiya netyala le-credit card elingangee-R110 000 nabantwana abane, uthi: “Abazalwana noodadewethu bokomoya babonakalisa uthando. Andazi ukuba ngendandenze ntoni ngaphandle kwabo. UYehova wandinika abona bazalwana banobubele, abazincamayo ngenxa yabantwana bam. Ndavuya xa ndibona abantwana bam bekhula ngokomoya ngenxa yolu ncedo. Xa ndifuna amacebiso, abadala babendinceda. Xa ndifuna umntu endiza kuzityand’ igila kuye, babendiphulaphula.”—Marko 10:29, 30.

Kakade ke, umhlobo onothando uya kusebenzisa ingqiqo, aze agqibe enoba lixesha elifanelekileyo lokuthetha nomntu ngeengxaki zakhe kusini na. (INtshu. 3:7) UMargarita uthi: “Amaxesha amaninzi ndandikuthanda ukuncokola noodade abasebandleni lam elitsha ngomsebenzi wokushumayela, izifundo zethu zeBhayibhile, abantwana bethu—kodwa kungekhona ngeengxaki zam. Ndandiyixabisa into yokuba bendinceda ndilibale ngezinto ezandehlelayo yaye ndakwazi ukuqhubeka nobomi.”

Kuphephe Ukufuna Impindezelo

Ngamanye amaxesha, usenokungaziva unetyala xa iqabane lakho lonile, kodwa kusenokwenzeka ukuba iyakucaphukisa into yokuba ubandezeleka kangaka ngenxa yezono zalo. Ukuba uyawuvumela lo msindo ukhule, oku kunokubangela ukuba umnqweno wakho wokuhlala uthembekile kuYehova ufiphale. Ngokomzekelo, usenokude ufune iindlela zokuziphindezela kwiqabane lakho elingathembekanga.

Ukuba uvakalelwa ngolu hlobo, unokucinga ngomzekelo kaYoshuwa noKalebhi. La madoda athembekileyo aphantse aphulukana nobomi bawo xa ayeye kuhlola iLizwe Lesithembiso. Ezinye iintlola azizange zibe nokholo yaye zabangela ukuba abantu bangamthobeli uYehova. Amanye amaSirayeli ayefuna ukuxuluba uYoshuwa noKalebhi ngamatye kuba babekhuthaze olo hlanga ukuba luhlale luthembekile. (Num. 13:25–14:10) Ngenxa yokungathembeki kukaSirayeli, uYoshuwa noKalebhi kwanyanzeleka ukuba bachithe iminyaka engama-40 bebhadula entlango ngenxa yezono zabanye.

Nangona uYoshuwa noKalebhi kusenokwenzeka ukuba babedanile, abazange babacaphukele abazalwana babo ngenxa yezono zabo. Banikela ingqalelo ekukhonzeni uYehova. Ngasekupheleni kweminyaka engama-40 besentlango, bona nabanye abaLevi ababesaphila kweso sizukulwana bavuzwa ngokungeniswa kwiLizwe Lesithembiso.—Num. 14:28-30; Yosh. 14:6-12.

Ukungathembeki kweqabane lakho kusenokukubangela ukuba ubandezeleke kangangethuba elithile. Umtshato usenokuphela, kodwa wena usenokushiyeka udandathekile yaye ukwimeko engentle yezoqoqosho. Noko ke, kunokuba uhlale udandathekile, khumbula ukuba uYehova uyayazi eyona ndlela ifanelekileyo yokohlwaya abo baye bayigatya ngabom imilinganiselo yakhe, njengokuba wenjenjalo kumaSirayeli ayengenalukholo.—Heb. 10:30, 31; 13:4.

Unokukwazi Ukunyamezela

Kunokuba uvumele iingcinga ezingakhiyo ukuba zikuthez’ amandla, zalisa ingqondo yakho ngeengcinga zikaYehova. UJane uthi: “Ndafumanisa ukuba kwakundinceda ukuphulaphula amanqaku arekhodiweyo eMboniselo noVukani! Ukuya ezintlanganisweni kwakundomeleza gqitha. Ukuba nenxaxheba ezintlanganisweni kwakundinceda ndilibale ngeengxaki zam. Umsebenzi wokushumayela nawo wandinceda ngendlela efanayo. Xa ndinceda abanye ukuba bakhulise ukholo lwabo kuYehova, ndandisomeleza nolwam ukholo. Ukunyamekela izifundo zeBhayibhile kwakundinceda ndihlale ndicinga ngezinto ezibaluleke ngakumbi.”

UMonique ekuthethwe ngaye ngaphambilana, uthi: “Ukuya rhoqo kwiintlanganiso nokuba nenxaxheba entsimini kangangoko ndinako, kuye kwandinceda ndakwazi ukunyamezela. Intsapho yam iye yakwazi ukusondelelana nokusondela ebandleni. Iingxaki zam zandinceda ndazibona iintsilelo zam. Ndiye ndavavanywa, kodwa uYehova uye wandinceda ndakwazi ukunyamezela.”

Nawe unokukwazi ukunyamezela. Nakuba ukungcatshwa liqabane kubangela intlungu, zama ukuthobela isiluleko sikaPawulos esiphefumlelweyo: “Masingayeki ukwenza okuhle, kuba sovuna ngexesha elililo ukuba asidinwa.”—Gal. 6:9.

[Imibhalo esemazantsi]

[Umfanekiso okwiphepha 31]

Abantu abashiywe ngamaqabane abo bayakuxabisa ukuncedwa entsimini