Iphulo Elikhethekileyo EBulgaria Liyaphumelela
“Isivuno sikhulu, kodwa abasebenzi bambalwa. Ngoko ke, bongozani iNkosi yesivuno ukuba ikhuphe abasebenzi baye esivunweni sayo.”—MAT. 9:37, 38.
LOO mazwi kaYesu ayafaneleka kwimeko yaseBulgaria, ilizwe elikwiBalkan kumzantsi-mpuma weYurophu! Kufuneka abasebenzi abangakumbi abaza kushumayela iindaba ezilungileyo kubemi balapho abangaphezu kwezigidi ezisixhenxe. EBulgaria kukho abavakalisi abamalunga ne-1 700 kodwa abakwazi ukugubungela yonke intsimi yabo. Ngenxa yoko, iQumrhu Elilawulayo lamema amaNgqina athetha isiBulgaria ahlala kumazwe aseYurophu ukuza kuncedisa kwiphulo elikhethekileyo ngowama-2009. Eli phulo laliza kuba sehlotyeni lize lithabathe iiveki ezisixhenxe yaye laliza kuphela ngexesha leNdibano Yesithili ‘Yokuhlala Nilindile!’ eyayiza kuba seSofia ngoAgasti 14-16, 2009.
Baninzi Abantu Ababa Nenxaxheba
Abazalwana abakwiofisi yesebe eSofia babezibuza ukuba baya kuba bangaphi na abantu abaza kuza kweli phulo bevela eFransi, eGrisi, eItali, eJamani, ePoland naseSpeyin. Kaloku, kwakuza kufuneka bazihlawulele iindleko zokuya eBulgaria baze bachithe ixesha labo leholide beshumayela. Kwabavuyisa gqitha ukubona ukuba veki nganye kufika izicelo ezingakumbi ezada zaya kufikelela kuma-292! Ekubeni inani labantu abezayo lalilikhulu, babeza kukwazi ukuthumela la matsha-ntliziyo kwizixeko ezithathu zaseBulgaria, eKazanlak, eSandanski naseSilistra. Abaveleli beziphaluka baseBulgaria bakhuthaza oovulindlela nabavakalisi ukuba nabo babe nenxaxheba kweli phulo. Ekugqibeleni, amatsha-ntliziyo angama-382 ayeshumayela ngenkuthalo kwimimandla engafane ifikelelwe ngeendaba ezilungileyo.
Abazalwana abakumabandla akufuphi bathunyelwa kuloo mimandla ukuya kulungiselela iindawo zokuhlala. Baqesha izindlu namagumbi kwiihotele ezinamaxabiso aphantsi. Aba bazalwana basebenza ngenkuthalo ukwenza la matsha-ntliziyo azive esekhaya yaye bawanyamekela. Kuzo zozithathu ezi zixeko, kwakuqeshwa iindawo zokuqhubela iintlanganiso. Kwenziwa amalungiselelo okuba abazalwana abatyeleleyo baqhube iintlanganiso zebandla. Kwakuvuyisa ukubona abavakalisi abangama-50 behlanganisene ukuza kudumisa uYehova, kwindawo ekungekho neNgqina eli linye.
Babekhuthele ngokwenene abo beze kweli phulo bevela kwamanye amazwe. Ehlotyeni, eBulgaria iqondo lobushushu liye libe ngaphezu kwama-40 ngokukaCelsius. Sekunjalo, ayikho into eyabatyhafisayo aba bazalwana noodade. ESilistra, isixeko esikuMlambo iDanube esinabemi abangaphezu kwama-50 000, kwashunyayelwa ngokucokisekileyo kwiiveki ezintathu zokuqala. Emva koko, abazalwana badlulela nakwiilali ezikufuphi, de baya kufika naseTutrakan, ekumgama oziikhilomitha ezingama-55 entshona yeSilistra. Babedla ngokuqalisa entsimini nge-9:30 kusasa. Emva kwesidlo sasemini, babedla ngokuphinda bathathise de kube yintsimbi yesi-7:00 ngokuhlwa okanye emva koko. Ngenxa yokuzibhokoxa kwala matsha-ntliziyo, iphulo elalisenziwa eKazanlak naseSandanski nalo laya kufikelela kwiilali needolophu ezikufuphi.
Waba Yintoni Umphumo?
Kwezi veki zisixhenxe kwanikelwa ubungqina obubalaseleyo. Njengoko kwatshiwoyo ngemihla yabapostile, abemi bezi zixeko babenokuthi, ‘Nisizalisile isixeko sethu ngemfundiso yenu.’ (IZe. 5:28) La maNgqina asasaza amaphephancwadi angama-50 000 aza aqalisa izifundo zeBhayibhile ezingama-482. Okuvuyisayo kukuba, ngoSeptemba 1, 2009, kwamiselwa ibandla eSilistra, yaye kukho amaqela ahlanganisanayo eKazanlak naseSandanski. Kuyavuyisa ukubona abantu ababeqala ukuva iindaba ezilungileyo kweli phulo besenza inkqubela ngokomoya.
Kwiveki yokuqala yephulo, udade othetha isiBulgaria onguvulindlela okhethekileyo waseSpeyin washumayela kuKarina, ibhinqa laseSilistra elalithengisa amaphephandaba esitratweni. UKarina wabonakalisa umdla waza weza kwiintlanganiso. Wavuma ukuqhutyelwa isifundo seBhayibhile. Ekubeni umyeni wakhe engakholelwa kuThixo, wacela ukuba aqhutyelwe isifundo seBhayibhile epakini. Wayefundelwa kunye neentombi zakhe ezimbini. Intombi yakhe endala, uDaniela, yabonakalisa uxabiso ngenyaniso yeBhayibhile. Yafunda incwadi ethi Okufundiswa YiBhayibhile yayigqiba ngeveki nje enye ibe kwangoko yenza oko iBhayibhile ikutshoyo ngemifanekiso yonqulo. Emva koko yaqalisa ukuxelela abahlobo bayo ngenyaniso. Emva kweeveki nje ezintathu iye kwintlanganiso yebandla yokuqala, yathi kudade owayeyiqhubela isifundo: “Ndiziva ingathi ndingomnye wenu. Ndifanele ndenze ntoni ukuze nam ndiqalise ukushumayela?” UDaniela wenza inkqubela entle kunye nonina nodadewabo omncinane.
EKazanlak, umzalwana othetha isiBulgaria ogama linguOrlin waseItali owayeze kweli phulo, ngenye imini xa wayevela entsimini wadlula kwabanye abafana ababini ababehleli epakini waza washumayela kubo. Wabanika incwadi ethi Okufundiswa YiBhayibhile waza walungiselela ukubuyela kubo ngosuku olulandelayo. Ekubuyeni kwakhe, uOrlin waqalisa isifundo seBhayibhile noSvetomir waza wabuyela nangosuku olulandelayo. Kwiintsuku ezisithoba uOrlin wayesele efunde noSvetomir izihlandlo ezisibhozo. USvetomir wathi: “Kwiintsuku ezimbini ngaphambi kokuba ndidibane nawe, ndithandaze kuThixo ndicela ukuba andincede ndimazi. Ndiye ndamthembisa ukuba, ukuba angandinceda ndiya kuzahlulela kuye.” Emva kokuba uOrlin ebuyele eItali, abazalwana basekuhlaleni baqhubeka befunda noSvetomir yaye wenza inkqubela ngokomoya.
Iintsikelelo Ezafunyanwa Ngabo Bazincamayo
Bavakalelwa njani abo baye basebenzisa ixesha labo leholide baza babetha kubo epokothweni ukuya kushumayela iindaba ezilungileyo kwelinye ilizwe? Omnye umdala waseSpeyin wathi: “Eli phulo liye labangela ukuba abazalwana baseSpeyin abakwintsimi yesiBulgaria bamanyane. Liye laba luncedo gqitha kubazalwana abaye banenxaxheba kulo.” Esinye isibini esitshatileyo saseItali sathi: “Le iye yaba yeyona nyanga ikhethekileyo ebomini bethu!” Songezelela sisithi: “Eli phulo liye latshintsha ubomi bethu! Ngoku sicinga ngendlela eyahlukileyo.” Esi sibini siye sacinga ngokufudukela eBulgaria ukuya kunceda apho kufuneka khona abavakalisi abangakumbi. UCarina unguvulindlela othe ngxi waseSpeyin ongatshatanga owaxhasa eli phulo eSilistra. Emva koko wayeka ukuphangela eSpeyin waza wafudukela eBulgaria ukuya kuxhasa ibandla elitsha elikuloo dolophu. Waqokelela imali eyaneleyo ukuze akwazi ukuhlala eBulgaria kangangonyaka. UCarina uthi ngesigqibo sakhe: “Ndiyavuya kuba uYehova eye wandivumela ndize kukhonza apha eBulgaria, ibe ndithemba ukuba ndiya kukwazi ukukhe ndihlale apha ithuba elide. Sele ndinezifundo zeBhayibhile ezihlanu ibe ezithathu kuzo ziyeza kwiintlanganiso.”
Omnye udade waseItali wayefuna ukuya kweli phulo kodwa ekubeni wayesandul’ ukuqalisa emsebenzini omtsha wayengenazo iintsuku zeholide. Sekunjalo, wacela ikhefu lenyanga yaye wayengazukuhlawulwa ebudeni belo xesha ibe wayekulungele ukuwuyeka loo msebenzi ukuba isicelo sakhe siyakhatywa. Akazange akholelwe xa umqeshi wakhe esithi: “Kulungile, kodwa ndifuna undenzele le nto: Xa ufika eBulgaria uze undithumelele iposkhadi.” Lo dade waqiniseka ukuba uYehova uyiphendule imithandazo yakhe.
UStanislava, udade oselula waseVarna isixeko saseBulgaria owayesebenza umsebenzi ohlawula imali encumisayo, naye waba nenxaxheba kweli phulo eSilistra. Xa wabona indlela abonwabe ngayo oovulindlela abaninzi ababeze kwilizwe lakhe ukuza kushumayela iindaba ezilungileyo, wachukumiseka de walila. Waqalisa ukucinga ngoko wayekwenza ebomini, ukuzibhokoxa kumsebenzi wempangelo. Ekubuyeleni kwakhe ekhaya emva kweeveki ezimbini, wayeka ukuphangela waza waba nguvulindlela othe ngxi. Ngoku wonwabe ngokwenene, kuba ukhumbula uMdali wakhe ngemihla yobutsha bakhe.—INtshu. 12:1.
Kuyintsikelelo ngokwenene ukuxakeka enkonzweni kaYehova. Ayikho into ebaluleke ngaphezu kokusebenzisa ixesha namandla akho ekwenzeni lo msebenzi ubalulekileyo wokufundisa nokushumayela iindaba ezilungileyo. Ngaba zikho iindlela onokwandisa ngazo ixesha lakho kobu bulungiseleli busindisa ubomi? Kusenokwenzeka ukuba kwilizwe ohlala kulo kukho iindawo ekufuneka abavakalisi abangakumbi kuzo. Ngaba unokufudukela kuloo mimandla? Okanye usenokucinga ngokufunda olunye ulwimi ukuze uncede abantu abakwilizwe ohlala kulo abanxanelwe inyaniso yeBhayibhile. Enoba luluphi na uhlengahlengiso olwenzayo ukuze ube nexesha elingakumbi kubulungiseleli, qiniseka ukuba uYehova uya kukusikelela gqitha.—IMize. 10:22.
[Ibhokisi/Umfanekiso okwiphepha 32]
Usuku Olungasokuze Lulibaleke
Abantu abaninzi ababeze kwiphulo elikhethekileyo eBulgaria bevela kumazwe aseYurophu baceba ukuba babekho kwiNdibano yeSithili ‘Yokuhlala Nilindile!’ eSofia. Kwabakhuthaza gqitha abazalwana noodade basekuhlaleni ukuba kunye nezi ndwendwe zininzi zivela kumazwe ngamazwe. Bavuya gqitha abo bangama-2 039 ababekho xa uMzalwan’ uGeoffrey Jackson weQumrhu Elilawulayo ekhulula INguqulelo Yehlabathi Elitsha YeZibhalo Ezingcwele epheleleyo ngolwimi lwesiBulgaria! Bonke ababekho ngaloo Lwesihlanu babonisa indlela abanoxabiso novuyo ngayo ngokuqhwaba izandla ixesha elide. Abanye bade balila ngenxa yovuyo. Le nguqulelo ichanileyo nebhalwe ngendlela eqondakala lula iya kunceda abantu abanyanisekileyo eBulgaria ukuba bamazi uYehova.
[Imaphu ekwiphepha 30, 31]
(Ukuba ufuna inkcazelo ehlahlelwe kakuhle, yiya kwimpapasho)
BULGARIA
SOFIA
Sandanski
Silistra
Kazanlak
[Imifanekiso ekwiphepha 31]
Ebudeni bezo veki zisixhenxe kwanikelwa ubungqina obubalaseleyo