Inkululeko Yonqulo EBulgaria

Ooduladula abathandathu ababevela eBulgaria, ababethwele abantu abangaphezu kwama-300 ababesiya kwiNdibano YeSithili “Yabathandi Benkululeko,” bafika kumabala endibano angaphandle kweTesalonika, eGrisi, ngobusuku bangoLwesine, ngoJulayi 11, 1991. Ngenxa yemfazwe yamakhaya eseYugoslavia eselumelwaneni nangenxa yesiphithiphithi esibangeleyo kuloo mmandla, aba bantu babesiya endibanweni babengakwazi ukufumana iimvume zabo zokungena kwelinye ilizwe kwada kwangowona mzuzu wokugqibela.

Emva kwemini ngoLwesithathu abasebenzi kwiofisi yozakuzo eseSofia, eBulgaria, basebenza ixesha elongezelelekileyo ukuze balungise iimvume zokungena kwelinye ilizwe. Ngaloo ndlela, ooduladula bakwazi ukuqokelela abo babeza kuya endibanweni nababekwimimandla eyahlukahlukeneyo yaseBulgaria kwangethuba ukuze babase kwindawo enendibano ngobusuku bangaphambi kokuba indibano iqalise ngoLwesihlanu, ngoJulayi 12.

Ngelo xesha, umsebenzi wamaNgqina kaYehova wawuvaliwe eBulgaria, ngoko olunjani lona uvuyo awaba nalo ngokunandipha ngokukhululekileyo ubudlelane bobuKristu kwilizwe eliselumelwaneni laseGrisi! Iholo ekwindawo enendibano, eneqonga elihonjiswe ngendlela ebukekayo (elibonakala emfanekisweni), yayilungiselelwe iindwendwe ezazivela eBulgaria. Hayi indlela ezazivuya nezazinombulelo ngayo ezi ndwendwe ngokuphulaphula lonke ucwangciso ngolwimi lwazo! Ngumdlalo weBhayibhile kuphela ongazange unikelwe ngolwimi lwazo. Intetho yemizuzu eli-15 eyayishwankathela umdlalo yanikelwa ngolwimi lwaseBulgaria, zaza ke iindwendwe zadibana nabazalwana bazo baseGrisi ukuze ziwubukele xa udlalwa.

Eyona nto yathi yabalasela kwindibano yaseBulgaria yayiyintetho yobhaptizo eyayingentsasa yangoMgqibelo. Kwakuze abantu abangama-342, yaye abangama-39 babhaptizwa (bambi babo babonakala bemile kulo mfanekiso ungasentla). Kwakhona ezi ndwendwe zavuyiswa kukukhutshwa, ngolwimi lwazo, kwencwadana enemifanekiso ethi Imimoya Yabafileyo​—⁠Ngaba Inokukunceda Okanye Inokukwenzakalisa? Ngaba Ikho Ngokwenene? nempapasho ethi Incwadi Yam Yamabali EBhayibhile.

Kodwa eyona nto yayiza kubavuyisa kakhulu aba bantu babeye endibanweni yayiza kwenzeka ngokukhawuleza nje bakuba bebuyele ekhaya eBulgaria. NgoJulayi 17, kwiintsuku nje ezimbalwa emva kwendibano, umsebenzi wamaNgqina kaYehova wamkelwa ngokusemthethweni eBulgaria! Okubalaseleyo kukuba, kwinyanga elandelayo abavakalisi bebandla eBulgaria baba nomlinganiselo weeyure ezingama-21,2 kubulungiseleli babo. Hayi indlela esinokuvuya ngayo kuba ngoku inkululeko yonqulo inanditshwa kwelinye ilizwe eliseMpuma Yurophu!