Sondela KuThixo
‘Umphulaphuli Wemithandazo’
NGABA ngokwenene uYehova uThixo uyayiphendula imithandazo enyanisekileyo yabakhonzi bakhe? Ibali leBhayibhile elingendoda engaziwa kangako ekuthiwa nguYabhetse libonisa ukuba uYehova ‘nguMphulaphuli wemithandazo.’ (INdumiso 65:2) Eli bali lifutshane lifumaneka kwimilibo yokuzalwa esekuqaleni kwincwadi Yokuqala yeziKronike. Makhe sihlole eyoku-1 yeziKronike 4:9, 10.
Yonke into esiyaziyo ngoYabhetse ifumaneka kwezi vesi zimbini. Ngokutsho kwevesi 9, unina “wamthiya igama elinguYabhetse esithi: ‘Ndimzele kabuhlungu.’”a Kwakutheni ukuze amthiye elo gama? Ngaba waba nenimba engaphezu kweqhelekileyo xa wayezala lo nyana wakhe? Ngaba mhlawumbi wayengumhlolokazi, ekhalela ukuba wayengasenamyeni xa wayemzala? IBhayibhile ayitsho. Kodwa lo mama wayeza kuba nebhongo ngalo nyana wakhe ngenye imini. Kusenokwenzeka ukuba abantakwabo Yabhetse babethe tye kodwa ke, ‘uYabhetse wayebekekile kunabo.’
UYabhetse wayethandaza rhoqo. Waqalisa umthandazo wakhe ngokucela intsikelelo kaThixo. Emva koko wacela izinto ezintathu ezibonisa ukuba wayenokholo.
Okokuqala, uYabhetse wabongoza uThixo esithi: ‘Yandisa ummandla wam.’ (Vesi 10) Le ndoda yayingarhwaphilizi umhlaba wabanye abantu. Isicelo sayo simele ukuba sinokuthanani nabantu kunomhlaba. Mhlawumbi yayicela ukwandiselwa ummandla ukuze kubekho abakhonzi bakaThixo abangakumbi.b
Okwesibini, uYabhetse wacela “isandla” sikaThixo ukuba sibe naye. Isandla sikaThixo simela amandla akhe awasebenzisa ukuze ancede abakhonzi bakhe. (1 Kronike 29:12) Ukuze afumane izicelo zentliziyo yakhe, uYabhetse walindela kuThixo onesandla esivulekileyo kwabo banokholo kuye.—Isaya 59:1.
Okwesithathu, uYabhetse wathandaza wathi: “Uze undigcine kwintlekele.” Ibinzana elithi “ukuze ingandenzakalisi” mhlawumbi libonisa ukuba uYabhetse wayengathandazeli ukubalekiswa kwingozi kunoko wayethandazela ukukhuselwa kwimiphumo yobungendawo.
Umthandazo kaYabhetse wawubonisa ukuba wayexhalabele unqulo olunyulu nokuthi wayenokholo yaye emthemba umphulaphuli wemithandazo. Wasabela njani uYehova? Eli bali lifutshane liqukunjelwa ngala mazwi: “Ke uThixo wamenzela oko wakucelayo.”
Umphulaphuli wemithandazo akatshintshanga. Uyavuya xa bethandaza abakhonzi bakhe. Abantu abanokholo kuye nabamthembayo banokuqiniseka ukuba: “Kungakhathaliseki ukuba yintoni na esiyicelayo ngokuvumelana nokuthanda kwakhe, uyasiva.”—1 Yohane 5:14.
[Imibhalo esemazantsi]
a Igama elithi Yabhetse livela kwelithi “intlungu.”
b ITargum yamaYuda iwaguqulela kanje amazwi kaYabhetse: “Ndisikelele ngabantwana uze uyizalise ngabafundi imida yam.”