Ubomi Namaxesha AmaKristu Enkulungwane Yokuqala
Ukuya Nakwezona Ndawo Zikude Zomhlaba
“Ngemini elandelayo wemka noBharnabhas baya eDerbhe. Emva kokuvakalisa iindaba ezilungileyo kweso sixeko nokwenza abafundi abaliqela, babuyela eListra naseIkoniyo nakwa-Antiyokwe.”—IZENZO 14:20, 21.
IMPEPHO yasekuseni itsho kamnandi njengoko indoda eya kushumayela kwezinye iindawo icanda amathafa, inxibe neembadada ezigugileyo. Iza kuhamba imini yonke.
Ilanga lasekuseni liyitshisa emqolo, njengoko ihamba kwindlela enothuli idlula izidiliya, imithi yomnquma ize icande neenduli. Njengoko ihamba idibana nabanye abantu, abalimi abaya emasimini abo, abarhwebi abaqhuba izilwanyana ezithwele imithwalo kunye namakholwa aya eYerusalem. Le ndoda kunye nomhlobo wayo bathetha naye wonke umntu abadibana naye. Kutheni? Kaloku bathobela umyalelo kaYesu wokuba ngamangqina akhe “kude kuse nakwezona nxalenye zikude zomhlaba.”—IZenzo 1:8.
Lo mhambi isenokuba ngumpostile uPawulos, uBharnabhas okanye omnye wabashumayeli bevangeli benkulungwane yokuqala. (IZenzo 14:19-26; 15:22) Loo madoda ayenenzondelelo yaye kwakunzima ukuhamba ngaloo mihla. Xa wayebalisa ngobunzima awabufumana elwandle, umpostile uPawulos wathi: “Ndaba namava okwaphukelwa yinqanawa izihlandlo ezithathu, ndachitha ubusuku nemini enzulwini.” Nasemhlabeni kwakungelulanga ukuhamba. UPawulos wathi wayedla ‘ngokuba sezingozini zemilambo nasezingozini zezihange.’—2 Korinte 11:25-27.
Kufanele ukuba kwakunjani ukuhamba nabo bathunywa bevangeli? Wawunokuhamba umgama ongakanani ngosuku? Kwakufuneka uphathe ntoni yaye wawuza kumana ulalisa phi?
Ukuhamba Emhlabeni Ngenkulungwane yokuqala, amaRoma ayesele akhe iindlela ezazinxibelelanisa iindawo ezibalulekileyo zobukhosi bawo. Ezo ndlela zazakhiwe kakuhle yaye zomelele. Uninzi lwazo lwaluziimitha ezili-4.5 ububanzi, zenziwe ngamatye yaye zineebhodi ezazichaza ukuba kusele umgama ongakanani ufike apho uya khona. Kwiindlela ezinjalo umthunywa wevangeli onjengoPawulos wayenokuhamba iikhilomitha ezimalunga nama-32 ngosuku.
Noko ke, kwakuyingozi ukuhamba kwiindlela ezininzi zasePalestina. Umhambi wayenokudibana namarhamncwa asendle okanye abaphangi; indlela yayisenokude ivalwe.
Yintoni eyayiphathwa ngumhambi? Kwakufuneka umntu aphathe intonga (1), ukhuko (2), inxili (3), iimbadada (4), ingxowa yokutya (5), impahla yokutshintsha (6), isitya sokukha amanzi esenziwe ngesikhumba (7), intsuba yamanzi (8) kunye nebhegi enkulu yokufaka ezinye izinto (9).
Abathunywa bevangeli babedibana nabarhwebi ababethengisa kwiimarike. Loo madoda ayehamba ngeembongolo. Kaloku yona yayikwazi ukuhamba kwiindawo ezimqengqelezi nezinamatye. Kuthiwa imbongolo eyomeleleyo yayinokuhamba iikhilomitha ezingama-80 ngosuku ithwele umthwalo. Iinqwelo ezirhuqwa ziinkomo zona zazicotha, zihamba nje umgama weekhilomitha ezisibhozo ukuya kwezingama-20 kuphela. Kodwa ke iinkomo zazithwala imithwalo enzima ungakumbi yaye zaziluncedo xa kuza kuhanjwa umgama omfutshane. Umhambi wayenokudlula kwiinkamela okanye iimbongolo ezirhuqa umthwalo, zivela kulo lonke elimiweyo. Wayesenokudlulwa ngumthunywa ophalisa ihashe, ephethe ileta okanye isigidimi sakomkhulu esiya kubo bonke ubukhosi.
Ebusuku abahambi babegxumeka iintente ecaleni kwendlela baze balale. Abanye babelala kwiindawo ezazinamagumbi okulala abahambi. Ezi ndawo ezazingacocekanga zazingakukhuseli ncam kwimozulu embi okanye kumasela. Abathunywa bevangeli babedla ngokulalisa kwintsapho ethile okanye kwamanye amakholwa xa iimeko zivuma.—IZenzo 17:7; Roma 12:13.
Ukuhamba Elwandle Izikhephe ezincinane zazithwala imithwalo kunxweme lwaseGalili. (Yohane 6:1, 2, 16, 17, 22-24) Iinqanawa ezinkulu ezininzi zazithwala imithwalo kulwandle lweMeditera zisuka kwiindawo ezikude. Ezi nqanawa zazisisa ukutya eRoma, zihambisa amagosa karhulumente kunye neeleta.
Emini oomatiloshe babeyiphawula ngezinto ezithile indlela yabo baze ebusuku bancedwe ziinkwenkwezi. Ukuhamba elwandle kwakukhuseleke ngomlinganiselo othile kuphela ukususela ngoMeyi ukusa phakathi kuSeptemba xa imozulu izolile. Kwakuxhaphakile ukuqhekeka kweenqanawa.—IZenzo 27:39-44; 2 Korinte 11:25.
Abantu babengahambi ngeenqanawa kuba kwakumnandi kunokuhamba emhlabeni. Eyona nto yayibalulekile kwezi nqanawa yayikukuthwala imithwalo kungekhona abantu. Abahambi babehlala baze balale kumphezulu wenqanawa enokuba yayinjani imozulu. Ngaphantsi kwakubekwa iimpahla zexabiso. Abahambi babephatha umphako. Babenikwa amanzi okusela kuphela. Maxa wambi imozulu yayisiba mbi kakhulu. Uqhwithela nolwandle olulwayo lwalubagulisa abantu, maxa wambi iintsuku eziliqela.
Nakuba kwakunzima ukuhamba emhlabeni naselwandle, abathunywa bevangeli abanjengoPawulos bazishumayela ngenzondelelo ‘iindaba ezilungileyo zoBukumkani’ kwelo hlabathi lamandulo. (Mateyu 24:14) Emva kweminyaka nje engama-30 uYesu eyalele abafundi bakhe ukuba bashumayele ngaye, uPawulos wabhala wathi iindaba ezilungileyo zishunyayelwe “kwindalo yonke ephantsi kwezulu.”—Kolose 1:23.