Ngaba Ngokwenene Uyazixabisa Iintsikelelo Ozifumeneyo?

OONYANA bakaSirayeli bakuvuyela ukufumana inkululeko yokunqula uYehova emva kokuba behlangulwe ngommangaliso kubukhoboka baseYiputa. (Eks. 14:29–15:1, 20, 21) Noko ke, kungekudala yatshintsha indlela ababezijonga ngayo izinto. Baqalisa ukukhalaza ngemeko ababekuyo. Ngoba? Ngenxa yokuba bayeka ukujonga izinto uYehova awayebenzele zona baza bajonga iingxaki ababehlangabezana nazo entlango. Bathi kuMoses: “Yini na ukuba nisinyuse eYiputa ukuba size kufela entlango? Ngokuba akukho sonka namanzi apha, yaye umphefumlo wethu uyasenyanya esi sonka sinkatshunkatshu [imana].”—Num. 21:5.

Kwiinkulungwane kamva, uKumkani uDavide woSirayeli wamandulo wavuma ingoma esithi: “Ke mna, ndikholose ngobubele bakho bothando; mayivuye intliziyo yam ngosindiso lwakho. Ndiya kumvumela ingoma uYehova, kuba uqhubene nam ngokunomvuzo.” (INdu. 13:5, 6) UDavide akazange abulibale ububele bothando awayebenzelwe nguYehova. Kunoko, wayesoloko ezipha ixesha lokucinga ngabo. (INdu. 103:2) Ngendlela efanayo, uYehova uye waqhubana ngokunomvuzo nathi, yaye kuya kuba bubulumko ukuba singakuthathi lula oko asenzele kona. Ngoko makhe sixubushe ezinye zeentsikelelo zikaThixo esizifumanayo namhlanje.

“Ukusondelelana NoYehova”

Umdumisi wavuma ingoma esithi: “Ukusondelelana noYehova kokwabo bamoyikayo.” (INdu. 25:14) Kulilungelo ngokwenene ukuba abantu babe nolwalamano olusondeleyo noYehova! Noko ke, kuthekani ukuba sixakeka kakhulu zizinto zobomi bemihla ngemihla kangangokuba side singabi naxesha lingako lokuthandaza? Khawucinge ngoko kuya kwenzeka kulwalamano lwethu oluhle noYehova. NjengoMhlobo wethu, uYehova ulindele ukuba simthembe kwaye siphalaze iimbilini zethu kuye ngomthandazo, simchazele izinto esizoyikayo, esizinqwenelayo nezisixhalabisayo. (IMize. 3:5, 6; Fil. 4:6, 7) Ngoko ngaba asifanele sicinge ngokuphucula umgangatho wemithandazo yethu?

Xa iNgqina eliselula eligama linguPaul lalicinga ngemithandazo yalo, laqonda ukuba kwakufuneka liyiphucule.a Lathi, “Bendisele ndinomkhwa wokuphindaphinda amabinzana afanayo xa ndithandaza kuYehova.” Njengoko uPaul wayesenza uphando kwiWatch Tower Publications Index, wafumanisa ukuba kukho imithandazo emalunga ne-180 ebhalwe eBhayibhileni. Kule mithandazo, abakhonzi bakaYehova bamandulo babephalaza iimbilini zabo. UPaul wathi: “Ngenxa yokucamngca ngaloo mizekelo ifumaneka kwiZibhalo, ndafunda ukuchaza iinkcukacha xa ndithandaza. Loo nto indincede ndakwazi ukuzityand’ igila kuYehova. Ngoku ndiyakuvuyela ukuthandaza.”

‘Ukutya Ngexesha Elifanelekileyo’

Enye into uYehova asisikelele ngayo yinyaniso efumaneka kwiZibhalo. Njengoko sizondla ngentabalala yokutya kokomoya, sinesizathu sokuba ‘simemelele ngovuyo ngenxa yemeko entle yentliziyo.’ (Isa. 65:13, 14) Noko ke, simele sikulumkele ukuvumela iimpembelelo ezingafanelekanga ukuba zisenze singabi nehlombe ngenyaniso. Ngokomzekelo, ukunikela ingqalelo kubuxoki obusasazwa ngabawexuki kunokuphazamisa indlela esicinga ngayo de singakuboni ukubaluleka ‘kokutya kokomoya okufika ngexesha elifanelekileyo’ esikulungiselelwa nguYehova ‘ngekhoboka elithembekileyo neliyingqondi.’—Mat. 24:45-47.

UAndré, owayekhonze uYehova kangangeminyaka, wakha wahlelwa yinto ebuhlungu yokulahlekiswa ziingcamango zabawexuki. Wayecinga ukuba ukujonga nje iWeb site yabawexuki kwakungayi kuba yingozi. Ukhumbula oku: “Ekuqaleni, ndatsaleleka kwiingcamango zabawexuki ababesithi ziyinyaniso. Okukhona ndandikuphengulula oko babekuthetha, kokukhona ndandicinga ukuba ndinesizathu esivakalayo sokuyishiya intlangano kaYehova. Kodwa kamva, njengoko ndandiphanda izinto ezazithethwa ngabawexuki ndizithelekisa nezo zazithethwa ngamaNgqina kaYehova, ndaye ndayibona indlela ababenamaqhinga ngayo abo bafundisi bobuxoki. Babesebenzisa inkcazelo egqwethiweyo ‘njengobungqina obunamandla’ nxamnye nathi. Ngenxa yoko, ndaqalisa ukufunda iimpapasho zethu kwakhona ndaza ndaya kwiintlanganiso. Kungekudala, ndafumanisa ukuba ndandiphoswe zizinto ezininzi.” Okuvuyisayo kukuba, uAndré wabuyela ebandleni.

‘Umanyano Lwabazalwana Luphela’

Ubuzalwana bethu obunothando nobumanyeneyo buyintsikelelo evela kuYehova. (INdu. 133:1) Umpostile uPetros wayenesizathu esihle sokubhala athi: “Yibani nothando ngomanyano lwabazalwana luphela.” (1 Pet. 2:17) Ekubeni siyinxalenye yobuzalwana bamaKristu, sinenyhweba yokuthandwa ngabo banjengootata, oomama, abazalwana noodade bokomoya esikhonza kunye nabo.—Marko 10:29, 30.

Noko ke, maxa wambi izinto ezahlukeneyo zinokubangela iingxaki phakathi kwethu nabazalwana noodade wethu. Ngokomzekelo, kulula ukucatshukiswa kukungafezeki komntu uze umgxeke. Xa kusenzeka oku, ngaba bekungayi kunceda ukukhumbula ukuba uYehova uyabathanda abakhonzi bakhe nangona bengafezekanga? Ukongezela koko, “Ukuba sithi: ‘Asinasono,’ siyazikhohlisa yaye inyaniso ayikho kuthi.” (1 Yoh. 1:8) Ngaba asifanele sizabalazele ‘ukuqhubeka sinyamezelana yaye sixolelana ngesisa’?—Kol. 3:13.

Intwazana egama linguAnn yakufunda kabuhlungu ukubaluleka kokunxulumana namanye amaKristu. Wazikhwebula kwibandla lamaKristu, esenza kanye ngendlela awenza ngayo unyana wolahleko okumzekeliso kaYesu. Kamva zabuya iingqondo waza wabuyela enyanisweni. (Luka 15:11-24) UAnn wafunda ntoni kule nto? Uthi: “Ekubeni ngoku ndibuyele kwintlangano kaYehova, ndibaxabisa bonke abazalwana noodade nangona bengafezekanga. Ngaphambili ndandikhawuleza ndibagxeke. Kodwa ngoku ndizimisele ukuba ndingavumeli nantoni na ukuba indibandeze iintsikelelo endizifumana ngokuba phakathi kwamanye amaKristu. Ayikho kweli hlabathi into ebaluleke kangangokuba ndide ndincame iparadesi yethu yokomoya ngenxa yayo.”

Hlala Unoxabiso Ngeentsikelelo Ozifumeneyo

Ithemba lethu lokuba uBukumkani bukaThixo busisicombululo sazo zonke iingxaki zoluntu libubuncwane obungenakulinganiseka. Xa sasiqala ukulifumana eli themba, iintliziyo zethu zazizaliswe luxabiso! Sasivakalelwa kanye njengomrhwebi okumzekeliso kaYesu ‘owathengisa zonke izinto awayenazo’ ukuze athenge “iperile enye yexabiso eliphakamileyo.” (Mat. 13:45, 46) UYesu akazange athi lo mrhwebi wakha wayeka ukuyixabisa loo perile. Ngendlela efanayo ke, masingaze siphelelwe luxabiso ngethemba lethu elimangalisayo.—1 Tes. 5:8; Heb. 6:19.

Masenze umzekelo ngoJean, obekhonza uYehova kangangeminyaka engaphezu kwama-60. Uthi: “Into eye yandinceda ukuba ndihlale ndibukhumbula uBukumkani bukaThixo kukuthetha ngabo kwabanye abantu. Kuba mnandi nakum xa ndibona indlela abasabela ngayo bakuva into obuyiyo uBukumkani. Ukubona umahluko obangelwa yinyaniso yoBukumkani kubomi besifundo seBhayibhile kundenza ndicinge oku, ‘Imangalisa ngokwenene le nyaniso ndiyifundisa abantu!’”

Sinezizathu ezibambekayo zokuba noxabiso ngeentsikelelo ezininzi esizifumanayo. Nangona sidibana neemvavanyo ezinjengentshutshiso, ukugula, ukwaluphala, udandatheko, ukufelwa neengxaki zemali, siyazi ukuba zizinto zexeshana. KuBukumkani bukaThixo asiyi kufumana iintsikelelo zokomoya kuphela, kodwa kuya kongezwa nezenyama. Nakuphi na ukubandezeleka esikunyamezelayo ngoku kuya kupheliswa kwinkqubo entsha yezinto.—ISityhi. 21:4.

Okwangoku, masizixabise iintsikelelo zethu zokomoya njengomdumisi owavuma ingoma esithi: “Zininzi izinto ozenzileyo, Owu Yehova Thixo wam, kwanemisebenzi yakho emangalisayo neengcamango zakho kuthi; akukho namnye onokuthelekiswa nawe. Ukuba bendityekele ekuxeleni ndize ndithethe ngazo, zininzi kakhulu kunokuba ndinokubalisa.”—INdu. 40:5.

[Umbhalo osemazantsi]

[Umfanekiso okwiphepha 18]

Sisikelelwa ngenkxaso yokomoya ngamaxesha ovavanyo