Funda KwiLizwi LikaThixo
Unokulubona Njani Unqulo Lokwenyaniso?
Eli nqaku libuza imibuzo ekunokwenzeka ukuba ukhe wazibuza yona lize likubonise iimpendulo zayo eBhayibhileni. AmaNgqina kaYehova aya kukuvuyela ukuthetha nawe ngeempendulo zale mibuzo.
1. Ngaba lunye kuphela unqulo lokwenyaniso?
Lunye kuphela unqulo uYesu awalufundisa abalandeli bakhe, lunqulo lokwenyaniso. Lunjengendlela esa ebomini. Mayela naloo ndlela, uYesu wathi: “Bambalwa abayifumanayo.” (Mateyu 7:14) UThixo wamkela kuphela unqulo olusekelwe kwiLizwi lakhe eliyinyaniso. Bonke abanquli bokwenyaniso bamanyene.—Funda uYohane 4:23, 24; 14:6; Efese 4:4, 5.
2. Kutheni iinkonzo ezininzi kangaka zisithi zingamaKristu?
Abaprofeti bobuxoki baye babonakalisa ubuKristu baze babusebenzisa ukuze baphumeze izilangazelelo zabo. Njengokuba uYesu waxelayo kwangaphambili, bazenza “iigusha” kodwa bafana neengcuka eziqwengayo. (Mateyu 7:13-15, 21, 23) AmaKristu obuxoki avela kakhulu emva kokufa kwabapostile bakaYesu.—Funda iZenzo 20:29, 30.
3. Ziziphi izinto ezahlula unqulo lokwenyaniso?
Abanquli bokwenyaniso bayayihlonela iBhayibhile njengeLizwi likaThixo. Bazama ukuphila ngemigaqo yalo. Ngaloo ndlela unqulo lokwenyaniso luyahluka kunqulo olusekelwe kwiimbono zabantu. (Mateyu 15:7-9) Abanquli bokwenyaniso abathethi le baze benze leya.—Funda uYohane 17:17; 2 Timoti 3:16, 17.
Unqulo lokwenyaniso luyalihlonela igama likaThixo, elinguYehova. UYesu walazisa igama likaThixo. Wabanceda abantu bamazi uThixo waza wabafundisa ukuba bathandazele ukungcwaliswa kwegama lakhe. (Mateyu 6:9) Luluphi unqulo olukhuthaza ukusetyenziswa kwegama likaThixo kwindawo ohlala kuyo?—Funda uYohane 17:26; Roma 10:13, 14.
4. Unokubabona njani abanquli bokwenyaniso?
AmaKristu okwenyaniso ashumayela ngoBukumkani bukaThixo. UThixo wathumela uYesu ukuba aze kushumayela ngoBukumkani. UBukumkani bukaThixo kuphela kwento olunokuthembela kuyo uluntu. UYesu waqhubeka ethetha ngabo de kwaba lusuku lokufa kwakhe. (Luka 4:43; 8:1; 23:42, 43) Waxelela abalandeli bakhe ukuba bashumayele ngoBukumkani bukaThixo. Ukuba umntu othile uthetha nawe ngoBukumkani bukaThixo, umele ukuba ngowaluphi unqulo?—Funda uMateyu 10:7; 24:14.
Abalandeli bakaYesu abayonxalenye yeli hlabathi. Abananxaxheba kwezopolitiko okanye kwiingxwabangxwaba zasekuhlaleni. (Yohane 17:16) Kwakhona abazenzi izinto ezenziwa lihlabathi nezimo zengqondo zalo.—Funda uYakobi 1:27; 4:4.
5. Luluphi olona phawu lwamaKristu okwenyaniso?
AmaKristu ayathandana. ILizwi likaThixo libafundisa ukuhlonela abantu bazo iintlanga. Nangona unqulo lobuxoki ludla ngokuxhasa iimfazwe eziphakathi kweentlanga, abanquli bokwenyaniso abayenzi loo nto. (Mika 4:1-4) Kunoko amalungu onqulo lokwenyaniso asebenzisa ixesha nezinto zawo ukuze ancede aze akhuthaze abanye.—Funda uYohane 13:34, 35; 1 Yohane 4:20, 21.
Liliphi iqela elisekela eLizwini likaThixo zonke iimfundiso zalo, elihlonela igama likaThixo lize lushumayele ngoBukumkani bukaThixo njengokuphela kwento olunokuthembela kuyo uluntu? Liliphi iqela elikhuthaza ukuthandana nelingayixhasiyo imfazwe? Zonke izibakala zikhomba kumaNgqina kaYehova.—1 Yohane 3:10-12.
Ukuze ufumane inkcazelo engakumbi, funda isahluko 15 sencwadi ethi, Yintoni Ngokwenene Efundiswa YiBhayibhile?, epapashwe ngamaNgqina kaYehova.
[Umfanekiso okwiphepha 16]
“Bavakalisa esidlangalaleni ukuba bayamazi uThixo, kodwa bayamkhanyela ngemisebenzi yabo.”—Tito 1:16.