4 UThixo Akanabulungisa—Ngaba Yinyaniso?
Mhlawumbi wakhe weva kusithiwa: “NguThixo olawula eli hlabathi yaye yonke into eyenzekayo kukuthanda kwakhe. Ekubeni ehlabathini abantu becalulwa, kungekho okusesikweni yaye becinezelwa, nguThixo omele abekw’ ityala.”
Oko kufundiswa yiBhayibhile: UThixo akanguye unobangela wokungabikho kokusesikweni. Xa iBhayibhile ichaza uThixo ithi: “NguLiwa, ugqibelele umsebenzi wakhe, ngokuba zonke iindlela zakhe zisesikweni.”—Duteronomi 32:4.
UThixo unesisa kubantu bonke, kuquka nakwabo singabafanelanga. Ngokomzekelo, ‘imvula uyinisa kubantu abangamalungisa nabangengomalungisa.’ (Mateyu 5:45) Abantu beentlanga neenkcubbeko ezahlukeneyo ubaphatha kakuhle, njengokuba iZenzo 10:34, 35 zibonisa ukuba: “UThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.”
Ngubani ke unobangela wokungabikho kokusesikweni? Abantu abaninzi babaphatha kakubi abanye abantu, abawulandeli umzekelo kaThixo wokusesikweni. (Duteronomi 32:5) Kwakhona, iBhayibhile ibonisa ukuba uThixo uvumele utshaba lwakhe, uMtyholi, ukuba lulawule ihlabathi.a (1 Yohane 5:19) Noko ke, sele kumbovu ukuba uThixo aluphelise ulawulo lukaSathana. Sele elungiselele ukuba “ayichithe imisebenzi kaMtyholi.”—1 Yohane 3:8.
Indlela ekukunceda ngayo ukwazi inyaniso: Usenokuphazanyiswa kukuva ngorhwaphilizo, ingcinezelo nokungabikho kokusesikweni. Ukwazi unobangela kunokukunceda uqonde isizathu sokuba iimeko zimbi nesokuba eyona migudu yabantu inyanisekileyo yokulungisa iingxaki zehlabathi iye yasilela. (INdumiso 146:3) Kunokuba uzame ukusebenzisa izicombululo eziza kusebenza okwexeshana, unokuba nethemba lekamva eliqinisekileyo elithenjiswe nguThixo.—ISityhilelo 21:3, 4.
Ukuqonda unobangela wokungabikho kokusesikweni kunokusinceda xa singamaxhoba eengxaki. Xa siphethwe kakubi, sinokukhala njengomkhonzi kaThixo uHabhakuki owathi: “Umthetho undindisholo, nokusesikweni akuze kubekho.” (Habhakuki 1:4) UThixo akazange amgxeke uHabhakuki ngokuthetha ngolo hlobo. Kunoko, uThixo waqinisekisa lo mkhonzi wakhe ukuba umisele ixesha lokulungisa izinto waza wamnceda uHabhakuki wahlala evuya. (Habhakuki 2:2-4; 3:17, 18) Ngendlela efanayo, ukukholosa ngesithembiso sikaThixo sokuphelisa ukungabikho kokusesikweni kunokukunceda uzole ube noxolo lwengqondo kweli hlabathi.
[Umbhalo osemazantsi]
a Ukuze wazi indlela abakho ngayo uMtyholi, funda isahluko 13 sencwadi ethi Yintoni Ngokwenene Efundiswa YiBhayibhile?
[Amagama acatshulweyo akwiphepha 7]
Ngaba uThixo ubekek’ ityala ngokubandezeleka nokungabikho kokusesikweni?
[Inkcazelo Ngomfanekiso okwiphepha 7]
© Sven Torfinn/Panos Pictures