IBhayibhile Inokubutshintsha Ubomi Bakho
YINTONI eyabangela ukuba intombazana eyashiya unqulo eyayikhuliswe, iphinde ibuyele kwakulo? Khawuve ukuba ithini.
“Ngoku Ubomi Bam Bunenjongo Ngokwenene.”—ULISA ANDRÉ
UNYAKA WOKUZALWA: 1986
ILIZWE: LUXEMBOURG
UBOMI BANGAPHAMBILI: INTOMBI YOLAHLEKO
INDLELA ENDANDIKADE NDIPHILA NGAYO: Ndakhulela eBertrange, idolophana ecocekileyo, ekhuselekileyo nephucukileyo kufutshane nesixeko saseLuxembourg. Ndingowokugqibela kubantwana abahlanu. Abazali bam ngamaNgqina kaYehova yaye basiqeqesha bebethelela imigaqo yamaKristu kum nakubantwana basekhaya.
Xa ndandifikisa, ndaqalisa ukuzithandabuza iimfundiso zamaNgqina kaYehova. Ekuqaleni andizange ndiwananze la mathandabuzo kodwa njengoko ixesha lihamba ukholo lwam lwaya lusiba buthathaka. Abazali bam benza konke okusemandleni ukundinqwanqwadela kwikhondo elililo kodwa ndalukhaba uncedo lwabo. Bengazi, ndandichitha ixesha neqela lolutsha olwaluziinjubaqa. Ndandifuna inkululeko olwalubonakala luyixhamla. Sasingabantu beziyolo, siziphethe kakubi ngokwesini yaye sinxila sisebenzisa neziyobisi. Ekuqaleni kwakundonwabisa ukuba kunye nabantu ababebonakala besitya ubomi.
Xa nditheth’ inyani ndandingonwabanga. Sasiphila nje singenanjongo ebomini. Ngokwahlukileyo koko, ukungabikho kobulungisa ehlabathini kwakundixhalabisa. Ngokuhamba kwexesha ndaxinezeleka ngakumbi.
INDLELA EBUTSHINTSHE NGAYO UBOMI BAM IBHAYIBHILE: Ngenye imini ngoxa ndandineminyaka eli-17 ubudala ndandiziva ndidakumbile. Ebona indlela endandingonwabanga ngayo umama wandicela ukuba ndikhe ndiphinde ndifunde iBhayibhile. Wandikhuthaza ukuba ndihlolisise imfundiso zayo ndize ndigqibe enokuba ndiyafuna kusini na ukuphila ngokuvisisana nazo. Loo ncoko ichukumisayo yaba kukutshintsha kwezinto. Ndavuma ukufunda iBhayibhile kunye nodade wethu omkhulu uCaroline nomyeni wakhe uAkif. Wayengakhuliswanga ngamaNgqina kaYehova kodwa waba lilo esakuba mdala. Ngenxa yendlela awayekade ephila ngayo ngaphambili ndaziva ndikhululekile ukuthetha naye yaye loo nto yandinceda gqitha.
Ndandisazi ukuba andiphili njengeNgqina likaYehova, kodwa ekuqaleni ndandizixelela ukuba ndinelungelo lokuzikhethela indlela emandiphile ngayo. Noko ke, ukufunda iBhayibhile kwandenza ndaqonda ukuba indlela endandiphila ngayo iyamkhathaza uYehova. (INdumiso 78:40, 41; IMizekeliso 27:11) Kanti ndaphawula ukuba iyabakhathaza nabanye abantu.
Njengokuba ndandiqhubeka ndifunda iBhayibhile ndafumana izizathu ezichanileyo nezivakalayo zokuba ngokwenene iliLizwi likaThixo. Ngokomzekelo, ndafunda iziprofeto eziliqela eziye zazaliseka ngendlela echane ngokumangalisayo. Olo lwazi lwawacima amathandabuzo endandinawo ngaphambili.
Emva konyaka ndiqalise ukufunda iBhayibhile mna nabazali bam satyelela umntakwethu owayelitsha-ntliziyo kwiofisi yamaNgqina kaYehova eJamani. Kwandichukumisa kakhulu ukubona indlela awayonwabe ngayo umntakwethu. Wayonwabe kanye ngale ndlela kudala ndiyifuna. Ndandichukunyiswa nangamanye amaNgqina awayengamatsha-ntliziyo apho. Ayohluke kakhulu kubahlobo bam ababenganyanisekanga nababesoloko befuna ukonwaba. Kamva ndathandaza kuYehova ndiphalaza imbilini yam ndathembisa ukumkhonza ubomi bam bonke. Xa ndandineminyaka eli-19 ubudala ndazahlulela kuYehova ndaza ndabhaptizwa.
INDLELA ENDINGENELWE NGAYO: Ngoku ubomi bam bunenjongo. Kuyandivuyisa ukufundisa abanye iBhayibhile, ndibanceda bafunde ngoYehova nangezithembiso zakhe. Intsapho yakowethu iye yangenelwa kuba akusafuneki izixhalabise ngam.
Ndiziqonda kakuhle iimpazamo endazenzayo, kodwa ndizama ukungazikhathazi ngazo. Kunoko ndinikela ingqalelo ekuxolelweni nguYehova nakuthando analo ngam. Ndiwakholelwa ngentliziyo yam yonke amazwi encwadi yeMizekeliso 10:22, athi: “Intsikelelo kaYehova—yiyo etyebisayo, yaye akongezi ntlungu kuyo.”
[Amagama acatshulweyo akwiphepha 12]
“Sasingabantu beziyolo, siziphethe kakubi ngokwesini yaye sibusebenzisa kakubi utywala neziyobisi”
[Amagama acatshulweyo akwiphepha 13]
“Ndiziqonda kakuhle iimpazamo endazenzayo, kodwa ndizama ukungazixhalabisi ngazo”