Ngaba Uyakhumbula?
Ngaba uye wakunandipha ukufunda iiMboniselo zakutshanje? Khawubone enoba ungayiphendula kusini na le mibuzo ilandelayo:
• Yayingubani uOlivétan yaye kutheni sifanele sibe nomdla kwiinguqulelo zakhe?
Elo ligama eyayibizwa ngalo indoda engumFrentshi uPierre Robert. Ngexesha loHlaziyo ngenkulungwane ye-16, waguqulela iBhayibhile kwisiFrentshi. Wakhetha ukusebenzisa igama elithi “umveleli” endaweni yelithi “ubhishophu,” nelithi “ibandla” endaweni yelithi “icawa.” Kwezinye iindinyana, igama likaThixo waliguqulela ngokuthi “Yehova.”—9/1, iphepha 18-20.
• Wayethetha ukuthini uThixo xa wathi kubaLevi: “Ndim isabelo sakho”?
Sizwe ngasinye sakwaSirayeli sanikwa isabelo somhlaba, kodwa “isabelo” sabaLevi sasinguYehova. (Num. 18:20) Babengazi kuba nalo ilifa lomhlaba, kodwa bafumana ilungelo elikhethekileyo lenkonzo. Sekunjalo, uYehova wayebanika izinto eziphathekayo ezaziyimfuneko. Nanamhlanje, abo banelungelo lokuhambisela phambili izilangazelelo zoBukumkani banokuqiniseka ukuba baza kuzinikwa izinto eziyimfuneko.—9/15, iphepha 7-8, 13.
• Sinokulazi njani ixesha lokoyiswa kweYerusalem ngamaBhabhiloni?
Ababhali-mbali bamandulo banikela iingxelo ezingqubanayo ngokuphathelele ookumkani baseBhabhiloni nolawulo lwabo. Sekunjalo, abahlalutyi bayavumelana ngelokuba uKoreshi II woyisa iBhabhiloni ngowama-539 B.C.E., mhla lowo obaluleke kunene. AmaYuda akhululwa yaye abuyela kwilizwe lawo ngowama-537 B.C.E. IBhayibhile ithi athinjwa kangangeminyaka engama-70. Ngoko imele ukuba iYerusalem yawa ngowama-607 B.C.E. (2 Kron. 36:21, 22; Yer. 29:10; Dan. 9:1, 2)—10/1, iphepha 26-31.
• Yintoni enokunceda umKristu agqibe enoba uhlobo oluthile lokuzihlaziya luyingenelo okanye akunjalo kusini na?
Ukuze siqonde enoba uhlobo oluthile lokuzihlaziya luya kuba yingenelo kuthi luze lumkholise uThixo, kubalulekile ukuzibuza le mibuzo: Luquka ntoni? Ndiza kuzihlaziya nini? Ndiza kube ndikunye nabani?—10/15, iphepha 9-12.
• Kutheni kuphosakele ukuqhomfa?
UThixo ubugqala njengobungcwele ubomi yaye ugqala imbumba esesesiswini njengomntu ophilayo. (INdu. 139:16) Ukubulala imveku engekazalwa kulityala, njengoko kuboniswa sisibakala sokuba ngokoMthetho, nabani na owenzakalisa imveku engekazalwa wayemele aphenduliswe. (Eks. 21:22, 23)—11/1, iphepha 6.
• Ingxelo ekwiMizekeliso 7:6-23 isinceda njani sikuphephe ukubukela imifanekiso yamanyala?
Loo ngxelo isixelela ngomfana owayehamba kwindawo ayaziyo ukuba ihlala umfazi oziphethe kakubi. Wamhenda. Namhlanje, kuya kuba kuhle ukuba siwaphephe amajelo eInternet abonisa imifanekiso enamanyala yaye kubalulekile ukuthandaza kuThixo sicele uncedo ngaphambi kokuba sidibane naloo mifanekiso kwi-Internet.—11/15, iphepha 9-10.
• Sazi njani enoba umhlaba uya kusinda kusini na ngowama-2012?
Ngenxa yemijikelo ekwikhalenda yamandulo yamaMaya, abanye bacinga ukuba ihlabathi liza kuphela ngonyaka wama-2012. Kodwa ayinakwenzeka loo nto, kuba uYehova wawudala ukuba umiwe umhlaba. IBhayibhile ithi umhlaba uya kubakho ngonaphakade. (INtshu. 1:4; Isa. 45:18)—12/1, iphepha. 10.
• Ngabaphi ababhali beBhayibhile ababekho ngePentekoste yowama-33 C.E.?
Kuyabonakala ukuba babekho abathandathu kubabhali beZibhalo ZamaKristu ZesiGrike. Bathathu abapostile ababekho—uMateyu, uYohane noPetros. Ababini kubo yayingabantakwabo Yesu—uYakobi noYude. Yaye kusenokwenzeka ukuba umfana onguMarko naye wayekho.—12/1, iphepha 22.