Eneneni, Olu Luhlelo Lokufundisa!

Siye saluhlaziya uhlelo lwethu lokufundisa ukuze lukunike umdla ongakumbi luze lukuncede xa ufunda iLizwi likaYehova elixabisekileyo neliyinyaniso.—INdu. 1:2; 119:97.

Sele imine iminyaka sipapasha iiMboniselo ezimbini ngenyanga, enye iyekawonke-wonke ize enye ibe yeyethu sonke—amaNgqina kaYehova nezifundo zeBhayibhile ezisele zihambele phambili.

Omnye umkhonzi kaYehova ongumakad’ enetha wathi xa wayethetha ngohlelo lokufundisa: “Lusemagqabini yaye luchukumisa gqitha—ndatsho mhla ndafumana uhlelo lokuqala lokufundisa lweMboniselo. Indlela oluyicacisa ngayo inyaniso enzulu eseBhayibhileni indifikelela intliziyo. Ndibulela gqitha ngeli lungiselelo litsha limangalisayo.” Omnye umzalwana wabhala wathi: “Ndiyakulangazelela ukuchitha iiyure ndifunda olu hlelo lokufundisa kwakunye ne-Reference Bible yam.” Sinethemba lokuba nawe uvakalelwa ngendlela efanayo.

Njengoko usazi, iMboniselo ibipapashwa ukususela ngowe-1879, nto leyo eyayinokwenzeka kuphela ngomoya nangentsikelelo kaYehova. (Zek. 4:6) Kule minyaka ili-133, liye latshintsha izihlandlo eziliqela iphepha elingaphambili leli phephancwadi. Ngowama-2012, hlelo ngalunye lokufundisa luza kuba nomfanekiso wabantu abashumayelayo ngaphandle, nto leyo eza kusikhumbuza ngothumo esilunikwe nguThixo lokunikela ubungqina obucokisekileyo ngoBukumkani bukaYehova. (IZe. 28:23) Xa usiya kwiphepha 2, uza kubona kwalo mfanekiso kunye nenkcazelo engephi ngoko kwenzekayo nendawo okwenzeka kuyo. Ebudeni bonyaka, oku kuza kusikhumbuza sonke ukuba abantu bakaYehova bashumayela iindaba ezilungileyo “kuwo wonke umhlaba omiweyo.”—Mat. 24:14.

Luluphi olunye utshintsho oluye lwenziwa kweli phephancwadi? Ibhokisi yempinda iye yabekwa kwiphepha lokuqala lenqaku ngalinye elifundwayo. Oku kuya kubalaselisa iingongoma eziziintloko ofanele uzikhangele njengoko ufunda inqaku. Kambe ke, abaqhubi beSifundo seMboniselo baza kuqhubeka beyisebenzisa le mibuzo xa besenza impinda ekupheleni kwesifundo. Uya kuphawula ukuba ibanzi kancinane eludinini yaye amanani achaza amaphepha neziqendu abhalwe acaca.

Njengoko kuchaziwe kuhlelo lwale nyanga, kuye kongezelelwa umxholo omtsha othi, “Okuphuma Koovimba Bethu,” ngelokubonisa inkqubela ephawulekayo kwimbali yale mihla yamaNgqina kaYehova. Kanti, maxa wambi kuza kubakho inqaku elinamabali obomi elinomxholo othi “Bazinikela Ngokuqhutywa Ziintliziyo.” La manqaku aza kuluchaza ngokweenkcukacha uvuyo, nolwaneliseko olufunyanwa ngabazalwana noodadewethu ngenxa yokuba bekhonza kwiindawo ezinemfuneko engakumbi yabavakalisi boBukumkani.

Ngamana ungakuvuyela kakhulu ukufunda iLizwi likaThixo usebenzisa la maphephancwadi.

Abapapashi

[Umfanekiso okwiphepha 3]

Ngowe-1879

[Umfanekiso okwiphepha 3]

Ngowe-1895

[Umfanekiso okwiphepha 3]

Ngowe-1931

[Umfanekiso okwiphepha 3]

Ngowe-1950

[Umfanekiso okwiphepha 3]

Ngowe-1974

[Umfanekiso okwiphepha 3]

Ngowama-2008