Unokonwaba Enoba Ukwintsapho Eyahluleleneyo Ngonqulo

‘Wazi njani na ukuba akuyi kulisindisa [iqabane] lakho?’—1 KOR. 7:16.

NGABA UNOKUZIFUMANA IIMPENDULO?

AmaKristu anokwenza ntoni ukuze ahlakulele uxolo kwikhaya elahluleleneyo ngonqulo?

UmKristu unokuwanceda njani amalungu entsapho angakholwayo ukuba amkele unqulo lokwenyaniso?

Abanye banokwenza ntoni ukuze bancede amaKristu abakhonza nawo ahlala kumakhaya ahluleleneyo ngonqulo?

1. Ukwamkelwa kwesigidimi soBukumkani kuba naliphi igalelo entsatsheni?

UYESU wakha wathi ngeny’ imini xa wayethuma abapostile bakhe: “Njengoko nihamba, shumayelani, nithi, ‘Ubukumkani bamazulu busondele.’” (Mat. 10:1, 7) Ezi ndaba zilungileyo zaziya kubazisela uxolo nolonwabo abo babezamkela baze bazixabise. Noko ke, uYesu walumkisa abapostile bakhe ukuba, abaninzi babeya kuwuchasa umsebenzi wabo wokushumayela ngoBukumkani. (Mat. 10:16-23) Olona hlobo lwenkcaso luba buhlungu, lolwaxa amalungu entsapho engasamkeli esi sigidimi soBukumkani.—Funda uMateyu 10:34-36.

2. Kutheni kungekho nzima ukuba amaKristu ahlala kumakhaya awahluleleneyo ngonqulo afumane ulonwabo?

² Ngaba oku kuthetha ukuba abalandeli bakaKristu abakwiintsapho ezahluleleneyo ngonqulo abanakulufumana ulonwabo? Akunjalo konke konke! Nangona maxa wambi intsapho inokuchasa ngokukrakra, akusoloko kunjalo. Kanti enoba kunjalo, akuhlali kusenzeka. Ubukhulu becala, oku kuxhomekeka kwindlela amaKristu asabela ngayo kwinkcaso. Ngaphezu koko, uYehova uyabasikelela abo bathembeke kuye, ebenza bavuye nakuba bephantsi kobunzima. AmaKristu anokongeza kulonwabo lwawo (1) ngokuzimisela ukuhlakulela uxolo ekhaya (2) nangokuzama ngokunyanisekileyo ukunceda amalungu entsapho ukuba alwamkele unqulo lokwenyaniso.

HLAKULELA UXOLO EKHAYA

3. Kutheni umKristu okwikhaya elahluleleneyo ngonqulo efanele ahlakulele uxolo?

³ Ukuze imbewu yobulungisa ivelise isiqhamo entsatsheni, ukuba seluxolweni ekhaya kubalulekile. (Funda uYakobi 3:18.) Enoba intsapho engamaKristu ayikamanyani elunqulweni olunyulu, elinye iqabane limele lenze konke okusemandleni alo ukuze likhuthaze uxolo ekhayeni. Kunokwenziwa njani oku?

4. AmaKristu anokuhlala njani eseluxolweni?

⁴ AmaKristu afanele alondoloze uxolo lwawo lwangaphakathi. Oku kufuna umthandazo osuka entliziyweni, onokusizisela “uxolo lukaThixo” olungenakuthelekiswa nanto. (Fil. 4:6, 7) Uxolo nolonwabo silufumana xa singenise ulwazi ngoYehova size siphile ngemigaqo yeZibhalo. (Isa. 54:13) Ukuba nenxaxheba kwiintlanganiso zebandla nokuba nenzondelelo kwinkonzo yasentsimini kubalulekile nako ukuba sifuna ukuba noxolo nolonwabo. AmaKristu akwiintsapho ezahluleleneyo ngonqulo ayayenza imisebenzi yamaKristu. Ngokomzekelo, umyeni kaEnzaa uchasa ngokukrakra. Ngaphambi kokuba ayokwenza abafundi, uEnza uqala enze imisebenzi yomzi wakhe. Uthi: “UYehova undisikelela gqitha sihlandlo ngasinye ndizama ukushumayela kwabanye.” Ngokuqinisekileyo ezo ntsikelelo ziye zaphumela ekubeni afumane uxolo, ulwaneliseko nolonwabo.

5. Luluphi ucelomngeni ajamelana nalo amaKristu akwiintsapho ezahluleleneyo ngonqulo, yaye anokulufumana phi uncedo?

⁵ Sifanele sizimisele ukuhlakulela uxolo namalungu eentsapho zethu angakholwayo. Oku kusenokuba lucelomngeni kuba izinto afuna sizenze maxa wambi ziyangqubana nemigaqo yeBhayibhile. Ukubambelela ngokuqinileyo kwimigaqo efanelekileyo kunokuwacaphukisa amanye amalungu angakholwayo, kodwa ekuhambeni kwexesha ukwenjenjalo kuya kudala uxolo. Kakade ke, ukungayekeleli xa enye into ingangqubani nemigaqo yeZibhalo, kunokubangela ukuba nixabane ngokungeyomfuneko. (Funda iMizekeliso 16:7.) Xa ujamelene nocelomngeni, kubalulekile ukukhangela isiluleko seZibhalo kwiimpapasho zodidi lwekhoboka elithembekileyo neliyingqondi nakubadala.—IMize. 11:14.

6, 7. (a) Kutheni abanye bewachasa amalungu entsapho xa eqalisa ukufunda namaNgqina kaYehova? (b) Sinokuthini isifundo seBhayibhile okanye umKristu xa echaswa yintsapho yakhe?

⁶ Ukuhlakulela uxolo entsatsheni kufuna ukuba sithembele ngoYehova size siqonde iimvakalelo zamalungu entsapho angakholwayo. (IMize. 16:20) Kwanabo basandul’ ukufundelwa iBhayibhile banokusebenzisa ukuqonda kule nkalo. Abanye abayeni okanye amakhosikazi angakholwayo asenokungabi nangxaki nokuba amaqabane awo afunda iBhayibhile. Anokubona ukuba oko kunokuyinceda intsapho. Noko ke, abanye inokubacaphukisa loo nto. UEsther, osele eliNgqina uyavuma ukuba waba “ligqabi ngumsindo” xa umyeni wakhe waqalisa ukufunda iBhayibhile namaNgqina kaYehova. Uthi: “Ndandizilahla okanye ndizitshise iincwadi zakhe.” UHoward, owayekhe wakuchasa ukufundelwa kwenkosikazi yakhe iBhayibhile, uthi: “Abayeni abaninzi boyikela ukuba amakhosikazi abo ayaqhathwa ukuze ajoyine ihlelo lonqulo. Umyeni usenokuxakwa ukuba makasithini na eso sisongelo, iqale apho ke into yokuchasa kwakhe.”

⁷ Umntu ofundelwayo oneqabane elichasayo ufanele ancedwe abone ukuba akuyomfuneko ukuba ayeke ukufunda iBhayibhile. Amaxesha amaninzi, uya kukwazi ukuyicombulula le ngxaki ngokuba nomoya wobulali aze alihlonele iqabane lakhe elingakholwayo. (1 Pet. 3:15) UHoward uthi: “Ndiyibulela gqitha inkosikazi yam ngokuzola ize ingacaphuki!” Inkosikazi yakhe ithi: “UHoward wayenyanzelisa ukuba ndiyeke ukufunda iBhayibhile. Wayesithi ndiyalahlekiswa. Kunokuba ndixambulisane naye ndathi kusenokwenzeka ukuba unyanisile, kodwa andiyiboni into endilahlekiswa kuyo. Ngoko, ndamcela ukuba afunde incwadi endandiqhutyelwa kuyo isifundo. Wayifunda yaye akazange akwazi ukuziphikisa izinto ezikuyo. Oku kwamfikelel’ intliziyo.” Kuhle ukukhumbula ukuba amaqabane angakholwayo anokuziva engahoywanga okanye edelelwa xa amaqabane awo ewashiya esiya kwimisebenzi yamaKristu, kodwa ukuwaqinisekisa ukuba ayawathanda kunokuwanceda gqitha ekuthomalaliseni ezo mvakalelo.

BANCEDE BAMKELE UNQULO LOKWENYANISO

8. Umpostile uPawulos wawaluleka wathini amaKristu anamaqabane angakholwayo?

⁸ Umpostile uPawulos ucebisa amaKristu ukuba angawashiyi amaqabane awo omtshato kuba nje engengawo amaKristu.b (Funda eyoku-1 kwabaseKorinte 7:12-16.) Ukukhumbula ukuba eli qabane lingakholwayo linokuba ngumKristu ngeny’ imini kunokunceda eli likholwayo ukuba lihlale lonwabile nangona likwikhaya elahluleleneyo ngonqulo. Noko ke, njengoko sizama ukuxelela amaqabane ethu angakholwayo ngesigidimi senyaniso, kukho izinto esimele sizilumkele njengoko la mava alandelayo eza kusibonisa.

9. Xa sixelela amalungu entsapho angakholwayo ngenyaniso yeBhayibhile, yintoni esifanele siyilumkele?

⁹ Ethetha ngendlela awayevakalelwa ngayo ngokufunda inyaniso yeBhayibhile uJason uthi: “Ndandifuna ukuxelela wonke umntu!” Xa isifundo seBhayibhile siyiqonda inyaniso esiyifunde eZibhalweni, sisenokuvuya kangangokude singayeki ukuthetha ngayo. Sisenokulindela ukuba amalungu entsapho angakholwayo akhawuleze asamkele isigidimi soBukumkani, kodwa ngokwahlukileyo ezo ndaba zilungileyo zisenokuchaswa. Inzondelelo eyaboniswa nguJason ekuqaleni yayichaphazela njani inkosikazi yakhe? Inkosikazi yakhe ithi: “Ndasuka ndaxakwa.” Elinye ibhinqa elamkela inyaniso kwiminyaka eli-18 emva komyeni walo, lithi: “Kwakusafuneka mna ndiyifunde ngokuthe ngcembe.” Ukuba iqabane lesifundo sakho seBhayibhile alinamdla kunqulo lokwenyaniso, qhelisela kunye naso indlela echuliweyo yokusingatha imicimbi. UMoses wathi: “Luya kuchaphaza njengemvula uyalelo lwam, ahle njengombethe amazwi am, njengentshizane engceni.” (Dut. 32:2) Amachaphaza ambalwa enyaniso awela kwindawo eyiyo anokuba luncedo gqitha kunemvula enkulu yokomoya.

10-12. (a) Sisiphi isiluleko umpostile uPetros awasinika amaKristu anamaqabane angakholwayo? (b) Esinye isifundo seBhayibhile safunda njani ukusebenzisa isiluleko esikweyoku-1 kaPetros 3:1, 2?

¹⁰ Umpostile uPetros wanikela isiluleko esiphefumlelweyo esiya kubafazi abakumakhaya ahluleleneyo ngonqulo. Wabhala wathi: “Wathobeleni amadoda enu, ukuze kuthi, nokuba kukho kuwo angalithobeliyo ilizwi, azuzeke ngaphandle kwelizwi ngenxa yehambo yabafazi bawo, kuba eye angamangqina okuzibonela ehambo yenu enyulu ndawonye nentlonelo enzulu.” (1 Pet. 3:1, 2) Inkosikazi inokumnceda umyeni wayo amkele unqulo lokwenyaniso ngokumthobela ize ibe nentlonelo enzulu kwanaxa eyiphethe kakubi. Ngokufanayo, indoda engumKristu ifanele yoyike uThixo ize ibe yintloko enothando yentsapho yayo enoba ichaswa kangakanani na ngumfazi wayo ongakholwayo.—1 Pet. 3:7-9.

¹¹ Imizekelo emininzi yanamhlanje isibonisa ukubaluleka kokusebenzisa isiluleko sikaPetros. Makhe sihlole oko kwenzeka kuSelma. Xa waqalisa ukufunda iBhayibhile namaNgqina kaYehova, umyeni wakhe, uSteve, akazange ayithande loo nto. Umyeni wakhe uthi: “Ndandinomsindo, ndinobukhwele, ndimbanga yaye ndingazithembanga.” USelma uthi: “Kwanangaphambi kokuba ndifumane inyaniso, kwakunzima gqitha ukuhlala noSteve. Wayenomsindo osempumlweni. Waba ngathi uthe chatha ukuqalisa kwam ukufunda iBhayibhile.” Yintoni eyancedayo?

¹² USelma ukhumbula oko wakufundiswa liNgqina elalimqhubela isifundo seBhayibhile. Uthi: “Ngenye imini, andizange ndifune ukuba kuqhutywe isifundo. Kubusuku obungaphambili, ndandibethwe nguSteve ngoxa ndandizama ukumchazela into ethile, yaye ndandikhathazeke gqitha. Ndathi ndakuchazela lo dade ngento endehleleyo nendlela endiziva ngayo, wacela ukuba ndifunde eyoku-1 kwabaseKorinte 13:4-7. Njengoko ndandiyifunda, kwathi qatha into yokuba, ‘Akukho nalunye kwezi mpawu zothando oluboniswa nguSteve.’ Kodwa lo dade wandibonisa elinye icala xa wabuza ukuba, ‘Zingaphi kwezi zenzo zothando ozibonisa kumyeni wakho?’ Ndaphendula ngokuthi, ‘Akukho nokuba lube lunye, kuba kunzima ukuhlala naye.’ Ngelizwi eliphantsi lo dade wabuza, ‘Selma, ngubani kanye kanye ozama ukuba ngumKristu apha? Nguwe okanye nguSteve?’ Ndabona ngokucacile ukuba kufuneka ndiyitshintshe indlela endicinga ngayo, yaye ndathandaza kuYehova ukuze andincede ndimthande uSteve. Ngokuthe ngcembe, izinto zatshintsha.” Emva kweminyaka eli-17, uSteve wayamkela inyaniso.

INDLELA ABANYE ABANOKUNCEDA NGAYO

13, 14. Abanye ebandleni bangabanceda njani abo bakwiintsapho ezahluleleneyo ngonqulo?

¹³ Njengamathontsi emvula afafazayo nathambisa umhlaba ukuze kukhule izityalo, abantu abaninzi abasebandleni banokuba negalelo kulonwabo lwamaKristu akwiintsapho ezahluleleneyo ngonqulo. UElvina waseBrazil uthi: “Uthando lwabazalwana noodadewethu lwandinceda ndayimela ngokuqinileyo inyaniso.”

¹⁴ Ububele nokuba nomdla kwamalungu ebandla kunokuyifikelela intliziyo yelungu lentsapho elingakholwayo. Indoda yaseNigeria eyamkela inyaniso kwiminyaka eli-13 emva kwenkosikazi yayo ithi: “Xa ndandihamba nelinye iNgqina, lonakalelwa yimoto. Lakhangela amanye amaNgqina akwilali ekufutshane, yaye asinika indawo yokulala ngobo busuku. Ngendlela awasiphatha kakuhle ngayo wawunokucinga ukuba sikhule nawo. Ngoko nangoko, ndaluva uthando lwamaKristu eyayidla ngokundibalisela ngalo inkosikazi yam.” ENgilani, inkosikazi eyamkela inyaniso kwiminyaka eli-18 emva komyeni wayo ithi: “AmaNgqina ayedla ngokusimemela ezidlweni. Ndandisoloko ndiziva ndamkelekile.”c Enye indoda ehlala kwakwelo lizwe, eyada yaba liNgqina ithi: “Abazalwana noodade babedla ngokusityelela, okanye basimemele emakhayeni abo yaye ndafumanisa ukuba banenkathalo. Oku ndakuqaphela kakhulu xa ndandisesibhedlele, uninzi lwabo lwalusiza luze kundibona.” Ngaba ungakhangela iindlela wena ongabonisa ngazo umdla kumalungu entsapho angakholwayo?

15, 16. Yintoni enokunceda umntu okholwayo ukuba ahlala onwabile xa amalungu entsapho yakhe engade abe ngamaKristu?

¹⁵ Kambe ke, asingawo onke amaqabane, abantwana, abazali okanye ezinye izalamane ezilwamkelayo unqulo lokwenyaniso kwanasemva kweminyaka emininzi zibukele ihambo yokuthembeka nokushumayela ngobuchule komKristu ezizalana naye. Abanye bahlala bengenamdla okanye babe ngabachasi abangayekeleliyo. (Mat. 10:35-37) Noko ke, xa amaKristu ebonisa iimpawu zikaThixo oko kunokuba nemiphumo emihle. Omnye umzalwana owakha wangumyeni ongakholwayo uthi: “Xa iqabane elikholwayo liqalisa ukubonisa iimpawu ezithandekayo, akukwazi oko kucingwa lelo lingakholwayo. Ngoko ungaze ulincame iqabane lakho elingakholwayo.”

¹⁶ Enoba kukho ilungu lentsapho eliqhubeka lingakholwa, elo likholwayo linokonwaba. Nangona umyeni wakhe engakhange asamkele isigidimi soBukumkani emva kweminyaka engama-21 ezama ukumnceda, omnye udade uthi: “Ndiyavuya kuba ndizama ukukholisa uYehova, ndihlala ndinyanisekile kuye yaye ndizama ukomeleza ubumoya bam. Ukuzixakekisa ngezinto zokomoya—njengofundisiso lobuqu, ukuya ezintlanganisweni, entsimini nokunceda abanye ebandleni—kuye kwandisondeza kuYehova kwaza kwalondoloza intliziyo yam.”—IMize. 4:23.

UNGAZE UNIKEZELE!

17, 18. UmKristu unokuhlala njani enethemba kwanakwikhaya elahluleleneyo ngonqulo?

¹⁷ Ukuba ungumKristu othembekileyo ohlala kwikhaya elahluleleneyo ngonqulo, ungaze unikezele. Khumbula ukuba “uYehova akayi kubalahla abantu bakhe ngenxa yegama lakhe elikhulu.” (1 Sam. 12:22) Unawe logama nje uthembele ngaye. (Funda eyesi-2 yeziKronike 15:2.) Ngoko “ziyolise ngokugqibeleleyo ngoYehova.” Eneneni, “yiqengqele kuYehova indlela yakho, uze uthembele ngaye.” (INdu. 37:4, 5) ‘Zingisa emthandazweni,’ uze ube nokholo lokuba uBawo wethu onothando wasezulwini unokukunceda unyamezele lonke uhlobo lobunzima.—Roma 12:12.

¹⁸ Mbongoze uYehova ukuba akuphe umoya wakhe oyingcwele ukuze ukuncede ukhuthaze uxolo ekhaya. (Heb. 12:14) Ngokwenene, sinokukwazi ukukhuthaza uxolo olunokuthi ekugqibeleni luchukumise iintliziyo zamalungu entsapho angakholwayo. Uya konwaba uze ube noxolo lwengqondo njengoko ‘zonke izinto uzenzela uzuko lukaThixo.’ (1 Kor. 10:31) Kuvuyisa ngokwenene ukwazi ukuba, ngoxa usenza le migudu abazalwana noodadewenu abakwibandla lamaKristu baya kukuxhasa ngothando!

[Imibhalo esemazantsi]

[Umfanekiso okwiphepha 28]

Khetha ixesha elililo lokuchaza izinto ozikholelwayo

[Umfanekiso okwiphepha 29]

Wakhathaleleni amaqabane angakholwayo