Ngaba Unokuzama Ukunceda Iqabane Elingakholwayo?
1. Kutheni ingengomaKristu anamaqabane angakholwayo kuphela anqwenela ukuba kuncedwe amaqabane awo amkele inyaniso?
1 Ngaba bakho abavakalisi abanamaqabane angakholwayo ebandleni lakho? Ukuba bakho, ngokuqinisekileyo banqwenela ukuba nawo amaqabane abo amkele inyaniso. Noko ke, asingabo kuphela abanaloo mnqweno. Bonke ebandleni banomnqweno ofanayo nokaThixo wokuba “zonke iintlobo zabantu zisindiswe zize zifikelele elwazini oluchanileyo lwenyaniso.” (1 Tim. 2:4) Yintoni esinokuyenza ukuze sincede amaqabane angakholwayo?
2. Ukuqonda indlela avakalelwa ngayo amaqabane angakholwayo kuya kusinceda njani?
2 Okokuqala, sifanele sizame ukujonga izinto ngendlela iqabane elingakholwayo elizijonga ngayo. Amaqabane amaninzi angakholwayo ayazithanda iintsapho zawo yaye azama ukuwaphatha kakuhle amaqabane nabantwana bawo. Kusenokwenzeka ukuba eyona nto ingumqobo kukuba anenzondelelo ngeenkolelo zawo ezahlukileyo kwezethu. Asenokuba akazi nto kangako ngamaNgqina kaYehova ngaphandle kwezinto azixelelwe ngabahlobo abangenalwazi ngathi. Wambi into angayithandiyo kukuba amaqabane awo ngoku achitha ixesha kwizinto zonqulo, xesha elo ayefudula elichitha nentsapho. Xa siyiqonda indlela avakalelwa ngayo siya kukwazi ukuwaphatha ngobubele nentlonelo size siyeke ukungakhululeki xa sikunye nawo.—IMize. 16:20-23.
3. Yiyiphi eyona nto inokunceda amaqabane angakholwayo amkele inyaniso?
3 Ukubonakalisa Umdla: Eyona nto inokunceda amaqabane angakholwayo amkele inyaniso, kukubonakalisa ububele kuqala kunokusuka sixubushe nawo ngeBhayibhile. (1 Pet. 3:1, 2) Ukuze sikwazi ukwenjenjalo sifanele sibonakalise umdla kuwo. Oodade banokubonakalisa umdla kwinkosikazi engakholwayo, yaye bona abazalwana banokubonakalisa umdla kwindoda engakholwayo. Njani?
4. Sinokuwubonakalisa njani umdla kwiqabane elingakholwayo?
4 Ukuba anazani neqabane elingakholwayo, into enokuba bhetele kukuzama ukudibana nalo emva kokuba uye wathetha neqabane elingumKristu. Ungadani xa libonakala lingenabubele ekuqaleni. Ukubonakalisa kwethu ububele nomdla kulo kunokulenza liyitshintshe indlela eliwajonga ngayo amaNgqina kaYehova. (Roma 12:20) Amanye amaKristu aqolileyo adla ngokumemela esidlweni iqabane elingakholwayo nentsapho yalo, ukuze aqhelane nalo. Adla ngokuncokola ngezinto elinomdla kuzo, kunokuzama ukulinyanzela ukuba lithethe ngezinto zokomoya. Xa sele likhululekile kuba lula ukuncokola ngeZibhalo. Lisenokuvuma xa limenyelwa kwiintlanganiso zethu ukuze lize kuphulaphula izinto ezifundwa yinkosikazi yalo, ngokumbi ekubeni sele linabantu elibaziyo ebandleni. Kwanokuba alikabi namdla wokufunda inyaniso, linokunconywa ngokuxhasa kwalo iqabane lalo.
5. Abadala banokuzama njani ukuqhelana namaqabane angakholwayo?
5 Ngokukhethekileyo, abadala bafanele bazame ukuqhelana namaqabane angakholwayo ukuze bakwazi ukubona xa kuvela amathuba okunikela ubungqina kuwo. Iqabane elingakholwayo ebelifudula lingenamdla wokuxubusha ngeBhayibhile lisenokuphulaphula xa likhuthazwa ngeZibhalo xa lilele esibhedlele okanye ligula kakhulu. Xa kukho into ebuhlungu eyenzekileyo kumzi weqabane elingakholwayo, njengokufelwa lilungu lentsapho, abadala banokucela ukuba nalo libekho xa kuthuthuzelwa intsapho.
6. Ziziphi izizathu zokuba sizame ukunceda amaqabane angakholwayo amkele inyaniso?
6 Cinga nje indlela elinokuvuya ngayo iqabane elingumKristu xa iqabane lalo lisamkela inyaniso! Eso inokuba sisihlandlo sovuyo kuYehova, kwiingelosi nakwibandla liphela. (Luka 15:7, 10) Kwanokuba iqabane elingakholwayo alibonakalisi mdla, sinokuvuyiswa kukuba imigudu esiyenzayo iyamkholisa uYehova ‘onganqweneli ukuba kutshabalale nabani na kodwa onqwenela ukuba bonke bafikelele enguqukweni.’—2 Pet. 3:9.
[Amagama acatshulweyo akwiphepha 6]
Eyona nto inokunceda amaqabane angakholwayo amkele inyaniso, kukubonakalisa ububele kuqala kunokusuka sixubushe nawo ngeBhayibhile