Ubacebisa Njani Abanye?

Ngaba wakha wacelwa ukuba udlulisele icebiso kwabanye? Ngokomzekelo, ngaba wakha wabuzwa imibuzo enjengale: ‘Ndifanele ndenze ntoni? Ngaba ndifanele ndiye kule mbutho? Ngaba ndimele ndiwufundele lo msebenzi? Ngaba ndimele ndenze amadinga nalo mntu ngenjongo yokutshata naye?’

Abantu abanyanisekileyo banokucela ukuba ubancede xa besenza izigqibo—izigqibo ezinokuba negalelo kulwalamano lwabo nabahlobo, intsapho, kwakunye noYehova. Iimpendulo obanika zona uzisekela entwenini? Wenza njani xa ucebisa abanye? Enoba umbandela awunamsebenzi kangako okanye untununtunu, iMizekeliso 15:28 ithi: “Intliziyo yelungisa iyayicamngca impendulo.” Khawubone indlela le migaqo yeBhayibhile mihlanu enokusinceda ngayo xa sicebisa abanye.

1 Yiqonde Kakuhle Imeko.

“Ukuba nabani na uphendula umbandela ngaphambi kokuwuva, bubudenge obo kuye nokuthotywa.”—IMIZE. 18:13.

Ukuze sikwazi ukunikela icebiso elililo, simele siqonde iimeko noluvo lomntu ocela ukucetyiswa. Ngokomzekelo: Ukuba ubunokufowunelwa ngumntu ebuza eyona ndlela anokuhamba kuyo xa esiya emzini wakho, yintoni ekufuneka uyazile ukuze ukwazi ukumnceda? Ngaba ungakwazi ukumchazela eyona ndlela anokuhamba ngayo, ungamazi apho akhoyo? Ubungenakukwazi! Ngokufanayo ukuze ukwazi ukunikela ulwalathiso olululo, yazi “indawo akuyo”—iimeko noluvo lwakhe—lowo ufuna ulwalathiso. Ngaba kunokwenzeka ukuba kukho iimeko esingazaziyo ezinokuchaphazela indlela esisabela ngayo? Xa singayazi kakuhle imeko akuyo, sinokunikela icebiso elinokubangela loo mntu adideke nangakumbi.—Luka 6:39.

Hlola Ukuba Lungakanani Uphando Asele Elwenzile. Kunokuba bubulumko ukubuza umntu ocela icebiso imibuzo efana nale: “Ucinga ukuba yiyiphi imigaqo yeBhayibhile esebenzayo kule meko?” “Wena ubona izeziphi iingenelo neengozi zolu khetho ujongene nalo?” “Sele uphande waya kuma phi ngalo mba?” “Akukacetyiswa na ngabanye abantu, njengabadala, abazali bakho, okanye umntu okuqhubela isifundo?”

Indlela aphendula ngayo loo mntu inokusinceda sibone umgudu asele ewenzile wokuphanda. Kanti xa simcebisa, siya kucinga nangoko sele kuthethiwe ngabanye. Sinokubona enoba lo mntu ufuna umcebisi oza ‘kumnyumbaza iindlebe’ kusini na, emxelela loo nto afuna ukuyiva.—2 Tim. 4:3.

2 Musa Ukuphendula Ngokungxama.

“Wonke umntu umele akhawuleze ukuva, acothe ukuthetha.”—YAK. 1:19.

Sineenjongo ezintle, sinokuphendula ngokukhawuleza. Kodwa ngaba ibiya kuba bubulumko loo nto, ingakumbi ukuba sithetha ngombandela esingawuphandanga kakuhle? IMizekeliso 29:20 ithi: “Uyambona na umntu ongxamayo ngamazwi akhe? Kukho ithemba ngakumbi kumntu osisiyatha kunaye.”

Ziphe ithuba lokuqinisekisa ukuba indlela ophendula ngayo ivisisana ngokupheleleyo nobulumko bukaThixo. Zibuze, ‘Ngaba iingcinga “nomoya wehlabathi” zinempembelelo kwindlela endicinga ngayo?’ (1 Kor. 2:12, 13) Uze ukhumbule ukuba, ukuba neenjongo ezintle kukodwa akwanelanga. Emva kokuva ngomsebenzi onzima kaYesu, umpostile uPetros wanikela eli cebiso kuye: “Yiba nobubele kuwe, Nkosi; akuyi kuba nesi siphelo konke konke.” Sinokufunda ntoni kula mazwi kaPetros? Sifunda ukuba, ukuba asilumkanga, enoba sineenjongo ezintle, sinokukhuthaza “kungekhona iingcamango zikaThixo, kodwa ezabantu.” (Mat. 16:21-23) Kubaluleke ngokwenene ukucingisisa ngaphambi kokuba sithethe! Ngapha koko, amava ethu asikelwe umda ngokugqithiseleyo xa siwathelekisa nobulumko bukaThixo.—Yobhi 38:1-4; IMize. 11:2.

3 Lisebenzise Ngokuthobeka ILizwi LikaThixo

“Andenzi nto ngokwam; kodwa ndizithetha ezi zinto kanye njengoko uBawo wandifundisayo.”—YOH. 8:28.

Ngaba uthi, “Ukuba bendinguwe, bendiza . . . ”? Kwanokuba indlela yokuphendula umbuzo ibonakala ilula, bekuya kuba kuhle ukuba uxelise umzekelo esawushiyelwa nguYesu wokuthobeka. Wayenobulumko namava angaphezu kwawakhe nawuphi na umntu; kodwa wathi: “Andithethanga ngokwentshukumisa yam, kodwa uBawo . . . undinike umyalelo mayela noko mandikuxele noko mandikuthethe.” (Yoh. 12:49, 50) Iimfundiso namacebiso kaYesu ayesoloko esekelwe ekuthandeni kukaYise.

Ngokomzekelo, kuLuka 22:49 sifunda ukuba abafundi bakaYesu babuza enoba bamele bamlwele na xa wayeza kubanjwa. Omnye umfundi wakhe wasebenzisa ikrele. Phawula ukuba kwingxelo efana naleyo ikuMateyu 26:52-54 kuthiwa naphantsi kwezo meko, uYesu wazipha ithuba lokuqiqa nabafundi bakhe ngokuthanda kukaYehova. Eyazi imigaqo ekwiGenesis 9:6, neziprofeto ezikwiNdumiso 22 nakuIsaya 53, uYesu wanikela ulwalathiso lobulumko olwathi ngokuqinisekileyo lwasindisa ubomi lwaza lwamkholisa uYehova.

4 Sebenzisa Iincwadi Zobuthixo.

“Ngubani ngokwenene olikhoboka elithembekileyo neliyingqondi ethe inkosi yalo yalimisela phezu kwempahla yendlu yayo, ukuze liyinike ukutya kwayo ngexesha elifanelekileyo?”—MAT. 24:45.

UYesu wamisela udidi lwekhoboka elithembekileyo elikhupha ukutya okubalulekileyo kokomoya. Xa ucebisa umntu okanye umnika ulwalathiso, ngaba uzinika ithuba lokuphanda kwiimpapasho ezisekelwe eBhayibhileni?

IWatch Tower Publications Index kwakunye neWatchtower Librarya zinentabalala yenkcazelo, ecacileyo nefumaneka lula. Ibiya kuba yimpazamo enkulu ukungayisebenzisi le ntabalala yenkcazelo! Imixholo emininzi icatshulwe yaye kukho namanqaku amaninzi okunceda umntu ofuna icebiso. Unobuchule obungakanani bokunceda abanye baphande imigaqo eseBhayibhileni baze baliqonde iLizwi likaThixo? Kanye njengoko iGPS inokunceda umntu ukuba ayazi eyona ndawo akuyo ize imkhokelele kwindawo afuna ukuya kuyo, ngoko izixhobo zokuphanda zinokumnceda ukuba ayibone indlela akuyo aze aqonde indlela anokuqhubeka ngayo ekwindlela yobomi.

Abadala abaninzi baye baqeqesha abavakalisi ukuba bakwazi ukukhangela amanqaku besebenzisa i-Index okanye iWatchtower Library, ngaloo ndlela benceda abazalwana noodade ukuba baqiqe ngeZibhalo. Ukwenza oko kunceda abavakalisi bangaphandi nje kuba befuna ukusombulula ingxaki ngelo xesha kodwa bakwenze umkhwa ukuphanda nokuthembela ngamalungiselelo kaYehova okomoya. Ngaloo ndlela, “amandla abo okuqonda bawaqeqeshela ukwahlula okulungileyo nokubi.”—Heb. 5:14.

5 Kuphephe Ukuzama Ukwenzela Abanye Izigqibo.

“Ngamnye uya kuthwala owakhe umthwalo.”—GAL. 6:5.

Ekugqibeleni, mntu ngamnye umele azikhethele ngokwakhe ukuba ufuna ukulandela siphi isiluleko okanye icebiso. UYehova uyasivumela sonke ukuba sibe nenkululeko yokuzikhethela enoba siza kulawulwa yimigaqo yakhe okanye akunjalo. (Dut. 30:19, 20) Ezinye iimeko ziquka imigaqo eliqela yeBhayibhile, yaye ekugqibeleni umntu ofuna icebiso kufuneka azenzele isigqibo. Ngokusuka kwimeko okanye ubudala balowo ufuna icebiso, simele sizibuze, ‘Ngaba ngokwenene ndinalo ilungelo lokuphendula lo mbuzo?’ Ezinye izinto kuhle ukuba zibhekiswe kubadala bebandla okanye ukuba lo mntu ubuzayo uselula, azibuze kubazali bakhe.

[Umbhalo osemazantsi]

[Ibhokisi/Umfanekiso okwiphepha 8]

Unqulo Lwentsapho

Kanye njengaxa usenza ufundisiso, kutheni ungakhe uphande iimpendulo zemibuzo obusandul’ ukuyibuzwa? Ngawaphi amanqaku nemigaqo yeBhayibhile onokuwafumana anokunceda umntu onemibuzo efanayo? Ngokomzekelo, masithi umzalwana okanye udade ukubuza ngokuthandana ngaphambi komtshato. Xa usebenzisa i-Index okanye iWatchtower Library, qala ujonge imixholo edibana ngokuthe ngqo naloo mbandela. Ngokomzekelo, kwi-Index unokujonga phantsi komxholo othi “Dating” okanye othi “Marriage.” Emva koko, jonga imixholwana ukuze ubone owona uwufunayo. Xa ujonga umxholo owufunayo, phawula enoba akukho mabinzana athi “See also” wona aza kukwalathisela ngqo kulo mbandela uwufunayo.

[Ibhokisi ekwiphepha 9]

Ngenxa yamalungiselelo kaYehova asenzela wona ngentlangano yakhe, siyakwazi ukunikela size sifumane icebiso elifanelekileyo. INtshumayeli 12:11 ithi: “Amazwi ezilumko anjengeemviko, yaye kanye njengezikhonkwane ezibethelelwe zatshona banjalo abazifica ngokuqokelela izivakalisi; banikwe ngumalusi omnye.” ‘Njengeemviko’—izinti ezibaziweyo ezisetyenziselwa ukwalathisa izilwanyana ezitsalayo—icebiso lothando nelisengqiqweni likhokelela abo banyanisekileyo kwikhondo elililo. ‘Izikhonkwane ezibethelelwe zatshona’ zenza isakhiwo somelele. Ngokufanayo, ukunika abanye amacebiso amahle kunokubomeleza, nto leyo enokuba nemiphumo emihle. Izilumko ‘ziyazifica,’ okanye zibe noyolo olungathethekiyo xa zifunda ‘ingqokelela yezivakalisi’ ezibonisa ubulumko ‘bomalusi wabo omnye,’ uYehova.

Xelisa uMalusi wethu xa unikela icebiso. Kulilungelo lokwenene ukuphulaphula nokunikela icebiso elifanelekileyo nanini na kunokwenzeka! Xa ngokwenene esekelwe kwimigaqo yeBhayibhile, amacebiso ethu aya kuba ngalungileyo yaye aya kuqhubeka ebanceda abo basiphulaphulayo.