AmaKristu Afanele Enze Ntoni Namhlanje?
AMAKRISTU okwenyaniso akananxaxheba kwezopolitiko namhlanje. Kutheni? Kaloku alandela umzekelo kaYesu. Wathi ngokuphathelele yena: ‘Andiyonxalenye yehlabathi.’ Ngokuphathelele abafundi bakhe wathi: ‘Aniyonxalenye yehlabathi.’ (Yohane 15:19; 17:14) Khawuve ezinye zezizathu ezenza amaKristu angabandakanyeki kwezopolitiko.
1. Abantu basikelwe umda. IBhayibhile ithi abantu abanawo amandla nelungelo lokulawula abanye abantu. Umprofeti uYeremiya wabhala la mazwi: “Asikokomntu ohambayo ukwalathisa inyathelo lakhe.”—Yeremiya 10:23.
Ekubeni abantu bengazange badalelwe ukuba babhabhe, abazange badalelwe ukuba bakwazi ukuzilawula. Ethetha ngezinto urhulumente angenakukwazi ukuzenza, umbhali-mbali uDavid Fromkin uthi: “Oorhulumente benziwa ngabantu, ngoko ke bayawa yaye nezinto abathembele kuzo aziqinisekanga. Banayo intwana yamandla, kodwa alinganiselwe.” (iThe Question of Government) Yiyo loo nto iBhayibhile isilumkisa ukuba singabeki ithemba lethu emntwini!—INdumiso 146:3.
2. Namhlanje imimoya engendawo inempembelelo. Xa uSathana wafuna ukunika uYesu isikhundla sokuba ngumlawuli, uYesu akazange ayikhanyele into yokuba uMtyholi unalo igunya lokumnika izikumkani zomhlaba. Eneneni, kamva uYesu wabiza uSathana ngokuba ‘ngumlawuli wehlabathi.’ Kwiminyaka eyalandelayo kamva umpostile uPawulos wathi xa ebiza uSathana: ‘Nguthixo wale nkqubo yezinto.’ (Yohane 14:30; 2 Korinte 4:4) UPawulos wawabhalela oku amaKristu: “Sizamazamana . . . noorhulumente, namagunya, nabalawuli behlabathi bobu bumnyama, kwanemikhosi yoomoya abangendawo kwezasezulwini iindawo.” (Efese 6:12) Ngokufihlakeleyo, aba moya bangendawo ngabona baxhuzul’ imikhala yolawulo aph’ emhlabeni. Eso sibakala sifanele sisenze sizijonge njani ezopolitiko?
Khawucinge ngalo mzekelo: Kanye njengoko izikhephe ezincinane zinokududulwa yimisinga enamandla yolwandle, iinkqubo zabantu zezopolitiko zibhexeshwa yile mimoya ingendawo inamandla. Kanye njengoko oomatiloshe bengenakwenza nto ingako ukuthintela loo misinga inamandla, nabantu bezopolitiko akukho nto ingako abanokuyenza ukuze batshintshe impembelelo enamandla yeedemon. Aba moya bangendawo bazimisele ukubonakalisa ngokupheleleyo abantu nokubangela “uyeha kuwo umhlaba.” (ISityhilelo 12:12) Ngoko ke, utshintsho lokwenene lunokuziswa kuphela ngumntu onamandla angakumbi kunakaSathana needemon zakhe. Loo Mntu nguYehova uThixo ngokwakhe.—INdumiso 83:18; Yeremiya 10:7, 10.
3. AmaKristu okwenyaniso axhasa uBukumkani bukaThixo kuphela. UYesu nabafundi bakhe babesazi ukuba ngexesha elililo, uThixo uya kumisela urhulumente emazulwini ukuze alawule wonke umhlaba. IBhayibhile imbiza lo rhulumente ngokuba buBukumkani bukaThixo yaye yatyhila nokuba nguYesu omiselweyo ukuba abe nguKumkani wabo. (ISityhilelo 11:15) Ekubeni obo Bukumkani buchaphazela bonke abantu, uYesu wenza “iindaba ezilungileyo zobukumkani bukaThixo” zangumxholo weemfundiso zakhe. (Luka 4:43) Kwakhona wafundisa abafundi bakhe ukuba bathandaze bathi: “Mabufike ubukumkani bakho.” Kwakutheni? Kuba xa kulawula obo Bukumkani, ukuthanda kukaThixo kuya kwenziwa emazulwini nasemhlabeni.—Mateyu 6:9, 10.
Kuya kwenzeka ntoni koorhulumente babantu? IBhayibhile iphendula isithi oorhulumente “bomhlaba omiweyo uphela” baya kutshatyalaliswa. (ISityhilelo 16:14; 19:19-21) Ukuba umntu uyakholelwa ukuba sekumbovu ukuba uBukumkani bukaThixo bushenxise iinkqubo zezopolitiko, bekuya kuba sengqiqweni ukuyeka ukuxhasa ezo nkqubo. Ngapha koko, ukuba ebenokuzama ukuxhasa oorhulumente babantu abaza kutshabalala, eneneni ebeya kuba ulwa noThixo.
Nangona amaKristu okwenyaniso engabandakanyeki kwezopolitiko, ngaba loo nto ithetha ukuba awanawo umdla wokunceda abantu? Khawufunde impendulo kwinqaku elilandelayo.
[Amagama acatshulweyo akwiphepha 7]
AmaNgqina kaYehova axhasa uBukumkani bukaThixo, kungekhona utshintsho oluziswa zezopolitiko