Zibaphembelela Njani Abantu Iimfundiso ZamaKristu?
AMANQAKU andulela eli aye achaza izizathu ezibangela ukuba amaKristu okwenene engabi nanxaxheba kwezopolitiko. Nangona kunjalo, amaKristu abonisa njani ukuba anawo umdla wokunceda abantu basekuhlaleni? Enye indlela kukulandela umyalelo kaYesu othi: “Hambani ke ngoko niye kubenza abafundi abantu beentlanga zonke, nibabhaptiza egameni loYise neloNyana nelomoya oyingcwele, nibafundisa ukuba bazigcine zonke izinto endiniyalele zona.”—Mateyu 28:19, 20.
Umyalelo kaYesu ‘wokubenza abafundi abantu’ nokugcina umyalelo wokuba yityuwa nokuba lukhanyiselo lwehlabathi ngamaphuth’ ahlathinye. (Mateyu 5:13, 14) Udibana njani? Yaye lo msebenzi ubachaphazela njani abantu?
Isigidimi SikaKristu—Siyalondoloza yaye Siyakhanyisa
Ityuwa ilondoloza ukutya, kungaboli. Ngendlela efanayo, isigidimi uYesu awasinika abafundi bakhe ukuba basise ebantwini bazo zonke iintlanga sinamandla okulondoloza ubomi. Abo bayamkelayo nabayisebenzisayo imfundiso kaYesu bayakhuseleka ekuziphatheni kakubi okuya kuthath’ unyawo namhlanje. Ngayiphi indlela? Baye bafunda ukuphepha imikhwa eyenzakalisa impilo, enjengokutshaya, yaye baye bahlakulela iimpawu ezinjengothando, uxolo, ukuzeka kade umsindo, ububele nokulunga. (Galati 5:22, 23) Ezo mpawu zibenza babe lulutho ekuhlaleni. AmaKristu abanenxaxheba ekwabelaneni nabamelwane bawo ngesi sigidimi silondolozayo aba negalelo elixabisekileyo ebantwini.
Kuthekani ngokusetyenziswa kwesafobe esithi ukukhanya? Kanye njengenyanga ebonisa ukukhanya okuvela elangeni, namaKristu abonisa “ukukhanya” okuvela kuYehova. Akhonza njengabathwali bokukhanya ngesigidimi asishumayelayo nangemisebenzi emihle ayenzayo.—1 Petros 2:12.
Ngokubhekele phaya, uYesu waphinda wabalaselisa ukufana kwezinto phakathi kokuba lukhanyiselo nokuba ngumfundi xa wathi: “Abantu balumeka isibane baze basibeke, kungekhona phantsi kwengobozi yokulinganisa, kodwa phezu kwesiphatho sezibane, sikhanyisele bonke abasendlwini. Malukhanye ngokunjalo ukhanyiselo lwenu phambi kwabantu.” Isibane esibekwe phezu kwesiphatho saso sibonakala ngokucacileyo kubo bonke abakufutshane naso. Ngokufanayo, umsebenzi wokushumayela neminye imisebenzi eyenziwa ngamaKristu okwenyaniso ifanele ibonakale ngokucacileyo kwabo bawangqongileyo. Ngoba? UYesu wathi abo bayibonayo imisebenzi emihle baya kunikela uzuko, kungekhona kuYesu, kodwa kuThixo.—Mateyu 5:14-16.
Umsebenzi Wawo
Xa uYesu wayesithi, “nilukhanyiselo lwehlabathi” waza waphinda wathi: “Malukhanye ngokunjalo ukhanyiselo lwenu” wayebhekisela kubo bonke abafundi bakhe. Uthumo lukaYesu alunakuphunyezwa liqaqobana labantu abasasazeke kwiimvaba ngeemvaba. Kunoko, bonke abo bakholwayo “balukhanyiselo.” AmaNgqina kaYehova azizigidi ezisixhenxe, akumazwe angaphezulu kwe-235, akholelwa ukuba ngumsebenzi wawo ukutyelela abamelwane ukuze abelane nabo ngesigidimi awasinikwa nguYesu ukuba asivakalise.
Uthini umxholo wesigidimi samaNgqina kaYehova? Xa uYesu wathuma abalandeli bakhe ukuba baye kushumayela, akazange abathume ukuba baye kushumayela utshintsho kwezentlalo okanye lwezopolitiko, umanyano kwiCawa nakwiLizwe okanye enye ingcamango. Endaweni yoko wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga.” (Mateyu 24:14) Ngenxa yoko, ethobela umyalelo kaYesu, amaKristu okwenyaniso ayaqhubeka encokola nabamelwane bawo ngoBukumkani bukaThixo—okuphela korhulumente okwaziyo ukuzisa isiphelo kwinkqubo kaSathana nokwaziyo ukuzisa ihlabathi elitsha elinobulungisa.
Eneneni, xa ufunda iingxelo zeVangeli, zimbini izinto ezingundoqo ngokuphathelele umsebenzi wokushumayela owawusenziwa nguYesu ezichaphazela imisebenzi eyenziwa ngamaKristu okwenyaniso namhlanje. Zombini ezo zinto kuthethwa ngazo kwinqaku elilandelayo.
[Amagama acatshulweyo akwiphepha 8]
Isigidimi samaKristu sifana njani netyuwa?
[Amagama acatshulweyo akwiphepha 9]
Isigidimi sikaKristu sifana njani nesibane kwindawo emnyama?