IBhayibhile Iyabutshintsha Ubomi Babantu
YINTONI eyayifumana isanelisa indoda yaseSkotlani ngaphezu kokuba ngusomashishini? Yintoni eyanceda indoda yaseBrazil ukuba yahlukane nobomi borheletyo nokutshaya iziyobisi? Yakwazi njani indoda yaseSlovenia ukwahlukana nomkhwa wokuzintyintya ngotywala? Khawuzivele ngokwakho ukuba bathini.
“Ubomi Bam Babubonakala Buqhuba Kakuhle.”—JOHN RICKETTS
UNYAKA WOKUZALWA: 1958
ILIZWE: ESKOTLANI
UBOMI BANGAPHAMBILI: USOMASHISHINI OPHUMELELEYO
INDLELA ENDANDIKADE NDIPHILA NGAYO: Ndakhula kakuhle. Utata wayeligosa lomkhosi waseBritani, ngenxa yoko intsapho yakowethu yayisoloko ingoonothwal’ impahlana. Ngaphandle kwaseSkotlani, sakhe sahlala eNgilani, eJamani, eKenya, eMalasia, eIreland naseCyprus. Ukususela xa ndandineminyaka esibhozo ubudala, ndandifunda ndihlala ngaphakathi esikolweni eSkotlani. Ekugqibeleni ndafumana isidanga kwiYunivesithi yaseCambridge.
Xa ndandineminyaka engama-20 ubudala, ndasebenza kwishishini le oyile iminyaka esibhozo. Ekuqaleni, ndandisebenza eMzantsi Merika, emva koko ndasebenza eAfrika ekugqibeleni ndaya kusebenza kwiNtshona yeOstreliya. Emva kokuba ndifudukele eOstreliya, ndaqalisa ishishini lokutyala imali, endaye ndalithengisa kamva.
Imali endayifumana ngokuthengisa elo shishini yandenza ndakwazi ukuthatha umhlala phantsi ndineminyaka engama-40 kuphela ubudala. Ekubeni ngoku ndandingasasebenzi ndaqalisa ukukhenketha. Ndayijikeleza kabini iOstreliya ngesithuthuthu ndaza ndatyhutyha ihlabathi. Zazibonakala zindihambela kakuhle izinto.
INDLELA EBUTSHINTSHE NGAYO IBHAYIBHILE UBOMI BAM: Kwangaphambi kokuba ndithathe umhlala phantsi, ndandifuna indlela endinokumbulela ngayo uThixo ngenxa yezinto endandizinandipha ebomini. Ndaqalisa ukuya kwiCawa yaseTshetshi, endakhulela kuyo. Kodwa yayingayifundisi iBhayibhile. Emva koko ndahamba icawa yamaMormon, nalapho ndaphelelwa ngumdla, kuba ayengayifundisi iBhayibhile.
Ngenye imini, amaNgqina kaYehova andityelela. Zisuka nje ndabona ukuba iimfundiso zawo zisekelwe eBhayibhileni. Esinye isibhalo abandifundela sona yayiyeyoku-1 kuTimoti 2:3, 4. Ezo vesi zithi kukuthanda kukaThixo ukuba “zonke iintlobo zabantu zisindiswe zize zifikelele elwazini oluchanileyo lwenyaniso.” Ndayithanda gqitha into yokuba amaNgqina ebethelela kungekhona ulwazi kodwa ulwazi oluchanileyo olusekelwe eBhayibhileni.
Ukufunda iBhayibhile namaNgqina kaYehova kwandinceda ndafumana ulwazi oluchanileyo. Ngokomzekelo, ndafunda ukuba uThixo noYesu abayonxalenye yothixo oneziqu ezithathu kunoko, bangabantu ababini abahlukeneyo. (Yohane 14:28; 1 Korinte 11:3) Kwandivuyisa gqitha ukwazi loo nyaniso. Kwandicaphukisa gqitha ukuchitha ixesha ndizama ukuqonda esi sintsompothi sothixo oneziqu ezithathu.
Akuzange kube kudala ndaqalisa ukuya kwiintlanganiso zamaNgqina kaYehova. Ndachukunyiswa gqitha kukuba nobuhlobo kwawo nayimilinganiselo yawo emihle yokuziphatha—ayengathi ziingcwele. Uthando lwawo olunyanisekileyo lwandeyisela ndaqonda ukuba ndilufumene unqulo lokwenyaniso.—Yohane 13:35.
INDLELA ENDINGENELWE NGAYO: Emva kokuba, ndibhaptiziwe, ndadibana nebhinqa elithandekayo eligama linguDiane. Wakhuliswa ngamaNgqina kaYehova, yaye wayeneempawu ezintle endandizithanda. Ekuhambeni kwexesha satshata. Ubuhlobo nenkxaso yakhe ibiyintsikelelo yokwenene evela kuYehova.
Saba nomnqweno wokuya kukhonza kwindawo efuna abashumayeli abangakumbi beendaba ezilungileyo. Ngo-2010, safudukela eBelize, eMbindi Merika. Apha sishumayela kubantu abamthanda ngokwenene uThixo nabanxanelwe ulwazi lweBhayibhile.
Kundenza ndibe noxolo lwengqondo ukwazi inyaniso ngoThixo nangeLizwi lakhe, iBhayibhile. Njengomshumayeli osisigxina, ndiye ndanandipha uvuyo lokufundisa abanye abantu iBhayibhile. Ayikho into ebhetele ngaphezu kokubona inyaniso yeBhayibhile iphucula ubomi babantu—kanye njengokuba nam ndancedakala. Ekugqibeleni ndide ndayifumana eyona ndlela ibhetele yokubulela uThixo ngobomi endibunandiphayo.
“Andiphatha Ngobubele.”—MAURÍCIO ARAÚJO
UNYAKA WOKUZALWA: 1967
ILIZWE: EBRAZIL
UBOMI BANGAPHAMBILI: UBOMI BORHELETYO
INDLELA ENDANDIKADE NDIPHILA NGAYO: Ndakhulela kwidolophu encinane yaseAvaré kwiphondo laseSão Paulo. Ubukhulu becala ihlala abantu abasebenzayo.
Utata wasweleka umama esakhulelwe mna. Xa ndandiseyinkwenkwana ndandinxiba impahla kamama xa engekho. Ndaziphatha njengomntu obhinqileyo, yaza loo nto yenza abantu bandijonga njengefanasini. Ekuhambeni kwexesha ndaqalisa ukulala namanye amakhwenkwe kuquka namadoda.
Xa ndandishiya ishumi elivisayo, ndandisabelana ngesondo (namadoda namabhinqa) naphi na, ezibharini, kwiindawo zemijuxuzo nasezicaweni. Ngamaxesha ekhanivali, ndandinxiba njengebhinqa ndize ndiye kwimijuxuzo yemidaniso yesamba. Ndandidumile.
Abahlobo bam, yayingamafanasini, oonongogo neengedle zeziyobisi. Abanye bandikhuthaza ukuba nditshaye ikhokheyini, akuzange kube kudala ndaba yingedle yayo. Ngamanye amaxesha sasitshaya ubusuku bonke. Maxa wambi, ndandiziba ndizihlalele ndedwa nditshaye imini yonke. Ndabhitya ndangumcinga kangangokuba abantu babesasaza amarhe okuba ndinesifo sikaGawulayo.
INDLELA EBUTSHINTSHE NGAYO IBHAYIBHILE UBOMI BAM: Kanye ngelo xesha, ndadibana namaNgqina kaYehova. Andiphatha ngobubele. Ezinye zeevesi zeBhayibhile andifundela zona yayingamaRoma 10:13, athi: “Wonk’ ubani obiza egameni likaYehova uya kusindiswa.” Loo mazwi abethelela ukubaluleka kokusebenzisa igama likaYehova. Izihlandlo ezininzi, emva kokuba nditshaye ikhokheyini ubusuku bonke, ndandiye ndivule ifestile, ndize ndikhangele ezulwini, ndize ndithandaze kuYehova ndintywizisa, ndimcela ukuba andincede.
Ndibuhlungu ngenxa kamama wam owayetyumke intliziyo, owayebuhlungu kukundibona ndizibhubhisa ngeziyobisi, ndagqiba ekubeni ndiziyeke. Ngokukhawuleza emva koko, ndavuma ukuqhutyelwa isifundo seBhayibhile ngamaNgqina. Andiqinisekisa ukuba isifundo siza komeleza isigqibo sam sokuyeka ukutshaya iziyobisi—eneneni kwaba njalo!
Njengoko, ndandiqhubeka nesifundo seBhayibhile ndaqonda ukuba kuza kufuneka ndiyitshintshe indlela endiphila ngayo. Kwakunzima gqitha ukwahlukana nobufanasini, ekubeni babusele buyinxalenye yobomi bam. Enye into eyandincedayo, yaba kukutshintsha indlela zokuzonwabisa. Ndabalahla abahlobo bam bakudala ndaza ndayeka nokuya ezibharini nakwiindawo zemijuxuzo.
Nangona kwakungelula ukwenza olu tshintsho, ndathuthuzelwa kukwazi ukuba uYehova undikhathalele yaye uyazazi neengxaki zam. (1 Yohane 3:19, 20) Ngo-2002, ndandisele ndiziyekile zonke izenzo ezinento yokwenza nobufanasini, ndaza ndabhaptizwa kwakulo nyaka ndaba liNgqina likaYehova.
INDLELA ENDINGENELWE NGAYO: Umama wayithanda gqitha le ndlela intsha yam yokuziphatha kangangokuba naye waqalisa ukufunda iBhayibhile. Ngelishwa waye wabethwa sisitrowuku. Nakuba kunjalo, uye waqhubeka emthanda uYehova nenyaniso yeBhayibhile.
Kule minyaka isibhozo idluleyo, bendishumayela ngokusisigxina, ndichitha ixesha lam elininzi ndifundisa abanye iBhayibhile. Mandivume ukuba ngamanye amaxesha kuye kufuneke ndilwe neminqweno engatshongo khona. Kodwa ndomelezwa kukuba xa ndikhetha ukungazenzi ezo zinto, ndiyamvuyisa uYehova.
Ukusondela kuYehova nokuphila ngendlela ekholisa yena indenza ndizihlonele. Ngoku ndiyindoda eyonwabileyo.
“Ndandiyindlamanzi.”—LUKA ŠUC
UNYAKA WOKUZALWA: 1975
ILIZWE: SLOVENIA
UBOMI BANGAPHAMBILI: NDANDIYINTSELI
INDLELA ENDANDIKADE NDIPHILA NGAYO: Ndazalelwa eLjubljana, ikomkhulu laseSlovenia. Ndakhula kamnandi ndade ndaneminyaka emine ubudala. Emva koko utata wazibulala. Emva kwale ntlekele, kwafuneka umama aye kuphangela ukuze anyamekele mna nomkhuluwa wam.
Xa ndandineminyaka eli-15 ubudala, ndaya kuhlala nomakhulu wecala lakulo mama. Kwakumnandi ukuhlala naye, ekubeni itshomi zam ezininzi zazihlala kwalapho. Ndaba nenkululeko engakumbi kunangokuya ndandihlala nomama. Xa ndandineminyaka eli-16 ubudala, ndaqalisa ukubutha nabantu ababesela ngeempela-veki. Ndayeka ukuzicheba iinwele, ndanxiba ngendlela ebonisa imvukelo ndaza ekuhambeni kwexesha ndaqalisa ukutshaya.
Nangona ndanditshaya iintlobo ezahlukahlukeneyo zeziyobisi, andizange ndiyeke ukusela, kuba ndandikuthanda. Akuzange kube kudala ndayeka ukusela iiglasi ezimbalwa zewayini ndasela ibhotile yonke rhoqo ndisela. Ndaba yincutshe ekuzifihleni xa ndisele kakhulu. Yayiba livumba nje lotywala elalindidiza ukuba bendisele. Wayengekho umntu owaziyo ukuba ndandisela iwayini okanye ibhiya—ndize ndibanise nevodka!
Amaxesha amaninzi, yayiba ziitshomi zam ezinxila zide zigxadazele zize zibambelele kum nangona ndandidla ngokuba ngoyena usele kakhulu kunazo. Ngenye imini, ndeva enye itshomi yam isithi ndiyindla manzi—eli ligama lendelelo eSlovania elisetyenziswa kumntu obodlulayo abanye ngokusela. Yandikhathaza gqitha loo nto.
Ndaqalisa ukuzikisa ukucinga ngendlela endandiphila ngayo. Ndandiziva ndingento yanto. Kwakubonakala ngathi ndandifathula nje ebomini.
INDLELA ENDANDIKADE NDIPHILA NGAYO: Mayela neli xesha, ndaphawula ukuba omnye wabafundi endandifunda nabo, wayetshintshile engasenguye lowa ndimaziyo. Ekubeni ndandinomdla wokwazi ukuba uncedwe yintoni ndamcela ukuba siye kwivenkile ethengisa ukutya. Njengoko sasincokola wandichazela ukuba uqalise ukufunda iBhayibhile namaNgqina kaYehova. Wandichazela ezinye zezinto awayezifunda, zonke ezi zinto zazintsha kum, kuba zange ndikhuliswe ngenkonzo. Ndaqalisa ukuya kwiintlanganiso zamaNgqina ndaze ndafunda iBhayibhile nawo.
Ukufunda iBhayibhile kwandivul’ amehlo ndaza ndazi iinyaniso ezikhuthazayo. Ngokomzekelo, ndafunda ukuba siphila kwixesha iBhayibhile elibiza ngokuba ‘yimihla yokugqibela.’ (2 Timoti 3:1-5) Nokuba uThixo uza kuba shenxisa abantu ababi emhlabeni aze abantu abalungileyo abanike ithuba lokunandipha ubomi obungunaphakade eParadesi. (INdumiso 37:29) Ndaba nomnqweno onamandla wokufuna ukucoca ubomi bam ukuze ndibe phakathi kwabo bantu balungileyo.
Ndaqalisa ukuchazela abahlobo bam ngeenyaniso zeBhayibhile endandizifunda. Inkoliso yabo bandigculela, kodwa oku kwaba yintsikelelo ngendlela engaqondakaliyo. Intsabelo yabo yandinceda ndabona ukuba bebe ngengabo abahlobo bokwenene. Ndaqonda ukuba ingxaki yam yokusela yayibangelwa ngabantu endandibutha nabo. Iveki yonke, babehlala bekhangele kwimpela-veki ukuze banxile kwakhona.
Ndayeka ukunxulumana nabo ndaza ndanxulumana namaNgqina kaYehova. Ukuba phakathi kwawo kwakundikhuthaza gqitha—ayengabantu abamthanda ngokunyanisekileyo uThixo nababezama kangangoko ukuphila ngemilinganiselo yakhe. Ngokuthe ngcembe, ndahlukana nokusela ngokugqithisileyo.
INDLELA ENDINGENELWE NGAYO: Ndiyambulela uYehova kuba akuseyomfuneko ukuba ndisele utywala ukuze ndonwabe. Andazi ukuba ngendandiphelele phi ukuba ndandiqhubekile nobomi bam bangaphambili. Ngoku ndeyisekile ukuba ndiphila ubomi obungcono.
Kule, minyaka isixhenxe idluleyo, ndiye ndafumana ilungelo lokukhonza kwiofisi yesebe yamaNgqina kaYehova yaseSlovenia. Ukwazi uYehova nokumkhonza kuye kwabenza banentsingiselo ubomi bam.