Lutsha—Mlweni UMtyholi

1, 2. (a) Ulutsha luncedwa yintoni ukuze loyise amajoni omoya akhohlakeleyo? (Jonga umfanekiso osekuqaleni.) (b) Siza kuthetha ngantoni?

UMPOSTILE UPAWULOS wafanisa ubomi bamaKristu nobamajoni alwa imfazwe. Asilwi imfazwe yokoqobo kunoko silwela ukholo lwethu. Kodwa ke, sineentshaba eziphilayo. USathana needemon zakhe ngamajoni anobuchule nakuqhelileyo ukulwa. Kusenokubonakala ngathi asinakuphumelela. Ulutsha olungamaKristu lunokubonakala ngathi lungoyiswa lula. Lungenza ntoni ukuze luwoyise la majoni akhohlakeleyo anamandla kunabantu? Inyaniso kukuba, ulutsha lungaphumelela, ibe luyaphumelela! Luncedwa yintoni? ‘Luzuza amandla eNkosini.’ Kodwa alupheleli nje ekuzuzeni amandla kuThixo. Lunxibele ukulwa imfazwe. Njengamajoni aqeqeshwe kakuhle, lunxibe “sonke isikrweqe sikaThixo.”—Funda kwabase-Efese 6:10-12.

² Xa uPawulos wayesenza lo mzekeliso, inoba wayecinga ngamajoni amaRoma. (IZe. 28:16) Makhe sibone ukuba kutheni lo mzekeliso ufanelekile. Uzuqaphele ukuba luthini olunye ulutsha ngeengxaki zokunxiba sonke isikrweqe esivela kuThixo nangendlela esinceda ngayo.

IBHANTI LENYANISO

3, 4. Inyaniso eseBhayibhileni ifana njani nebhanti lejoni elingumRoma?

³ Funda kwabase-Efese 6:14. Ibhanti lejoni laseRoma lalineepleyiti zentsimbi ezikhusela isinqe. Lalenzelwe ukuphungula ubunzima besikrweqe esinxitywe ngentla lijoni. Amanye amabhanti ayesenza ijoni lalikwazi ukuqhoboshela ikrele nemela. Xa ijoni lilibophe nkqi ibhanti lalo, lalikwazi ukuma lizithembile emfazweni.

⁴ Ngokufanayo, inyaniso esiyifunda kwiLizwi LikaThixo isikhusela kubuxoki obunokusonzakalisa. (Yoh. 8:31, 32; 1 Yoh. 4:1) Okukhona siyithanda inyaniso, kokukhona kuya kuba lula ukuthwala “isigcina-sifuba,” loo nto ithetha ukuthi ukuphila ngemithetho kaThixo yobulungisa. (INdu. 111:7, 8; 1 Yoh. 5:3) Kwakhona, xa siyiqonda kakuhle inyaniso eseLizwini LikaThixo, siya kukwazi ukuyimela, siyithethelele kubachasi.—1 Pet. 3:15.

5. Kutheni kufuneka sithethe inyani?

⁵ Xa inyaniso ibotshelelwe nkqi ezinqeni zethu njengebhati, siza kuphila ngendlela ethi siphile ngayo size sihlale sithetha inyaniso ngalo lonke ixesha. Kutheni singaxoki? Ngenxa yokuba ubuxoki ibisesinye sezona zixhobo zisetyenziswa nguSathana. Ubuxoki bonzakalisa lowo ubuthethayo nalowo ubukholelwayo. (Yoh. 8:44) Ngoko kufuneka sizame kangangoko sinako ukuba singaxoki. (Efe. 4:25) Kodwa isenokuba nzima loo nto. UAbigail oneminyaka eyi-18 uthi: “Ukuthetha inyani kunokubonakala kungancedi ngamanye amaxesha, ingakumbi xa ufuna ukuphuma engxakini.” Kutheni ke esoloko ezama ukuthetha inyani? Uthi: “Xa ndithethe inyani isazela sam siyakhululeka. Abazali bam neetshomi zam ziyazi ukuba zingandithemba.” UVictoria ona-23 uthi: “Xa uthetha inyani ibe uyimela into oyikholelwayo usenokuntlontwa. Kodwa imiphumo isoloko imihle: Uzithemba ngakumbi, uya usondelelana noYehova, ibe abantu abakuthandayo bayakuhlonela.” Kubalulekile nyhani ukuba ‘sibhinqe inyaniso ezinqeni zethu’ ngalo lonke ixesha.

“ISIGCINA-SIFUBA SOBULUNGISA”

6, 7. Kutheni ubulungisa bufaniswa nesigcina-sifuba?

⁶ Isigcina-sifuba sejoni laseRoma sasisenziwa ngeziqwenga zentsimbi ezigotyiweyo ukuze zihambe nomzimba ongasentla walo. Ezi ziqwenga zazibotshelelwa kwiintambo zesikhumba ngeehaki namakhonkco. Esi sinxibo sasisenza kube nzima nokushukuma kwijoni, ibe kwakufuneka limane lijonga ukuba iziqwenga zihleli kakuhle. Kodwa sasilinceda ukuba lingahlatywa likrele okanye lutolo entliziyweni okanye kwamanye amalungu abalulekileyo.

⁷ Esi sigcina-sifuba siyifanekisela kakuhle indlela imithetho kaYehova yobulungisa ezikhusela ngayo iintliziyo zethu zomfuziselo! (IMize. 4:23) Njengokuba ijoni lingenakulahla isigcina-sifuba sentsimbi lize linxibe esenziwe ngenkcenkce, nathi asifuni kulahla imithetho kaYehova size sizibekele eyethu engacacanga. Kaloku thina siyoyiswa kukwenza izigqibo ezinokusikhusela. (IMize. 3:5, 6) Ngoko, sihlala sihlola ‘iziqwenga zentsimbi’ esizinikwe nguYehova ukuze sibone ukuba zisahleli kakuhle na phezu kweentliziyo zethu.

8. Kutheni kunceda ukuphila ngemithetho kaYehova?

⁸ Ngaba ngamanye amaxesha uye uve imithetho kaYehova yobulungisa ikucinezela okanye ikwenza ungabi nankululeko? UDaniel ona-21 uthi: “Ootitshala nabantwana endandifunda nabo babehlekisa ngam kuba ndiphila ngemithetho eseBhayibhileni. Kwabakho ixesha apho ndayeka ukuzithemba ndaza ndaba buhlungu kakhulu.” Wancedwa yintoni? Uthi: “Ekugqibeleni ndayibona indlela ekunceda ngayo ukuphila ngemithetho kaYehova. Abanye babantwana endandifunda nabo baqalisa ukusebenzisa iziyobisi; abanye bayeka phakathi esikolweni. Kwakubuhlungu ukubona into abaphela beyiyo. UYehova usikhusela nyhani.” UMadison ona-15 uthi: “Kunzima ukusoloko ndilandela imithetho kaYehova ndingenzi izinto abanye abantwana abathi zimnandi ibe ziyonwabisa.” Uncedwa yintoni? Uthi: “Ndiye ndizikhumbuze ukuba ndithwele igama likaYehova, ibe izilingo yindlela uSathana andihlasela ngayo. Xa ndiye ndaphumelela kuye kube mnandi kum.”

“NEENYAWO ZENU NIZIXHOBISELE IINDABA EZILUNGILEYO ZOXOLO”

9-11. (a) Zeziphi izihlangu zomfuziselo ezinxitywa ngamaKristu? (b) Yintoni eya kusinceda sikulungele ukushumayela iindaba ezilungileyo?

⁹ Funda kwabase-Efese 6:15. Ijoni elingumRoma elinganxibanga izihlangu lalingakulungelanga ukuya emfazweni. Ezi zihlangu zazenziwe ngezikhumba ezalekwe kathathu ukuze zihlale kakuhle elunyaweni. Le ndlela zenziwe ngayo yayibangela ukuba zihlale ixesha elide kwaye zihambise kamnandi.

¹⁰ Izihlangu ezazinxitywa lijoni elingumRoma zazilinceda likwazi ukuya emfazweni, kanti izihlangu zomfuziselo ezinxitywa ngamaKristu ziwanceda akwazi ukuhambisa iindaba zoxolo. (Isa. 52:7; Roma 10:15) Nakuba kunjalo, kufuneka umntu abe nesibindi ukuze ashumayele xa ithuba livela. UBo ona-20 uthi: “Ndandisoyika ukushumayela kubantwana endandifunda nabo. Ndandineentloni. Xa sendicinga ngoku, andazi ndanditheni. Ngoku ndiyathanda ukushumayela koontanga bam.”

¹¹ Ulutsha oluninzi lufumanise ukuba, kuba lula ukushumayela iindaba ezilungileyo xa lulungiselele kakuhle. Ungenza ntoni wena? UJulia ona-16 uthi: “Ndisoloko ndineencwadi ebhakeni wam, ibe ndiyathanda ukubamamela abantwana endifunda nabo ukuze ndive ukuba bacinga ntoni nokuba bakholelwa ntoni. Nditsho ndazi ukuba bangancedwa yintoni. Xa ndilungiselele, ndiye ndikwazi ukuthetha nabo ngezinto eziza kubanceda.” UMakenzie ona-23 uthi: “Xa unobubele ibe ubamamela kakuhle abantu, uza kuzazi izinto ezikhathaza oontanga bakho. Ndiyaqiniseka ukuba ndizifunda zonke izinto ezibhalelwe ulutsha. Ngoko ndiyakwazi ukuchazela olunye ulutsha ngezinto ezingalunceda eziseBhayibhileni okanye ku-jw.org.” Izinto ezithethwa lolu lutsha ziyasibonisa ukuba xa ulungiselela kakuhle ukushumayela, ‘izihlangu’ zakho aziyi kuphuma ezinyaweni zakho.

“IKHAKA ELIKHULU LOKHOLO”

12, 13. Yeyiphi eminye ‘yemijukujelwa evuthayo’ uSathana ahlasela ngayo?

¹² Funda kwabase-Efese 6:16. “Ikhaka elikhulu” elaliphathwa lijoni elingumRoma laliligquma ukusuka emagxeni ukuya emadolweni. Lalilikhusela kwizixhobo nakwiintolo.

¹³ Eminye ‘yemijukujelwa evuthayo’ uSathana angakuhlasela ngayo kukuxoka ngoYehova, athi uThixo akakukhathalelanga kwaye awuthandeki tu kuye. UIda ona-19 okhe azive engento yanto, uthi: “Ngamanye amaxesha ndiye ndingamva tu esondele kum uYehova, ibe iba ngathi akafuni ukuba ngumhlobo wam.” Uncedwa yintoni? Uthi: “Iintlanganiso ziluqinisa kakhulu ukholo lwam. Ngaphambili ndandihlala nje ndingaphenduli ezintlanganisweni kuba ndicinga ukuba akukho mntu uhoyileyo ukuba ndifuna ukuthini. Kodwa ngoku ndiyazilungiselela ibe ndizama ukuphendula kabini okanye kathathu. Kunzima kona, kodwa kuba mnandi kum xa ndiphendule. Abazalwana noodade bandikhuthaza nyhani. Ndiphuma qho ezintlanganisweni ndisazi ukuba uYehova uyandithanda.”

14. Amava kaIda asifundisa ntoni?

¹⁴ Amava kaIda asifundisa le nto ibalulekileyo: Ubukhulu bekhaka lejoni babungatshintshi, kodwa lona ikhaka lethu lokholo linokuncipha okanye likhule. Sithi abamele bazikhethele. (Mat. 14:31; 2 Tes. 1:3) Kubaluleke nyhani ukuqinisa ukholo lwethu!

“ISIGCINA-NTLOKO SOSINDISO”

15, 16. Ithemba lifana njani nesigcina-ntloko?

¹⁵ Funda kwabase-Efese 6:17. Izigcina-ntloko zamajoni aseRoma ahamba ngeenyawo zazenziwe ngohlobo lokuba zikhusele intloko, intamo nobuso. Ezinye zaziba nomqheba ukuze amajoni akwazi ukuziphatha.

¹⁶ Kanye njengokuba isigcina-ntloko sikhusela ubuchopho bejoni, ‘ithemba lethu losindiso’ likhusela iingqondo zethu okanye amandla ethu okucinga. (1 Tes. 5:8; IMize. 3:21) Ithemba lisenza sihlale sicinga ngezinto uThixo asithembise zona kwaye lisinceda sizibone ngendlela efanelekileyo iingxaki. (INdu. 27:1, 14; IZe. 24:15) Kodwa ukuba sifuna ‘izigcina-ntloko’ zethu zisincede, kufuneka sizithwale entloko, singaziphathi ngezandla.

17, 18. (a) USathana angasiqhatha njani ukuba sothule izigcina-ntloko zethu? (b) Singabonisa njani ukuba asiqhathwanga ngamaqhinga kaSathana?

¹⁷ USathana angasiqhatha njani ukuba sothule izigcina-ntloko zethu? Masenze umzekelo ngento awayenza kuYesu. Wayesazi ukuba uYesu unethemba lokuba ekugqibeleni uza kulawula abantu. Kodwa uYesu kwakuza kufuneka alinde ixesha elibekwe nguYehova. Ibe ngaphambi kokuba lifike elo xesha, wayeza kuphathwa kakubi aze abulawe. USathana wathembisa uYesu ukuba wayeza kumnika kwangoko loo nto wayenethemba layo. Wathi ukuba nje wayenokumnqula kube kanye, wayeza kumnika yonke into, ngoko nangoko. (Luka 4:5-7) Ngokufanayo, uSathana uyazi ukuba nathi uYehova usithembise ukuba uza kusinika yonke into kwihlabathi elitsha. Kodwa kufuneka silinde, ibe sisenokufikelwa bubunzima ngeli xesha silindile. Ngoko uSathana usirhalisela ngamathuba okufumana ezo zinto ngoku. Ufuna sibeke ukuba nezinto kwindawo yokuqala, sifumane yonke into, kwaye siyifumane ngoku. USathana ufuna sibeke uBukumkani kwindawo yesibini.—Mat. 6:31-33.

¹⁸ Njengolunye ulutsha olungamaKristu, uKiana oneminyaka eyi-20 akakhange aqhathwe ngala maqhinga. Uthi: “Ndiyazi ukuba ayikho enye indlela yokulungisa iingxaki zethu ngaphandle koBukumkani BukaThixo.” Eli themba analo linaliphi ifuthe kwindlela acinga ngayo nakwizinto azenzayo? Wongeza athi: “Ithemba leParadesi lindinceda ndibeke izinto endiceba ukuzenzela zona kwindawo yazo. Andizami kwenza imali ngeziphiwo endinazo okanye ukunyuka emsebenzini. Kunoko, ixesha namandla am ndiwasebenzisa ekukhonzeni uYehova.”

‘IKRELE LOMOYA,’ ILIZWI LIKATHIXO

19, 20. Singabuphucula njani ubuchule bethu bokusebenzisa iLizwi LikaThixo?

¹⁹ Ikrele elalisetyenziswa ngamajoni aseRoma ngexesha umpostile uPawulos awayebhala ngalo incwadi yakhe lalimalunga neesentimitha eziyi-50 kwaye lenzelwe ukulwa. Enye into eyayisenza amajoni aseRoma aphumelele emfazweni kukuba ayeqhelisela ukusebenzisa izixhobo zawo yonke imihla.

²⁰ UPawulos uthi iLizwi LikaThixo lifana nekrele esilinikwe nguYehova. Kodwa kufuneka silisebenzise ngobuchule xa sithethelela iinkolelo zethu—okanye xa silungisa indlela esicinga ngayo. (2 Kor. 10:4, 5; 2 Tim. 2:15) Ungabuphucula njani ubuchule bakho? USebastian oneminyaka eyi-21, uthi: “Emva kokuba ndifunde isahluko seBhayibhile ndiye ndibhale ivesi ibe nye. Ndizenzela uludwe lweevesi endizithandayo. Loo nto indenza ndizive ndisondele kuYehova.” UDaniel, ocatshulwe ngaphambili, uthi: “Xa ndifunda iBhayibhile, ndiye ndikhethe iivesi endicinga ukuba ziya kunceda abantu entsimini. Ndifumanise ukuba abantu baba nomdla xa bebona ukuba uyithanda nyhani iBhayibhile kwaye uzama ngandlela zonke ukubanceda.”

21. Kutheni singenasizathu sakumoyika uSathana needemon zakhe?

²¹ Njengoko ulutsha olucatshulwe kweli nqaku lubonisa, akukho sizathu sokuba simoyike uSathana needemon zakhe. Banamandla bona, kodwa singaboyisa. Baza kufa ekugqibeleni. Kungekudala, ebudeni boLawulo Lweminyaka Eliwaka lukaKristu, baza kubanjwa baze bangakwazi kwenza nto, baze emva koko batshatyalaliswe. (ISityhi. 20:1-3, 7-10) Siyalwazi utshaba lwethu, amaqhinga alo, neenjongo zalo. UYehova uza kusinceda silwe nalo!