Ukwalathisela Izifundo ZeBhayibhile Kwintlangano KaYehova
1 Izifundo zeBhayibhile kufuneka ziqhelane nentlangano ‘yomhlambi omnye’ uYesu awathetha ngawo kuYohane 10:16. Zimele ziqonde ukuba ukuzinxulumanisa nentlangano kaYehova kuyimfuneko ukuze zisinde. (ISityhi. 7:9, 10, 15) Ngoko ke, sifanele siqalise ukwalathisela izifundo zethu zeBhayibhile entlanganweni kwakamsinya nje sakuba isifundo seBhayibhile siqalisiwe.
2 Zincede izifundo zakho zeBhayibhile ukuba ziqhelane neenkalo ezininzi zentlangano kaYehova yasemhlabeni. Belandela umzekelo wenkulungwane yokuqala, bonke abantu bakaYehova bayinxalenye yamabandla abunjwa ngabadala, izicaka zolungiselelo nabavakalisi. Namhlanje, amalungu amabandla anandipha iintlanganiso ezintlanu ngeveki. Ngamathuba athile kubakho iindibano ezicwangciswayo ebudeni bonyaka, yaye zinikela imfundiso ekhethekileyo namathuba okunxulumana namaNgqina angoowethu aphuma kwiindawo ngeendawo. Kwakhona, kukho oovulindlela, abavangeli basemazweni nabaveleli abahambahambayo, kunye neQumrhu Elilawulayo elalathisa umsebenzi ehlabathini lonke. Ungaziqhelanisa njani izifundo zakho zeBhayibhile neenkalo ezahlukahlukeneyo zentlangano kaYehova? Unokuzinceda njani zibone ukuba indlela elungelelaniswe ngayo intlangano isekelwe eBhayibhileni?
SEBENZISA INCWADANA ENEMIFANEKISO ETHI UKUTHANDA KUKATHIXO
3 Incwadana enemifanekiso ethi Ukuthanda KukaThixo inenkcazelo epheleleyo mayela nentlangano kaYehova. Ngayo unokuziqhelanisa ngokuthe ngcembe izifundo zeBhayibhile nentlangano uze uzincede ziqonde indlela esebenza ngayo. Indlela efanelekileyo yokuqalisa oku kukuxubusha oko kwenzekayo kwiHolo yoBukumkani. Oku kuya kumkhuthaza lowo ufunda naye ukuba aye kwiintlanganiso zebandla. Ngaphambi kokummemela kwintetho yesidlangalala okwesihlandlo sokuqala, hlolisisa inkcazelo ekwiphepha 14 nele-15. Mbonise imifanekiso. Mchazele indawo ekuyo nendlela ekhangeleka ngayo iHolo yoBukumkani eniyisebenzisayo. Usenokude umbonise nefoto yeHolo yenu yoBukumkani.
4 Xa kusenziwa isaziso sotyelelo lomveleli wesiphaluka ebandleni, qwalasela kunye nesifundo sakho seBhayibhile iphepha 20 nelama-21. Sebenzisa imibuzo esekupheleni kwephepha 21 ukuze uphuhlise iingongoma eziziintloko. Hlolisisa kunye naso imvelaphi engokweZibhalo yelungiselelo lethu lanamhla ngokusebenzisa isiqendu sokuqala kwiphepha 20. Le nkcazelo iya kwenza utyelelo lwesifundo sakho kwiHolo yoBukumkani lube nentsingiselo.
5 Ngokufanayo, ngaphambi kwendibano yenu yesithili, eyesiphaluka, okanye indibano ekhethekileyo yosuku, gubungela oko kupapashwe kwiphepha 19. Tsalela ingqalelo yaso kokubandakanyekileyo kwindibano enkulu, uze uchaze iinkalo zendibano yezizwe ngezizwe eziboniswe kwimifanekiso ekwiphepha 18. Xa ugqabaza ngomfanekiso obonisa ukukhutshwa kwempapasho entsha, usenokusenza silungele ingxubusho elandelayo ekwiphepha 24 nelama-25. Xa ucacisa ngobuvulindlela, gubungela iingongoma ezikwiphepha 22 nelama-23.
HLENGAHLENGISA UMBANDELA NGOKWEMFUNEKO
6 Njengoko unokubona, akuyomfuneko ukuba uyiqale ekuqaleni incwadana enemifanekiso ethi Ukuthanda KukaThixo. Kunoko, njengoko kuvela ithuba nemfuneko yoko, qwalasela iingongoma ezingqalileyo kule ncwadana enemifanekiso eziya kumnceda lowo ufunda naye ayiqonde intlangano kaYehova uze umkhuthazele ukunxulumana nebandla lasekuhlaleni.
7 Ukuthetha ngolweyiseko xa uxubusha le mibandela kuya kumchukumisa kanobom lowo ufunda naye. Vutha emoyeni. (IZe. 18:25) Kwakhona, qinisekisa ukuba wena, “umfundisayo omnye,” umisela umzekelo omhle ngokubonisa uxabiso ngentlangano kaYehova. (Roma 2:21) Ngokwenjenjalo, usenokunceda abanye ukuba bathelele umhlambi omnye uYesu awukhokelela kubomi obungunaphakade.