Ukwalathisela Izifundo Kwintlangano Emelwa Ligama Lethu
1 “Sisigidimi esishunyayelwa ngeelwimi ezingaphezu kwama-200. Sisigidimi esiviwa kumazwe angaphezu kwama-210. Sisigidimi esishunyayelwa naphi na apho kukho abantu. Siyinxalenye yephulo elikhulu lokushumayela elingazange libonwe ehlabathini, isigidimi esimanyanisa izigidi ngezigidi zabantu mbombo zone zomhlaba. AmaNgqina kaYehova aye alungelelaniswa kangangeminyaka engaphezu kwekhulu ukuze aphumeze lo msebenzi!”
2 Itshayelela ngaloo mazwi ividiyo ethi Jehovah’s Witnesses—The Organization Behind the Name. Ihlabela mgama iphendula le mibuzo: Angoobani kanye kanye amaNgqina kaYehova? Umsebenzi wawo ulungelelaniswa njani? Walathiswa njani? Uxhaswa njani ngemali? Ibashiya ababukeli bengenamathandabuzo ngento yokuba “amaNgqina kaYehova ehlabathini jikelele aye aqeqeshwa njengentlangano ukuba ancede abamelwane bawo babe nokholo eBhayibhileni,” yaye ibakhuthaza ukuba bazibonele le ntlangano imelwa ligama lethu. Emva kokubukela le vidiyo, ibhinqa elalifundelwa alizange likwazi ukuzibamba iinyembezi zovuyo nezoxabiso laza lathi: “Ngubani ongenakuyibona ukuba le yintlangano kaThixo oyinyaniso, uYehova?”—Thelekisa eyoku-1 kwabaseKorinte 14:24, 25.
3 Elinye ibhinqa lalifundisisa iBhayibhile limana liyeka libuye liqalise kangangexesha elide, kodwa yayingangeni kulo into yokuba uBathathu Emnye yimfundiso yobuxoki. Landula ke lona nendoda yalo laboniswa ividiyo yethu. Yabachukumisa kakhulu baza bayibukela izihlandlo ezibini ngobusuku obunye. Kwisifundo sabo esilandelayo, umfazi wathi unqwenela ukuba liNgqina. Wathi ebekade ekokose inkolelo yakhe engoBathathu Emnye waza akabi saziduba ngentlangano yethu nabantu abakuyo. Awakubona kule vidiyo kwamtsho waqonda ukuba uyifumene intlangano kaThixo yokwenyaniso. Wayefuna ukuqalisa ukushumayela kwindlu ngendlu kwangaloo mzuzu. Emva kokucaciselwa ngamanyathelo afunekayo ngaphambi kokuba ubani abe ngumvakalisi ongabhaptizwanga, wathi: “Ingathi ngesingaphozisi maseko.” Wayiyeka icawa yakhe, waqalisa ukuya entsimini, ibe waba nobuchule ekuphikiseni into kaBathathu Emnye.
4 Licacile elokuba izifundo zeBhayibhile zenza inkqubela entle ngokomoya zize ziqole ngokukhawuleza kakhulu xa ziyiqonda intlangano kaYehova zize zinxulumane nayo. Into ephawulekayo kukuba, emva kokubhaptizwa kwabantu abangaphezu kwama-3000 ngePentekoste, “baqhubeka bezinikela emfundisweni yabapostile nasekunxulumaneni kunye.” (IZe. 2:42, umbhalo osemazantsi weNW) Kubalulekile ukunceda izifundo zenze okufanayo nanamhlanje. Singazinceda njani?
5 Yithwale Imbopheleleko Yakho: Wonke umntu owenza umfundi umele aqonde ukuba kuyimbopheleleko yakhe ukwalathisela izifundo zeBhayibhile kwintlangano kaThixo. (1 Tim. 4:16) Isihlandlo ngasinye sesifundo sifanele sigqalwe njengomchankcatho okhokelela kusuku oluvuyisayo xa siya kube sibona loo mntu usemtsha efuzisela uzahlulelo lwakhe kuYehova ngokubhaptizwa emanzini. Omnye wemibuzo aya kuyibuzwa kwintetho yobhaptizo ngulo: “Uyaqonda na ukuba uzahlulelo nobhaptizo lwakho lukufanisa njengomnye wamaNgqina kaYehova anxulumene nentlangano kaThixo eyalathiswa ngumoya?” Ngenxa yoko, kufuneka aqonde ukuba akanakumkhonza uThixo enganxulumani ngokukhutheleyo nebandla lamaKristu okwenyaniso.—Mat. 24:45-47; Yoh. 6:68; 2 Kor. 5:20.
6 Qhubeka ufundisa isifundo ngebandla lasekuhlaleni nangentlangano esehlabathini lonke emelwa ngamaNgqina kaYehova. Yenjenjalo kwisihlandlo ngasinye sesifundo seBhayibhile, uqale ngeyokuqala. Kwasekuqaleni, memela isifundo kwiintlanganiso, uze uqhubeke usimema.—ISityhi. 22:17.
7 Sebenzisa Izixhobo Esinazo: Iimpapasho zethu ezifaneleke kakhulu ekuqhubeni izifundo zeBhayibhile zamakhaya yincwadana enemifanekiso ethi Yintoni UThixo Ayifunayo Kuthi? nencwadi ethi Ulwazi Olukhokelela Kubomi Obungunaphakade. Zombini zibalaselisa imfuneko yokunxulumana nebandla. Ekupheleni kwesifundo 5 sencwadana enemifanekiso ethi Okufunwa NguThixo kuthiwa: “Kufuneka uqhubeke ufunda ngoYehova uze uthobele oko akufunayo. Ukuya kwiintlanganiso eziqhutyelwa kwiHolo yoBukumkani yasekuhlaleni yamaNgqina kaYehova kuya kukunceda ukuze wenjenjalo.” Incwadi ethi Ulwazi isikhuthaza ngokuphindaphindiweyo isifundo ukuba siye kwiintlanganiso. Isahluko 5, isiqendu 22, sihlab’ eli khwelo: “AmaNgqina kaYehova . . . akubongoza ngokufudumeleyo ukuba ube nesabelo kunye nawo ekunquleni uThixo ‘ngomoya nangenyaniso.’ (Yohane 4:24)” Isahluko 12, isiqendu 16, sithi: “Njengoko uqhubeka ufundisisa uze ukwenze isiko lakho ukubakho ezintlanganisweni zamaNgqina kaYehova, ukholo lwakho luya komelezwa ngakumbi.” Isahluko 16, isiqendu 20, sithi: “Kwenze umkhwa ukubakho kwiintlanganiso zamaNgqina kaYehova.” Sihlabela mgama sisithi: “Oko kuya kukunceda uqonde uze usebenzise ulwazi ngoThixo ebomini bakho yaye kuya kukuzisela ulonwabo. Ukuba yinxalenye yobuzalwana bamaKristu bomhlaba wonke kuya kukunceda uhlale usondele kuYehova.” Isahluko 17 sixubusha ngokucokisekileyo ngendlela ubani alufumana ngayo unqabiseko lokwenyaniso phakathi kwabantu bakaThixo. Njengoko sifundisisa nabanye, kuyimbopheleleko yethu ukugxininisa kule mibandela.
8 Incwadana enemifanekiso ethi AmaNgqina KaYehova—Enza Ukuthanda KukaThixo Ngokumanyeneyo Zwenibanzi isisixhobo esihle esenzelwe ukuqhelanisa abantu nentlangano ebonakalayo esetyenziswa nguYehova ekwenzeni ukuthanda kwakhe. Inkcazelo yayo eneenkcukacha ngobulungiseleli, ngeentlanganiso nangentlangano yethu iya kumkhuthaza umfundi asithelele ekunquleni uThixo. Sakuba siqalisiwe isifundo seBhayibhile, kucetyiswa ukuba sinike isifundo umbhalo wale ncwadana inemifanekiso sizifundele. Akukho mfuneko yakuyifunda kunye naso njengoko besisenjenjalo kwixa elidluleyo.
9 Iividiyo eziveliswe nguMbutho zizixhobo ezisemagqabini zokwalathisela izifundo kwintlangano emelwa ligama lethu. Bekuya kuba kuhle ukuba bezinokubukela ezi: (1) The New World Society in Action, impinda yomfanekiso oshukumayo wowe-1954 obonisa umoya wenzolo, wenkuthalo, nowothando esebenza ngawo intlangano kaYehova; (2) United by Divine Teaching, ibalaselisa umanyano loxolo oluye lwabonakaliswa kwiindibano zethu zezizwe ngezizwe eMpuma Yurophu, eMzantsi Merika, eAfrika naseAsia; (3) To the Ends of the Earth, ibalaselisa ukugqiba kweSikolo seBhayibhile seWatchtower saseGiliyadi ama-50 eminyaka ize ibonise ifuthe labavangeli basemazweni kumsebenzi wokushumayela owenziwa ehlabathini lonke; (4) Jehovah’s Witnesses Stand Firm Against Nazi Assault, ibalisa ibali elihlab’ umxhelo lenkalipho nokoyisa kwamaNgqina phezu kwako nje ukutshutshiswa ngenkohlakalo nguHitler; kunye nale ethi, (5) Jehovah’s Witnesses—The Organization Behind the Name.
10 Sibekele Usukelo Ngokuphathelele Ukuya Kwiintlanganiso Ngokuqhubekayo: Izifundo zimele zicaciselwe ukuba kufuneka zibe nokufundiswa emakhaya ngelungiselelo lesifundo seBhayibhile sekhaya nangeengxubusho zeklasi ngelungiselelo leentlanganiso zebandla. (Yoh. 6:45) Umntu osemtsha kufuneka enze inkqubela ngokulinganayo kwindlela aziqonda ngayo iZibhalo nentlangano. Ukuze enjenjalo, ayikho into enokuthabathela indawo ukuya kwiintlanganiso. (Heb. 10:23-25) Qalisa zisuka nje ukumemela loo mntu kwiintlanganiso zebandla. Bambi abantu abasandul’ ukuba nomdla baqalisa ukuya kwiintlanganiso kwanangaphambi kokuba baqhutyelwe isifundo seBhayibhile sekhaya esithe rhoqo. Kakade ke, nathi kufuneka simisele umzekelo omhle ngokuya rhoqo kwiintlanganiso.—Luka 6:40; Fil. 3:17.
11 Sichazele kakuhle ngeentlanganiso nendlela eziqhutywa ngayo ukuze isifundo sikhululeke xa sisiya okokuqala ezintlanganisweni. Ekubeni abanye abantu bengakhululeki xa besiya kwindawo ethile okwesihlandlo sokuqala, kusenokuba kuhle ukuhamba nesifundo xa siqala ngqa ukuya kwiintlanganiso kwiHolo yoBukumkani. Siya kukhululeka ngakumbi ukuba uba kunye naso xa sidibana namalungu ebandla. Ngaphezu kwako konke, lugcine kakuhle undwendwe lwakho, ulenze luzive lusekhaya yaye lukhululekile.—Mat. 7:12; Fil. 2:1-4.
12 Sikhuthaze isifundo siye kwindibano ekhethekileyo yosuku olunye, kwindibano yesiphaluka, okanye kwindibano yesithili kuxhomekeka kuleyo iza kuqala ibekho. Mhlawumbi unokusifaka kumalungiselelo akho ento ekhwelwayo.
13 Bethelela Uxabiso Olusuka Entliziyweni Kuso: Incwadi ethi Ukulungelelaniselwa Ukufeza Ubulungiseleli Bethu, iphepha 92, ithi: “Ukuba uxabiso lwakho olunzulu ngentlangano kaYehova lubonakala kwiincoko zakho nabantu abanomdla, kuya kuba lula ngakumbi ngabo ukukhula ekuqondeni yaye lunokubashukumisela ukwenza inkqubela engakumbi ekwazini uYehova.” Ngamaxesha onke thetha kakuhle, yaye ungaze uthethe kakubi, ngebandla lakho lasekuhlaleni. (INdu. 84:10; 133:1, 3b) Xa uthandaza kwisifundo seBhayibhile, khankanya ibandla nemfuneko yokuba eso sifundo sinxulumane nalo ngokuthe rhoqo.—Efe. 1:15-17.
14 Ngokuqinisekileyo sifuna abantu abasebatsha babe noxabiso olusuka entliziyweni ngobudlelane obuvuyisayo nonqabiseko lokomoya olufumaneka phakathi kwabantu bakaThixo. (1 Tim. 3:15; 1 Pet. 2:17; 5:9) NjengamaNgqina kaYehova, masenze konke okusemandleni ethu xa sisonke ukuze salathisele abafundi beLizwi likaThixo kwintlangano emelwa ligama lethu.
[Blurb on page 3]
Izifundo zenza inkqubela ngokukhawuleza xa zizibonela intlangano ngawazo amehlo
[Blurb on page 4]
Musa ukulibazisa ukumema izifundo ukuba ziye kwiintlanganiso