Ukufeza Ubulungiseleli Bethu BoBukumkani Ebandleni
1 NgoYesu Kristu, oyiNtloko yebandla lamaKristu, uYehova uye wanikela imbopheleleko ‘kwigosa elithembekileyo,’ okanye umphathi wendlu. (Luka 12:42, 43) Eli lungiselelo lenze sakwazi ukufumana ulwalathiso olushicilelweyo lokuba ‘sifanele kukuthini na ukuhamba endlwini kaThixo.’ (1 Tim. 3:15) Isixhobo sethu esiyintloko sokufumana oko kuye kwashicilelwa yiWatch Tower Publications Index. (Ukuba ukufumanisa kunzima ukusebenzisa iWatch Tower Publications Index yesiNgesi, uya kufumana iimbekiselo eziluncedo ngokufanayo kwimbekiselo yombandela yaminyaka le ngasemva kwiMboniselo kaDisemba 15 noVukani! kaDisemba 8.) Inokukunceda njani?
2 Ngaba ungumdala? Kukho imixholo emibini emikhulu exubusha ngeembopheleleko zakho: Othi “Elders” nothi “Overseers.” Umbandela ophantsi kothi “Elders” unenkoliso yeembekiselo ezikhokelela kwinkcazelo yokunceda abantu abahlukahlukeneyo ebandleni, indlela yokunikela isiluleko, ulwalamano phakathi kwequmrhu labadala, iimbopheleleko zabadala, njalo njalo. Iimbekiselo eziphathelele iimfaneleko zabo ziphantsi kothi “Overseers,” ekubeni loo mxholo ulibinzana iBhayibhile elisebenzisayo xa ixubusha ngabo. Kwakhona phantsi kwalo mxholo othi “Overseers” kukho izabelo zabo bakweso sigxina, njengakumxholwana othi “presiding overseer,” “service overseer” nothi “secretary.” Kwakhona umxholo oyintloko othi “Congregations” uya kunikela inkcazelo eluncedo.
3 Nani enizizicaka zolungiselelo nikwaphumeza indima ebalulekileyo ebandleni. Umxholo othi “Ministerial Servants” udwelisa inkcazelo ephathelele iimfaneleko neembopheleleko zenu. Kwakhona niya kufumana iimbekiselo ezalatha kumbandela ongokubaluleka kwamalungelo enkonzo anivulekeleyo nendlela yokuzabalazela imbopheleleko engakumbi.
4 Abadala nezicaka zolungiselelo banamalungelo ngokuphathelele iintlanganiso ebandleni. Umxholo othi “Meetings” unikela iimbekiselo kwinkalo nganye yalo mbandela, kuquka imizekelo echukumisayo phantsi kothi “efforts to attend.” Kambe ke, kukwakho nemixholo eyintloko yentlanganiso nganye.
5 INdumiso 68:11 ithi: “Mkhulu umkhosi weentokazi ezishumayela iindaba ezilungileyo.” Ngokufanayo namalungu angamadoda ebandla, oodade nabo bamele babe nehambo efanelekileyo endlwini kaThixo. Maxa wambi kuphakama imibuzo ngokuphathelele amaxesha udade afanele athwale ngawo entloko okanye oko kufanele kwenziwe xa kungekho mzalwana ufanelekayo wokuqhuba intlanganiso okanye wokumela ibandla ngomthandazo. Umxholo othi “Women” unokukwalathisela kwinkcazelo yaloo mibandela. Ikwaluncedo nemixholo ethi “Sisters,” “Head Covering,” nothi “Prayer.”
6 Inxalenye yokugqibela yeyoku-1 kuTimoti 3:15 ibhekisela kwibandla lamaKristu ‘njengentsika nesiseko senyaniso.’ Kulilungelo lethu ukuxhasa inyaniso njengoko siziphatha ngokufanelekileyo endlwini kaThixo, sifeza ubulungiseleli bethu boBukumkani ebandleni.