Ukukhuthaza Abanye Bafunde IMboniselo
1 Ebudeni buka-Aprili noMeyi, sifuna ukukhuthaza abathandi benyaniso ukuba bayifunde rhoqo IMboniselo. Ngokusuka kumava siye seyiseka kukuba kuwo onke amaphephancwadi apapashwayo namhlanje, yiyo kuphela enikela ukudla okubalulekileyo kokomoya okufunwayo ngabo bancwinayo nabagcumayo ngenxa yeemeko ezilusizi ezikhoyo emhlabeni.—Hez. 9:4.
2 IMboniselo iye yasinceda ukuba siqonde isiprofeto seBhayibhile esingqina ukuba siphila kwixesha lesiphelo nokuba kungekudala uBukumkani bukaThixo buza kuzisa uxolo emhlabeni. Inkxalabo yethu yokwenene ngobomi babanye isishukumisela ukuba sabelane nabo ngeli themba limangalisayo. Yaye siyakhuthazwa kukubona ukuba abaninzi abantliziyo zinyanisekileyo bayahlanganiswa ukuze basindiswe.—Yoh. 10:16.
3 “Ngaba Ixesha Lihambile Kunokuba Ucinga?” lowo ngumxholo okubangela ukub’ ucinge welinye lamanqaku enkupho yeMboniselo ka-Aprili 1, 1991. Inkupho ka-Aprili 15 ibalaselisa inqaku elinomxholo othi “Luya Kubakho Nini Ngokwenene Uxolo Oluhlala Luhleli?” La manqaku anokunxityelelaniswa kakuhle noMxholo Wencoko wangoku othi, “Uxolo Lwehlabathi, Ngaba Lukufuphi?” Ukuze ufumanise enoba umninimzi unomdla wokwenene kwiindaba ezilungileyo kusini na, mbandakanye kwingxubusho efudumeleyo yeBhayibhile neyobuhlobo. Oku kuthetha ukuba ufanele ulungiselele kwangaphambili yaye ukulungele ukubonisa indlela iphephancwadi langoku elinokumnceda ngayo umninimzi ukuba abe nolwazi oluphangaleleyo ngombandela eniwuxubushayo.
4 Sifuna ukukhuthaza abantu abaninzi kangangoko kunokwenzeka ukuba barhumele IMboniselo. Ngoxa ngokungathandabuzekiyo inkoliso yemirhumo yethu siya kuyifumana kwindlu ngendlu, asifuni kubalibala abo sishishina nabo, abamelwane nezalamane zethu. Xa umntu engawamkeli umrhumo, mkhuthaze ukuba athabathe amaphephancwadi amabini. Usenokukwazi ukuliquka igama lakhe kumzila wakho wamaphephancwadi uze umtyelele rhoqo. Ukumtyelela kwakho rhoqo kuya kukuvulel’ ithuba lokuvuselela umdla wakhe yaye uya kutsho uqonde nexesha elifanelekileyo lokunikela umrhumo. Khumbula ukuba uthumo lwethu lolokushumayela iindaba ezilungileyo nokwenza abafundi.—Mat. 24:14; 28:19, 20.
5 NgoAprili nangoMeyi kuya kuvuleka amathuba amaninzi okusasaza iindaba ezilungileyo zoBukumkani bukaYehova kwindlu ngendlu nangeencoko ezingacwangciswanga nabantu esidibana nabo. Sinokuba nentembelo yokuba uYehova uya kuqhubeka eyisikelela imigudu yethu yenkuthalo yokufuna abalulamileyo abakwintsimi yethu size sibanike isondlo sokomoya esiyimfuneko.