Ukunikela Iindaba Ezilungileyo—Ngokusebenzisa Ingqiqo
1 Umzekeliso ophefumlelweyo uthi: “Ogcina ingqondo uya kufumana okulungileyo.” (IMize. 19:8) Ubulumko bala mazwi buye basoloko bungqineka buyinyaniso kumsebenzi wethu wokushumayela. Ngokomzekelo, ngokusebenzisa ingqiqo nobuchule, abavakalisi abaninzi baye basebenzisa amazwi okuthintela incoko njengamathuba okunikela ubungqina obubhekele phaya. Okanye ubuncinane baye babeka isiseko sokunikela ubungqina kwixesha elizayo. Kunokwenziwa njani oku?
UKUSINGATHA AMAZWI OKUTHINTELA INCOKO
2 Ngokufuthi sidibana nabantu abathi, “Ndixakekile.” Ngaba umninimzi uxakekile ngokwenene, okanye ngaba ukutsho oku nje ngenxa yokuba engafuni kubandakanyeka kwingxoxo ende? Kufuneka sisebenzise ingqiqo. Ukuba akabonakali exakeke ngokwenene, sisenokuzama ukuwoyisa la mazwi okuthintela incoko. Sisenokuthi, “Ngoko ndiza kubetha koomofu.” Emva koko, sinokushwankathela oko besinenjongo yokukuxubusha, sikhumbula ukuba besimthembise ukungayenzi nde incoko yethu. Ngenxa yolwazelelelo lwethu namagqabaza avus’ umdla, loo mntu usenokude avakalise umnqweno wokuqhubela phambili nengxubusho kanye ngelo xesha.
3 Masithi lowo uthetha naye uxakekile ngokwenene. Nangona singafuni ukuvinjwa ithuba lokuthetha ngokulula, ukuba siyacengacenga okanye sinyanzelise, sisenokubenza babe nembono ephosakeleyo ngathi. Ukuba umninimzi usivulela umnyango ephethe imbiza yaye siva ivumba lokutya okuphakwayo, kunokwenzeka ukuba uxakekile ngokwenene. Ngoko sifanele sisebenzise ingqiqo. Bekungayi kuba kukubonisa ulwazelelelo ukutyhudisa ngencoko ngelo xesha. Hayi indlela ebekuya kuba kuhle ngayo ukunika umninimzi iphecana uze uthembise ukubuya kamva. Oku kuya kumenza abe nembono entle ngathi, yaye kusenokunikelwa ubungqina obuhle xa kutyelela iNgqina ngelinye ixesha.
UKUSABELA KWISIMO SENGQONDO SOMNTU
4 Ngamathub’ athile sidibana nabantu abasuka bathethe krwada xa sibatyelela kubulungiseleli bendlu ngendlu. Sifanele senze ntoni kwimeko enjalo? IMizekeliso 17:27 iyaluleka: “Omoya upholileyo yindoda enengqondo.” Elinjani lona ukuba lihle icebiso! Ilizwi elithambileyo elivakalisa inkxalabo ngokufuthi liyamthomalalisa umntu onjalo. Ngaphezu koko, ukuba sinokukwazi ukuthi ngobuchule simenze achaze oko kumxhalabisayo, usenokungasibhebhethi kangako. Kwanokuba uyayinqamlela incoko, ngokunokwenzeka ukusabela kwethu ngokuzolileyo kuya kumenza abe nesimo sengqondo esihle ngomsebenzi wamaNgqina kaYehova. Uya kube uphumeze okukhulu ngaloo ndlela. Kambe ke, ukuba umninimzi uba lugcwabevu ngumsindo, kuya kuba kokona kufanelekileyo ukumshiya ngokuzolileyo uze mhlawumbi uzame ukunikela ubungqina kuye ngelinye ixesha.
5 Kukwakho nabantu abathi, nangona bethanda ukuphikisa, kodwa babe benyanisekile. Kwiimeko ezinjalo, bekuya kuba luvavanyo lokwenene lomonde wethu ukuqhubeka sincokola nabo. Kodwa ukuba sisebenzisa ingqiqo, asisayi kusuka sigqibe ngelithi umninimzi akanamdla ngenxa nje yokuba exhasa ngamandla imbono eyahlukileyo. Sisenokufuna ukubuza imibuzo yobuchule ngelinge lokuzama ukufumanisa isizathu sokuba akholelwe ngendlela akholelwa ngayo sandule ke simbonise oko iBhayibhile ikutshoyo ngombandela lowo. (IMize. 20:5) Ngokusekelwe kwindlela asabela ngayo, sisenokugqiba enoba kuya kuba yingenelo kusini na ukuqhubeka nencoko.
6 Umvakalisi osebenzisa ingqiqo uyaqonda ukuba ixesha neemeko zidla ngokusiguqula isimo sengqondo sabaninimzi ngakwisigidimi soBukumkani. Usenokusabela ngokwahlukileyo xa sityelela kwakhona ngelinye ixesha. Simele sikulumkele ukugqiba ngelithi asizukwamkelwa ngenxa yendlela umninimzi asabele ngayo kutyelelo lwethu lokugqibela ekhayeni lakhe.
7 Ukugqiba enoba sifanele siqhubeke nencoko akulula. Kodwa, ngokuvelisa ubuchule bokufundisa, siya kuba nempumelelo ngakumbi ekunikeleni iindaba ezilungileyo ngokusebenzisa ingqiqo, ngoxa sikhangele kuYehova ukuba asikelele imigudu yethu.—1 Kor. 3:6; Tito 1:9.